Bŏl he òs geh tơngkah lah păl lơh ală broă gơlik cồng nha ngăn. Bơta hơ̆ ò di là tìs ò. Mơya gơwèt mơ bơta duh broă Yang, cồng nha gòi kŭng ò tơl sơl. Gơs dơ̆, bŏl he òs buơn gơdùh tòm broă mìng gơs đah bơdih lơm mơya hŭi bơta kis tòm dơlăm. Bŏl he kơlôi rcang ală broă be bơtê chò, ală bơta rơndăp geh rcang sir wil tơl, mơya hŭi bơta nền cê bơta duh broă di, hơ̆ la dô nơm hwing nùs dipăl mơ bơta gơtòmklac dềt mềr mơ Yang. Gen bơta lơi lơh gơlik gơs kwơ bơta duh broă diđap măt Yang Tom Trồ taih?

Ngai do, ngai 26/05/2026 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl mò Linda Vulcano dê bơh Tơnggume BƠTA GƠCHỒL BƠTRUT DUH BROĂ DI

“Tŭ do, bol he neh dòp ò di hwềng dunnia dê, mơya Hwềng tus bơh Yàng Tom Trồ, nàng bol he in git ală bơta Yàng Tom Trồ neh ai gòi bol he in.” (I Kôrintô 2:12)

Gơs ală tŭ tòm rài kis, bŏl he kơlôi rcang ir bơh ală broă òs mòng kòp ngai di, kung be tòm bơta duh broă băl dô mpồl bơta dòn, buơn ngăn lơh bŏl he hŭi hwơr bơta gơchồl bơtrut he di mơ bơta lơi là dơng màng rlau jơh. Bŏl he rơp gơs dùh broă niam ngăn, đơs chò bợkah tôr iat, lip kơñi jak, rơndăp tap sèng niam wil tơl, mơya siơ̆u wơl bơta lơh broă Yang Hwing Gọh du, jơh ală bơta mìng la siơ̆u bơta kis. Jơnau yăl tơnggit bơh Doris Akers tơngkah bŏl he ĭn lah Yang Tom Trồ kah kơlôi tus hwing nùs mơ bơta gơchồl bơtrut bŏl he di rlau mơ ală bơta bŏl he rơp ràng tơlik đah bơdih.

Doris Akers deh ngai 21 kơnhai 5 sơnăm 1923 tiah Missouri, Hoa Kỳ tòm dô hiu nhă gơs jơt nă kọn. Mò bơtê piano bơh 6 sơnăm, mơ tus 12 sơnăm neh chài cih chò sơnrờp. Tŭ pa 12 sơnăm, mò neh bơt bơtào gơs dô nơm mpồl kơñhơl kơñi gơs pram nă cau, kơñhơl ală chò ală năm 1930. Năm 22 sơnăm, mò lòt tus Los Angeles, tiah mơ mò gơs tŭ lơmpah tip măt bal mơ dô nùs lơh broă băl bơh ală cau chài rgơi đah Jơnau niam tiang pơnrơ ngăn. Bar năm tơnơ̆, băl mơ ală cau lơh broă băl, mò bơtào gơs dô mpồl kơñhơl chò is mơ pò công ty xuất bản chò.
Năm 1958, tòm Hiu Jum Goh tòm Los Angeles, mò bơtào gơs dô mpồl đơs chò Jơnau Niăm ală kòp jơi bơtian ĭn, òs đơs chò jọng ro Yang ală cau Mỉ gốc Phi, lơh ală cau koñ iat kơno ngăn ĭn. Ală chò goh mò di geh oă cau tiang pơnrơ chài rgơi thu âm mơ geh đơs tòm ală tiah kòp Hiu Jum Goh.

Bulah là dô nă cau gơs tiang pơnrơ dờng gơwèt mơ ală chò Gọh, mơ ya Doris òs ơn lài broă jòi jat Yang mơ họi dăn. Mò yăl lah tòm dô àng drim ngai rlô năm 1962, tŭ tề lăm mpồl đơs chò, mò neh đơs mơ bol khai lah: “ ăñ gơlơh be bŏl ai òhềt rcang sir nàng jọng ro Yang” tài bơh mò gŏ bŏl khai òhềt tơl họi dăn. Bulah bŏl khai neh họi dăn lài, mơya mò găm jà bŏl khai họi dăn wơl, mơ tŭ do, bŏl khai họi dăn bơh hwing nùs ngac ngar rlau.

Tòm tŭ họi dăn, cau lơi kung geh doñ bơta bơka lơngột Yang Hwing Gọh di. Tơnơ̆ mơ tŭ Pơjum, Doris ri wơl hiu, nggùi đah kơñi piano mơ cih wơl ală ryai gen mò neh “iat” geh tom tŭ họi dăn hơ̆, mơ chò oh tiang pơnrơ “Yang Hwing Gọh Niăm” (Sweet, Sweet Spirit) geh gơlik gơs.

Tòm chò gọh hơ̆, mò geh jòi bàn bơta tơlik mat mơ lơh broă niam krơi Yang Hwing Gọh di hơđăng kòp nă cau. Mơ bơta hơ̆ geh tơngkah bŏl he bơh jơnau Yang tòm I Kôrintô 2:12 “Tŭ do, bol he neh dòp ò di hwềng dunnia dê, mơya Hwềng tus bơh Yàng Tom Trồ, nàng bol he in git ală bơta Yàng Tom Trồ neh ai gòi bol he in.”

Tòm tap sèng Sră Goh do, Pol đơs pơndròm digul “hwing dunnia” “ mơ “hwing tus bơh Yang Tom Trồ” digul bơta jak chài kon mơnùs mơ bơta geh ràng tơlik tus bơh Yang Hwing Gọh di (sèng 13). Bơta do ơn he in dô nơm sèng lùp be os bŏl he in ngai do, lah bŏl he găm dùh broă bơh chài rgơi he di hala găm cơnđòa lòt tòm bơta tề lăm Yang Hwing Gọh di?

Dilah Doris Akers mìng lơh broă be cau chài rgơi cau cih chò dunnia di, digơlan mò neh ơn nùs kơlôi bơh bơta chài rgơi kỹ thuật thanh nhạc, bơta tòmtọh bơta rơndăp di hala bơta rcang wil tơl bơh chuyên môn he di rau. Mơya mò neh sac iat kơno Yang Hwing Gọh di nàng dòp git lah mpồl đơs chò òhềt rcang sir cơnđòa mut tòm bơta duh khoai Yang. Mò wă lọh là dilah siơ̆u bơta bŏng mơñà Yang di, gen ală ntas chò hơ̆ mìng là ală jơnau ntas ò kwơ.

Gơs dơ̆, bơta lài ngăn bơta họi dăn ĭn he di rơp kòl cau dunnia sền là “tul gơla” hala prong preh tŭ jơ. Gen Pol ràng tơlik lọh lang bơta do tòm sèng 14: “Mơ tai, ală cau ò gơs Yàng Hwềng ò rgơi dòp bơta ai gòi tus bơh Hwềng Yàng Tom Trồ dê; bơh bol khai gơwèt mơ bơta hơ̆ la tùl gơla, mơ bol khai ò rgơi git wă, tài bơh pal sền sơwì jat đah hwềng.”

Ò gơs bơta lơi gơs kwơ ngăn tom tòm lơgar Yang Tom Trồ gen siơ̆u bơta họi dăn mơ tề lăm Kơnrẵn di. Tŭ bŏl he săng pơndăng ală rnoas dunnia di mơ cơnđòa mut tòm bơta gơtòmklac băl mơ Yang, să tom Yang Hwing Gọh rơp ai bŏl he ĭn gŏ, wă, mơ dŏng kòl bŏl he ràng tơlik ală bơta nđàc gơkrơi gen Kơnrẵn neh rcang lài bŏl he ĭn, be jơnau cau gơnoăr bơtọ dờng Pol neh đơs.

Bơh hơ̆, tŭ mut tòm bơta duh broă, chài rgơi mơ chuyên môn là bơta păl càng, mơya dilah bŏl he sền rmê ir ală bơta hơ̆ mơ lơh tơnrọh bơta gơtòmklac he di gơwèt mơ Yang gen bŏl he ò càng gơjrañ săng glài ò. Bơta duh broă niam nùs Yang ò ơm tòm cồng nha đah bơdih, gen ơm tòm bơta gơchồl bơtrut đah dơlăm, tŭ bŏl he ơn bơta gơklŏ Yang Tom Trồ di lài ngăn mơ pơndềt să diđap bơta tề lăm Yang Hwing Gọh di. Kŭng be jơnau Yang tòm neh tơngkah: “Mơya dilah cau lơi ai màh, priă, lŭ màng, chi, ñhơt ro, rhe nàng bơt hơđang mơnàng hơ̆, gen broă kòp nă cau dê rơp geh ràng tơlik; bơh tòm ngai Yàng dê rơp yal loh. Tài bơh gơ rơp geh ràng tơlik tòm ồs, mơ ồs rơp lòng broă kòp nă cau dê la mbe lơi.” (I Kôrintô 3:12-13). Bơta duh broă bơh chài rgơi be òs be “chi, ñhơt ro, rhe”, mơya tòm bơta duh broă tòm Yang Hwing Gọh hơ̆ la “màh, priă, lŭ màng” rơp găm wơl sum sum, sơlơ ngai àng gơcrà rlau tŭ geh geh ràng tơlik tòm ồs lòng Yang di.

Dan jà bol he dô nùs bal tòm bơta hòi dan: Khoai Yang, kọn Ưnngai Yang Kơnrẵn tài bơh neh ai pà kọn ĭn tŭ lơmpah dùh broă Kơnrẵn. Dăn dŏng kọn git sơwì wơl bơta gơchồl bơtrut he di tòm bơta duh broă. Dăn ai pà kọn ĭn dô nơm hwing nùs pơndềt să, osf jọng ro Kơnrẵn tòm ală broă lơh kon di, tồ bơta duh broă kọn di ò gơlik ò kwơ. Ơ Yang, dăn lơh pa wơl hwing nùs duh broă kọn di, tồ kọn ò gơlơh ro răñ hala njơ̆-njŭt, mơya geh bềng lìu hòn chò mơ bơta kis bơh Yang Hwing Kơnrẵn di. Dăn bơta dùh broă kon di lơh gơs tơmgồp pơnah bơt bơtào lơgar Kơnrẵn di mơ cèng tus lơngai lơngọ ală cau ơm gut dăr. Kọn họi dăn, ai sơnđăn Yang Jesu Krist, Amen.

Ơ ală ồng mọ ọh mi koñ gơboh, he găm gơs kơnòm pràn is he di nàng duh broă Yang sơl? Bơta gơchồl bơtrut he di tòm bơta dùh broă ngai do hơ̆ la ñchi, bơh bơta gơklŏ Yang mơ bơt bơtào să jan Bơtau Krist, hala bơh să tom is he di taih? Ngai do, bơsŏng tĕ gơjrañ săng glài băl mơ Yang bơh nùs nhờm hwing nùs he, mơ dăn Kơnrẵn lơh pa wơl hwing nùs mơ bơta duh broă he di. Sền sơwì wơl bơta gơchồl bơtrut đah dơlăm he, mơ king crŭ di bơta nđàc Yang di, nàng he ò găm dùh broă bơh pràn is mơya bơh gơnoăr pràn Yang ai.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.