Lu bơ̆n ngăl đei tơ’blŏk khan athei pơm tôm tơdrong jang đei yua tơpă. Tơdrong ‘noh ưh kơ glăi. Mă lei hăm tơdrong bơ̆jang kơ Kră Yang, đei yua đĕch oei tim mă tôm mah. Mưh lăp, lu bơ̆n ‘bônh kơ huŏng lăm tơdrong lăp đei tơ’bôh gah ‘nguaih na ưh kơ đei tơdrong arih gah lăm. Lu bơ̆n hrăt hrot hăm dôm kơ jơ pơhrăm hơri, dôm kơ tơdrong tơdă đei hơmet ‘lơ̆ng tôm, mă lei đei hiơt kơ tơdrong tơm kăl đơ̆ng tơdrong bơ̆jang, ‘noh jơ̆ minh jơhngơ̆m ‘lơ̆ng trŏ hăm tơdrong pơgơ̆p oei hơdai hăm Kră Yang. Thoi noh tơdrong kiơ tơpă pơm jing tơdrong gĭt đơ̆ng tơdrong bơ̆jang ‘bơ̆t anăp ‘Bok Kei-Dei?

Năr ‘nâu, ‘năr 26/05/2026, tơdrong tơdă Amăn Jơ Krao Khan Rim Năr, apinh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Escamp kơ̆l ‘bai WĂ KƠĐEI ĐƠ̆NG TƠDRONG BƠ̆JANG.

“Mă-lei bơ̆n bơngai lui ưh kơ wă iŏk ôh tơdrong tơchĕng ala teh âu. Bơ̆n đei Yang Bơhngol ‘Lơ̆ng jur tơ bơ̆n, wă kơ bơ̆n băt tôm tơdrong ‘Bok Kei-Dei pơkă khan wă ăn kơ bơ̆n.” ( I Kôrintô 2:12)

Đei kơ dôm kơplah lăm chăl arih, lu bơ̆n hrăt hrot dêh hăm tơdrong jang rim năr, hăm lăm tơdrong bơwih bơwăn lăm tơpôl bơngai lui, ‘bônh pơm kơ bơ̆n hiơt kơ tơdrong wă kơđei đơ̆ng kơdih păng tơdrong kiơ jơ̆ gĭt kăl hloh. Lu bơ̆n gơh bơ̆jang ‘lơ̆ng, hơri hiôk, reh brŏ gơh hơgei, pơjing ‘lơ̆ng tôm, mă lei dah ưh kơ đei tơdrong pơgơ̆r đơ̆ng Yang Bơhngol ‘Lơ̆ng, đĭ đăng lăp jơ̆ tơ’bôh gah ‘nguaih ưh kơ đei tơdrong arih. Tơdrong hơ’mon đơ̆ng Doris Akers tơ ‘blŏk kơ lu bơ̆n khan ‘Bok Kei-Dei hiơ̆k bơngơ̆t truh kơ jơhngơ̆m păng wă kơđei đơ̆ng lu bơ̆n hloh kơ tôm tơdrong kiơ lu bơ̆n tơ’bôh tơlĕch gah ‘nguaih.

Doris Akers rơneh năr 21 khei 5 sơnăm 1923 tơ Missouri, Hoa Ky lăm mĭnh hnam dơnŏ đei mơjit ‘nu kon. Yă hŏk pơhrăm reh brŏ pianô đơ̆ng 6 sơnăm, păng truh tơ 10 sơnăm đei pơcheh pơjing ‘bai hơri blŭng a. Kơplah ‘nao 12 sơnăm, yă đei pơjing mĭnh khŭl reh brŏ đei pơđăm ‘nu bơngai hơdai, reh hơri dôm kơ ‘bai hơri đơ̆ng chăl 1930. Sơnăm 22 sơnăm, yă năm oei tơ Los Angeles, anih yă đei jơ năr tơ’bơ̆p păng bơ̆jang hơdai hăm dôm lu bơngai hơgei gah hơri reh brŏ Bơngai Lui đe ư-ang. ‘Bar sơnăm đơ̆ng rŏng ‘noh, hơdai păng bơngai bơ̆jang, yă đei pơjing khŭl reh brŏ kơdih păng pơih anih jang tơlĕch hơri reh brŏ.

Sơnăm 1958, tơ minh Khŭl Bơngai tơ Los Angeles, yă pơjing mĭnh khŭl hơri Bơngai Lui phara adrĕch adrŭng, hơri gah ‘bai hơri ư-ang đơ̆ng bơngai My adrĕch adrŭng Phi, đei pơm kơ lơ bơngai ‘maih mơ̆ng. Dôm lu ‘bai pơcheh pơjing đơ̆ng sư đei lơ bơngai hơri đe pơ-ư hiup păng hơri tơ lơ anih lăm Khŭl Bơngai Lui.
Mă khan jơ̆ minh ‘nu bơngai đei hơtŭt ‘bơm tih hăm tơdrong hơri Bơngai Lui, mă lei Doris ling lang ‘măn hơdrol blŭng a chơ chă Kră Yang păng krao khan. Sư đei roi khan lăm minh pơge năr Tơpơh sơnăm 1962, kơplah oei bơtho khŭl hơri, yă đei pơma hăm lu sư khan: “Inh mơn ‘bôh lu iĕm ưh tim mă wă hơri ư-ang kơ Kră Yang”. Yua kơ yă ‘bôh lu sư krao khan ưh tim mă tôm mah. Mă lu sư đei krao khan adrol kơ ‘noh, mă lei yă oei krao lu sư krao khan dơ̆ng, păng kơplah ‘nâu, lu sư krao khan hăm đĭ jơhngơ̆m hloh.

Kơplah oei krao khan, bu kŭm đei mơn tơdrong ‘bĕnh blai kơ Yang Bơhngol ‘Lơ̆ng. Đơ̆ng rŏng kơ jơ akŭm, Doris brŏk tơ hnam, hơoei ‘bơ̆t brŏ reh pianô păng chih hơmet dôm kơ ‘bai mă sư đei “mơ̆ng” kơplah lăm jơ krao khan noh, păng ‘bai hơri đei ư-ang “ ‘Bĕnh Blai Yang Bơhngol ‘Lơ̆ng (Sweet, Sweet Spirit) đei chih.
Lăm ‘bai hơri ‘noh, yă đei chă băt ‘bôh tơdrong oei hơdai păng pơgơ̆r ‘lơ̆ng rŏ đơ̆ng Yang Bơhngol ‘Lơ̆ng lăm rim ‘nu bơngai. Păng tơdrong ‘noh tơ’blŏk kơ lu bơ̆n gah Nơ̆r Kră Yang lăm I Kôrintô 2:12, ‘bok Pôl chih: “Mă-lei bơ̆n bơngai lui ưh kơ wă iŏk ôh tơdrong tơchĕng ala teh âu. Bơ̆n đei Yang Bơhngol ‘Lơ̆ng jur tơ bơ̆n, wă kơ bơ̆n băt tôm tơdrong ‘Bok Kei-Dei pơkă khan wă ăn kơ bơ̆n.”

Lăm chăl ‘nâu, ‘bok Pôl pơting hăm “tơchĕng ala teh âu” păng “Yang Bơhngol ‘Lơ̆ng đơ̆ng ‘Bok Kei-Dei”, lăm tơdrong gơh hơgei đơ̆ng kon bơngai păng tơdrong bơtho đơ̆ng Yang Bơhngol ‘Lơ̆ng (trong 13). Tơdrong ‘nâu đei tơ lĕch mĭnh nơ̆r jet tơpă kơ lu bơ̆n dang ei, khan lu bơ̆n oei bơ̆jang hăm tơdrong gơh hơgei đơ̆ng bơ̆n dah oei yak năm lăm tơdrong chông anhăk đơ̆ng Yang Bơhngol ‘Lơ̆ng?

Dah Doris Akers lăp bơ̆jang hăm jơhngơ̆m đơ̆ng minh ‘nu bơngai chih ‘bai hơri teh đak, rŏ lăng yă đei kơnhăm lăm tơdrong hơri, tơdrong hơđăl đơ̆ng tơdrong tơdă dah tơdrong hơmet ‘lơ̆ng tôm gah tơdrong jang noh. Mă lei yă đei rơih iŏk mơ̆ng Yang Bơhngol ‘Lơ̆ng wă kơ ‘bôh băt khan khŭl hơri ưh tim mă đei jơhngơ̆m wă yak lăm tơdrong akŭm kơkuh hloi. Yă hlôh khan dah ưh đei tơdrong tuh ăn pơgang ‘bâu phu đơ̆ng Kră Yang, brŏ reh hơri noh kŭm lăp jơ̆ dôm tơdrong re ưh kơ đei yua.

Mưh lăp, tơdrong ‘măn ăn blŭng a kơ krao khan đơ̆ng ih phŏ kŭm đei bơngai lăm teh đak lăng jơ̆ “kư̆ kă” dah pơhuach jơ năr. ‘Bok Pôl đei tơblang tơdrong ‘nâu hơđăl ‘bơ̆t trong 14: “’Lu bơngai kiơ̆ kơ sĕch akar wă khan lu ưh kơ lui, lu sư ưh kơ iŏk ôh dôm tơdrong đơ̆ng Yang Bơhngol ‘Lơ̆ng ‘Bok Kei-Dei, yua kơ lu sư ưh kơ đei Yang Bơhngol ‘Lơ̆ng bơtho. Na lu sư ưh kơ hlôh, lu sư lăng dôm tơdrong ‘noh nhen lĕ tơdrong kơtul đĕch.”

Ưh kơ đei tơdrong kiơ đei gĭt tơpă lăm dêh char ‘Bok Kei-Dei pơgơ̆r na ưh kơ đei tơdrong krao khan păng tơdrong chông anhăk đơ̆ng Sư. Kơplah lu bơ̆n sơngah dôm tơdrong hơgăt đơ̆ng teh đak wă yak lăm tơdrong pơgơ̆p hăm Kră Yang, kơdih Yang Bơhngol ‘Lơ̆ng gô ăn kơ lu bơ̆n ‘bôh, hlôh, păng tơgŭm lu bơ̆n tơ’bôh dôm tơdrong mơnat ăn đĕch ‘lơ̆ng rŏ mă Sư đei ‘măn ăn bơih kơ lu bơ̆n, thoi nơ̆r đơ̆ng ‘bok Pôl đei pơma.

Yua kơ thoi noh, dah yak năm lăm tơdrong bơ̆jang, tơdrong gơh hơgei păng trŏ lăm tơdrong jang jơ̆ kăl tơpă, mă lei dah lu bơ̆n kơnhăm dêh lăm dôm tơdrong ‘noh na tơhiong lê̆ tơdrong pơgơ̆p đơ̆ng bơ̆n hăm Kră Yang lei lu bơ̆n kăl kơ tơbral. Tơdrong bơ̆jang Kră Yang lăp đon ưh kơ lăm ‘bơ̆t đei yua gah ‘nguaih, na oei lăm wă kơ đei đơ̆ng lăm, kơplah lu bơ̆n dan tơdrong ư-ang đơ̆ng ‘Bok Kei-Dei tơ adrol hloh păng tơjur kơdih akâu tơ ala ‘bơ̆t tơdrong chông anhăk đơ̆ng Yang Bơhngol ‘Lơ̆ng. Thoi Nơ̆r Kră Yang lăm I Kôrintô 3:12-13 đei tơ’blŏk: “Lu bơngai pơm hnam kơpal anih noh, lu sư pơm păng maih, hu, tơmo, găch; lu mơ’nah pơm păng tơ̆r, ‘nhĕt, gia, hơnong ‘ba. Na mưh truh năr sek tơlang ning-mônh, ‘Bok Kei-Dei wă pơlong lăng hnam mă bơ̆n pơm noh hăm kơjăp dah ưh. Tơdrong pơlong noh thoi lĕ kơ ŭnh sa, na sư wă pơlong lăng tơdrong bơ̆n jang kơ Sư hăm yua ưh.” (I Kor 3:12-13). Tơdrong bơ̆jang hăm tơdrong gơh hơgei hmă gơh lei lăi thoi “tơ̆r, ‘nhĕt, gia”, mă lei tơdrong bơ̆jang lăm Yang Bơhngol ‘Lơ̆ng trŏ jơ̆ “maih, hu, tơmo găch” gô oei đei ling lang, gô rai rang hơdah hloh kơplah hlôi tơ’bơ̆p ŭnh pơlong lăng đơ̆ng Kră Yang.

Apĭnh đĭ đăng krao khan hơdai: Kơkuh kơ Kră Yang, kon bơnê kơ Ih yua kơ đei ăn kơ kon jơ năr bơ̆jang kơ Ih. Apinh tơgŭm kon băt lăng ming dơ̆ng wă kơ đei đơ̆ng kơdih lăm tơdrong bơ̆jang. Apinh ăn kơ kon jơhngơ̆m iok đon ala, ling lang pôk pơ-ư Ih lăm tôm tơdrong kon jang, wă kơ tơdrong bơ̆jang đơ̆ng kon gô jing đei yua. Kră Yang ơi, apinh pơm ‘nao ‘plơ̆ng jơhngơ̆m bơ̆jang đơ̆ng kon, wă kơ kon ưh kơ mơn ‘bôh hrĕng kro dah gleh trăp, mă lei gơh ‘bĕnh blai tơdrong hiôk chơt păng tơdrong arih đơ̆ng Yang Bơhngol ‘Lơ̆ng Ih. Hơpơi tơdrong bơ̆jang đơ̆ng kon gơh tơiung pơjing dêh char Ih pơgơ̆r păng ba ăn pŭn hiôk kơ dôm lu bơngai jum dăr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, ih hăm đei gơnang lăm tơdrong gơh hơgei đơ̆ng kơdih wă bơ̆jang kơ Kră Yang ưh? Wă kơ đei đơ̆ng ih lăm tơdrong bơ̆jang dang ei jơ̆ kiơ, yua kơ tơdrong ư-ang Kră Yang păng tơiung pơjing akâu jăn ‘Bok Krist, dah yua kơdih kâu ih? Năr ‘nâu, athei đĭ jơhngơ̆m tơbral hăm Kră Yang gah tơ’bôh đơ̆ng jơhngơ̆m ih, păng apinh Sư pơm ‘nao plơ̆ng jơhngơ̆m păng tơdrong bơ̆jang đơ̆ng ih. Athei lăng ming dơ̆ng wă kơ đei đơ̆ng lăm ih, păng gơnang anih tơdrong mơnat ăn đơ̆ng Kră Yang, wă kơ ih ưh kơ bơ̆jang kơ Kră Yang hăm jơhngơ̆m pran kơdih na hăm trŏ jơhngơ̆m pran Sư ‘măn ăn.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.