Hăm đei layơ ih dơ̆ng tŏk bŏk kon bơngai hăt hot, lăng dôm kơ tơdrong arih ‘lơ̆ng rŏ tơ ‘nguaih to na thar jet kơdih: “Inh jơ̆ bu lăm teh đak tih să ‘nâu? Lei tơpă inh gĭt kăl ưh?” Lu bơ̆n đei hơ iă dôm kơ tơdrong arih tơ lăm hla ar ‘bao, dôm kơ bơngai gơh hơgei pơm pơjing đơ̆ng chăl sơ̆, na hiơt khan kơdih bơ̆n kŭm chĕp ba minh tơdrong ‘măn lê̆ ưh kơ gơh tơplih lăm tơdrong tơdă đơ̆ng Tơ’ngla Pơjing.

Năr ‘nâu, năr 28/05/2026, tơdrong tơdă Amăn Jơ Krao Khan Rim Năr, apinh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Gene Markland kơ̆l ‘bai MĬNH ĐĔCH PĂ ĐEI NAI DƠ̆NG

“Inh bơnê kơ Ih, yua kơ Ih đei pơjing inh hlĭch chrơp tơpă. Tơdrong jang Ih hlĭch chrơp mă jơhngơ̆m inh băt nhen tơpă.” (Hơriso 139:14)

Inh đơ̆ng đei ‘bôh tơdrong lôch đơ̆ng minh ‘nu bơngai jang gah roi tơbăt đe pơ-ư. Tơdrong ‘noh đei tah tơlĕch jơ̆p kơ hla ar ‘bao păng lăm tiwi tih. Đĭ tôm tơdrong jang kơjăp đơ̆ng yă gơh tơ’bôh đêl thoi minh pôm phim ‘lơ̆ng rŏ ăn kơ đĭ đăng teh đak lăng. Dôm kơ tơdrong roi tơbăt teh đak ‘nguaih đơ̆ng yă đei bơ̆jang đei jing ‘blŏk răk đơ̆ng chăl sơ̆.

Trŏ kơ hlĭch hloh, yă đơ̆ng đei pĭnh jet pơma dơnuh lơ hloh kơ 10 jơhnơr ‘Bok pơgơ̆r Hoa Ky. Lăm dôm kơ nơ̆r ư-ang mă bơngai jang hơdai ‘măn ăn kơ yă, đei mĭnh nơ̆r oei re jơwa ling lang: “Yă jơ̆ mĭnh ‘nu bơngai mĭnh đĕch pă đei nai dơ̆ng.”

Kiơ̆ kơ jơnăr đei hlôi, lu bơ̆n đei ‘bôh lơ bơngai hơgei đei truh na yak năm: dôm lu bơngai đe pơ ư gah pơchơt, dôm kơ bơngai đe pơ-ư gah tơdrong jang pơm kĭch, dôm lu bơngai pơgơ̆r gơh rơgei hloh, dah dôm lu bơngai chă nơnăm wă kơbăt đơ̆ng đei yak truh tơ măt khei. Đĭ đăng lu sư, dôm lu bơngai đe đei pơ-ư păng gơh rơgei hloh, đei đĭ đăng teh đak pôk pơ-ư jơ̆ dôm lu kon bơngai đei mĭnh đĕch pă đei nai dơ̆ng.

Pơih dơ̆ng dôm kơ hlak chăl sơ̆ lăm Sơ̆p Hla Bơar Nơ̆r ‘Bok Kei-Dei, lu bơ̆n kŭm tơ’bơ̆p dôm kơ lu kon bơngai gĭt kăl tơpă. Lu bơ̆n ‘bôh ‘bok pơtao Đawit, mĭnh ‘nu bơngai linh pran nuih đơ̆ng ‘Bok Kei-Dei, bơngai đei blah ‘bok Gôliat tih kơjung wă bơwei kon pơlei Sư. Kră Yang đei yua ‘bok Đawit wă chông anhăk păng hơmet ming Isơrael.

Đawit jơ̆ minh ‘nu bơngai đei bơhngol jrŭ să păng gơh hơgei hlĭch tơpă, mă lei sư kŭm jơ̆ minh ‘nu kon bơngai hăm dôm tơdrong hưch wă kơdih păng hăm dôm tơdrong pơ̆k huŏng thoi kon bơngai hmă. Mă lei, Nơ̆r ‘Bok Kei-Dei krao sư jơ̆ “bơngai Kră Yang lăp đon”. Lăm rơbŏu kon bơngai, tơpă sư jơ̆ mĭnh đĕch pă đei nai dơ̆ng.

Ih hăm ‘blŏk hơ’mon gah bơngai drŏkăn đei chĕp mĭnh pôm pơgang ‘bâu phu gĭt, đei kăp jên tơmam, wă tuh kơ Yang Yêsu, tuh đĭ kơpal kơ̆l Sư? Kơplah lu bơngai pơhrăm đei pơma khan yă đei pơhuach păng khan athei tĕch pơgang ‘noh wă tơgŭm lu bơngai dơnuh, Yang Yêsu đei pơma khan: mă ‘bơ̆t anih ayơ Tơdrong ‘Nao ‘Lơ̆ng gơh ră roi jơ̆p teh đak, tơdrong yă pơm gô ling lang đei tơ’blŏk wă kơ ‘blŏk truh kơ yă. Yă jơ̆ mĭnh bơhngol gĭt kăl.

Yak mơ̆t lăm jơhnơr dang ei, lu bơ̆n đei dôm lu bơngai thoi Billy Graham, mĭnh ‘nu bơngai bơtho Tơdrong ‘Nao ‘Lơ̆ng gơh hơgei, sư đei ba ăn tơdrong tơtă chang hơmĕng đơ̆ng ‘Bok Dŏng Pơklaih truh tơ rơbâu bơhngol lăm jơ̆p kơ dêh char. Sư jơ̆ mĭnh chăl arih đei ‘măn lê̆, ưh kơ gơh tơplih.

Na păng, tơpă, lu bơ̆n đei ‘blŏk ling lang kơ Yang Yêsu. Sư đei achăng anih ư-ang rang mơnhal kơpal plĕnh wă jur lăm teh đak jing kon bơngai, na jing “Kon Bơngai” oei lăm teh đak. Sư pơm tơdrong ‘noh wă kơ jing tơmam soi pŭ iŏk minh wơ̆t đĕch tôm đĭ kơ tơdrong yoch lu bơ̆n. Sư jing ‘Bok Dŏng Pơklaih kơ kon bơngai.

Sư đei tơplih ăn kơ lu bơ̆n tơ ‘long pơglang, pŭ iŏk dôm tơdrong yoch ăn kơ lu bơ̆n gơh jô̆ bơngai ‘lơ̆ng ‘bơ̆t anăp ‘Bok Kei-Dei (II Kôrintô 5:21).
Trŏ thoi noh, Yang Yêsu trŏ jơ̆ Tơ’ngla mĭnh đĕch pă đei nai dơ̆ng lăm đĭ kơtuăl teh ‘nâu!

Tuch luch, đei minh ‘nu bơngai dơ̆ng: kơdih ih, ơ lu bơngai mơ̆ng mă ‘mêm kơ eng! Trŏ, kơdih ih!

Nơ̆r Kră Yang pơma khan ih “đei pơjing hlĭch chrơp tơpă. (Hơriso 139:14), kơdih ti Sư đei pơjing ih lăm klak mĕ ih (Jop 31:15). Athei chĕp răk tơdrong ‘nâu: ‘Bok Kei-Dei ‘mêm kơ ih ưh kơ yua đơ̆ng dôm tơdrong ih gơh pơm. Sư ‘mêm kơ ih yua kơdih kon bơngai ih- yua kơ ih jơ̆ kon Sư.

‘Bă kơpal plĕnh ‘mêm kơ ih lơ tơpă mah truh kơ Sư đei ăn Kon Pôm Sư, wă kơ ih gơh klaih păng đei tơdrong arih ling lang (Yôhan 3:16). Sư pơm tơdrong ‘noh yua kơ Sư rơhing dŏng pơklaih ih. Athei pơlong tơchĕng lăng! ‘Bok Kei-Dei kơ đĭ đăng plĕnh teh wă dŏng pơklaih ih! Sư ‘mêm mơnat kơ ih lơ tơpă dĭng mah hiơ̆k bơngơ̆t đơ̆ng rim kơ tơdrong iĕ hloh lăm tơdrong arih ih. Mă khan dôm găr sŏk tơ kơpal kơ̆l ih Sư kŭm đei pơ’lơ̆ng jô̆ pơ đĭ (Luka 12:7)

Rŏ lăng ih gô jet kơdih: “Yua kơ liơ Kră Yang đei ‘mêm mơnat kơ inh lơ tơpă thoi noh? Yua kơ liơ?”

Nơ̆r tơl tơpă hmă đĕch: Yua kơ ih jơ̆ kon mă Sư ‘mêm, păng lăm măt Sư, ih tơpă jơ̆ mŭk tơmam gĭt mĭnh đĕch pă đei nai dơ̆ng!

Apĭnh đĭ đăng krao khan hơdai: Kơkuh kơ ‘Bă mă ‘mêm, kon bơnê kơ Ih yua kơ tơdrong mơnat ăn đĕch gơh jing kon Ih mă ‘mêm. Bơnê kơ Kră Yang yua kơ lăm rơbâu rơngan bơngai kơpal teh đak ‘nâu, Ih oei lăng ‘bôh kon păng ‘mêm kơ kon hăm minh tơdrong ‘mêm jrŭ să. Lơ wơ̆t kon đei ăn kơ dôm tơdrong re hrơ̆ng hreng đơ̆ng teh đak pơm ưh kơ gĭt kơ tơmam gĭt tơpă đơ̆ng kơdih, pơm kơ kon druh kiơ̆ dôm tơdrong hơgăt ưh kơ đei tơpă na hiơt khan kon đơ̆ng Ih pơjing hlĭch chrơp tơpă. Apinh Kră Yang tơgŭm kon băt gĭt kơ tơdrong arih mă Ih ‘măn ăn. Apinh ăn kơ kon hlôi mơn đei tơdrong rơngơp đơ̆ng ‘Bok Dŏng Pơklaih, ăn kơ kon arih lăm tơdrong rơngei đơ̆ng minh ‘nu bơngai đei gơh jô̆ ‘lơ̆ng tơpăt.
Kon krao khan yua anăn Kră Yang Yêsu Krist, A-men

Ơ lu bơngai mơ̆ng ‘mêm kơeng, teh đak gơh pơwao tơdrong gĭt đơ̆ng ih lăng lăm dôm tơdrong kiơ ih đei pơgơ̆r dah dôm kơ tơdrong kĕ jei ih gơh đei. Mă lei hăm Kră Yang, tơdrong gĭt đơ̆ng ih oei lăm kơdih tơdrong ih jơ̆ kon Sư mă ‘mêm. Ih ưh kơ kăl jơ̆ minh ‘nu ‘bok pơtao pran kơtang thoi ‘bok Đawit, kŭm ưh kơ kăl pơm dôm tơdrong tih hloh thoi Billy Graham wă kơ đei Kră Yang lăng ‘bôh. Mă khan kơplah ih ‘bôh kơdih iĕ ioch păng hmă đĕch hloh, lei hăm ‘Bă Kơpal Plĕnh, ih oei jơ̆ mĭnh tơmam gĭt kăl yua đơ̆ng kơdih ti ‘Bok Kei-Dei pơjing păng đei ‘Bok Dŏng Pơklaih yua pham Sư dŏng pơklaih. Athei yak năm lăm năr ‘nao plơ̆ng ‘nâu hăm jơhngơ̆m kơjăp, yua kơ lu bơ̆n băt kơdih đei ‘mêm mơnat păng đei ‘măn lê̆ kơ tơdrong kơnhăm ‘lơ̆ng rŏ đơ̆ng Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.