Lăm tơdrong pơgơ̆p pah so, lu sư pơyơ̆r kơ ‘Bok Kei Dei tơmam soi ‘buh păng tơmam soi bơnê nhen thoi tơmam soi ‘bâu phu. Noh jơ̆ tơ’bôh jơhngơ̆m pơyom, bơnê dah nơ̆r pơkă pơyơ̆r kơ ‘Bok Kei Dei hăm jơhngơ̆m ‘maih kơdih păng ‘mêm kơ Kră Yang. Hloh kơ tôm tơmam pơyơ̆r hăm mŭk tơmam, pơm kơ Kră Yang lăp đon noh jơ̆ minh jơhngơ̆m hli yom păng tơdrong arih ăn Kră Yang pơgơ̆r. Hrei ‘nâu, lăm chăl ‘mêm mơnat đơ̆ng Kră Yang, lu bơ̆n ưh pă pơyơ̆r tơmam soi tơ chơnang soi bơih. Mălei, rim ‘nu bơngai lui oei krao râu pơyơ̆r kơ Kră Yang “tơmam soi ‘bâu phu” tơdrong arih bơnê, chu yom, bơ̆jang păng đĭ jơhngơ̆m pơyơ̆r kơ Sư.

Năr ‘nâu, năr 27/05/2026, tơdrong tơdă Amăn Jơ Krao Khan Rim Năr, apinh krao wơ̆n bơngai mơ̆ng hơdai tơchĕng pơwao nơ̆r Kră Yang hăm kơ̆l ‘bai TƠMAM SOI ĐEI ‘BÂU PHU.

“Kră Yang lăp đon kơ pơyơ̆r tơmam soi ‘buh noh hloh kơ chu yom kơ nơ̆r Sư dah ưh? Chu yom kiơ̆ nơ̆r ‘lơ̆ng hloh kơ tơmam soi, mơ̆ng pơm kiơ̆ ‘lơ̆ng hloh kơ rơmă triu tơno”. (ISamuel 15:22)

-“ ‘Bơ̆t anăp ‘Bok Kei -Dei hăm bơngai lui, ih pơkă khan gô yua nơ̆r ‘Bok Kei -Dei pơtho kon jah tơbral tơdrong yoch, lui sơng iŏk Kră Yang Yêsu pơm Tơ’ngla Pơklaih dah ưh?

-“Inh pơkă”

-“Hăm trŏ ih gô yua tơdrong ‘mêm păng tơdrong mơsêh mơyang Kră Yang na arih hli yom kơ Sư, pơm kơmil ‘lơ̆ng ăn kơ kon rok kiơ̆ dah ưh?

-“Inh pơkă”

-“Hăm trŏ ih pơkă dah Kră Yang krao râu păng yua kon ih bơ̆jang kơ Sư, lei ih pơdrơ̆ng hăm jơhngơ̆m hiôk dah ưh?

-“Inh pơdrơ̆ng hăm jơhngơ̆m hiôk”.

Dôm kơ nơ̆r pơkă lăm phĕt pơyơ̆r kon oei lăm tơdrong tơchĕng inh. Rim wơ̆t ‘blŏk hơdơ̆r, inh jet kơdih, “Inh arih tơpă thoi yơ wă pơm kiơ̆ nơ̆r pơkă noh ‘bơ̆t anăp Kră Yang?”

Pơyơ̆r kon kơ ‘Bok Kei Dei ưh kơ trŏ pơm kiơ̆ tơdrong juăt gah ‘ngoaih lăm Hnam Akŭm. Noh sơ nong tih hloh kơ lu mĕ ‘bă pơm kiơ̆ nơ̆r Kră Yang Yêsu pơtho păng pơm kiơ̆ kơ mil đĭch đam Kră Yang đơ̆ng chăl sơ̆. Lăm tơdrong pơgơ̆p pah so, Hana jing kơ mĭl ‘lơ̆ng kơ bơngai mĕ pơyơ̆r kon kơ Kră Yang.

Jơ̆ minh ‘nu drŏ kăn arih lăm hnam dơnŏ đei mŏ mai lơ. Hana pŭ iŏk tơdrong ơh sơngon yua ưh kơ đei kon. Mă khan klo sư ‘mêm kơ sư dêh, Hana hlôh băt lăp minh ‘Bok Kei-Dei đĕch jing anih kơ’nơp kơ jơhngơ̆m sư.

“Hana jơhngơ̆m sư rŭng răng ưh kơsŭk sư krao apinh Kră Yang sư nhơ̆m sơ’ngon dêh.” (I Samuel 1:10)

Lăm kơplah ơh sơ’ngon tih mălei đei đon lui ngeh tih. Hana krao khan pơma pơkă khan: “Ơ Kră Yang Tih Hloh, tơdah ih lăng mơnat kơ đam drŏ-kăn ih, ‘blŏk bĕ kơ inh ‘nĕ kơ hiơt kơ inh đam drŏ-kăn ih, mă-lei gô ăn kơ đam drŏ-kăn ih đei minh ‘nu kon drŏ-nglo, thoi ei inh gô ăn sư kơ ih Kră Yang đĭ chăl arih sư, ưh kơ gơh yuă dah hơkôih sŏk sư.” (I Samuel 1:11). Tơdrong sĭt lăm nơ̆r krao khan noh ưh kơ sĭ rơhing wă kơ đei minh ‘nu kon, mălei noh jơ̆ jơhngơ̆m wă ‘măn ăn tơdrong ‘lơ̆ng hloh wă pơyơ̆r kơ ‘Bok Kei-Dei. Hana ưh kơ bơwei tơdrong pŭn hiôk ăn kơ dih kâu, mă lei hăm đon lui, sư pơkă pơkăm pơjao tơdrong sư đei ăn kơ Tơ’ngla song ăn.

Sơ̆p hla ar nơ̆r ‘Bok Kei-Dei tơbăt ăn Hana krao khan đunh ‘bơ̆t anăp ‘Bok Kei-Dei păng đĭ jơhngơ̆m ‘bơ̆t anăp Kră Yang (I Samuel 1: 12,15). ‘Bok Kei-Dei tơl tơwih kơ sư: Na truh tơ Hana anăp na tơpŭ kơ minh ‘nu kon drŏ-nglo. Krao anăn sư Samuel, yua kơ sư đei khan, inh đei apinh bơih sư đơ̆ng Kră Yang.

(I Samuel 1:20) Hơnăn “Samuel” wă khan ” ‘Bok Kei-Dei tơl tơwih” mă Hana krao anăn kon drŏ nglo sư wă roi kơ jơhngơ̆m bơnê kơ Kră Yang. Ưh kơ dơ̆ng ‘bơ̆t doh, Hana khan kơ klo sư: “Gô kon hơ’lơ̆p lê̆ mŏ, inh gô năm chông ba sư, wă kơ sư năm ‘bơ̆t anăp Kră Yang păng oei hloi tơ noh ling-lang.” (ISamuel 1:22). Tơdrong arih Samuel jơ̆ tơmam soi mă sư pơyơ̆r kơ ‘Bok Kei-Dei. Lăm khei năr wei rong kon hơ’lơ̆p, sư ưh kơ rong ăn kơ kơdih sư, mălei wă hơmet ăn minh tơdrong arih kơ Kră Yang. “Truh tơ sư lê̆ mŏ boih, Hana chông ba kon sư năm hơdai sư. Păng kư̆m dui ba rơmo tơno pêng sơnăm, minh êphac tơpŭng, minh pơm get akar sik hơmu. Sư chông kon sư tơ hnam Kră Yang tơ pơlei Silô. Kon hơ’lơ̆p sư noh oei ‘lơ̆p. (I Samuel 1:24). Hana pơyơ̆r Samuel kơ Kră Yang. “Na inh pơyơ̆r sư kơ Kră Yang yua; lăm đĭ chăl sư arih dang yơ; sư noh jing tơmam Kră Yang boih.” (I Samuel 1:28). Noh jing tơmam soi ‘bâu phu Kră Yang lăp đon. Păng ” ‘bâu phu” noh ưh kơ dơ̆ng ‘bơ̆t jơ phŭt pơyơ̆r, mălei oei ‘bâu phu lăm chăl arih Samuel. Nhen thoi sơ̆p hla ar nơ̆r ‘Bok Kei-Dei đei chih. “Samuel wơ̆ ‘lŏ gơh hơgei, Kră Yang oei hơdai sư: Kră Yang ưh kơ đei lê̆ minh nơ̆r hơyơ đơ̆ng Sư mă đei pơma boih. Sư gô pơm keh.” (I Samuel 3:19) Samuel jing bơngai pơtruh nơ̆r ‘Bok Kei-Dei păng jơ̆ bơngai pơgơ̆r kon pơlei Isorael. Minh tơdrong arih pơyơ̆r đĭ kơ Kră Yang jing tơm tơdrong pŭn hiôk ăn kơ minh adrĕch adrŭng.

Pơyơ̆r kơ Kră Yang tơdrong ‘mêm hloh ưh kơ hiong tơdrong hiôk hian, mălei ba ăn tơdrong hiôk chơt lăm jơhngơ̆m. Kơplah hơdai Samuel hơri bơnê kơ Kră Yang, sư khan thoi âu: “Jơhngơ̆m inh chơt hiôk lăm Kră Yang; Kră Yang pơm ăn kơ jơhngơ̆m inh hiôk chơt.” ( ISamuel 2:1). Sĭt tơpă, đơ̆ng rŏng kơ pơyơ̆r kon, Hana ưh pă arih lăm ơh sơ‘ngon mălei lăm hiôk chơt păng hơri ư ang. Tơdrong hiôk chơt sư ưh kơ sĭ lĕch đơ̆ng gơh đei kon, mălei lĕch đơ̆ng Kră Yang pơgơ̆r sư păng kon sư. Păng tơdrong pŭn hiôk oei tuh ăn kơ hnam dơnŏ sư. “Kră Yang mơnat kơ Hana, na đei anăp tơpŭ pêng ‘nu kon drŏ-nglo păng ‘bar ‘nu kon drŏ-kăn. Kon tơdăm anăn Samuel rai wơ̆ ‘lŏ ‘bơ̆t anăp Kră Yang.” ISamuel 2:21)

Inh kŭm ‘maih pơyơ̆r tơmam soi đei ‘bâu phu ăn kơ ‘Bok Kei-Dei đơ̆ng lăm hnam dơnŏ inh wă pơm nơ̆r pơkă pơkăm ‘bơ̆t anăp Kră Yang. Păng inh kŭm hlôh băt, wă kơ đei tơmam soi Kră Yang lăp đon, lu bơ̆n kăl kơ hơmet jơhngơ̆m păng tơdrong arih chu yom. Tơdrong inh gơh pơm năr ‘nâu noh tơgŭm kon inh băt kơ Kră Yang, lui sơng iŏk Kră Yang kơdih, păng wơ̆ ‘lŏ lăm nơ̆r Kră Yang chông anhăk. Tơdrong inh hiơ̆k dang ei ưh pă kon inh pơhrăm kiơ dah pơngôi kiơ, mălei noh kon inh băt kiơ gah ‘Bok Kei-Dei, kon pơm kiơ̆ nơ̆r Kră Yang lăm tơdrong arih rim năr sư thoi yơ, păng kon wei tơdrong tơ’bưh hăm Kră Yang sư liơ. “Chu yom kiơ̆ nơ̆r ‘lơ̆ng hloh kơ tơmam soi, mơ̆ng pơm kiơ̆ ‘lơ̆ng hloh kơ rơmă triu tơno.” Inh hlôh băt tơdrong kăl hloh kăl kơ pơm noh krao khan kơ kon, wă kơ Yang Bơhngol ‘Lơ̆ng bơ̆jang, tơplih kon rim năr, tơgŭm kon arih chu yom Kră Yang, păng jing tơmam soi đei ‘bâu phu pơyơ̆r kơ Sư.

Apĭnh đĭ đăng krao khan hơdai: Kơkuh kơ Kră Yang mă ‘mêm, kon ‘maih wă pơyơ̆r kơ Ih tơmam soi đei ‘bâu phu đơ̆ng tơdrong arih mă Ih lăp đon, hnam dơnŏ păng tơdrong hli yom kon. Apinh kon băt tơdrong ‘maih wă ‘lơ̆ng rŏ Ih wă kơ kon pơm kiơ̆ păng yak năm kiơ̆ thoi Ih chông anhăk rim năr. Apinh tơgŭm kon ‘mêm kơ Ih hăm tơdrong arih pơyơ̆r đĭ jơhngơ̆m, băt mơ̆ng păng pơm kiơ̆ nơ̆r Ih. Apinh Ih yua tơdrong arih kon kiơ̆ thoi tơdrong tơdă ‘lơ̆ng rŏ Ih, đơ̆ng kon, anăn Ih đei ư-ang, păng lơ bơngai băt tơdrong ‘mêm Ih. Kon krao khan yua anăn Kră Yang Yêsu Krist, A-men

Ơ lu bơngai mơ̆ng ‘mêm kơeng, lu bơ̆n tam yak năm hăm jơhngơ̆m bơnê păng chu yom ‘Bok Kei-Dei? Nơ̆r Kră Yang năr ‘nâu krao wơ̆n lu bơ̆n ưh kơ sĭ pơyơ̆r kơ Sư mŭk tơmam dah nơ̆r hơri ư-ang hăm ‘bơ̆r, mălei hăm đĭ chăl arih ‘măn kơ tơdrong Kră Yang kơ nhăm. Mă khan lăm hnam dơnŏ, tơdrong jang dah bơ̆jang, apinh lu bơ̆n băt tơdrong kăl wă Kră Yang păng tơnăp pơm kiơ̆ nơ̆r Sư. Apinh Yang Bơhngol ‘Lơ̆ng chông anhăk wă kơ tơdrong arih lu bơ̆n jing tơmam soi đei ‘bâu phu, ‘Bok Kei-Dei lăp đon, păng ba ăn tơdrong pŭn hiôk ăn kơ lơ bơngai jum dăr.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.