Rŏ lăng lu bơ̆n ngăl đei tơchĕng Kră Yang lăp pơm mơsêh kơ dôm lu bơngai chu sơ tơ̆p kŭl tăng mă đunh, ơ̆t kơ sŏng sa krao khan mă tơpă, dah pơyơ̆r dôm kơ nơ̆r krao apinh hơmet lê̆ mă ‘lơ̆ng tôm. Mưh lăp, lu bơ̆n đei pơm kơ tơdrong pơgơ̆p hăm Kră Yang jing minh hla ar chih pơkăm pơkă: “Kon pơm tơdrong ‘nâu, păng Kră Yang gô ăn kơ kon tơdrong ‘noh.” Mă lei, jơhngơ̆m đơ̆ng ‘Bok Kei-Dei tih să hloh kơ dôm hơgăt mă đơ̆ng lu bơ̆n tơlĕch hơmet. Sư ăn kơ lu bơ̆n dôm tơmam apah gĭt kăl, ưh kơ trŏ yua kơ lu bơ̆n đei krao apinh lơ tôm, na hmă đĕch yua kơ Sư jơ̆ mĭnh ‘nu bơngai ‘Bă ‘lơ̆ng rŏ tơpă.

Năr ‘nâu, năr 30/05/2026, tơdrong tơdă Amăn Jơ Krao Khan Rim Năr, apinh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jeanette Levellie kơ̆l ‘bai KƠPLAH ĐEI PŬN HIÔK TRUH ADROL KƠ NĂR APĬNH

“Adrol kơ lu sư krao apinh; Inh gô tơl tơwih nơ̆r lu sư. To lu sư oei pơma, Inh kơtơ̆ng bơih.” (Êsai 65:24)

Akăn yŏng inh anăn Cindy, jơ̆ mĕ kơ ‘bar ‘nu kon- minh ‘nu drŏnglo, minh ‘nu drŏkăn. Kon sư kŭm wă mơ̆t lăm sơnăm khŭl mơlôh. Dang ei, sư rơhing păng chang hơmĕng kơ đei thim minh ‘nu kon dơ̆ng. Mă lei klo sư ưh kơ drơ̆ng hơdai. Sư khan hnam dơnŏ đei tôm mah bơih păng lăp đon hăm tơdrong arih dang ei. Hơdai noh, wă yak mơ̆t lăm sơnăm 40, sư kŭm ưh kơ wă đei thim kon ‘lơ̆p.

Mă lei mŏ Cindy ưh kơ đei bơ̆l hăl. Rơhing gah minh ‘nu bơngai ‘lơ̆p đei ‘net ‘lŏ lăm jơhngơ̆m sư, ưh kơ đei kiơ gơh pĭt lê̆.

Tuch luch, bơngai klo đei tơlĕch minh tơdrong proh hơmet mă sư lui tơpă khan gô pơm kơ akăn sư đei kơdŭn tơrŏng: “Trŏ bơih, ba gô pơlong minh wơ̆t tuch luch. Mă lei hăm tơdrong pơkă: ‘noh athei jơ̆ minh ‘nu kon drŏkăn, kon athei rơneh adrol kơ ‘blŏk kơ năr rơneh kơplah mă 40 inh, păng oh athei tơpŭ kon lăm trŏ kơ năr Tơdrâu wă kơ ‘nhŏng ưh kơ kăl kơ pơdơh kơjang kơplah ba oh năm tơ hnam pơgang.”

“Oh drơ̆ng!”- Cindy hiĕk păng tơl tơwih, ti sư pơih hlak sơ̆p hla ar chih hơmet tơmam yua kơ hơ’lơ̆p, ‘bơ̆r hơri ‘bĕnh tơdrong chang hơmĕng.

Tơsĭn khei đơ̆ng rŏng, ‘nhŏng Lance kơ drăt ‘brĕng yua kơ minh tơdrong hơtŭt hơdar lăm hơngiĕng. “‘Nhŏng tam đei hơmet năm sơng iŏk kon ưh?” Mŏ Cindy jet. Gơsơ̆ năr ‘noh, kon drŏkăn Tiffany June nhơ̆m kơplah ‘nao tơ pŭ. ‘Noh jơ̆ minh năr Tơdrâu, 12 khei 8 sơnăm 1999- ‘nao trŏ ‘bar năr adrol kơ ‘nhŏng Lance tơ’bưh 40 sơnăm.

Kơplah ‘nhŏng Lance roi kơ inh mơ̆ng hơ’mon ‘nâu, inh ưh kơ băt lei mŏ Cindy đei krao khan wă kơ Kră Yang bơ̆jang păng pơm kơ ‘nhŏng kŭm drơ̆ng hơdai hăm tơdrong chang gô đei thim kon ‘lơ̆p dah ưh. ‘Nhŏng Lance tơ treh kơ̆l: “Kiơ̆ ‘nhŏng băt lei ưh.”

Liơ ‘nei?

Tơdrong ‘nâu đei pơlong lăng tơpă dôm kơ tơdrong hlôi mơn đei hăm Kră Yang mă inh đơ̆ng đei. Inh trŏ lui khan kon bơngai lăp sơng iŏk trŏ tơpă dôm tơdrong kiơ kơdih wă kơplah lu sư tơpă pơyơ̆r nơ̆r krao apinh kơ ‘Bok Kei-Dei. Inh lui tơpă khan tơdrong tơpŭ kơ Tiffany ưh kơ trŏ yua kơ blư thar đĕch dah tơdrong pŭn, thoi noh na lăp đei minh nơ̆r tơl đĕch: ‘Bok Kei-Dei đei tuh ăn pŭn kơ ‘nhŏng Lance păng mŏ Cindy hmă đĕch yua kơ Sư ‘mêm mơnat păng wă ăn pŭn hiôk kơ lu sư. Chih đĭ.

Yua kơ liơ tơdrong ‘nâu đei pơm kơ inh tơchĕng tơtăm? Yua kơ kon bơngai jơ̆ ling lang ‘maih wă minh tơdrong tơpăt kiơ̆ thoi “rei gô đei”- minh tơmam gĭl gŭl kăl kơ đei tơpăt. Dah inh chu yom Kră Yang păng lui yom Sư hăm đĭ chăl arih inh, inh gơh đei tơdrong chang hơmĕng Sư sơng iŏk dôm nơ̆r krao khan “ưh kơ gơh tơchĕng”- thoi kơ tơpŭ kon drŏkăn trŏ kơ năr, trŏ kơ jơ adrol kơ năr ‘blŏk kơnăr tơpŭ kơ ‘bă. Dah minh ‘nu bơngai đei sơng iŏk tơdrong lu sư hơpơi wă mă khan adrol kơplah lu sư tơlĕch nơ̆r krao apinh, lei tơdrong ‘noh đei pơma ăn tơdrong kiơ?

Ưh kơ trŏ dôm tơdrong jang bơ̆jang kơ Kră Yang ưh kơ đei yua, kŭm ưh kơ trŏ lu bơ̆n ưh kăl krao khan kơ dôm tơdrong kăl yua đơ̆ng bơ̆n. Na tơpă hmă đĕch jơ̆: Kră Yang jơ̆ ‘Bok Kei-Dei- Sư đei tơdrong pơgơ̆r păng pơm tôm tơdrong kiơ Sư wă.

Inh lui khan Kră Yang đei lăp đon kơplah ăn kơ ‘nhŏng Lance păng mŏ Cindy trŏ tơpă dôm tơdrong kiơ sư rơhing, yua kơ Sư jơ̆ ‘Bă ‘mêm mơnat, Sư hơ iă ‘bôh kon sư hiôk chơt. Sư jơ̆ ‘Bok Kei-Dei ‘lơ̆ng rŏ, Tơ’ngla ăn pŭn hiôk kơ đĭ đăng kon bơngai, ưh kơ sĭ lăp hơdrô̆ kơ dôm lu bơngai krao apinh Sư. Trŏ thoi Sơ̆p Hla Bơar Nơ̆r ‘Bok Kei-Dei đei chih: “Sư ăn măt ‘năr pơchrang hơdah kơ đĭ-đăng bơngai, mă bơngai ‘lơ̆ng mă bơngai kơnê̆. Sư ăn đak ‘mi lei-lăi mơ̆n ưh kơ ‘mêm kơ bu wă pơdê bu ôh.” (Mathiơ 5:45). Lăm tơdrong ‘nâu, “măt ‘năr” păng “đak ‘mi pŭn hiôk” đơ̆ng Sư đei ‘măn lăm rup minh ‘nu bơngai ‘lơ̆p!

Tơdrong tơpŭ kơ minh ‘nu bơngai ‘lơ̆p ưh kơ trŏ yua kơ blư thar, na jơ̆ tơdrong tơ’bôh ăn kơ nơ̆r pơkă lăm Êsai 65:24: “Adrol kơ lu sư krao apinh; Inh gô tơl tơwih nơ̆r lu sư To lu sư oei pơma, Inh kơtơ̆ng bơih.” Tơpă jơ̆, mă khan mŏ Cindy đei tơlĕch nơ̆r krao khan tơpă dah ưh, lei rơhing tơlăm jrŭ lăm jơhngơ̆m sư đei Kră Yang ‘bôh băt. ‘Bok kei-Dei đei ăn pŭn hiôk kơ lu sư hmă đĕch yua kơ Sư jơ̆ ‘Bă ‘mêm mơnat. Mưh lăp lu bơ̆n tơchĕng hơwơ̆l khan tơdrong pŭn hiôk đơ̆ng Kră Yang jơ̆ “tơmam apah” kơ tơdrong tơpăt đơ̆ng bơ̆n, mă lei tơpă, Sư ăn pŭn hiôk yua kơ Sư jơ̆ ‘lơ̆ng tơpăt.

Tơpă bơih, tơdrong pơgơ̆p hăm Kră Yang, tơdrong bơ̆jang kơ Kră Yang, păng tơdrong arih krao khan rim năr đơ̆ng lu bơ̆n oei ling lang gĭt kăl. Mă lei hơ’mon đơ̆ng hnam dơnŏ Lance păng Cindy tơ’blŏk kơ lu bơ̆n khan: Kră Yang ưh kơ đei hơgăt yua kơ tơdrong tơchĕng đơ̆ng kon bơngai. Sư jơ̆ ‘Bok Kei, Tơ’ngla pơgơ̆r, păng jơ̆ Tơ’ngla gơh pơm dôm tơdrong hloh kơ dôm tơdrong chang hơmĕng.
Tơdrong ‘lơ̆ng rŏ hloh kơ tơdrong hlôh đơ̆ng Kră Yang gô đei pơm kơ ih ‘maih wă dan đĭ tơdrong lui ngeh păng chang hơmĕng lăm Sư lơ hloh dơ̆ng dah liơ? Dah ‘Bok Kei-Dei đei pơrơ̆ng ăn kơ minh ‘nu bơngai tơdrong jơhngơ̆m lu sư hơpơi wă mă khan kơplah lu sư ưh tim mă tam krao apinh, lei lu bơ̆n, dôm lu bơngai gah Kră Yang, rai đei tơm tơdrong wă jơhngơ̆m kơjăp năm jê̆ anih tơdrong mơnat ăn. Tơdrong ‘lơ̆ng rŏ hloh kơ tơdrong hlôh đơ̆ng Kră Yang ưh kơ trŏ jơ̆ tơdrong pơm kơ lu bơ̆n ‘maih wă dan đĭ tơdrong lui ngeh lăm Sư, Tơ’ngla ‘mêm kơ lu bơ̆n hloh kơ kơdih lu bơ̆n ‘mêm kơ akâu jăn bơ̆n, dah liơ?

Apĭnh đĭ đăng krao khan hơdai: Kơ kuh kơ Kră Yang jơ̆ ‘Bă mơnat kơ kon, kon bơnê kơ Ih yua kơ Ih jơ̆ Tơ’ngla ‘lơ̆ng rŏ hloh kơ dôm tơdrong hlôh băt kon. Bơnê kơ Kră Yang yua kơ mưh lăp Ih tơl tơwih hloi dôm tơdrong hơpơi wă lăm jrŭ jơhngơ̆m kon mă kon ưh tim mă tam tơlĕch nơ̆r. Dang ei kon apinh dan đĭ tơdrong arih, dôm kơ rơhing păng hăm dôm tơdrong kăl yua dang ei hloi đơ̆ng kon lăm ti ih. Apinh ăn kơ kon minh đon lui ‘nao plơ̆ng, ăn kơ kon băt chang gô dôm tơdrong hlĭch chrơp đơ̆ng anih Sư rim năr. Kon lui khan măt ‘năr păng đak ‘mi pŭn hiôk gô tuh ro lăm chăl arih kon lăm trŏ jơ năr Ih rơih iŏk. Kon kŭp kơ̆l krao khan hăm anăn Yang Yêsu Krist, Amen.

Ơ lu bơngai mơ̆ng mă ‘mêm kơ eng, Kră Yang ưh kơ trŏ jơ̆ ‘bok “yang ŭnh kơđeng” lăp ‘bôh kơplah lu bơ̆n ‘maih apinh minh tơdrong hơpơi. Sư jơ̆ ‘Bok Kei-Dei Băt Tôm, Tơ’ngla ‘bôh băt rim kơ jơhngơ̆m tơhôih, rim kơ tơdrong rơhing lăm jrŭ hloh mă mưh lăp lu bơ̆n oei ưh tim mă tam tơlĕch nơ̆r. Dah ih oei gleh lap yua kơ nơ̆r krao khan đơ̆ng kơdih ưh tim mă đei tơl tơwih, dah oei adrin arih mă ‘lơ̆ng wă “ kơ trŏ ” hăm tơdrong pŭn hiôk đơ̆ng Sư, lei dang ei athei pơdơh păng ăn jơhngơ̆m tơchĕng ‘bơ̆t anăp Kră Yang. Athei lăng dôm kơ măt ‘năr tơ ‘nguaih to, dôm kơ dui jơhngơ̆m hơdai lăm plei nuih- ‘noh hăm trŏ jơ̆ tơdrong mơnat ăn mă Sư đei ăn đĕch mă khan lu bơ̆n ưh tim mă đei krao apinh kiơ? Athei pơ̆n nuih yak năm tơ anih tơdrong mơnat ăn đĕch wă lăng tơdrong ‘lơ̆ng rŏ jrŭ să đơ̆ng Sư.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.