Oh mi dòn sơl kờp nă bol he la dô pơnah geh crap bal dờng mang tom dô nơm rùp sơniọ dờng ơnàng mơ Bèp Đăng Trồ gam lơh wĭl tơl? Gơs tŭ, bol he sền gọ̆ he ơm ìs, hala sền gŏ ală broă he lơh mìng la bọh ơn tom tơrlung. Bol he lùp ìs: lơh cơng dô nă, bar nă cau in dòn Yàng gen gơs ñchi kwơ taih? Mơ ya, Lơgar Trồ gơs dô gơtha “kwơ màng” pha is ngan. Ò gơs bơta pơnđơl pràn lơi la ò kwơ tom tŭ geh ơn tơmtoh, mơ ò gơs hwềng soàn lơi la dềt rhên tom tŭ ntào di đap bơta kòñ gơboh Kơnràñ dê.

Ngai do, ngai 31/05/2026, Bơta Hoi Dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Wally Odum dê bơh tơnggume BƠTA KAS MÀNG DÔ NƠM HWỀNG SOÀN DI.

“Añ đơs mơ bol mê, kung behơ̆ sơl dê đap ală cau gơnrơh Yàng Tom Trồ dê gơs hòn-chò bơh dô nă cau glài gơjrañ sang-glài.” (Luka 15:10)

Oă năm lài, rơndeh Mercedes Benz neh gơs dô rùp pơnđàng lơh cau in gơdan kah sùm: bol khai lòi rơndeh he dê gơtơm song di thèng geh bơ̆t mơ lŭ mơ bràs kơ̆ cê tom dô bơta lòng sền bơta ring-lơngai. Tom tŭ sền gọ̆ rùp sơnio pơnah să rơndeh gơ rgơi lơh broă pràn ngan mơ ya gơkòl ală cau sò-tơm tơm pơrlòng nàng lơh dròm bal, dô nă cau lùp mơ cih neh lùp cau ala mat hiu rơndeh dê lah ñchi bơh tai bol khai ò dan sră lơh cơng rơndeh la bol khai di lơm. Ồng mìng ho wơl: “Tài bơh hơđang rài kis do gơs ală bơta dờng mang ngan nàng rgơi prap ìs he in.”

Jơnau yal bơh Jơnau Niam kung cèng bơta kwơ màng behơ̆ sơl. Gơs tŭ, tài bơh rngòt hala bơta òs mòng, bol he ò kơlôi gen tàng neh prap kơ̆ phan màng bơta dọ̆ng-klàs ìs he dê kung be dô nơm phan màng pal prap tom bài. Hiu Jum Goh bồ dà sơnròp kung neh ơm gơn behơ̆ di đap Gơnoar Sồr Yàng Dọ̆ng-Klàs Jesu dê. Digơlan hơ̆ la bơta kơlôi sơnơng jơh kòn mơnùs dê-bol he òs sac rwah bơta ring-lơngai mơ ò khin lik bơh kơnhwàl bơta lơngap-lơngai. Bơh sơnròp, ală cau dòn mìng ơm gùt dar tom Jerusalem, jơl tus di tŭ do bơta gơlik gơs tom sră Broă Cau Bơto tap 8. Yàng Tom Trồ neh ai gơnoar càl rbut kup kơryan gơguh bơklơ̆n Hiu Jum Goh pal nrah-nrĭng lam bă tiah, cèng bol khai mùt sŏng hơ kơnhwal Samari nàng Jơnau Niam geh bơto yal.

Tom tap 8, Philip tơlik mat be dô bơta lơh cơng loh lang nùs nhơm ngac ngar. Neh geh sac rwah la dô nă tom poh nă dong gar nàng sền gar dong kơl ală cau ur pơnrau, mơ ya Philip ò tŭ lơi lòi he gơkòl kơryan tom broă lơh sră pơàr be òs. Nùs nhơm ồng sùm duh hơng ồs bơto yal. Dô nă ồng neh mut tom kơnhwàl cau Samari-tiah òs gơkòl cau Juđa sền òsơp-mơ ting hơ̆, ồng neh chu ồs bơta bơtào tơngguh pràn ngan. Yàng Tom Trồ neh lơh cơng bơta dòn ồng dê mơ oă ngan hwềng soàn rê wơl mơ ală tềl krơi bîng gơnap-gơnoar geh rang tơlik bal.

Jơh ƀòn Samari neh tơm pơrgơl mìng tài bơh dô nă cau rcang sir tơmpà Jơnau Niam. Broă 8:8 cih wơl dô công nha lơngap-lơngai ngan: “Gen tang, tom ƀòn bîng bơta hòn-chò.” Tom tŭ kơlôi sơnơng bơh sèng Sră do, añ dòn lah cau lơi tom bol he kung ji-gloh tơhir sền gọ̆ bơta dròm behơ̆ gơlik gơs tom tiah he gam kìs: bơta còp rwang crih-crài Yàng di, bơta hòn-chò bơh đăng trồ rơp lơh bîng tơl ală tiah hut-hung mơ lài òr mìng la bơta ƀassil bơh tồi glài mơ bơta kơlôi rcang kơnjơ̆-kơnjùt.

Bơta ai lơh krơi ngan tom tap 8 la tom tŭ bơta bơtào tơngguh wơl gam pràn ngan, Yàng Tom Trồ sồr cèng Philip lik bơh hơ̆. Kơnràñ sồr ồng tus tom blang bràs đah đơm Israel nàng tìp dô nă cau Êtiôpi lòt tom gùng rê hiu.

Cau do la kwang dơng sền gar phan mơna dô nơm lơgar dê. Ồng neh dòp dô pơnah phan mơna dềt nàng dòp geh dap sră pồt gơnoar hwơr Esai, tài bơh tŭ hơ̆ Sră Goh cih mơ tê la kàs ngan. Bulah pas-sơm mơ gơs gơnoar pràn, mơ ya ồng gơs dô bơta kalkê: ồng ò rgơi wă wơng bơta he neh sền.

Yàng Tom Trồ neh cèng Philip lik bơh blang srê bơto yal dơng ngan, mìng nàng rgơi tơmtìp mơ dô hwềng soàn ơm ìs. Añ nrơt-nrơl di đap bơta sền gar wil tơl Kơnràñ dê hơđang kờp nă cau. Să tòm Yàng Dọ̆ng-Klàs Jesu, Bơtau neh bơto sồr rbô nă cau in, kung neh ơn jơh trồ nggùl ngai dơng mang mìng nàng tombơh bơr mơ dô nă cau ur tom tơrlung dà Jakôp. Cau ur hơ̆ gơs dô rài kis neh rlau ò niam, mơ ya mò geh sền dơng mang ngan di đap Kơnràñ.

Bol he ƀuôn ngan sền mơ tơnliah di bơta pràn kơldang dô nă cau di, mơ ya Yàng Tom Trồ gen ò tŭ lơi. Kơnràñ còp rwang ƀòn dơng Samari bal mơ ală têl krơi, mơ ya Kơnràñ kung sền gọ̆ bơta pal cang dô nă cau Êtiôpi gam nggui hơđang rơndeh ơseh lòt gan blang bràs. Ồng hơ̆ pal cang bơta git loh, mơ Philip neh rcang sir tus tiah lơi Yàng sồr.

Bơta yal yau Jơnau Niam neh cih kah sơnđan ală cau wă loh ngan bơta kas mang ò git jơh “dô nơm hwềng soàn” di.

Lài ngan pal đơs tus C.T.Studd-cau tiàng pơnro geh yal sùm bơh kơnhơl plai mơng dà (bóng gậy nuớc) lơgar Anh di, la sơmañ àng bơh di tŭ kơnòm dêt. Ồng gơs dô jơtai àng gơcrà di đap. Mơ ya, tơnơ̆ mơ tŭ geh kơno bơh Yàng tom Klơng dơng Cambridge, ồng neh ò pơrlai mơ sang lòi jơh broă lơh àng gơcrà hơ̆ nàng ơn să lòt tom lơgar Lô (Trung Quốc). Tom tŭ geh pơrdòn dô phan jơtai dơng ngan (pơgap mơ 500.000 USD tŭ do), ồng neh ơn jơh wil tơl khà jên hơ̆ mìng tom 24 jơ. Tom tŭ rê wơl lơgar Anh, mơ lòt gan Phi Châu, oă cau kòñ gơboh neh lah pơrhơng ồng rơp roh bơta kis tom tiah hơ̆. Ồng mìng ho wơl lah he ji-gloh tơhir dòp geh tŭ lơmpah geh kis mơ chơt bơh Yàng Dọ̆ng-Klàs Jesu. C.T Studd dòn di bơta mơ Yàng kòñ kờp nă bol he dòn: Yàng Tom Trồ kòñ jơh kòp nă cau geh kơno Jơnau Niam lah Bơtau Krist neh chơt bơh bol khai.

Philip neh lik bơh Jerusalem, mơ tŭ do ồng rcang sir săng jơh bơta bơto yal gơlik công nha tài bơh Yàng kơlôi tus di dô nă cau. Cau kwang Êtiôpi neh dòn Yàng, kong lơh ƀaptem mơ pơnjat gùng lòt rê hiu. Philip ò tŭ lơi tìp wơl tai ồng. Mơ ya, tom tŭ ală cau lòt bơto yal sơnròp ơn jơng tus Êtiôpi tơnơ̆ do, bol khai nrơt-nrơl sền gọ̆ dô Hiu Jum Goh neh gơs mat bơh lai hơ̆. Dô nă cau neh rê wơl mơ tom pơrgơl jơh dô lơgar.

Bol he ò tŭ lơi git bơta git jak dô nă cau mơ Yàng ngui bol he nàng bơt bơtào. Luis Palau la cau lòt bơto yal tiàng pơnro bal mơ ală bơta rơndap bơto yal dơng ală lơgar. Ồng sơntòm gơnoar broă bơh năm 18 sơnăm gan broă tơmpà Jơnau Niam tom gùng ƀòn Buenos Aires, Argentina. Tơlak tơman cau neh kơno ồng bơto gan ală bơta pơjum, radio, rùp sơnio mơ internet. Ồng neh yal bơh ală cau lòt bơto yal neh tus tom kơnhwal he di:

“Ală cau lòt bơto yal cau Anh neh cèng hiu nhă añ tus mơ Yàng. Añ gam kah tom tŭ hơ̆ añ gam la dô nă kòn dềt, nggui di cơnòng sơnròp hơđap sền di cau lòt bơto yal nđàc sơngìt hơ̆. Digùl bơta ji-duh tơràl kơnhai prăng Nam Mỹ di, ồng kư dòn song mơ ao vest mbal, dà pơhal oă ngan. Añ lùp ìs: ‘Ñchi bơh tai ồng ò hò ao jruh taih?’ Mơ ya dô nă cau Anh song ngan tŭ hơ̆ pal soh ao jruh mơ pal kong tus lồi dut. Ồng đơs jơnau Tây Ban Nha rlŭ rlun mơ gơs ală bơta òs mong crih crài lơgar ndai di. Mơ ya bơh kơnòm di ồng hơ̆, bèp añ neh geh mut tom lơgar trồ.”
Ñcau rgơi kơlôi lah dô nă kơnòm dềt nggui iat cau lòt bơto yal ƀă lĭa nam hơ̆ neh bư tus jơh dunnia? Mơ Yàng Tom Trồ git. Mơ cau lòt bơto yal lơi hơ̆ ̆hơđang trồ rơp dòp geh phan ban-phan ban cau dĭ git sền dơng mang bơta kas mang dô nă hwềng soàn mơ rcang sir tus di tiah Yàng sồr lòt.

C.Summer Wemp kung neh tompà dô bơta git lam kalkê hŭi ngan digah dà lêng Jacksonville, Florida: “Tom tŭ sền gọ̆ gơs cau pơnđơl nàng re bơh digùl dà dơng, cau dong tă neh ò ơm bơdơh kơlôi sơnơng dô ềt lơi, ai mo têl sơnio mơ săng să he tom dà lềng. Mìng dô ềt jây, dô nơm rơndeh dong cau kòp tus mo mơ pe nă cau dong ndai kung re nàng dong kơl. Bol khai neh dong tă ồng hơ̆.

Bơta hơ̆ neh gơlik gơs nđò dơ̆ behơ̆ tom ngai hơ̆ tài bơh dà guh mơ gơpài pràn ngan dô bă nisơna. Mơ oh mi git sơl, tom tiah dong tă hơ̆, gơs dô sèng jơnau geh cih mơ dà phông: “DILAH GAM GƠN, KƯ LÒT TĔ!”

Sèng jơnau hơ̆ kung be dô jơnau tơngkah pràn ngan kờp nă bol he in: bañ ơm gơn di đap jơnau hòi jà dong tă hwềng soàn.

Do la jơnau đơs geh sền la jơnau ai rài kis in mơ jơh ală cau dòn pal cih kah tom nùs. Bol he òs ơm gơn, kơlôi sơwì sền cau hơ̆ di pal nàng geh tơmpà hala ò, hala he gơs tơl pràn hala ò. Mơ ya dunnia gùt dar gam gơkrăm tom kơrwàl dà tồi glài di.

Dan jà bolhe dô nùs bal tòm bơta hòi dan: Khoai Yàng, ưnngai Kơnràñ tài bơh digùl dà lêng cau dơng ơnàng, Kơnràñ neh hoi sơnđăn kòn mơ kòñ gơboh kòn mơ bơta kòñ gơboh ò git jơh ò git lồi. Ơ Yàng, dan toh glài kòn in tài bơh ală tŭ kòn pơrwài, mìng kòñ prap kơ̆ bơta hòn-chò dong-klàs tom kơrwàl ring-lơngai ìs he di. Dan ai kòn in dô nùs nhơm rcang sir ơn să tài bơh ală hwềng soàn gam roh rui digùl blang bràs rài kis. Bulah ngai do kòn mìng tus mơ dô nă cau lơm, kòn kung rơp jơh nùs bal mơ bơta kòñ gơboh mơ yal bơh sơnđan Kơnràñ. Kòn jơh nùs hoi dan tom sơnđan Yàng Jesu Krist, Amen.

Ơ jơh ală ồng mò, oh mi kòñ gơboh, bañ ơm gơn tus di tŭ să tòm he sền gọ̆ he wĭl tơl hala geh rcang sir wil tơl jơh ală bơta pal cang gen song khin ơn să, kung bañ ơm gơn jơl tus di tŭ ñă ntào di đap mpôl oă gơklŏ song rcang sir yal tơnggit. Bơtê tĕ mbe sền dơng mang di “kon số dùl”, tài bơh tom lơgar đang trồ, mìng dô hwềng soàn geh dong tơwài lơm kung neh kas mang rlau mơ ală bơta gơklŏ ryŭ ryơm mơ phan màng dunnia dê tơrgom wơl. Yàng Tom Trồ gam joi jat ală cau khin ơn să he mìng tài bơh dô nă cau gam roh rui. Bơh ò git lah, hwềng soàn mìng dùl lơm hơ̆ mơ oh mi neh ƀư tus ngai do rơp gơlik gơs gar sơntil tơm pơrgơl jơh dô hiu nhă, dô mpôl cau oă, hala dô nơm lơgar tom ngai tơnơ̆. Kơnràñ gam gơn oh mi, lòt tĕ!

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.