Ông mò oh mi neh tŭ lơi sền sơwì dô nơm sềm klàng tòm tip mơ càl rbùt dờng hala ò? Tòm tŭ ală sềm ndai joi tiah nàng pồn să, ai klàng gèn ngui pràn càl dê nàng yò he gơ guh jơnhoa rlau tai. Bơta pồn ndơp ò di gơ ơm tòm pràn dô yô pơnđàr gơ di, mơya la gơ ơm tòm gùng gơ sơnđing să he tòm gùng nhờm trồ. Kùng ndrơm behơ̆ sơl, raì kis Cau Dòn Yàng ò di là bơta ntoat pơrlòng poac să dê, mơya la gùng dà bơtê sơđing să he tòm gùng hòr lik Yàng Hwềng Goh dê. Digùl ală ngai tòm rài kis gơlơh be “kùp đèng”, ngăn gơs bơta àng lơi găm ò tŭ lơi kăl? Mơ gơs bơta pràn lơi tơl gơnoăr pràng nàng dong bol he par jơnhoa lòt găn hơđăng sơnoa rnoas he dê sơl?

Ngai do, ngai 29/5/2026, tơnggu Hoi Dan Kòp Ngai dăn ja ong mò oh mi kơlôi sơnưng bal jơnau Yàng kơnòm bơta dong kòl Wally Odum bơh tơnggu me BƠTA PRÀN YÒ TƠNGGUH ĐAH HWỀNG IN

“Bơh bơta boh lăm Yàng Hwềng bơta kis dê tòm Yàng Krist Jesu neh hồ toh añ lik klas bơh bơta boh lam tồi glài dê mơ bơta chơt.” (Rôma 8:2)

Tòm tŭ ùr klau añ găm ơm tòm lơgăr Úk, bol hi gơs tŭ lơmpah tìp mơ dô nă cau ur kis tòm dô nơm bòn dềt ơm tòm Queensland. Mò yăl bơh rài kis tòm dô nơm bòn dềt bơh đèng gơlơh siaŭ siar ngăn. Ting hơ̆ gơs dô nơm hiu sơnơm dềt ƀòn dê, mơ kòp dơ̆ mô cau kòp pal càng dong kòl, ală cau lơh sơnơm pal hòi điện thoại tùs mơ kòp nơm hiu tòm ƀòn hơ̆ nàng ràc dăn bơta dong kờl “Dăn nđàc sơngit tĕ kăl jơh ồs ƀuh mơ đèng. Bol hi păl càng sơntòm pò máy X-Quang.”
Jơh tơl nă bol he ngai do siău ngăn tòm bơta lòt găn bơta siău siar bơh pràn đèng di be hơ̆. Di gơlăn la dô nơm càl rbùt dơng lơh kùp đèng ing lơm, mơ gơs dơ̆ kùng ò càng nàng rcăng đèng pin sơl. Bơta gơlik gơs nisơna kùp đeng lơh ntung máy gơ ơm dơh wơl, ơnih lơh broă gơ ơm tòm bơta klăm jơngo mơ kòp nơm bơta hòi lùp bol he di gơ dơh wơl. Mơya ưn ngai Yàng, ală bơta kalkê hơ̆ òs ò gơ hwoài jŏ jòng.

Bulah behơ̆, tòm rài kis đah hwềng, bol he ò tŭ lơi pal kơlồi rngòt bơh broă “sơlùng sơlăng bơh pràn đèng dê”. Yàng Tom Trồ neh ai bol he in Yàng Hwềng Goh mơ rcăng ai jơh ală bơta pal càng. Gùng dà nàng bol he in pha lin ò gơ ơm tòm bơta pơnđơl pràn is he di, mơ la pràn jak bol he ngui gơnăp gơnoăr bơh hơđăng jòng neh rcăng sir tòm he.

Oă năm lai , Mike Kollin lik bơh klờng Đại Học Auburn nàng kơ-nhơl plai bầu dục chuyên nghiệp đội Miami Dolphins in. Cau bơtô yau bi di, Shug Jordan neh hòi điện kơnòm bi hơ̆ sac mpôl cau bơh kơnhwal Miami. Mike lùp: “Ơ cau bơtô, cau bơtô kơñ joi cau mƀe lơi?”

Jordan hơ wơl: “Ơ Mike, gơs ală cau tòm tŭ kol lơh alah, bol khai om bơthĭ tơn dô bă tiah.”

“Bol hi ò càng ală cau behơ̆, ngăn sơl cau bơtô?” – Mike hơ wơl.

“Ơi ngăn behơ̆! Mơya kùng gơs ală cau kol lơh alah rau kùng găm ntao wơl. Kòl lơh alah tơnơ̆ ntao wơl. Kừ behơ̆ sùm.”

Mike chò hòp: “hơ̆ la lau mơ bol he pal càng joi ƀàn ngăn sơl cau bơtô?”

“Ò, ơ Mike”- Jordan đơs dô bă nền cề. “Bol hi ò cang cau behơ̆. Joi tĕ añ in cau lơi rgơi lơh alah jơh ndai ne. Hơ̆ la caumơ bol hi càng joi”

Yàng Tom Trồ kờñ bol he gơlik gơs ală Cau Dòn Yàng pha lin jơh ală bơta kơryăn tòm rai kis. Kơnràñ kờñ bol he kis tòm bơta khat gơboh ngăn, ò găm gơ kòl kùp kơryăn bơh tồi glài mơ bơta chơt. Bơta càng la, bol he ngăn đăl git bơh bơta lơbơñ lơño mơ sơnoa rnoas he de. Bol he sền gơloh he be đềt rhền nàng rgơi kis rài kis pha lin hơ̆. Mơya Yàng neh gơs dô nơm gùng nàng bol he pràn kơldang rlau tom “bơta pơrlong” rài kis do dê.

Tòm sră Rôma tăp 8, cau gơnoăr bơtô Pol neh ai dô jơnau hơ Yàng dê ai bơta lơƀơñ lơñò kòn mơnus dê: hơ̆ la Yàng Hwềng Goh.

Kòp nă bol he kùng git khà kas mang mơ tồi glài lơi wơl. Mìng lòt găn tiah tơp să bồc, bol sền gŏ bơta gơlik gơs ngăn ò rgơi pleh klàs bơh bơta chờt đah poac să dê. Mơya jơnau hờn chò mơ Pol cèng wơl hơ̆ la bơta gơn kơnòm àng gơcrà:

“Bơh bơta boh lăm Yàng Hwềng bơta kis dê tòm Yàng Krist Jesu neh hồ toh añ lik klas bơh bơta boh lam tồi glài dê mơ bơta chơt.” (Rôma 8:2)

Jonau yal tơlik do ngăn krơi is ò git nđò! Bulah tồi glài mơ bơta chờt gơlơh be găm sơmƀăt kơ̆ gơnoăr ăt bồ, gèn găn di Yàng Jesu, Yàng Tom Trồ neh bơtao “boh lam Yàng Hwềng bơta kis dê” nàng hồ toh bol he. Tồi glài ò rgơi lơh alah di bol hi tai. Yàng Hwềng Goh wil tơl lòt rlau mơ jơh ală gơnoăr bơta klăm jơngo di. Yàng ò lòi bol he tòm lơh is dô nă ò, bơh Kơnràñ git bol he neh kòng alah rau. Ala bơh hơ̆, Kơnràñ sôr Yàng Hwềng Goh tus nàng lơh cơng bơh bơta khat gơboh bol hi in. Hơ̆ la bơta khat gơboh ngăn- dô bơta khat gơboh ai gơnoăr bol he in cơnđoà lòt tòm rài do mơ mùt tòm rài găm sùm sùm, bơh bơta lơh nền lah tồi glài mơ bơta chờt ò găm gơs gơnoăr lơh nên rài kis găm sùm sùm he di tai.
Pah tơngai đại học, añ geh bơtê bơh “Nguyên lý Bernoulli”. Đơs dô bă bă liă, tŭ dô nơm phăn gơ ơm wol (be không khí) tòm tŭ gơ lòt mơ tốc độ dờng, gèn gơ gơlik gơs áp suất dềt rlau gơwèt mơ gùng lòt ơlĕ. Nguyên lý do geh ngui nàng lơh gơs pơđar rơndeh pàr dê: không khí gơpuh hơđăng pơnđàr mhăr rlau mơ hơđơm pơnđàr, lơh gơlik gơs dô nơm pràn nàng gơ yò tơngguh dờng ngăn chồt rơndeh pàr gơpàr jơnhòa hơđăng.

Git bơta bơtê la dô pơnah, mơya tòm tŭ nggui hơđăng dô nơm rơndeh pàr găm gơpàr hơđăng gùng gơpàr, gơlơh pha is. Oh mi dòp git bơta kis he găm ơn tòm broă mơ ông Bornoulli đơs tòm toh hala ò. Dilah rơndeh pàr ò gơ pàr, gèn nên cề lah oh mi ròp ò geh pàr ò mơ bơtaiơh rmơh ngăn golik gơs!

Oă cau dòn mìg wòng bơg gơnap gơnoăr Yàng găn di sră pơàr gời. Mơya Kơnràñ kờn bol he git lam gơnăp gơnoăr Yàng Hwềng Goh dê. Bol he găm ntoat hơđăng gùng pàr rai kis dê, tiah tồi glài mơ bơta chờt găm kòp mòc tòm lồi dùt gùng. Mơya bañ rngòt! Pol git bơta ông gam đơs. Yàng Hwềng Goh ròp lơh gơlik gớs “Pràn yò tơngguh” pal càng đah hwềng, dong bol he pàr jơnhoà lòt rlau jơh ală bơta sơrbơng roh.

Pol pơnjat đơs nền gơnăp gơnoăr ò lồi do: “Dilah Yang Hwềng Goh bơh Bơtau neh lơh Yàng Jesu in kis wơl bơh bơta chờt tòm oh mi, gèn Bơtau neh lơh Yàng Krist Jesu in kis wơl boh bơta chờt kung ròp kơnòm di Yàng Hwềng Goh Kơnràñ dê òm tòm oh mi nàng lơh să jan òs chờt oh mi dê geh kis sơl” (Rôma 8:11)
Gơnăp gơnoărr kis wơl găm kis tòm bol he! Bơta chờt ò rgơi lơh alah bol he, tồi glài ò rgơi tơnroh bol he- ò di boh bol he pràn kơldang, mơya la bơh Yàng Hwềng Goh ơm at bồ tom bol he.

Yang Tom Trồ neh gơs pơnah nàng hồ toh bol he lik klàs bơh chè srêng găn lơh bol he in lơbờñ lơño. Añ neh sên phim tài liệu bơh dô nơm ơhin Canada găm gơduh tòm dô bơta gơlik gơs roh gơn kơnòm. Dô nă cau neh tòng nơm vòng kơt dưng hơđăng gùng mơ kờn ơhin gơkòl mbùng gơ ting hơ̆. Tai bơh mƀùng ơhin kơt nhăp, gơ ò rgơi sa mơ nền cề ròp chờt jê gloh. Dô nă cau ông ne lơh nền dong gơ. Kòn ơhin rngòt rngơt ntoat dô (ndrơm be gơs dơ̆ bol he ntoat dô bơh Yàng), mơya cau ông dô găm kơ̆ nus ntoat jat.

Tŭ kòn ơhin rê digùl hiong dà mơ gơbŭ ngai bơh tề, cau ông do neh ntao rcăng hơđăng ntùng lôi dà. Ông tong jal, gòm kòn ơhin mơ ntruñ hơđơm dà nàng dong tă gơ. Tŭ tơnduh să nêh lơh jơng ông di pă, mơya ông neh koh gơltĕ dă chờt cau hơ̆, dòp wơl bơta kis kòn ơhin nđàc hơ in.

Hơ̆ la ală bơta mơ Yàng Dong Jesu neh lơh bol he in. Kơnràñ neh tùs dong twoai bol he mơ khà păl tơm hơ̆ la bơta kis Kơnràñ dê. Tòm bơta phi să hơ̆, Kơnràñ ò di mìng yal tơlik bol he in bơta khat gơboh, mơ kùng găm ai Yàng Hwềng Goh nàng bol he in ponjat kis tòm bơta khat gơboh pha lin kòp ngai. Dô nus bal tĕ mơ ông Pol dơs dơng mơ jơh nùs nhờm lah: “boh lăm Yàng Hwềng bơta kis dê tòm Yàng Krist Jesu neh hồ toh añ ….”

Dan jà bol he dô nùs bal tòm bơta hòi dan: Khoai Yang Jesu kờñ goboh, ưn ngai Yàng bơh Kơnràñ ò lòi kon pal tòm lơh is gơwèt mơ sơnoa rnoas poac să lơbơñ lơñò do dê. Dan Yàng Hwềng Kơnràñ hòr lik bềng liu hơđăng kòn, chù hơng ồs đèng hwềng nus kon dê. Dăn Kơnràñ ai gơnăp gơnoăr kis wơl nàng pha lin tồi glài, bơta rngòt rngơt mơ chè srêng găm kùp kơt he. Dan dong kon geh git lam bơta gơs măt bềng gơnăp gơnoăr Kơnràñ dê tòm kòp nhờm tă kòn dê, tòm kòp nơm bơta lơh nền kòn dê ngai do. Dăn boh lăm Yàng Hwềng bơta kis dê tề lăm kòn cơnđòa lòt tòm bơta khat gơboh mơ ring lơngai wil tơl. Kon jơh nus hòi dăn tòm sơnđăn Yàng Jesu Krist, Amen.

Ơ ală ông mò oh mi kờñ gơboh, Yàng Jesu ò di mìng dong bol he lik bơh bơta lơh glài tồi glài dê gèn lòi bol he cơnđòa is. Kơnràñ kung găm ai Yàng Hwêng Goh la tom ryas gơnăp gơnoăr kis wơl ơm bal mơ bol he kòp tŭ kờ jơ. Ƀañ lòi ală pràn kơryăn bơta bassil tồi glài dê hala bơta rngòt rngơt bơta chơt bơ klơn oh mi tòm gung lòt roh gơn kơnòm. Dòn kơnòm tĕ tòm gơnăp gơnoăr Yàng Hwềng Goh dê, nàng Kơnràñ yờ tơngguh dô yô pơnđàr bơta dòn ông mò oh mi dê khăt gơboh păr jơnhoà. Bơh tŭ gơs Kơnràñ, ông mò oh mi nền cề ròp gơlik gơs cau pha lin.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.