Ih tam đei layơ lăng ‘bôh sem grơ̆ păr kơplah đei kial hơbŭt ưh? Kơplah lu sem nai chă anih wă gơ’nơp, sem grơ̆ yua iŏk kial hơbŭt tih wă kơ tưk sư păr kơjung hloh. Tơdrong hlĭch noh ưh kơ sĭ sư đei pơnăr pran, mă sư dan akâu sư tơlăm hơ yuh kial. Kư̆m lei lăi thoi noh, tơdrong arih Bơngai Lui ưh kơ pơjei băl hăm sĕch akar mă pơhrăm iŏk dan jơhngơ̆m lăm Yang Bơhngol ‘Lơ̆ng. Kơplah tơdrong arih nhen thoi “pă đei điê̆n”, lei hăm đei tơdrong hơdah ayơ pă đei tôch? Na đei jơhngơ̆m pran ayơ đei tôm mah tơgŭm lu bơ̆n păr kơjung hloh kơ kơdih akâu?

Năr ‘nâu, ‘năr 29/05/2026, tơdrong tơdă Amăn Jơ Krao Khan Rim Năr, apinh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Wally Odum kơ̆l ‘bai JƠHNGƠ̆M PRAN TƯK ĂN KƠ BƠHNGOL

 “Yua kơ bơ̆n lui kơ Yêsu Krist, na Yang Bơhngol ‘Lơ̆ng ăn kơ bơ̆n tơdrong arih ‘nao, bơ̆n jing klaih đơ̆ng tơdrong yoch, ưh pă hli kơ lôch dơ̆ng.” (Rôm 8:2)

Kơplah klo akăn nhi oei tơ dêh char Ŭk, lu nhôn đei juăt kơ minh ‘nu bơngai drŏkăn arih tơ pơlei Queensland kueng ataih.

Queensland. Yă âu ră roi gah pơlei iĕ điê̆n wă yua tơnat dêh. Tơnoh đei hnam pơgang, rim wơ̆t wă hơmet bơngai jĭ jăn, bơngai bơ̆jang krao rim ŭnh hnam lăm pơlei noh wă dŏng hơmet bơngai jĭ jăn: “Apinh pĭt đĭ jơđah ‘buh. Lu nhôn wă pơih kơmăi X-quang.”

Rim ‘nu lu bơ̆n dang ei pă đei ‘bôh bơih điê̆n ưh kơtôm mah thoi noh. Mă khan đei kial hơbŭt pơm ưh kơđei điê̆n ‘biơ̆ đĕch, na truh tơ inh kư̆m ưh kơ đei hơmet ŭnh ‘bin. Tơdrong ưh kơđei điê̆n pơm kơ kung kơmăi dơ̆ng, anih jang măng mu, tôm kơ lu tơdrong wă pơma dơnuh gô jing hiơ̆. Na bơnê kơ Kră Yang tơdrong noh huay kơ đei đunh ôh.

Mălei, lăm tơdrong arih gah bơhngol, lu bơ̆n huay kơ đei hli tơrơ gah tơdrong “ưh kơđei điê̆n”. ‘Bok Kei-Dei đei ăn kơ lu bơ̆n Yang Bơhngol ‘Lơ̆ng păng ăn tôm kơ tơdrong bơ̆n ‘maih wă. Wă kơ kĕ jei ưh kơ sĭ adrin kơdih đĕch ôh, mă lăm lu bơ̆n kơdih ăn kơ tơdrong mơsêh mơyang đei bơih lăm bơ̆n sư bơ̆jang.

Đei lơ sơnăm adrol, Mike Kollin lĕch đơ̆ng hnam trưng Auburn đei pơchơt ‘bŏng lŏng wong ăn kơ khŭl Miami Dolphins. Bơngai bơtho so sư, Shug Jordan đei krao sư athei tơgŭm chă bơngai pơchơt ‘bŏng lŏng ăn kơ khŭl đơ̆ng gah anih Miami. Mike đei jet: “Ơ ‘bok thây, thây oei chơchă bơngai thoi yơ hă?”

Jordan tơl: “Ơ Mike, đei bơngai kơplah ưh kơ kĕ jei, sư ‘bĭch kơtă hloi.”

“Lu bơ̆n ưh kơ kăl kơ bơngai thoi noh hăm trŏ ưh thây?” – Mike tơl.

“Trŏ bơih! mălei đei bơngai pă kĕ jei bơih oei iung ‘mơ̆i. Pă kĕ jei bơih oei iung dơ̆ng. Kư̆ kơ thoi noh ling lang.”

Mike ‘nă hal: “Noh jơ̆ bơngai lu bơ̆n kăl hăm trŏ ưh thây?”

“Ưh, Mike ah”- Jordan pơma kơjăp kơjăl. “Lu bơ̆n ưh kơ kăl kơ bơngai thoi noh. Athei chă ăn kơ thây bơngai ayơ kĕ jei dôm lu bơngai noh to. Noh bơngai lu bơ̆n wă.”

‘Bok Kei-Dei wă kơ lu bơ̆n Bơngai Lui kĕ jei tôm tơdrong pơgăn lăm chăl arih ‘nâu. Sư wă kơ lu bơ̆n arih hăm tơdrong rơngei tơpă, huay pă chô̆ lăm tơdrong yoch păng tơdrong lôch. Tơdrong ‘nâu jơ̆, lu bơ̆n kơnhăm dêh kơ tơdrong rơdu tơrăn păng ưh kơtôm mah kơdih. Lu bơ̆n mơn kơdih iĕ dêh wă kơ đei tơdrong arih kĕ jei noh. Mălei Kră Yang đei hmet ăn wă kơ lu bơ̆n pran hloh lăm tơdrong “pơjei” chăl arih ‘nâu.

Lăm hla bơar Rôm chăl 8, ‘bok Pôl đei ăn nơ̆r tơl đơ̆ng Kră Yang ăn kơ jơhngơ̆m rơdu tơrăn kon bơngai: noh jơ̆ Yang Bơhngol ‘Lơ̆ng.

Rim ‘nu lu bơ̆n đei pŭ iŏk đơ̆ng tơdrong yoch lu bơ̆n pơm. Lăp yak năm brih kơ bơsat, lu bơ̆n ‘bôh tơdrong lôch gah sĕch akar tơnoh. Dôm lu tơdrong ‘nao lơ̆ng ‘bok Pôl đei tơ’bôh ăn tơdrong hơmĕng ‘lơ̆ng tơpă:

“Yua kơ bơ̆n lui kơ Yêsu Krist, na Yang Bơhngol ‘Lơ̆ng ăn kơ bơ̆n tơdrong arih ‘nao, bơ̆n jing klaih đơ̆ng tơdrong yoch, ưh pă hli kơ lôch dơ̆ng.” (Rôm 8:2)
Nơ̆r roi tơbăt ‘nâu hlĭch tơpă! Mă khan tơdrong yoch păng tơdrong lôch oei pơgơ̆r, mălei đơ̆ng Yang Yêsu, ‘Bok Kei-Dei đei pơjing “khôi juăt Yang Bơhngol ‘Lơ̆ng tơdrong arih” wă ăn kơ lu bơ̆n rơngei. Yang Bơhngol ‘Lơ̆ng tih hloh kơ lu yŏng pơgơ̆r lăm măng mu. Kră Yang huay kơ achăng lê̆ lu bơ̆n tơblah adrô̆, yua kơ Sư băt kơ lu bơ̆n ưh kơ kĕ jei bơih. Tơplih kơ noh, Sư wơh Yang Bơhngol ‘Lơ̆ng năm pơsĭt tơdrong rơngei ăn kơ lu bơ̆n. Noh jơ̆ tơdrong rơngei tơpă – minh tơdrong rơngei ăn kơ lu bơ̆n yak năm lăm chăl arih ‘nâu păng yak mơ̆t tơ tơdrong arih ling lang, hăm tơdrong pơsĭt kơ tơdrong yoch hăm tơdrong lôch ưh pă gơh pơrăm tơdrong arih khŏm khŏm lu bơ̆n bơih.

Kơplah oei pơhrăm tơ lăm tih, inh đei pơhrăm gah “Tơdrong jang Bernoulli”. Pơma wă kơ ‘bônh kơ hlôh, kơplah đei hơyuh kial păr nơnăm hrĕnh tĕnh, sư pơm kơ tơdrong trăp hơyuh kial trăp hloh. Tơdrong juăt ‘nâu yua lăm pơm pơnăr gre păr: hơyuh kial kơpal pơnar hrĕnh hloh kơ ala pơnăr, pơm kơ đei tưk tơiung gre păr păr kơjung.

Băt kơ tơdrong bơjăng noh jơ̆ minh tơdrong kăl, mălei kơplah buăl ngôi tơ lăm gre păr, buăl mơn phara dêh. Buăl mơn tơdrong arih buăl oei pơlong lăng tơdrong jang Bernoulli pơma hăm trŏ ưh. Tơdah gre păr ưh kơ păr, rŏ lăng buăl gô ưh đei gơh păr na tơdrong hiong răm gô truh!

Lơ bơngai lui băt kơ tơ̆ng tơdrong mơsêh mơyang đĕch. Mălei Sư wă kơ lu bơ̆n đei hlôi mơn tơdrong mơsêh mơyang Yang Bơhngol ‘Lơ̆ng. Lu bơ̆n oei kơdâu lăm trong yak năm tơdrong arih, anih mă tơdrong yoch păng tơdrong lôch oei wă pơrăm tơ tuch luch trong yak năm. Mălei ‘nĕ kơ hli! Pôl băt kơ tơdrong sư pơma. Yang Bơhngol ‘Lơ̆ng gô “tơiung” bơhngol kăl yua, lu bơ̆n gô păr kơjung weh ataih đơ̆ng tơdrong yoch kơnê̆.

Pôl pơma khan tơdrong mơsêh mơyang ưh kơ hơgăt ‘nâu: Sơ̆ ‘Bok Kei-Dei yua Yang Bơhngol ‘Lơ̆ng Sư tơiung arih Yêsu đơ̆ng lôch. Dah Yang Bơhngol ‘Lơ̆ng oei lăm bơ̆n, lei ning-mônh ‘Bok Kei-Dei kư̆m yua Yang Bơhngol ‘Lơ̆ng Sư tơiung arih bơ̆n đơ̆ng lôch mơ̆n.” (Rôm 8:11)

Tơdrong mơsêh mơyang iung arih đơ̆ng lôch oei lăm bơ̆n! Tơdrong lôch pă đei pơđep lu bơ̆n bơih, tơdrong yoch pă đei pơrăm lu bơ̆n bơih – ưh kơ sĭ yua kơ lu bơ̆n pran, mă yua kơ Yang Bơhngol ‘Lơ̆ng Kră Yang oei păng pơgơ̆r lăm lu bơ̆n.
‘Bok Kei-Dei đei bơ̆jang wă ăn kơ lu bơ̆n rơngei đơ̆ng glang chô̆ pơkơ̆ng pơm kơ lu bơ̆n gleh glăn. Inh kư̆m đei lăng phim gah kon ‘ngông Canada đei tơdrong ơh sơ’ngon. Đei bu noh klơ̆m gơwang tơcheng trong, na ‘ngông noh tơwŏk đom tơ tơ’bong sư. Yua kơ đom ‘bơ̆t tơ’bong, sư ưh kơ gơh sa, sĭt sư gô pơngot na lôch. Đei minh ‘nu drŏ nglo adrin dŏng tơgŭm sư. ‘Ngông kơdâu hli tơrơ (nhen thoi lu bơ̆n kơdâu ôn kơ Kră Yang), mălei bơngai drŏ nglo noh oei adrin druh kiơ̆.
Kơplah kon ‘ngông noh glơi tơ glung đak na rai ataih, na bơngai drŏ nglo noh răp bơih bơ̆t gơng tơ bơbah. Sư dăng hơnhuăl, rôp hloi kon ‘ngông noh na dŏng pơklaih sư. Đơ̆ng sư pơplŏng bruh rôp noh sư tơgơ̆ jơ̆ng, mălei sư kăt kơtĕch gơwang chai noh, ba ăn kơ kon ‘ngông đei tơdrong arih.

Noh jơ̆ dôm lu tơdrong Yang Yêsu đei pơm ăn kơ lu bơ̆n. Sư jur dŏng pơklaih lu bơ̆n, Sư pŭ iŏk tơdrong lôch. Lăm tơdrong lôch noh, ưh kơ adrô̆ Sư ăn kơ lu bơ̆n rơngei, mă ăn kơ lu bơ̆n Yang Bơhngol ‘Lơ̆ng wă kơ lu bơ̆n pơtrơp dơ̆ng lăm tơdrong arih kĕ jei rim năr. Athei minh jơhngơ̆m hăm Pôl na pơih đĭ jơhngơ̆m: “khôi juăt Yang Bơhngol ‘Lơ̆ng tơdrong arih lăm Yang Yêsu Krist ăn kơ inh đei rơngei…”

Apĭnh đĭ đăng krao khan hơdai: Kơkuh kơ Yang Yêsu mă ‘mêm, bơnê kơ Kră Yang yua kơ Ih huay kơ achăng lê̆ kon adrô̆, tơblah hăm sĕch akar rơdu tơrăn ‘nâu. Apinh Yang Bơhngol ‘Lơ̆ng tuh ‘bĕnh blai ăn kơ kon, tơ̆k ŭnh hơdah lăm bơhngol kon. Hơpơi kơ Ih ăn kơ kon đei iung arih wă kơ kĕ jei tơdrong yoch oei chô̆ pơkơ̆ng kon. Apinh tơgŭm kon đei hlôi mơn Ih oei hơdai kon đơ̆ng lăm kon dui jơhngơ̆m, đơ̆ng dôm kơ drơ̆ng iŏk kon pơm đơ̆ng năr ‘nâu. Hơpơi kơ khôi juăt Yang Bơhngol ‘Lơ̆ng chông anhăk kon yak năm lăm tơdrong rơngei păng rơnŭk rơnua tôm tơdrong. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, Yang Yêsu ưh kơ sĭ adrô̆ dŏng pơklaih bơ̆n đơ̆ng tơdrong phak đơ̆ng tơdrong yoch na achăng lê̆ lu bơ̆n yak năm kơdih. Sư ăn kơ lu bơ̆n Yang Bơhngol ‘Lơ̆ng jơ̆ tơm kơ tơdrong mơsêh iung arih đơ̆ng lôch oei hơdai lu bơ̆n rim jơ, rim anih. ‘Nĕ ăn dôm lu tơdrong yoch pơgăn dah tơdrong hli kơ lôch kơtĭt buăl tơlăm trong ơh sơ’ngon. Athei lui gơnang kơ tơdrong mơsêh mơyang Yang Bơhngol ‘Lơ̆ng, wă kơ Sư tưk pơnăr đon lui buăl rơngei păr kơjung. Yua kơplah đei Kră Yang, buăl gô jing bơngai đei kĕ jei tơpă.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.