Gơs tŭ lơi oh mi gọ̆ lah nùs he òsùp tian gơs ò rgơi pun prap bơta hòn-chò he neh git lam? Gơs tŭ lơi gar mat oh mi àng gơcrà tom tŭ yal bơh gùng lòt niam ngan mơ he neh git lam? Kung be dô nă kòn dềt ò rgơi ơm bơdơh yal bơh bơta lòt kơnhơl chò-hòp, hwềng soan bol he kung gơs dô bơta yal yau niam ngan behơ̆: bơta yal yau bơh ngai sơnròp bol he geh tìp Yàng Dọ̆ng- Klàs Jesu mơ git làm bơta nđàc dọ̆ng-klàs.

Ngai do, ngai 22/05/2026, Bơta Hoi Dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Marrisa Nordlum bơh tơnggume TƠM TŬ NÙS Ò RGƠI ƠM MOMỌ̆

“Bơh bol hi ò rgơi ò đơs bơh ală bơta he neh gŏ mơ kơno” (Broă 4:20)

Tom jọ̆ tơngai, kòn klau añ sùm tơngkah bơh tiah wing-kơnhơl. Bơh ală bơta kơnhơl sơrbơng roh, ală phan sa bơkah tus di bơta chò-hòp, ràc-mal tom tiah hơ̆-añ ò rgơi lah pơrhơng kòn añ jê, tài bơh ală tiah hơ̆ sùm cèng wơl dô bơta krơi ìs ngan. Pơgap nđò kơnhai laì, hiu nhă añ neh lòt tus tom dô nơm tiah wing-kơnhơl dờng rlau jơh lơgar dê, mơ jơl tus di tŭ do, ngai lơi kòn añ kung yal wơl bơh bơta lòt hơ̆ mơ muh mat chò-hòp.

Sền bơta iàng-lơr khai yal bơh ală bơta khai neh sền gọ̆ mơ sơrlèt rlau, nisơna añ kơlôi tus ồs bơta ngàc-ngar mơ Hiu Jum Goh bồ dà sơnròp neh ai Yàng Dŏng-Klàs Jesu in. Sră Broă 4:20 cih lah: “Bơh bol hi ò rgơi ò đơs bơh ală bơta he neh gŏ mơ kơno.”

Tơnơ̆ mơ tŭ Yàng Jesu kong chơt, kis wơl mơ guh rê hơ trồ, Kơnràñ neh ai Yàng Hwềng Goh mù hơđang ală cau bơtê. Tŭ hơ̆, bol khai kung be ală sơmpòl ồs hơng dờng, ò rngòt bơta bòl glar kalkê nàng bơto yal, duh broă mơ sơmbơì ai sơnđăn Kơnràñ. Sră Goh ai gọ̆ công nha bềng bơta lơngai: kờp ngai, Yàng bơtơl tai khà cau geh dọ̆ng-klàs mut tom Hiu Jum Goh.

Ñchi bơh tai bol khai khin cha behơ̆ taih? Tài bơh bol khai git lah he gam sơmbat prap Jơnau Niam dong-klàs- dô nơm phan mang dờng ngan nang rgơi prap ìs să tòm he in. Bol khai git dunnia roh rui do gam jê-gloh tơhir Yàng Dọ̆ng-Klàs Jesu ò git nđò! Bol khai neh ho wơl Gơnoar Sồr ò di mơ sră pơàr, mơ bal mơ ală bơta git lam kis tus bơh rài kis he di.

Ngai do, jơnau hòi jà ai bol he in gam be òs behơ̆. Ală bơta krơi, bơta dòn-sọ̆ng mơ cơng tang bơh Bơtau Krist gam “ngai òr, ngai do, mơ jơl tus sùm sùm ò tŭ lơi tơmgơl.” (Hebrơ 13:8). Kờp nă bol he cau lơi kung gơs jơnau lơh cơng ìs he di, lah Yàng Dọ̆ng-Klàs Jesu neh joi jat, twài wơl, bơt bơtao wơl mơ tơm pơrgơl pa rài kis he mbe lơi. Dunnia pal cang kơno mơ git lam bơta nđàc dọ̆ng-klàs mơ bol he gam gơs! Kờp ngai, bol he gơs tŭ lơmpah ho wơl jơnau hòi jà Kơnràñ dê tom Mak 16:15: “Lòt tĕ làm jơh dunnia, bơto yal Jơnau Niam jơh ală làng bol in.”

Mơ ya bol he pal sơntòm bơh lơi taih? Oă dơ̆ broă lơh cơng lơh bol he in sền gọ̆ kơnjơ̆ hala rngòt-rngơt. Mơ ya pal kah tĕ lah, lơh cơng bơh Yàng ò pal cang lơh kalkê. Sơntòm tĕ mơ ală bơta yal yau bơh să tòm oh mi. Oh mi neh roh rui, mơ ya tŭ do neh joi bàn. Yal tĕ cau ndai in bơh ală bơta lơi oh mi neh sền gŏ mơ git lam.
Loì tĕ dô phuk nàng sền wơl gùng lòt he di: oh mi neh gơkram mbe lơi tom thòng bơta tồi glài, mơ kơnòm Bơtau Krist tŭ do oh mi geh ntào tom tiah lơngap-lơngai mbe lơi? Jòng ro Yàng Tom Trồ tài bơh Kơnràñ neh dong tă bol he klàs bơh bơta roh rui sùm sùm!

Kơlôi sơwì wơl tĕ muh mat bîng ai lơh krơi mơ chò-hòp ngan dô nă kơnòm dềt tom tŭ yal bơh tiah kơnhơl, nàng joi wơl bơta rngoh-rngàc bơh ngai sơnròp oh mi geh tìp Yàng. Ngan ò gơs bơta lơngai lơi tom rài kis do rgơi pơndròm mơ bơta chò-hòp dô nă cau glài neh dòp geh bơta toh glài!

Digơlan oh mi gam kah ală jơnau tom sră đơs chò John Newton di: “Jòng ro Yàng kòñ gơboh ai bơta nđàc crih-crài. Rài kis añ bîng srat bơtăng. Añ neh roh rui ò git nđò ngai, bòl glar tom tiah tồi glài. Mơ bơta nđàc Yàng nđàc sơngit dờng ơnang.”
Bañ ơm momọ̆ tom tŭ bol he neh dòp geh Jơnau Niam dŏng-klàs. Bơh tŭ sơntòm lơh cơng bơh Yàng mơ nùs git ưnngai ngan, oh mi rơp ò rgơi ơm bơdơh đơs bơh ală broă crih-crài Kơnràñ neh lơh- kung be ală cau dòn bîng liu Hwềng Goh tom sră Broă Cau bơto ngai òr.

Dan jà bol he dô nùs bal tòm bơta hòi dan: Khoai Yàng, dan chu tom kòn ồs ngàc-ngar bơh sơnđan Kơnràñ. Dan tơngkah kòn bơh bơta kòñ gơboh bơh sơnròp mơ Yàng Dọ̆ng-Klàs Jesu. Ưnngai Kơnràñ neh kong chơt bơh kòn, neh kis wơl mơ ai kòn in bơta dong-klàs. Dan dong kòn khĭn cha đơs mơ dunnia lah Kơnràñ gam kis, mơ Kơnràñ rcang sir ai bơta kis wơl cau lơi in hòi sơnđan Kơnràñ! Do la gùng dọ̆ng-klàs, do la Jơnau Niam lơngap-lơngai dunnia in! Kòn jơh nùs hoi dan tom sơnđan Yàng Jesu Krist, Amen.

Ơ jơh ală ồng mò, oh mi kòñ gơboh, ò gơs cau lơi rgơi ò kơlôi tus dô rài kis neh geh tơm pơrgơl bơh bơta kòñ gơboh dọ̆ng-twài. Bàñ loì ală bơta gơkòl rồn bơklơ̆n lơh kơnjơ̆ hala bơta rngòt rngơt lơh gơhùc ngềt bơta gơn kơnom tom nùs oh mi. Kư̆ ƀă-lĭa tĕ be kòn dềt, yal jơh dunnia in kơno bơh Bơtau neh joi bàn oh mi tom tŭ oh mi tìs nrah, neh kòñ gơboh oh mi tom tŭ oh mi gam la cau glài. Kơp kòñ lah tơnơ̆ mơ bơta hoi dan do, cơnoà jơng oh mi di rơp nggòc-nggơr rlau mơ bơr oh mi rơp bîng ală jơnau ưnngai. Dan Yàng ngui bơta yal yau bơh să tòm oh mi tô tề ceng oă hwềng soàn tìs nrah rê wơl hơ hiu.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.