Ih tam đei layơ lăng ‘bôh hơ’lơ̆p kơ dâu kuăr mĕ ‘bă pă đei kơdŭn tơrŏng ưh? Hơ’lơ̆p noh rŏ lăng huay kơ mơ lâu, huay kơ hli, păng huay kơ krê ưh kơ drơ̆ng iŏk, yua kơ lui ngeh sư đei ‘mêm mơnat. Mălei, kơplah rai wơ ‘lŏ, lu bơ̆n đei tơhiong lê̆ tơdrong hmă juăt kơ đei păng tơdrong tơpă tơpăt noh. Kư̆m thoi noh, lăm tơdrong arih hăm đon lui, Kră Yang ưh kơ wă kơ lu bơ̆n năm tơ Sư hăm jơhngơ̆m mơ lâu păng dơ̆ng tơ ataih, Sư ling lang krao lu bơ̆n athei năm tơ Sư hăm jơhngơ̆m thoi kơ hơ’lơ̆p.

Năr ‘nâu, ‘năr 25/05/2026, tơdrong tơdă Amăn Jơ Krao Khan Rim Năr, apinh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Joy Brunson kơ̆l ‘bai JING THOI KON HƠ’LƠ̆P

“Na Yêsu krao lu hơ’lơ̆p noh năm tơ Sư păng khan kơ lu bơngai pơhrăm păng Sư: “’Nĕ pă khă lu hơ’lơ̆p, lê̆ lu sư năm tơ Inh, yua kơ bơngai bu lui thoi lu bơngai hơ’lơ̆p âu lui, bơngai noh ‘Bok Kei-Dei pơgơ̆r wei-lăng sư ling-lang. ” (Luka 18:16)

“Na Yêsu krao lu hơ’lơ̆p noh năm tơ Sư păng khan kơ lu bơngai pơhrăm păng Sư: “’Nĕ pă khă lu hơ’lơ̆p, lê̆ lu sư năm tơ Inh, yua kơ bơngai bu lui thoi lu bơngai hơ’lơ̆p âu lui, bơngai noh ‘Bok Kei-Dei pơgơ̆r wei-lăng sư ling-lang.” (Luka 18:16)
Tơdah ih đei oei jê̆ lu hơ’lơ̆p, ih ‘bôh lu sư hmă đĕch, ưh kơ đei tơchĕng lơ dah bơwei dơ̆ng ataih đơ̆ng bơngai ‘lŏ. Inh đei ‘blŏk kơplah blŭng a đei bơ̆jang lăm khŭl hơ’lơ̆p lăm Hnam Akŭm. Kơplah noh inh bơtho lu sư ‘bai hŏk gah nơ̆r ‘Bok Kei-Dei. Oei pơma tŏk bŏk đĕch, minh ‘nu hơ’lơ̆p tŏk tơ inh, tơ oei pôk tơ inh păng pơma: “Kon ‘mêm kơ duch”

Đơ̆ng rŏng kơ đei bơ̆jang lăm khŭl hơ’lơ̆p, inh đei mơn ‘bôh hơ’lơ̆p ling lang pơm kơ inh ‘bôh hlich. Bơ̆n ngăl juăt kơ pơma khan “hơ’lơ̆p tơchĕng thoi yơ na gô pơm thoi noh”. Ih ưh kơ băt lu sư gô pơma kiơ, mă minh tơdrong sĭt lu sư pơm tơpă tơpăt hăm jơhngơ̆m đon lu sư. Yua kơ thoi noh, ‘bônh kơ pơm buăl juăt hăm lu sư păng tơ’bôh jơhngơ̆m pơlong lăng tơdrong hlich plơ̆ng hloh kơ bơngai ‘lŏ. Tơchĕng lăng, ki sơ̆ mă ih đei năm tơ’bơ̆p bơngai hlich, tơ oei hơdai păng pơma dơnuh hăm lu sư noh kơplah ayơ?
Đơ̆ng tơdrong lăng hmă đĕch noh Yang Yêsu yua wă bơtho tơ’bôh kơ lu bơ̆n ‘bai pơhrăm gah iŏk đon ala păng tơpă tơpăt. Sơ̆p hla bơar Luka đei roi hơ’mon kơ lu hơ’lơ̆p năm jê̆ Yang Yêsu, mă lei lu bơngai pơhrăm păng sư khă găn yua kơ tơchĕng khan gô pơgăn Kră Yang. Mălei Yang Yêsu pơma khan: “’Nĕ pă khă lu hơ’lơ̆p, lê̆ lu sư năm tơ Inh, yua kơ bơngai bu lui thoi lu bơngai hơ’lơ̆p âu lui, bơngai noh ‘Bok Kei-Dei pơgơ̆r wei-lăng sư ling-lang. Inh khan kơ iĕm tơpă: Dah bu ưh kơ lui thoi lu hơ’lơ̆p âu lui, bơngai noh ‘Bok Kei-Dei ưh kơ pơgơ̆r sư ôh.” (Luka 18:16-17 )

Tơplih kơ puh tơweh, Yang Yêsu krao lu hơ’lơ̆p năm jê̆ tơ Sư păng yua iŏk tơdrong arih lu hơ‘lơ̆p bơtho gah tơdrong ‘Bok Kei-Dei.

Lei Kră Yang wă kơ lu bơ̆n pơhrăm iŏk tơdrong kiơ đơ̆ng hơ’lơ̆p? Noh jơ̆ athei năm tơ Sư thoi kơ hơ’lơ̆p. Minh ‘nu hơ’lơ̆p lăng hmă đĕch, lui gơnang mă ưh kơ đei tơchĕng kơ tơdrong kiơ. Lu sư ưh kơ gô đei pơm yua ‘mơ̆i dah tơdrong pơm gơh ‘mơ̆i. Na Yang Yêsu kư̆m pơma thoi âu, wă kơ gơh mơ̆t tơ lăm dêh char ‘Bok Kei-Dei, lu bơ̆n kư̆m kăl kơ đei jơhngơ̆m đon ala păng đon lui gơnang thoi noh, wă kơ đei hlôi mơn jê̆ Kră Yang.

Ưh kơ adrô̆ Yang Yêsu bơtho tơdrong ‘nâu đĕch ôh, sơ̆p hla bơar ‘Bok Kei-Dei kư̆m tơ’bôh kơ lu bơ̆n tơdrong noh đơ̆ng lăm tơdrong arih pơtao Đawit. Kơplah đŏk lăm Hơriso, inh ‘bôh Đawit lui kơ ‘Bok Kei-Dei tơpă tơpăt. Sư pơma tơ’bôh đĭ đơ̆ng lăm jơhngơ̆m sư kơ Kră Yang, kơplah hiôk chơt, kơplah sơ ‘ngon, kơplah rơdu tơrăn dah kơplah đei jơhngơ̆m pran. Sư ưh kơ đei ôn jơhngơ̆m sư mă kư̆ kơ tơpăt hăm Kră Yang đĕch, yua kơ sư băt Kră Yang jơ̆ anih gơnơp ăn kơ sư. Sư đei tơtok: “Ơ Kră Yang, yua kơ kiơ Ih dơ̆ng ataih, Kơplah đei tơdrong pơmat-tat liơ Ih ôn akâu?” Sư kư̆m tơ’bôh jơhngơ̆m pran: “Kră Yang boih Pơtao ling-lang hlŏng hloi.” (Hơriso 10:1, păng 16a)

Đawit jơ̆ bơngai ưh kơ đei ‘lơ̆ng tôm, sư đei pơm lơ tơdrong yoch. Mălei ‘Bok Kei-Dei khan kơ sư “bơngai mă Kră Yang lăp đon.” (Samuel 13:14)

Yua kơ thoi noh, tơdrong kăl hloh ưh kơ sĭ ih gô ‘lơ̆ng tôm dah ưh, mă ih hăm hơmet jơhngơ̆m wă năm tơ Kră Yang hăm jơhngơ̆m tơpă tơpăt dah ưh. Buăl mă ‘mêm, ‘Bok Kei-Dei wă kơ ih năm tơ Sư lăm tôm tơdrong arih, ih oei hiôk hian dah ưh, oei hiôk chơt dah gleh lap, kơplah jơhngơ̆m pran dah rơdu tơrăn. Sư jơ̆ ‘Bă ‘mêm mơnat, yua kơ thoi noh ih athei năm tơ Sư ‘nĕ kơ hli, Kră Yang oei ling lang chang gô sơng iŏk ih.

Apĭnh đĭ đăng krao khan hơdai: Kơkuh kơ ‘Bă mă ‘mêm, kon bơnê kơ Ih yua kơ Ih ling lang oei chang gô kon năm tơ Ih. Apinh tơgŭm kon đei jơhngơ̆m thoi lu hơ’lơ̆p, jơ̆ jơhngơ̆m lăng hmă đĕch, hiôk hơ iă păng đon lui gơnang, wă kơ kon đei hlôi mơn tơpă păng hlôi mơn tơdrong ‘mêm tôm mah đơ̆ng Ih. Apinh Ih tŭk lê̆ jơhngơ̆m pơang dah lăp đon bơih kơ kơdih, păng tơgŭm kon đĭ jơhngơ̆m lui gơnang kơ tơdrong ‘mêm đơ̆ng Ih rim năr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, kơplah tơdrong arih đei trăp trĭn păng đei tơdrong gleh glăn, kơplah lu bơ̆n gô tơ’bơ̆p dôm lu tơdrong kơnê̆ truh păng pơlong lăng, tam đei layơ lu bơ̆n hlôi mơn rai hiong jơhngơ̆m thoi kơ lu hơ’lơ̆p? Đei layơ lu bơ̆n jing arih jing hrĕp hreh, rai wơ̆ ‘lŏ hloh, păng rai pă gan tơ’bôh tơdrong tơpă tơpăt đơ̆ng lăm jơhngơ̆m, hăm ‘Bok Kei-Dei ưh?
Năr ‘nâu, athei amăn jơ hrĕp hreh lăm Kră Yang, mơ̆ng nơ̆r Sư hăm jơhngơ̆m rơmuăn. Athei rai ming lê̆ dôm tơdrong hiơ̆k bơngơ̆t, trăp trĭn lăm tơdrong arih, na năm tơ Kră Yang hăm tơdrong tơpă tơpăt. ‘Nĕ adrin ôn muh măt ‘bơ̆t anăp Kră Yang, athei pơih đĭ jơhngơ̆m thoi pơtao Đawit năm tơ Kră Yang. Athei ‘blŏk ‘Bok Kei-Dei băt rơđah đơ̆ng hiôk chơt dah sơ’ngon lăm ih, păng ling lang ‘mêm kơ ih hăm tơdrong ‘mêm ưh kơ đei layơ tơplih.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.