Digơlăn bol he găm ơs kơlôi Yàng ming lơh bơta krơi ală cau cun gơltăng jong ngăn, ơt sa hôi dăn dô bă kràñ ci, hala ơn ală jơnau hôi dăn niam ngăn. Gơs dơ̆, bol he ò kờñ mơ ya neh lơh bơta gơtơmklac mơ Kơnràñ gơlik gơs dô nơm sră hơ pơgon bal: “Kòn lơh bơta do, mơ Yàng rơp ai kòn in bơta nê.” Mơya ơ oh mi, nùs nhơm Yàng Tòm Trồ dê dơng rlau mơ ală rnoas mơ bol he ai lơh is. Kơnràñ ai bol he in ală phăn ban kas mang ò rgơi kơp, ò di bơh bol he neh hôi dăn tơl oă, mơ ming la tai bơh Kơnràñ la dô nă cau Bèp niam ngăn.

Ngai do, ngai 30/05/2026, Bơta Hôi Dăn Kơp Ngai dăn jà ală ồng mò oh mi bơtê bal Jơnau Yàng kơnơm di bơta dong kơl Jeanette Levellie dê bơh tơnggumê TŬ BƠTA LƠNGAI TUS LAI MƠ JƠNAU HÔI DĂN.

“Lài mơ tŭ bol khai hòi dan Añ rơp ho wơl; tòm tŭ bol khai ơm đơs Añ rơp kơno.” (Êsai 65:24)

Bau ur cau tòm añ jê sơnđăn la Cindy, la mè bar nă kòn – dô nă klau, dô nă ur. Kòn bol khai dê kung mor cơnđòa mut tòm sơnăm kơnòm dơng. Jơ do, mò kơp kòñ ngăn gơs tai dô nă kòn. Mơ ya bau klau gen ò dô nùs. Ồng đơs hiu nhă neh tơl rau mơ hưh nùs bơh hiu nhă tŭ do. Dơgah hơ̆, rcăng mut tòm sơnăm 40, ồng kung ò kòñ gơs tai dô nă kòn dềt.

Mơ ya Cindy ò gơdơrcul nùs. Kơp kòñ dô nă kòn dềt kư sơlơ dơng tòm nùs khai, ò gơs bơta lơi dơp chơt.

Lồi dut, bau klau ai dô bơta rơndăp mơ ồng dòn nền lah rơp lơ bau ur he păl dơrcul nùs: “Di rau, bol he rơp pơnđơl dơ̆ ôi dut. Mơya gơs dô bơta: hơ̆ păl la dô nă kòn ur, kòn dềt păl deh lai mơ tŭ kah ngai deh dơ̆ 40 bi di, mơ oh păl deh kòn tòm toh di ngai dơ̆ Poh nàng bi ò rlô lơh broă nàng cèng oh tus hiu sơnơm dơng.”

“Oh dô nùs!” – Cindy ñŏ hơ wơl, tê pờ sră cih ală phăn păl cang dô nă kòn dềt in, dờ gen đơs chờ bềng bơta gơkơnơm.

Sin kơnhai tơnơ̆, Lance nrơt să guh bic bơh dô bơta lơh di wĕ. “Bi neh rcăng sir wă rò kòn dềt hala ò?” Cindy lùp. Mhô ngai hơ̆, kòn dềt ur Tiffany June ồng mò di neh pò bơr ñim lik rai. Hơ̆ la dô ngai dơ̆ Poh, 12 kơnhai 8 năm 1999 – tòm toh dê bar ngai lai mơ tŭ ồng Lance tơl 40 sơnăm.

Tòm tŭ Lance yăl wơl añ in kơno broă do, añ ai lơh gơdăn lùp digơlăn mò Cindy gơs hôi dăn nàng Yàng lơh broă mơ lơh ồng in kung dô nus bal mơ bơta kơp kòñ gơs kòn dềt haha ò. Ồng Lance tơngeh bồ: “Jat bi git gen ò gŏ.”
Bơta lơi?

Bơta dô ngăn la dô bơta gơlong ală bơta git lam mơ Yàng mơ añ neh gơs. Añ ơs dòn lah kòn mơnus ming dơp geh tòm toh ală bơta he koñ tòm tŭ bol khai ngăn ơn jơnau hôi dăn hơ Yàng Tòm Trồ. Añ nên cê lah bơta lik rai Tiffany dê ò di la nisơna hala bơtoah, gen tàng ming găm dô jơnau hơ ming dul lơm: Yàng Tòm Trồ neh ai nđàc ồng mò Lance mơ Cindy in ming tai bơh Kơnràñ kòñ gơboh mơ kòñ ai lơngai bol khai in. Jơh.

Ñchi bơh tai bơta do lơh añ in kơlôi sơnưng? Tai bơh nùs nhơm kòn mơnùs sùm kờñ dô bơta song rưng jat “tai bơh – công nha” – dô nơm phăn êt at pal gơs gơ ơm ring. Dilah añ dòn duh Yàng mơ duh rngòt Kơnràñ mơ jơh rai kis he, añ gơs gơnoăr kơp gơn Kơnràñ dơp ală jơnau hôi dăn “ò kơlôi tus” – gơlơh beh deh dô nă kòn ur tòm toh ngai, tòm toh jơ lai mơ tŭ kah ngai deh bèp dê. Dilah dô nă cau dơp geh bơta bol khai kơp gơn mơ tian gơs lai mơ tŭ bol khai ai jơnau hôi dăn, gen broă hơ̆ đơs bơta lơi?

Ò di jơh ală pơnđơl pràn duh broă Yàng kung ò gơs kwơ, kung ò di bol he ò càng hôi dăn ală bơta păl cang he dê. Mơ ngăn bă liă lúi la: Yàng la Yàng Tòm Trồ – Kơnràñ gơs gơnoăr at bồ mơ lơh ală bơta lơi Kơnràñ kòñ.

Añ dòn lah Yàng neh niam nùs tòm tŭ ai ồng mò Lance mơ Cindy in tòm toh ală bơta bol khai kơp kòñ, tai bơh Kơnràñ là Bèp lơbơn niam, Kơnràñ kòñ kòn sau Kơnràñ chò hòp. Kơnràñ la Yang Tòm TRồ niam, Bơtau ai lơngai jơh tơl nă cau in, ò di la ming ală cau hôi lùp Kơnràñ. Ò di Sră Goh neh cih ơ: “bơh Kơnràñ sồr mattơngai lik pơnđàng cau iơh bơsak in mơ cau lơbơn niam in sơl, ai mìu cau song ring in mơ cau ò song ring in sơl.” (Mathiơ 5:45). Tòm bơta gơlik gơs do, “pơnđang mattơngai” mơ “miu lơngai” Kơnràñ dê geh tơrgòm tòm dô nơm săjăn kòn dềt!

Bơta lik rai dô nă oh dềt dê ò di la dô bă nisơna, mơ la cơng tang jơnau hơ in tòm Êsai 65:24 “Lài mơ tŭ bol khai hòi dan Añ rơp ho wơl; tòm tŭ bol khai ơm đơs Añ rơp kơno.” bơta song ngaen la, bulah mò Cindy gơs jơnau hôi dăn ngăn hala ò, gen bơta kơp kòñ

Jrô dơlăm nùs khai neh geh Yàng wơng git. Yàng Tòm TRồ neh ai lơngai bol khai in ming tai bơh Kơnràñ là Bèp lơbơn niam. Gơs dơ̆ bol he tôn lah bơta lơngai Yàng dê la “phăn bam” ai bơta song ring he dê, mơya ngăn gne, Kơnràñ ai lơngai bơh nùs nhơm Kơnràñ la niam.

Ngăn, bơta gơtơmklac mơ Yàng, bơta duh broă Yàng, mơ rai kis hôi dăn kơl ngai bol he dê găm sùm dơng mang. Mơya yal yau hiu nhă ồng mò Lance mơ Cindy tờngkah bol he lah: Yàng ò kol gơs n’hal bơh bơta kơlôi sơnưng kòn mơnùs dê. Kơnràñ la Yàng Tòm Trồ, Bơtau at bồ, mơ la Bơtau gơs gơnoăr lơh ală broă lin rlau mơ bơta kơp gơn.

Bơta lơbơn niam lin rlau mơ bơta git wơng Yàng dê ò di là lơh ồng mò oh mi in kòñ ơn wil tơl bơta dòn mơ bơta gơn kơnơm tòm Kơnràñ oă rlau tai ơ? Dilah Yàng Tòm Trồ neh kòñ ai dô nă cau lơi in bơta mơ nùs nhơm bol khai kơp kòñ bơh tòm tŭ bol khai ò hềt hôi dăn, gen bol he, ală cau gơri mơ Yàng, sơlơ gơs tơnggu mê nang kơ̆ nùs tus rềp sơnbàn gơklŏ. Bơta niam tìa rlau mơ bơta git wă Yàng ò di la bơta lơh bol he in kòñ ơn wil tơl bơta dòn tòm Kơnràñ, Bơtau kòñ bol he rlau mơ să tòm bol he kòñ gơboh să tòm he, ò ơ?

Dan jà bol he dô nùs bal tòm bơta hòi dan: Khoai Yàng la Bèp lơbơn niam kòn dê, kòn ưnngai Kơnràñ bơh Kơnràñ la Bơtau niam lin rlau ală bơta git wă kòn dê. Ưnngai Yàng bơh gơs dơ̆ Kơnràñ hơ wơl băl mơ ală bơta kơp kòñ jrô ndơp tòm nùs mơ kòn ò hềt đớ gơlik jơnau. Tŭ do kòn dăn ơn wil tơl rai kis, ală bơta kơp kòñ bal mơ ală bơta păl cang gơjal gơwal ngăn kòn dê tòm tê Kơnràñ. Dan ai kòn in dô nơm bơta dòn pa wơl, nàng kòn git kơp gơn ală bơta crih crai bơh Kơnràñ kơp ngai. Kòn don lah mattơngai pơnđang mơ miu lơngai rơp hor lik hơđăng rai kis kòn tòm toh dê tŭ tongai Kơnràñ sac rwah. Kòn jơh nùs hôi dăn tòm sơnđăn Yàng Jêsus Krist, Amen.

Ơ ală ồng mò oh mi kòñ gơboh, Yàng ò di la ông “yang đèng” ming tolik măt tòm tŭ bol he kòñ dăn dô bơta kơp kòñ. Kơnràñ la Yàng Tòm Trồ Git Jơh, Bơtau wơng jơh kơp jơnau rac ròc, kơp bơta kơp kòñ jrô ndơp rlau jơh mơ gơs tŭ bol he kung ò hềt đơs gơlik jơnau. Dilah ồng mò oh mi găm lơgah lơgañ bơh jơnau hôi dăn he dê ò geh hơ wơl, hala găm pơnđơl kis niam ngăn nàng “dipal” mơ bơta lơngai Kơnràñ dê, gen jơ do ơm bơdơh wơl tĕ mơ ơn nùs di đap Yàng. Sền tĕ ală pơnđang mattơngai dê đah bơdih nê, ală nhơm tă kư pơnjat di ntơh – hơ̆ ò di la bơta nđàc mơ Kơnràñ găm ai bulah bol he ò hềt dăn ò ơ? Kư khin cha tĕ cơnđòa lòt tus sơbàn gơklŏ nàng sền gŏ ală bơta niam ò git jơh Kơnràñ dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.