Hwềng soan hala poac să? Dô la bơta tơmlơh ơm mơ dơng gơlik gơs tòm nùs kơp nă cau dòn Krist kơp ngai. Bulah neh dơp nđac dong klas, gơs dơ̆ bol he kư găm pơdac tòm bơta roh gơnkơnơm, bơh siơ̆u roh bơta tề lăm Yàng Hwêng Goh dê. Lơh mbe lơi nàng bol he git lam dô rai kí pha lin hòn chò, bêng liu plai Yàng Hwềng dê?

Ngai do, ngai 21/05/2026, Bơta Hoi Dan Kơp Ngai dăn jà ală ồng mò oh mi bơtê bal Jơnau Yàng bơh tơnggumê GÙNG DÀ NÀNG GƠS RAI KIS HÒN CHÒ.

“Bơta nđàc Añ jê neh tơl mê in, bơh gơnoar pràn Añ jê gơlik wil tơl tòm bơta lơbơn lơño.”  (II Kôrintô 12:9)

Gơs dô bơta dơng ngăn tòm gùng lot jat Yàng bol he dê: lơh mbe lơi nàng rgơi ơn jơh bơta jak chai mơ kung rgơi lơh sa mơ ò gơ duh tòm dă nùs pơnhừ sư dê?
Yàng Tòm Trồ ai kơp nă in gơnoăr khat gơ boh sac rwah cau mơ he duh broă. Mơ ya moat jrung ngăn, gơs oă cau Dòn Krist bulah neh dơp leng bơta dong klas mơya rai kis gen siơ̆u roh gơnap gơnoăr Yàng Hwềng Goh dê. Nùs pơnhừ să la bơta ơs gơri mơ poac să, rgơi ceng wơl bơta gơlik gơs pràn kơldăng mablac tòm dô ết jŏ, mơya ngăn hơ̆ ngăn la phăn bih khih sa căp mơ tơn roh drĕ drĕ rai kis lot bal mơ Yàng Hwềng Goh. Nàng đăl git loh bơta tơmdră jrô dô, bol he sền bal tĕ tòm ală bơta ham kờñ poàc să dê:

“Ală broă poac să dê la loh làng be do: Hơ̆ la rềs àr bơrnàn, ngkòr ngkàc, bung jang, duh rùp ràk, juh proh, sò tơm, jak tòmlah, ƀoah, gơjrañ mañ, tòm pơndang bal, cah is mpồl, jat gùng duh khoai tìs, ƀoah gơjrañ, bơñul lơmbè, jròk ñô sa, mơ ală bơta ndai ndròm bal behơ̆ sơl. Añ bơto tơngkah oh mi be añ neh bơto rau: Dilah cau lơi tìs tòm ală bơta behơ̆ gen ò geh pơrdòn lơgar Yàng Tom Trồ dê.” (Galati 5:19-21)

Gơ sơlơ̆ wơl, hwềng soan bol he dê ji gloh tơhir bơta lơi? “Mơya plai Yàng Hwềng dê hơ̆ la kòñ gơboh, hòn chò, lơngap lơngai, kong ơt, kơ̆ dơn, lơbơn niam, dòn song, niam lơnhơn, git kơrhia. Ò gơs bơta boh lam lơi bơkơŭ ală bơta hơ̆.” (Galati 5:22-23)

Lơh mbe lơi nang bol he kis jat Yàng Hwềng ala mơ lơh jat poàc să? Kis tòm Yàng Hwềng gơtha la săng gơnoăr lơh nên is să tòm dê, jà Yàng Dong Jêsus ăt bồ wil tơl bồ dơngoh, nùs kòñ mơ bơta dơp git he dê.

Poac să la să jan mơ ară nting mơ ală pơnah rgơi dơp git. Hwềng soan la klŏ bồ dơngoh, nùs kòñ mơ bơta dơp git. Hwềng nùs la tiah Yàng Hwềng Goh ơm ăt bồ tòm tŭ bol he dòn dơp Yàng.

Bơta tơmlơh kràñ cê rlau jơh gơs mat tòm să tòm pơnah hwềng soan. Hwềng soan bol he sum ntao diđap bar gah gùng: kol hwoai hơ đah ală bơta ham kòñ poằc să dê, hala wet nùs tôr hơ Yàng nang gơlik plai Yàng Hwềng bơkah lơngồt.
Jơnau Yàng tòm Jude sèng 20 chôl bơtrôt: “Mơya, ơ ală oh mi kòñ gơboh, oh mi bơt bơtào tĕ să tòm oh mi hơđang bơta dòn sàng goh ngan oh mi dê, kơnòm di Yàng Hwềng Goh mơ hòi dan.”

Nang bơta tơngguh bơta dòn, bol he păl bơtê gùng hôi dăn tòm Yàng Hwềng. Hôi dăn tòm Yàng Hwềng tơm dră mat tòm toh măt mơ bơta hôi jat poăc să, gơtha la jat nùs is kơp nă dê. Hơ̆ la hôi dăn hơđơm bơta at bồ mơ chôt bơtrôt Yàng Hwềng Goh dê, tom toh mơ nùs kòñ Yàng Tòm Trồ dê.

Ming tòm tŭ bồ dơngoh bol he ơm ring ngit, săng jơh ală bơta kơlôi rcăng kol kơt mơ bơta ham kòñ poàc să dê, Yàng Hwềng Goh rgơi sơntơm pơng đin ală broă lơh poàc să dê hơđăng chi pơng.

Tòm tŭ hoi dăn tòm Yàng Hwềng, oh mi rơp git lam bơta tề lăm kis: gơs dơ̆ la bơta chôl bơtrôt wet tus dô nă oh mi, gơs dơ̆ la dô sèng Sră Goh bơ tus tòm toh dê bơta păl càng đah hwềng oh mi dê. Kai mpông dơng mang la bơta dòn duh wil tơl, ơn jơh ală bơta oh mi găm gơs mơ rơp gơs Kơnràñ in. Tòm tŭ oh mi wil tơl gơri hơ Yàng, ală bơta dơng rơp gơlik gơs.

Dan jà bol he dô nùs bal tòm bơta hòi dan: Khoai Yàng, dăn dong kòn geh git lam mbe lơi la hôi dăn tòm Yàng Hwềng. Kơnơm gơnăp gơnoăr Kơnràñ, dăn lơh pă mơ pơng đin ală bơta jañ bơsăk găm kơt kòn. Kòn ò rgơi pha lin mơ nus tôr poac să, mơ ya ming kơnơm gơnăp gơnoăr Kơnràñ lơm. Khoai Yàng Dong Jêsus, dăn toh glài ală tŭ kòn lòt tis gùng mơ ò gơboh gơbai hôi lup Kơnràñ. Dăn dong kòn ngai do sơntơm dô nơm gùng lòt pa ò cah gùng tis nrah. Tŭ dô mơ, dăn Yàng ràng tơlik kòn in bơta ring lơngai hơđăng jong tus bơh Yàng Hwềng Kơnràñ. Kòn jơh nus hôi dăn tòm sơnđăn Yàng Jêsus Krist, Amen.

Ơ ală ồng mò oh mi kòñ gơboh, Tŭ dô mơ, kơp nă bol he lơi tĕ hwềng soan he in dô pah ring ngit ơn is nàng tus mơ mơ Yàng tòm bơta hôi dăn, duh khoai mơ yờ tơngguh sơnđăn Kơnràñ. Bañ lơi ală bơta nggôr nggàc poàc să dê pơnjềt jơnau đơs lơbơn niam bơh dê tiah hơđăng jong. Cih kah tĕ bơta do: dô rai kis hòn chò mơ pha lin ngăn ming rgơi hor lik bơh ryas hiong dà pa bơkah Yàng Hwềng Goh dê, ò tŭ lơi jôi bàn tòm tiah ală bơta hàm kòñ mhăr lòt găn dunnia dô dê. Joi jat tĕ yàng mơ git lam plai bơkah lơngồt Yàng Hwềng dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.