31.05 Amăn Jơ Krao Khan Rim Năr: GĬT GĂL KƠ MINH ‘NU BƠHNGOL

Ih hăm lui ngeh rim ‘nu lu bơ̆n jơ̆ đei pơjing gĭt kăl đơ̆ng ‘Bok Kei-Dei oei wă pơkeh ưh? Kư̆m đei, lu bơ̆n mơn kơ minh adrô̆ đĕch, dah mơn kơdih pơm dôm tơdrong đei yua iĕ đĕch. Lu bơ̆n đei jet kơdih: pơm kơdranh ăn kơ minh, ‘bar ‘nu bơngai lui kơ Kră Yang đei yua kiơ? Mălei, Plei ‘Lơ̆ng đei pơma khan “gĭt tơpă” phara dêh. Ưh kơ đei tơdrong adrin ayơ mă ưh kơ đei yua kơplah dan trŏ kơ anih, păng ưh kơ đei bơhngol ayơ iĕ kơplah dơ̆ng ‘bơ̆t anăp tơdrong ‘mêm Kră Yang.

Năr ‘nâu, ‘năr 31/05/2026, tơdrong tơdă Amăn Jơ Krao Khan Rim Năr, apinh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Wally Odum kơ̆l ‘bai GĬT GĂL KƠ MINH ‘NU BƠHNGOL

“Kư̆m thoi noh mơ̆n lu linh jang ‘lơ̆ng ‘Bok Kei-Dei hiôk tơpă mă ‘bôh minh ‘nu bơngai yoch băt băi tơbral kơdih tơdrong yoch.” (Luka 15:10)

Đei lơ sơnăm adrol, tơ’ngla pơm gre Mercedes-Benz đei roi tơ’bôh ‘lơ̆ng tơpă: lu sư ăn gre tâm tơklă tơnăr pơm hăm ‘bêtŏng kơplah pơlong lăng gre hăm kơjăp ‘lơ̆ng. Kơplah ‘bôh akâu gre pơm ‘lơ̆ng na đei lơ đe nai pơm rok, minh ‘nu bơngai đei jet tơ’ngla sư, yua kơ kiơ iĕm ưh kơ pơm hla bơar bơwei tơdrong pơjing gre noh. Na sư tơl: “Yua kơ tôm tơmam tơ kơpal teh ‘nâu gĭt kăl dêh wă bơwei ăn kơdih.”

Bơtho gah Tơdrong ‘Nao ‘Lơ̆ng kư̆m đei gĭt găl thoi noh. Kư̆m đei, yua kơ mơlâu dah juăt kơpơm, lu bơ̆n bơwei kơjăp tơdrong dŏng pơklaih ăn kơdih nhen thoi tơmam gĭt tah lăm krôh. Mă Hnam Akŭm blŭng a kư̆m đei thoi noh, ‘bơ̆t anăp Yang Yêsu wơh athei năm bơtho. Rŏ lăng noh jơ̆ đơ̆ng jơhngơ̆m đei bơih lăm kon bơngai – lu bơ̆n ngăl rơih iŏk tơdrong hiôk hơ đơ̆ng păng ưh kơ ‘maih lĕch đơ̆ng anih hiôk noh. Blŭng a, lu bơngai lui oei lăm pơlei Jerusalem đĕch, truh tơ đei roi tơ’bôh lăm hla bơar Tơdrong jang chăl 8. ‘Bok Kei-Dei ăn tơdrong rôp phak truh na Hnam Akŭm tơklah tơklang jơ̆p kơ anih, lu sư kơdâu năm tơ pơlei Samari bơtho tơdrong ‘Nao ‘Lơ̆ng tơ noh.

Lăm chăl 8, Philip pơsĭt tơ’bôh tơdrong pơnam sư. Đêl đei rơih iŏk lăm tơpơh ‘nu bơngai tơgŭm ăn kơ lu yă adro, mălei Philip ưh kơ đei layơ đei tơdrong pơgăn lăm tơdrong bơtho sư. Jơhngơ̆m sư ling lang ‘nă hal kơ năm bơtho. Minh adrô̆ sư năm bơtho tơ pơlei Samari anih mă bơngai Isơrael pơdê – păng tơ noh, sư bơtho đei lơ bơngai lui kơ Kră Yang. ‘Bok Kei-Dei đei pơsĭt ăn kơ sư đei lơ bơhngol lui păng dôm lu tơdrong mơsêh đei pơm hơdai sư.

Pơlei Samari đei tơplih yua kơ đơ̆ng minh ‘nu bơngai đei jơhngơ̆m ră roi Tơdrong ‘Nao ‘Lơ̆ng. Tơdrong jang 8:8 đei chih tơ’bôh tơdrong pŭn hiôk: “Na pơlei ei chơt hiôk tơpă.” Kơplah tơchĕng pơwao kơ nơ̆r ‘nâu, inh lui ngeh bu bu lăm lu bơ̆n kư̆m đei rơhing đei tơdrong thoi noh tơ anih lu bơ̆n oei arih: tơdrong Kră Yang oei hơdai, jơhngơ̆m chơt hiôk đơ̆ng Sư gô tơ’bĕnh lăm jơhngơ̆m rơhông mă ki sơ̆ oei mơlâu păng tơ tok tơ tăm oei trăp trĭn.

Tơdrong hlĭch lăm chăl 8 kơplah tơdrong lui oei tưk tơiung pran tơ noh, ‘Bok Kei-Dei athei Philip lĕch đơ̆ng pơlei noh. Kră Yang wơh Philip năm tơ gah yă nơ̆m kơ Isơrael tơ’bơ̆p bơngai Êthiôpia kơplah oei yak rok trong wă brŏk tơhnam.

Bơngai ‘nâu jơ̆ yŏng wei lăng mŭk tơmam dêh char sư. Sư đei tơlĕch tŏ sĕt tơmam wă răt sơ̆p hla bơar Êsai, yua kơplah noh sơ̆p hla bơar ‘Bok Kei-Dei chih păng ti kăp jên dêh. Mă khan mơdrŏng păng yŏng pơgơ̆r, sư kư̆m đei tơdrong yoch kơnê̆: sư ưh kơ hlôh kơnơ̆r sư oei đŏk noh.

‘Bok Kei-Dei ba Philip lĕch đơ̆ng anih bơtho tih, wă tơ’bơ̆p minh ‘nu bơhngol đĕch. Inh ‘bôh hơdrôt kơ tơdrong wei lăng ‘lơ̆ng tơpă đơ̆ng Kră Yang ăn kơ rim ‘nu kơdih kơdih. Tơm đơ̆ng Yang Yêsu, Tơ’ngla bơtho kơ rơbâu ‘nu bơngai, kư̆m đei ‘măn jơ ‘năr dơ̆ng pơma dơnuh hăm bơngai drŏkăn ‘bơ̆t đak kuay Jakôp. Bơngai drŏkăn noh đêl đei tơdrong arih ưh kơ ‘lơ̆ng, mă lei sư noh gĭt găl lăm măt Kră Yang.

Lu bơ̆n ngăl ‘bônh kơ pơma tơjur minh ‘nu bơngai, mălei ‘Bok Kei-Dei ưh kơ đei layơ pơm thoi noh. Sư năm ngôi hơpong tơ pơlei Samari hăm tơdrong mơsêh mơyang, na Sư kư̆m ‘bôh tơdrong kăl bơngai Êthiôpia oei ngôi tơ kơpal gre aseh tơ rok trong tơmăn glă. ‘Bok noh kăl kơ tơdrong hlôh wao, na Philip pơih jơhngơ̆m yak năm tơrim anih kiơ̆ kơ Kră Yang wơh.

Đơ̆ng sơ̆ Tơdrong ‘Nao ‘lơ̆ng đei chih lơ anăn lu bơngai hlôh ưh kơ đei la yơ tôch kơ “minh ‘nu bơhngol”.

Adrol hloh roi gah C.T. Studd – đe ư ang gah teh ‘bŏng lŏng tơ teh đak Ăng gle, đe pôk pơ ư sư đơ̆ng oei tơdăm mơlôh. Sư đei tơdrong jang ‘lơ̆ng tơ anăp. Mălei đơ̆ng rŏng kơ mơ̆ng kơtơ̆ng ră roi gah Kră Yang tơ anih pơhrăm tơ hnam trưng Cambridge, sư ưh kơ đei hmach achăng lê̆ tơdrong jang sư na pơyơ̆r akâu jăn sư năm tơ Trung Quôc. Kơplah đei mŭk tơmam lơ (dang kơ 500.000USD kơplah noh), sư pơyơ̆r đĭ jên noh lăm 24 jơ. Kơplah brŏk tơ teh đak Ăng gle na năm tơ teh đak Phi Châu, lơ bơngai đei pơma khan Ih gô lôch tơnoh. Na sư đei pơma pơ ‘lơ̆ng thoi âu, inh ling lang rơhing đei tơdrong arih păng lôch yua kơ Yang Yêsu. C.T. Studd lui kơ tơdrong mă Kră Yang wă kơ lu bơ̆n lui: ‘Bok Kei-Dei wă kơ rim ‘nu kon bơngai đei kơtơ̆ng băt kơ Tơdrong ‘Nao ‘Lơ̆ng Yang Yêsu lôch yua kơ lu sư.

Philip lĕch đơ̆ng Jêrusalem, na jơ noh sư achăng lê̆ tơdrong ră roi tơdrong ‘nao ‘lơ̆ng Kră Yang tơ noh, yua kơ Kră Yang kăl kơ minh ‘nu bơngai. Yŏng pơgơ̆r Êthiôpia lui kơ Sư, chu iŏk ‘ba tem na yak brŏk tơhnam. Philip pă đei tơ’bơ̆p ‘bok noh dơ̆ng bơih. Mălei bơngai pơtruh nơ̆r ‘Bok Kei-Dei blŭng a năm tơ Êthiôpia đơ̆ng rŏng kơ noh, lu sư ‘bôh hlich, Hnam Akŭm đei bơih. Minh ‘nu bơngai wih brŏk tơ ‘Bok Kei-Dei đei tơplih minh pôm teh đak.

Lu bơ̆n ưh kơ băt bơngai noh đei tơdrong kiơ mă Kră Yang yua lu bơ̆n wă pơjing. Luis Palau jơ̆ bơngai ră roi tơdrong ‘Bok Kei-Dei đe ư ang, ră roi Jơ̆p jang kơ anih. Sư bơ̆jang tơdrong jang đơ̆ng 18 sơnăm ră roi tơdrong ‘Nao Lơ̆ng tơ rok trong pơlei tih Nuenos aires, Argentinan. Đei rơbâu rơngan bơngai mơ̆ng đei tơdă phĕt, radio, pơdah rup tơ tivi păng internet. Sư đei roi tơ’bôh dôm lu bơngai năm bơtho tơ tơpŭng sư.

“Lu ‘bok bơtho tơdrong ‘Bok Kei-Dei bơngai Ăng gle đei tơgŭm ŭnh hnam nhôn lui kơ Kră Yang. Inh oei ‘blŏk kơplah noh inh oei ‘lơ̆p đĕch, tơ oei tơ tang dŏ ‘bơ̆t anăp lăng tơ ‘bok bơtho noh. Kơplah tơ gah yă nơ̆m teh đak Mi oei tŏ dêh, mă sư oei hrŭk hơbăn ao vest hơ’bơ̆l, bơ uh bơ ang lĕch hlơ hlê̆ hlơ hlă. Inh đei jet kơdih: ‘Liơ sư ưh kơ plôh ao hơ’bơ̆l sư?’ mălei minh ‘nu bơngai Ăng gle tơpă athei hrŭk ao hơ’bơ̆l păng chu iŏk tơdrong noh truh tơ keh đang. Sư pơma nơ̆r Tây ‘Ban Nha păng nhen thoi ưh kơ bơngai hmă. Mălei tơm đơ̆ng bơngai drŏ nglo noh, ‘bă inh tŏk tơ plei ‘lơ̆ng.

Bu đei băt adrol, drŏnglo ‘lơ̆p mơ̆ng ‘bok bơtho sơnăm noh sơ̆ mă atŭt ‘bơm lăm teh đak? Thoi noh mă ‘Bok Kei-Dei băt. Păng ‘bok bơtho ayơ noh tơ kơpal plei ‘lơ̆ng đei iŏk tơmam apah – apah kơ minh ‘nu bơngai đam băt kơ gĭt găl kơ bơhngol păng yak năm hloi kơplah Kră Yang wơh.

C. Summer Wemp kư̆m đei klah song đêl đei mơn hlôi ưh kơ đei hiơt tơ jih đak dơsĭ Jacksonville, Florida: “ Kơplah ‘bôh bơngai glơ̆k tơ kơpal đak, bơngai dŏng iŏk pă đei tơchĕng kiơ, sư roi tơbăt na prong tơ lăm đak dơsĭ hloi. Na minh ‘bar yâi đơ̆ng rŏng, đei gre pơgang năm truh păng pêng ‘nu bơngai dŏng tơgŭm iŏk nai kư̆m glơi năm dŏng tơgŭm. Lu sư đei dŏng iŏk bơngai drŏnglo noh.

Tơdrong thoi đei pơlơ̆k minh ‘bar wơ̆t lăm năr noh yua kơ đak huơ̆r jăng dêh. Na ih hăm băt ưh, tơ anih dŏng tơgŭm, đei kơ chư ‘brĕo: “TƠDAH OĔI TAM MĂ PƠ̆N, ATHEI KƯ̆ KƠNĂM!”

Chư noh nhen thoi nơ̆r teh tơ’blŏk ăn kơ rim ‘nu lu bơ̆n: ‘nĕ kơ kơdŭn kơplah đei nơ̆r krao dŏng iŏk bơhngol.

‘Nâu jơ̆ tơm kơ tơdrong pơđơ̆k mă rim ‘nu bơngai lui kăl kơ wei răk lăm jơhngơ̆m. Lu bơ̆n ngăl ‘maih kơdŭn, tơchĕng lăng bơngai noh hăm trŏ kơ ră roi ưh, dah kơdih hăm tôm mah wă ră roi ưh. Mălei jum dăr oei môch lăm đak huơ̆r lăm tơdrong yoch.

Apĭnh đĭ đăng krao khan hơdai: Kơkuh kơ Kră Yang, bơnê kơ Kră Yang tŏk bŏk lơ bơngai, Ih đei krao kon păng ‘mêm kơ kon hăm tơdrong ‘mêm Ih. Kră Yang ơi, apinh huay kơ jô̆ yo kơ kon yua kơ rim wơ̆t kon mơlâu, ‘maih wă bơwei jơhngơ̆m hiôk chơt wă kơ đei dŏng pơklaih ăn kơdih akâu. Apinh ăn kơ kon đei jơhngơ̆m pơ̆n nuih pơyơ̆r akâu yua kơ lu bơhngol oei hiong tơ dêh glă chăl arih. Mă khan năr ‘nâu kon hơtŭt ‘bơm minh ‘nu bơngai đĕch, kon gô adrin tuh đĭ jơhngơ̆m ‘mêm mơnat ră roi anăn Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, ‘nĕ kơ gô kơdih ‘lơ̆ng tôm ‘mơ̆i dah đei tôm mah ‘mơ̆i na pơ̆n pơyơ̆r akâu, kư̆m ‘nĕ kơ gô truh tơ dơ̆ng ‘bơ̆t lơ bơngai ‘mơ̆i na ră roi. Athei pơhrăm iŏk gĭt găl “đơ̆ng kơ sô̆ minh”, yua kơ lăm dêh char plei lơ̆ng, đei minh ‘nu bơhngol đei dŏng pơklaih đĕch kư̆m gĭt găl hloh kơ mŭk tơmam gĭt lăm teh đak ‘nâu. ‘Bok Kei-Dei oei chơchă dôm lu bơngai pơ̆n pơyơ̆r akâu yua kơ minh ‘nu bơngai wơ̆l jrok. Băt kơ kiơ, minh ‘nu bơhngol đĕch mă ih đei ră roi năr ‘nâu gô tơplih hnam dơnŏ, pơlei pơla, dah kư̆m truh tơ dêh char noh tơ anăp ning mônh. Kră Yang oei gô ih, athei kư̆ kơ yak năm!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.