Gơs ală tŭ bol he jơh nùs sơntòm dô nơm broă ne. Mơya, sơlo lơh, bol he sơlo gơ lơh bòl glar ngan. Digơlan rài kis jat Yang kung gơ dùh tòm bơta hơ̆ dilah bol he kơ nòm jat bơta chài rgơi să tòm dê rlau mơ bơta kơnòm dê Yang Hwềng Goh. Ồng mò oh mi đal git gơnap gơ noar Yang Hwềng Goh lơh broă tòm rài kis he sơl? Kơ nòm dê bơta lơi nàng bol he rgơi lơh broă Yang dô bă gơ lik cồng nha mơ ò gơ plơ̆ nùs tiah?

Ngai do, ngai 24/05/2026, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng bơh tơnggume: BƠH HWỀNG AÑ

‘Behơ̆ khai đơs mơ añ lah: “Do la jơnau Yàng Jehôwa đơs mơ Jerubabel: ‘Hơ̆ ò di la bơh gơnoar pràn, kung ò di la bơh gơnap gơnoar, mơya la bơh Hwềng Añ,’ Yàng Jehôwa Gơnap Gơnoar Dờng Làm Jơh đơs behơ̆. ‘ (Sacari 4:6)

Oă nam lài or, ăñ mù tus dê dô nơm Hiu Jum pa nàng duh khoai Yang. Ăñ gơ boh gơ bài dê Hiu Jum mơ ală oh mi tềng hơ̆. Kơ nòm dê ală bơta nđàc Yang ai pà, ăñ ngac ngar duh broă Yang tòm oă pơnah bơh ntass kơñi, lam bồ bơta duh khoai tus dê tòm pà Jơnau Yang… Gơs ală tŭ tơngai ăñ gơs tơl mat tòm hiu jum tơl poh tơn, nhưk la ală tŭ gơs bơta pơ jum dờng. Ồng mò oh mi băñ kơ lôi tơn ăñ la dô nă cau “tơryiang tơryong” jat bơta kơ lôi sơ nơng òs mòng. Bơta chồl bơtrut ăñ mìng lah bơta kòñ gơ boh gơwèt mơ Hiu jum Goh mơ ji gloh tơrhir geh duh broă Yang.

Mơya, ồng mò oh mi git sơl, dilah bol he duh broă Yang mơ ò kơ nòm dê Yang hala nùs nhơm ò tòm toh, gen mhar ngan bol he rơp gơ plơ̆ nùs mơ bol glar. Ăñ neh lòt gan bơta hơ̆ rau. Ăñ neh geh dòp ală jơ nau jong rơ, mơya ò rgơi pleh dê ală jơnau đơs iơh. Ăñ kung neh lòt gan ală bơta wờng tìs, ò dô bă bal tòm tŭ duh broă Yang. Ăñ tồn lah să tòm pràn kơldang, mơya ăñ lơ bơn lơño di đap ală bơta kalke đah bơh dìh mơ nùs nhơm tòm dơ lam ăñ jê. Oă dơ̆ ăñ tus mơ Yang, dan Yang nđàc sơ ngit mơ bơ tơl pràn, yal tơlik mơ Yang lah ăñ kung gơs tŭ jơ lơbơn lơño.

Mơya sền wơl, tòm tŭ jơ hơ̆ la tŭ lơm pạh nàng ăñ git làm gung dà Yang dê pa lơm, mìng tŭ lơi kơ nòm dê Hwềng Yang dê, mơ ăñ gơs pràn ngan nang pơn jat duh broă Yang mơ lơh sir gơ noar broă Yang jào.

Tơnơ̆ mơ poh jơt sơ nam làng bol Israel kong lơh dĭ tòm bòn Babilon, bol khai geh rê wơl tòm bòn tòm. Mơya dê đap bol khai la bòn dòng Jerusalem bơcah lề mơ hiu duh khoai phà tơrlah. Tòm tŭ hơ̆, Jerobabel neh ñă ntào nang tề lam lang bol bơt bơtào wơl. Mơya, broă lơh do ò dê la buơn soh. Bơta bơt bơtào geh bơta tòm pơn dang, lang bol gơ plơ̆ nùs, rngòt rngơt, siơ̆u siar li bơta. Bơta bơt bơ tào gơ dơh wơl oă sơ nam.

Digul bơta hơ̆, Yang Tom Trồ ai pà cau gơ noar hwơr Sacari in dô nơm bơta gơtơng gŏ: dô nơm jơng đèng màh, hơđang la dô nơm gri mơña, bar gah la bàr nơm chi ôlibe. Bơta krơi is la mơña ò cang cau bơtơl tai, mơya kư̆ hòr sum bơh chi ôlibe tus dê gri jơng đèng (Sacari 4:1-3).

Yang Tom trồ ngùi bơta gơtơng gŏ do nàng đơs mơ ồng Jerubabel lah: ‘Hơ̆ ò di la bơh gơnoar pràn, kung ò di la bơh gơnap gơnoar, mơya la bơh Hwềng Añ,[…]Ơ mơnơm dờng ne, mê la ñcau taih? Ơm di đap Jerubabel mê gơlik gơs ƀlàng ring’ (Sacari 4:6b-7a).

Tŭ hơ̆, ală bơta ông Jerobabel gơs tòm tê mìng la dô êt mpồl lang bol lơm, ò gơs tơl bơta pran kơldang, siơ̆u phan mơna, nùs nhơm gơhùc. Tài bơh hơ̆, Yang ngùi ala bơta gơtơng gŏ do nàng chồl bơtrut ồng Jerobabel lah: ò dê bơh gơnap gơ noar hala bơta pràn kơldang làng bol gơs nàng lơh sir broă bơt bơ tào, mơya mìng bơh Hwềng Yang. Să tòm Yang la Bơtau lơh broă mơ bong mơña nang bol khai duh broă Yang.

Do kung la bơta mơ bol he òs gơhŭi. Bol he òs mòng rơn dap tap sèng ală bơta, pơnđơl, jơh nùs jơh pràn. Bol he kơ lôi sơ nơng lah dilah bol he tơl bơta pran, tơl bơta chài rgơi, tơl bơta kơ̆ cê gen bol he rơp lơh bơta ne Yang in. Mơya, tŭ geh tìp ală “mơ nơm dờng” bol he đal git ò rgơi lơh bơta lơi dilah ò kơ nòm dê pràn Yang dê. Tài bơh bơta kơp kòñ Yang Tom Trô dê lah broă Yang dê rơp ò lơh sir kơnơm bơh pràn is kòn mơ nus dê.

Oă nam tơnơ̆ , dô mpồl dềt ndai rơp ñă ntào di đap dô gơnoar broă dờng ngăn. Bol khai lah cau bơtê Yang Jesu dê – la ala cau ò gơs tiang pơnrơ ha la bơta jak chài lơi. Bơta bol khai gơs mìng la jơ nau ho pơ gon Yang Jesu dê: ‘Mơya tòm tŭ Yàng Hwềng Goh mù hơđang bol mê, gen bol mê rơp dòp geh gơnap gơnoar, mơ rơp lơh gơs cau lơh cơng bơh Añ tòm ƀòn dờng Jerusalem, jơh lơgar Jude, lơgar Samari, jơl tus làm plai ù.” ‘ (Broă 1:8)

Mơ bơta hơ̆ gơlik gơs tòm tŭ Yang Hwềng Goh mù. “Nisơna, gơs ntas bơh đang trồ tus be ntas càl khồm ur ur bềng jơh dô nơm hìu bol khai ơm nggui. Ală cau bơtê gŏ ală lơmpiat be lơmpiat ồs gơlik, gơcah is mơ rơp hơđang kòp nă cau tòm bol khai. Jơh tơl nă geh bềng lìu Yàng Hwềng Goh, rơp sơntòm đơs ală jơnau đơs lơgar ndai, jat be Yàng Hwềng ai bol khai in đơs.” (Broă 2:2-4)

Ală cau neh rngòt rngơt hơ̆ gơ lik khin cha. Bol khai bềng liu Yang Hweng Goh nàng sơn tòm bơto yal. Mơya, mìng tòm dô ngai, gơs pơgap pe rbô nă geh bơtơl tòm hiu jum.

Bơta hơ̆ dô dơ tai dong kòl he kah wol Jơnau Yang ho: ‘Hơ̆ ò di la bơh gơnoar pràn, kung ò di la bơh gơnap gơnoar, mơya la bơh Hwềng Añ.” Bulah bơt bơtào hiu duh khoai tòm rài Sacari hala bơt bơtao hiu jum goh tòm rài cau bơtê, bơta pal càng ò tòm gơl: broă lơh Yang Tom Trồ mìng rgơi lơh sir bơh Yang Tom Trồ, gan dê Yang Hwing Goh Yang dê.

Đal git bơta do bol he ò jong să hala pơnhừ sa tòm broă Yang, kung ò gơ plơ̆ nùs tŭ tìp bol glar, tài bơh Yang Tom Trồ rơp rcang mơ lơh sir broă Yang dê, mơ bol he mìng la cau geh bơta nđàc dong kol tòm broă hơ̆.

Ngai do, “mơnơm dờng” bol he dê la ñchi taih? Digơlan la dô mpồl dềt bol he pal càng sền gar hala dô bơta rơndap tap sèng mơ bol he ơn nùs ơn tôr. Digơlan hơ̆ la bơta rngòt tŭ tòm pa Jơ nau niam, hala ală nhar tòm nùs nhơm bol he: bơta rngòt rngơt, bơta pin wil wơl, bơta ò ngac ngar.

Hơđap ală mơnơm dờng, jơnau Yang Tom Trồ đơs mơ bol he: “Ơ mơnơm dờng ne, mê la ñcau taih? Ơm di đap Jerubabel mê gơlik gơs ƀlàng ring.”

Tòm ngai kah Kirsơnre Yang Hwềng Goh mù, dô dơ̆ tai tơng kah bol he lah Yang Tom Trồ là Bơtau sôr lòt, mơ Yang ò lòi bol he ơm is tòm bơta hòi sac hơ̆, mơya ai pà Yang Hwềng Goh nàng lòt bal mơ bong mơña hơđang bol he.

Gen tang, tŭ geh tip bơta gơlòng tòm broă Yang,bơta sơnròp bol he pal cang kơ lôi sơnơng tus ò dê la bơta chài rgơi he dê, mơya, pal kơ lôi nền nền Yang Hwềng Goh lơh broă mơ ai pà gơnap gơ noar tòm rài kis bol he ha la ò, bol he kis dềt mêr mơ Yang Hwềng Goh hala lik ngài bơh bơta tơlik mat Yang dê sơl? Digơlan bơta bol he pal cang ò dê la pơn đơl oă rlau tai, mơya pa rê wơl mơ Yang Hwềng Goh nàng Yang lơh pa wơl, tề lăm mơ lơh broă găn dê rài kis he dê.

Dan jà bol he dô nùs bal tòm bơta hòi dan: Khoai Yang, kòn ưn ngài Yang tài bơh Yang ò săng lòi kòn tòm gơnoar broă, mơya ơm bal mơ lơh broă tòm kòn. Kòp tŭ kòn gơlơh bòl glar mơ kơnjơ̆ kơn jut, dan dong kòl kòn git làm bơta lơh broă lơbơn niam mơ gơnap gơ noar Yang Hwềng Goh dê. Kòn dòn lah ò gơs gơnoar pràn hala pràn is lơi, mơya mìng bơh bơta pràn Yang Hwềng dê mơ kòn rgơi kis Yang in. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, ồng mò oh mi duh broă Yang gan dê pràn is hala pràn Yang Hwềng Goh dê? Ồng mò oh mi duh broă Yang tài bơh bơta kòn gơboh gơwèt mơ Yang, hala tài bơh gơnoar broă, bơta òs mòng, bơta jòng rơ? Ngai do la ngai bol he kah Kirsơnre Yang Hwềng Goh mù, gen bol he geh tơngkah lah Yang Hwềng Goh ơm rềp mơ bol he, tơlik mat mơ ai pà pràn kơldang nàng bol he kis mơ duh broa Yang. Dilah gơs tồi glai, lơh jat poac să hala bơta kră kơldang nùs lơi lơh kơryan bơta ring lơ ngai mơ gơnap gơ noar Yang hơđang rài kis bol he, tus tĕ mơ Yang tòm bơta gơjran sang glai. Dan Yang toh glài, tòm gơl pa mơ ai pràn bol he in nàng cơn đoà tai tòm gơnoar broă Yang dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.