01.06 Amăn Jơ Krao Khan Rim Năr: KƠPLAH ƯH KƠ TÔM MAH JƠ̆ PƠTƠM ĐƠ̆NG BLŬNG-A

Đei mơ’nah lăm chăl arih, lu bơ̆n mơn kơdih oei dơ̆ng ‘bơ̆t anăp mĭnh tơdrong ‘maih wă tih dêh, pŭ iŏk tơdrong trăp, tơdah mă mĭnh tơdrong jang hloh kơ hôh wao kơdih. Lăng tơ lăm tơpang ti, lu bơ̆n tơ-hôih khan: “Dôm âu đĕch wă gơh pơm kiơ?”. Đei bơngai mơ’nah lăng kơdih sư iĕ ioch đĕch na rơih iŏk tơdrong kơdŭn tơ rŏng. Đei mơ’nah ưh kơ pơ̆n pơtơm yua hli kơ pơm gô ưh kơ jing. Păng đei mơ’nah, tơ lăm tơdrong bơ̆jang Kră Yang, lu bơ̆n đei nơ̆r “ưh kơ tôm mah” pơm kơ lu bơ̆n jing lap păng hiong đĭ tơdrong chơt hiôk.

Mălei hlĭch tơpă, đei lơ wơ̆t lăm Sơ̆p Hla Bơ-ar Nơ̆r ‘Bok Kei-Dei, ‘Bok Kei-Dei pơtơm tơdrong jang Sư đơ̆ng tơdrong mă kon bơngai bơ̆n jô̆ khan tŏ sĕt, iĕ ioch… noh bơih jing tơm tơdrong pơtơm ăn kơ tơdrong tih tin mă ưh kơ ngeh. Tơdrong Kră Yang oei chă noh ưh kơ sĭ mĭnh ‘nu bơngai “hơgei tôm mah”, mălei mĭnh jơhngơ̆m wă pơyơ̆r dôm tơdrong bơ̆n đei ăn kơ Sư. Păng lơ mơ’nah, anih mă lu bơ̆n tơchĕng jơ̆ anih hơtŭch yua kơ “ưh kơ tôm mah”, noh tă kơ anih ‘Bok Kei-Dei pơtơm bơtho tơ’bôh lu bơ̆n arih păng đon lui.

Năr ‘nâu, ‘năr 01/06/2026, tơdrong tơdă Amăn Jơ Krao Khan Rim Năr apinh wơ̆n đĭ đăng lu bơ̆n wang pơwao Nơ̆r Kră Yang hăm kơ̆l ‘bai KƠPLAH ƯH KƠ TÔM MAH JƠ̆ PƠTƠM ĐƠ̆NG BLŬNG-A

“Đei minh ‘nu bơngai ‘lơ̆p tơ âu mơ̆n, sư đei pơđăm tŏ ‘bĕng mi hăm ‘bar tŏ ka na liơ mah tôm kơ bơngai lơ?” (Yôhan 6:9)

“Lăp Yêsu ngơk lăng na Sư tơmang ‘bôh bơngai tơpôl lơ luh năm tơ Sư. Na Yêsu khan kơ Philip: “Bơ̆n răt tơmam sa đơ̆ng yơ wă kơ mah ‘me bơngai dôm noh? Philip khan: “Mă ‘bar-hrĕng hlak jên hu kư̆m tam mah ‘mơ̆i răt tơmam sa kơ lu sư, rim ‘nu sa pơgia đĕch kư̆m ưh tam mah ‘mơ̆n.” Minh ‘nu bơngai pơhrăm păng Yêsu nai, anăn sư Andrê, sư oh Pêtrôs, sư khan kơ Yêsu: “Đei minh ‘nu bơngai hơ’lơ̆p tơ âu mơ̆n, sư đei pơđăm tŏ ‘bĕng mi hăm ‘bar tŏ ka na liơ mah tôm kơ bơngai lơ?” (Yôhan 6:5,7-9)

Ih hăm ‘bôh mĭnh chăl lăm Sơ̆p Hla Bơ-ar Nơ̆r ‘Bok Kei-Dei âu ưh kơ pơma pơsĭt gah tơdrong kơ’bah kơ’bôch, mălei ăn kơ bơ̆n ‘bôh pơtơm blŭng-a ‘Bok Kei-Dei juăt tơ lu anih mă lu bơ̆n ngăl khan kơdih ưh kơ kăl.

Kơplah đŏk tơdrong hơ’mon Kră Yang pơm ‘bĕng jing lơ, tơdrong mă pơm kơ inh dơ̆ng ‘nhrơ̆t ưh kơ trŏ kơ tơdrong mơsêh tuch luch, kư̆m ưh kơ kơsô̆ bơngai đei sa phĭ. Tơdrong mă pơm kơ inh tơchĕng noh jơ̆ anih mă Kră Yang Yêsu rơih iŏk wă pơtơm blŭng-a.

Lăm mĭnh tơdrong kăl wă tih, Kră Yang Yêsu ưh kơ pơtơm blŭng-a đơ̆ng khŭl tơpôl ôh. Sư kư̆m ưh kơ pơtơm đơ̆ng lu bơngai pơhrăm păng Sư, dôm lu bơngai mă pơ̆n pŭ iŏk, đei băt dơdra păng kơchăng tơpă gah hơgăt kơdih. Sư pơtơm blŭng-a đơ̆ng mĭnh ‘nu bơngai hơ’lơ̆p.

Tơdrong mơsêh pơm ‘bĕng jing lơ đei chih răk lăm puăn Sơ̆p Tơdrong ‘Nao ‘Lơ̆ng (Mathiơ 14, Markôs 6, Luka 9, Yôhan 6). Đĭ đăng đei pơma jrŭ gah lu tơpôl lơ, dang pơđăm rơbâu ‘nu bơngai drŏnglo, ưh tam mă jô̆ ôh lu bơngai drŏ-kăn păng lu hơ’lơ̆p. Lăp dôm kơsô̆ noh đĕch kư̆m dai gơh pơma kơjăp khan: “Ưh kơ mah”.
Păng lu bơngai pơhrăm păng Sư đei tơ’bôh pơm lei lăi thoi lu bơ̆n dang ei. Lu sư lăng kơ tơdrong kăl wă, lăng tơ tơmam lu sư đei, na tơproh ăn mĭnh tơdrong mă trŏ hloh: athei lu sư năm chă răt kơdih tơmam sa (Mathiơ 14:15). Noh jơ̆ minh tơdrong tơchĕng mă tơpă tơpăt păng ‘lơ̆ng hloh.

Mălei Kră Yang Yêsu pơm phara. Sư khan: “Iĕm ‘me sư wăi.” Sư ưh kơ athei lu bơngai pơhrăm păng Sư ăn bĕ tơmam sa. Sư kư̆m dai ưh tơblang rơđah tơdrong mơsêh gô jing thoi yơ. Yêsu wơ̆n krao păng dan lu sư trŏ kơ tơdrong jang: Bơngai bơwih bơwăn ăn kơ khŭl kon pơlei noh, mă khan lu sư mơn “ưh kơ mah”.

Yôhan đĕch đei tơ’blŏk gah bơngai hơ’lơ̆p. Kơplah lu sơ̆p hla bơ-ar nai đei chih tơ’bôh gah tơdrong pơm keh. Yôhan đei chông tơ’bôh kơ lu bơ̆n gah minh anih iĕ ioch, anih mă tơdrong mơsêh pơtơm blŭng-a. Sơ̆p Hla bơ-ar Nơ̆r ‘Bok Kei-Dei ưh kơ đei chih roi anăn bơngai hơ’lơ̆p noh bu, kư̆m ưh kơ chih khan bơngai hơ’lơ̆p noh đei pơma kiơ. Mălei rơđah tơpă, Kră Yang đei rơih iŏk tơdrong iĕ ioch đơ̆ng bơngai hơ’lơ̆p noh thoi lĕ kơ pơtơm blŭng-a ăn kơ tơdrong jang Sư. Tơdrong noh pơm ăn kơ inh gơh ‘bôh kơnăl: bơngai hơ’lơ̆p ưh kơ sĭ kăl kơ bơwei đĕch, mălei mơ’nah jơ̆ bơngai mă Kră Yang rơih yua wă tơ’bôh kơ lu bơngai ‘lŏ kră gah đon lui. Păng inh đei pơhrăm iŏk tơdrong noh hlôi đơ̆ng kon drŏkăn 5 sơnăm inh.

Inh ‘blŏk kơ tơdrong krao wơ̆n păng tah pŏ 10.000 tơmam pơjao bơyan Nôel ăn kơ lu hơ’lơ̆p anih đak lơ̆p tơ tơring Sơlam teh đak Viêt Nam năm pơhrăm tơ hnam trưng lăm khei 12/2025. Đơ̆ng rŏng kơ minh ‘măng đak lơ̆p tih, lơ lu hơ’lơ̆p hiong đĭ bơih hla bơ-ar păng lu tơmam yua wă pơhrăm. Khŭl bơ̆jang lu nhôn krao pơtơm băl, pŏ tơmam, nam ba păng pơjao ăn kơ lu hơ’lơ̆p tơmam noh lăm bơyan Nôel.

Lăm kơplah lăm năr hơmet adrol, inh chih anăn kơ kon hơ‘lơ̆p drŏkăn 5 sơnăm inh wang năm wă proh hơmet lu kơ thŭng hla-ar păng dônh hơmet lu tơmam ‘mê̆ ‘mach, hơdai păng lu kon hơ’lơ̆p lu mai oh lăm khul bơ̆jang. Tơdrong jang lu sư ‘bônh đĕch noh jơ̆ proh hơmet lu kơthŭng hla-ar păng dônh lu tơmam ‘mê̆ ‘mach. Tơdrong jang mă khan ưh kơ tơnat ră, mălei hăm mĭnh ‘nu hơ’lơ̆p 5 sơnăm đei jang đơ̆ng 8 jơ pơgê truh kơ 8 jơ kơmăng kư̆m dai gleh trăp dêh. Mălei kon inh sư ‘nă hal tơpă đơ̆ng blŭng-a hloi, hơlen tơnen pơm dôm lu tơdrong đei pơjao păng chơt hiôk kơ tơdrong sư đei pơkeh, thoi lĕ kơ lăp đei wang jang hơdai, mă khan iĕ đĕch, kư̆m tôm mah wă kơ chơt prăt năr hloi.

Mălei inh oei lăm tơdrong tơchĕng mơn phara hloh. Mă blŭng a chơ ba tơmam kăl kơ chơ đĭ 4.000 pŏ tơmam, mălei kơsô̆ bơngai pơyơ̆r bơ̆jang ‘măng blŭng lăp tŏ sĕt đĕch. Prăt pơgê, lăp mĭnh lăm pêng kơsô̆ đĭ đăng bơngai chih anăn pơyơ̆r bơ̆jang đĕch năm truh, păng lăp loi 700 tŏ pŏ đang. Inh lăng tơ dôm tơmam tam mă hơtŭt, lăng kong jơ păng lăm jơhngơ̆m ưh kơ tôch kơ tơchĕng juăt jue khan: “ưh kơ mah”.

Mălei. Rai tơ kơmăng, lu bơngai pơyơ̆r bơ̆jang truh rai lơ. Minh ‘nu đei tơdrong kơdih kơdih. Đei bơngai ‘nao brŏk đơ̆ng pơhrăm hơri thar năm hloi. Đei bơngai ‘nao hơmet pơrŏ ăn kơ hnam akŭm ‘mơ̆i na năm. Đei bơngai brŏk đơ̆ng jang klui kư̆m dai drong tơgŭm mơ̆n. Đei bơngai drong tơgŭm dang kiơ̆ 30 phŭt na năm tơ nai yua kơ đei pơkă kơ đe adrol bơih. Ưh kơ đei bơngai ayơ khan năm hrôih ngăl ôh, kư̆m ưh kơ đei bơngai ayơ gơh tơgŭm đunh, mălei rim ‘nu đei tơgŭm pŏ tŏ sĕt tŏ sĕt. Rim lu “tŏ sĕt” noh, đei Kră Yang akŭm pơpôi, păng tôm mah wă kơ tơdrong jang gơh jing. Tuch luch 4.000 tŏ pŏ tơmam đei chơ ba pơkeh hloi lăm măng noh, păng pơtôch tơdrong jang lăm dôm năr đơ̆ng rŏng kơ noh, lu nhôn đei pŏ đĭ đăng 10.700 tŏ tơmam wă ăn kơ lu bơngai hơ’lơ̆p tơ anih đak lơ̆p hăm tơdrong ată ‘lơ̆ng bơyan Nôel.

Kơmăng noh, rok trong brŏk tơ hnam, inh jet kon hơ’lơ̆p inh sư mơn thoi yơ. Sư tơl ‘bônh đĕch: “Kon chơt dêh ơ ‘bă, mălei dang yơ kon gơh năm tơgŭm proh hơmet kơthŭng hla-bơar hơdai hăm lu ‘nhŏng mŏ dơ̆ng ‘bă?” Nơ̆r tơl kơđeh noh tơ’blŏk kơ inh lơ tơdrong tơpă. Kon inh đei tôm minh năr chơt bơ̆jang kơ Kră Yang, mălei inh âu, mă khan bơ̆jang păng kư̆m dai pơyơ̆r bơwih bơwăn mơ̆n ră, mălei ăn kơ nơ̆r “ưh kơ mah” gom đĭ lăm jơhngơ̆m. Păng inh kư̆m dai tơhiong wă jê̆ ‘bar lăm pêng chăl lăm năr noh, ưh kơ sĭ yua kơ ưh kơ đei tơdrong jang, mălei ưh kơ đei tơdrong pơdơh păng hiôk chơt lăm Kră Yang.

Kơmăng noh inh hlôh thim mĭnh tơdrong: Kră Yang ưh kơ jô̆ jŏk inh yua kơ inh “ưh kơ tôm mah”, mălei Sư kư̆m ưh kơ lê̆ inh dơ̆ng ‘bơ̆t anih “ưh kơ tôm mah”. Pah inh noh jơ̆ dơ̆ng ‘bơ̆t anih mă đei pơjao ăn noh jơ̆ proh hơmet păng bơ̆jang. Gah tơdrong tuh ăn, krao pơtơm, ba bơngai truh tơ trŏ kơ jơ năr ….noh gah ‘Bok Kei-Dei. Thoi lĕ kơ kơplah noh sơ̆, đơ̆ng rŏng kơ đĭ đăng sa phĭ ngăl bơih, đe dônh iŏk đei mơjĭt ‘bar tŏ bai ‘bĕnh. Tơdrong tôm mah rơkah rơkai noh ưh kơ truh đơ̆ng tơdrong tơchĕng kon bơngai, mălei truh đơ̆ng tơpang ti Kră Yang.
Tơdah năr ‘nâu ih ‘bôh gah ih đei tŏ sĕt dêh ‘nĕ hăt kơ kơdŭn tơ rŏng. Athei ‘blŏk bĕ kơ “bơngai hơ’lơ̆p” lăm Yôhan 6:9. ‘Bok Kei-Dei juăt kơ pơtơm blŭng-a tơdrong jang Sư hăm tơdrong iĕ păng Sư kư̆m dai bơtho bơ̆n yak năm hăm đon lui kiơ̆ kơ noh: Lu bơ̆n bơ̆jang tơdrong bơ̆n hăm tơdrong lui gơnang, păng Kră Yang bơ̆jang tơdrong Sư lăm tơdrong tuh ăn păng pơgơ̆r.

Hăm Sư, anih “ưh kơ tôm mah” noh bơih pơtơm blŭng-a ăn kơ lu bơ̆n lui gơnang kơ Sư hăm đĭ jơhngơ̆m.

Apĭnh đĭ đăng krao khan hơdai: Kơkuh kơ Kră Yang, bơnê kơ Ih yua kơ Ih ưh kơ pơtơm tơdrong jang Ih đơ̆ng tơdrong tôm mah, sơmă đơ̆ng tơdrong iĕ ioch lu nhôn wă kơ lu nhôn đei gơh pơgơ̆p hơdai lăm tơdrong jang Ih. Năr ‘nâu, kơplah tơchĕng tơ lu kon hơ’lơ̆p păng tơdrong hơ’mon pơđăm tŏ ‘bĕng mi, ‘bar hlak ka, kon ‘bôh kơdih akâu jăn kon lơ wơ̆t ăn kơ tơdrong “ưh kơ tôm mah” gom ‘bĕnh jơhngơ̆m kon, pơm kơ kon bơ̆jang kơ Ih mălei tơhiong lê̆ tơdrong chơt hiôk lăm Ih. Apinh Ih mơnat ăn kơ kon yua kơ kon tơchĕng gah tơdrong mă ưh kơ ‘bơm kơ kơdih akâu jăn kon. Apinh Ih ăn kơ kon băt dan đon lui lăm Ih thoi lĕ mĭnh ‘nu hơ’lơ̆p, ưh kơ hlôh đĭ tôm tơdrong, mălei hơđơ̆ng yua kơ băt kơdih oei lăm tơpang ti ‘Bă. Apinh Kră Yang tơgŭm lu nhôn arih mĭnh chăl arih đei đon lui wă kơ lu kon hơ’lơ̆p lăng ‘bôh Ih đơ̆ng lăm tơdrong arih lu nhôn. Kon kŭp kơ̆l krao khan hăm anăn Kră Yang Yêsu Krist, A-men.

Ơ lu bơngai mơ̆ng mă ‘mêm kơeng, năr ‘nâu jơ̆ năr ‘Blŏk hơ dơ̆r kơ lu hơ’lơ̆p, lu bơ̆n đei tơ’blŏk khan kon hơ’lơ̆p ưh kơ kăl adrô̆ tơdrong bơwei đĕch ôh, mălei kăl kơ lăng ‘bôh đon lui gơnang tơpă đơ̆ng lu bơngai ‘lŏ kră yak adrol. Lu sư gô pơhrăm iŏk lui kơ Kră Yang ưh kơ sĭ đơ̆ng tơdrong bơtho đĕch, sơmă đơ̆ng lu bơ̆n tơ’bưh hăm tơdrong “ưh kơ tôm mah”, lei lu bơ̆n oei hli tơtăm, dah mă lui gơnang kơ ‘Bok Kei-Dei.

Hơpơi rim ‘nu lu bơ̆n gơh wei lăng tơdrong arih gah bơhngol lu kon hơ’lơ̆p hăm tơdrong arih lu bơ̆n: Mĭnh tơdrong arih ưh kơ ‘lơ̆ng tôm ră mălei lui kơjăp; ưh kơ đei tôm mah ră mălei băt dan tơdrong gơnang kơ Kră Yang. Apinh lu bơ̆n pơjing lu anih mă kon hơ’lơ̆p đei jơhngơ̆m pơyơ̆r tơdrong jang, đei jơhngơ̆m chơt hiôk păng wơ̆ ‘lŏ lăm đon lui. Na kơplah mĭnh ‘nu bơngai hơ’lơ̆p đei ‘me rong thoi noh, hơpơi kơdih akâu jăn lu bơ̆n kư̆m đei Kră Yang chông anhăk trŏ kơ tơdrong arih lu bơ̆n đei: Bơngai rei pơtăm tơpăt, Kră Yang gô pơm ăn wơ̆ ‘lŏ.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.