Chăl arih ‘nâu ưh kơ đei khăi kơ phang ang, ưh kơ sĭ phang ang tơ kơdơ, mă dôm lu bơyan hrĕng kro lăm jơhngơ̆m, jơ̆ dôm kơ tơdrong arih pă băt pơm thoi yơ, jơ̆ dôm kơ chhŭr nuih đunh, jơ̆ kơmăng thĕng hreh đak măt lĕch ro. Lăm kơplah thoi noh, lu bơ̆n ngăl juăt kơ jet: “Lei tơdrong ‘mêm mơnat, chơ̆n jơhngơ̆m kơdih hăm đei yua kiơ ưh?”

Năr ‘nâu, ‘năr 03/06/2026, tơdrong tơdă Amăn Jơ Krao Khan Rim Năr, apinh krao wơ̆n bơngai mơ̆ng hơdai tơchĕng pơwao nơ̆r Kră Yang kơ̆l ‘bai KƠJĂP KƠPLAH ƠH SƠ‘NGON.

“Yă Rispa kon drŏ-kăn Aiya, iŏk minh ‘blah ‘bi lơ̆k kơpal tơmo, păng yă ei oei tơ noh đơ̆ng bơyan yuă blŭng truh tơ đei ‘mi đơ̆ng kơpal plĕnh jruh tơ kơpal akâu lu bơngai lôch. Kơ’năr yă ei ưh kơ ăn sem păr jruh kơpal akâu bơngai lôch, kơmăng yă ei ưh kơ ăn sem bri năm jê̆.” (II Samuel 21:10)

Lăm kơplah ‘blŏk kơ oei hơ’lơ̆p, mĕ inh jơ̆ bơngai đei jơhngơ̆m kĕ pŭ iŏk tơdrong gleh glăn. Mĕ inh ‘lơ̆ng păng đei jơhngơ̆m pơ̆n nuih. Mĕ tơ’bôh ăn kơ inh trong kơ minh ‘nu bơngai pơ̆n pơma, pơ̆n pơm. Mĕ ưh kơ đei pơm kiơ tih mă kư̆ kơ dôm tơdrong mĕ pơm iĕ iĕ Mĕ đei pơm kơmĭl ăn kơ inh. Inh ‘blŏk dôm wơ̆t mĕ đei chơ inh hăm gre honđa so năm ngôi hơpong tơ bơngai lui lăm Hnam Akŭm. Trong teh hrăt hrot ngăl kơ tơmo, ‘bar pah đei sơlŭng jrŭ pơm kơ inh hli. Mălei mĕ pơma rơngơp athei inh tơ oĕi minh dơnơ̆ng na wơ̆r rah gre păng hơri ư-ang rah kơ ‘Bok Kei-Dei. Inh ưh pă hli dơ̆ng bơih, yua kơ inh băt kơ đei mĕ tơnoh. Inh kư̆m ‘blŏk kơ mĕ sơtơ̆p kŭl tăng krao khan kơplah kơmăng. Mĕ kư̆m đei nhơ̆m. Kư̆m đei mĕ thĕng hreh đunh ‘bơ̆t anăp Kră Yang. Kơplah noh inh tam mă hlôh băt tôm, na đơ̆ng rŏng kơnoh kơplah rai ‘lŏ, inh đei mơn băt kơplah thoi noh mĕ oei tơblah hăm nơ̆r krao khan tơpă tơpăt. Kư̆m đei tơdrong đêl mơn hlôi chơt hiôk nai, kơplah mĕ chông ba inh năm ngôi tơ buăl juăt tơ mir. Nhi wă mơ̆t tơhnam kư̆m tơnat pat, na truh tơ kon kŏ berger tih pơplŏng bruh. Na mĕ inh pĕng găn hloi, bơwei inh. Mĕ inh hơgei dêh. Mă khan mĕ ưh kơ băt wă pơm liơ, tĕnh kơ krao “Kiki, Kiki” na kŏ huay pă kuăl hloi na chu yom mơ̆t tơ lăm.

Oei đei dôm lu tơdrong đêl hlôi mơn, hơdai mĕ lơ khei, lơ sơnăm, noh jơ̆ lơ tơdrong đêl hlôi đei ‘lơ̆ng mă inh gĭt dêh. Sơ̆p hla bơar ‘Bok Kei-Dei đei chih: Yua kơ bu pơ̆n pơjăm kơ năr tơdrong iĕ âu?” (Sachari 4:10) Kră Yang ưh kơ pơdê dôm lu năr iĕ âu. Na Kư̆m thoi noh đei minh ‘nu bơngai mĕ lăm sơ̆p hla bơar ‘Bok Kei-Dei, đei dôm tơdrong iĕ đĕch mălei ‘bĕnh kơ tơdrong ‘mêm mơnat kơjăp tơpă, na tơ hơtuch jing thoi tơlei glang pơtrơp dih băl ăn kơ jơhngơ̆m huay kơ jô̆ yo păng klaih jing thoi đêl đơ̆ng ‘Bok Kei-Dei ăn kơ adrĕch adrŭng yă âu.

Tơdrong hơ’mon kơ yă âu đei hơtuch lăm sơ̆p hla bơar II Samuel, tŏk bŏk đei tơdrong chhŭr nuih. Kon pơlei Isơrael oei wă hlôi kơ tơdrong pơngot rơwĕt tơpêng sơnăm. Kơplah pơtao Đawit apinh Kră Yang, sư đei nơ̆r tơl đơ̆ng Kră Yang noh jơ̆ tơdrong truh đơ̆ng tơdrong yoch Sôl kơplah sư tŭk lê̆ tơdrong pơgơ̆p păng pơlôch lu bơngai Gibeôn. (II Samuel 21:1-2) Wă kơ huay kơ đei tơdrong pơngot rơwĕt, Đawit drơ̆ng ăn kơ bơngai Gibeôn tơ lĕch nơ̆r pơma đơ̆ng lu sư. Kơsô̆ đei tơlĕch noh kơsô̆ 7, tơdrong pơm noh pơlôch atol tơ kơpal, tơ anih Gibêah, na lu bơngai noh kon sâu Sôl, lăm lu bơngai noh đei lu kon Rispa. Lăm minh năr pơlôch atol ‘bar ‘nu kon Rispa. (II Samuel 21:3-9)

Đei đŏk minh ‘bar trong kơđeh, lu bơn đei tơchĕng ‘bôh jơhngơ̆m chhŭr nuih tih dêh đơ̆ng minh ‘nu bơngai mĕ kơplah tơ’bơ̆p tơdrong lôch kơ kon sư, păng lăng ‘bôh atol kon tơ kơpal. Yă âu ưh kơ kĕ găn nơ̆r đơ̆ng pơtao, sư ưh kơ kĕ ayăt kơ adrĕch adrŭng bơngai Gibeôn oei blĕk yua kơ oei ‘mong tơdrong lôch. Tơdrong sư pơm noh găn tơdrong kơnê̆ hloh ăn kơ dôm nu kon sư mă ‘mêm.

Kơplah đei tơdrong chhŭr nuih, đei bơngai rơih iŏk tơdrong kơnê̆ wă pơm plơ̆ ăn kơ dôm lu tơdrong pơm kơ kơdih chhŭr nuih. Mălei kư̆m đei bơngai rơih iŏk pơm dôm lu tơdrong ‘lơ̆ng trŏ hăm jơhngơ̆m ‘mêm mơnat păng jing lu bơngai đe ư-ang. Jên tơmam tơ anih chhŭr nuih noh, Rispa adrin pŭ iŏk truh tơ hơtuch. Sư pơtơm đơ̆ng lu tơdrong iĕ hloh mă bơngai drŏ kăn Isơrael ayơ kư̆m gơh pơm: “iŏk minh blah ‘bi lơ̆k kơpal tơmo, păng yă ei oei tơ noh đơ̆ng bơyan yuă blŭng truh tơ đei ‘mi đơ̆ng kơpal plĕnh jruh tơ kơpal akâu lu bơngai lôch. Kơ ‘năr yă ei ưh kơ ăn sem păr jruh kơpal akâu bơngai lôch, kơmăng yă ei ưh kơ ăn sem bri năm jê̆.” (II Samuel 21:10) Nhen thoi sư đei jơhngơ̆m pran, mă sư oei tơnoh ưh kơ đei minh ‘bar năr đĕch ôh, mă đơ̆ng bơyan âu truh tơ bơyan to. Sư adrin bơ̆jang đei bơngai brih ‘bôh khan kơ sư ưh kơ đei yua kiơ, mălei hăm sư đei tơdrong dan ăn tih: ưh kơ ăn đe pel hơtŭt atâu kon sư. Tơdrong ‘mêm lăm sư jing jơhngơ̆m pran păng kơjăp. Sư kĕ pŭ iŏk hăm kial, tŏ hang hơt kơ’năr, tŭk tơngiĕt kơmăng, sem bri, tơdrong gleh glăn păng ơh sơ’ngon minh ‘nu bơngai mĕ.

“…đơ̆ng bơyan yuă blŭng truh tơ đei ‘mi đơ̆ng kơpal plĕnh jruh …”

Tơdrong kiơ pơm kơ sư đei jơhngơ̆m thoi noh?- Noh jơ̆ đơ̆ng jơhngơ̆m ‘mêm bơngai mĕ. Tơdrong ‘mêm pran hloh kơ pơmat tat ơh sơ’ngon. Jơhngơ̆m ‘mêm pơm kơ sư ưh kơ achăng lê̆, mă khan dôm lu tơdrong đĭ tôch hiong bơih.
Tơdrong Rispa pơm kơtơ̆ng truh tơ Đawit, đơ̆ng noh Đawit iŏk dôm lu atâu hnam dơnŏ Rispa: đơ̆ng Sôl, Jônathan, truh tơ kon drŏnglo yă ei, păng kon drŏnglo Mêrap bơngai dai hơtol hơdai kon yă ei brŏk hơdai tơ yă ‘bok păng ‘bŭ hơmet ‘lơ̆ng. Tơdrong noh Kră Yang lăp đon. “Đơ̆ng rŏng kơ lu sư jang keh dôm tơdrong pơtao pơkă, Kră Yang ‘Bok Kei-Dei tơl tơwih nơ̆r pơtao krao apinh păng tuh tơdrong pŭn hiôk ăn kơ teh đak.” (II Samuel 21:14) Rispa ưh pă thoi bơngai drŏkăn rơdu tơrăn, sư jing minh ‘nu bơngai linh pran ăn kơ lu bơngai mă sư ‘mêm, ăn kơ hnam dơnŏ, na jing tơdrong pơtrơp lăm tơdrong ‘Bok Kei-Dei huay kơ jô̆ yo, tơl tơwih nơ̆r apinh, pă đei pơngot rơwĕt păng pơklaih adrĕch adrŭng sư.

Lăm kơplah chăl arih hrĕi âu, kơplah hơ’lơ̆p wơ̆ ‘lŏ bơih đei lơ tơdrong hơtŭt ‘bơm lăm teh đak ‘nâu, yua kơ thoi noh, lu bơ̆n kăl kơ bơngai mĕ, bơngai ‘bă hơđơ̆ng kơjăp. Rŏ lăng huay kơ kăl kơ bơngai ‘lơ̆ng tôm, kăl kơ bơngai sơtơ̆p kŭl tăng krao khan rim măng, jơ̆ dôm lu bơngai huay kơ achăng lê̆ kơplah kon hơ’lơ̆p kơchu, jơ̆ bơngai pơtrơp rei Nơ̆r Kră Yang mă khan ưh kơ’bôh hloi dang ei, dôm lu bơngai arih tơpă, tơpăt hăm đon lui.

Rŏ lăng lăm năr ‘nâu ih mơn ‘bôh tơdrong jang iĕ đĕch. Minh jơ akŭm hnam dơnŏ ‘bônh đĕch. Minh trong Nơ̆r ‘Bok Kei-Dei tơ’blŏk kơ kon adrol kơtep. Minh nơ̆r krao khan hmă đĕch lăm rim pơge. Minh wơ̆t chơ̆n jơhngơ̆m bơtho hăm tơdrong ‘mêm mơnat. Mălei lê̆ kơ lăng khan ưh kơkăl kơdôm kơ găr adrĕch iĕ noh.

“Bơngai bu pơm tơpăt mă tơdrong iĕ, bơngai noh sư kư̆m gô pơm tơpăt tơdrong tih mơ̆n.” (Luka 16:10)

‘Bok Kei-Dei huay kơ pơdê dôm lu tơdrong iĕ đei pơm hăm jơhngơ̆m ‘mêm păng đon lui. Păng kư̆m đei, đơ̆ng dôm tơdrong ‘mêm mơnat kơjăp noh gô jing hơnă kơjăp ăn kơ bơhngol lu chăl đơ̆ng rŏng.

Apĭnh đĭ đăng krao khan hơdai: Kơkuh kơ Kră Yang ‘mă ‘mêm, kư̆m đei kon mơn ưh kơ đei jơhngơ̆m wă yak năm tơ anăp. Dôm kơ chhŭr nuih, hiong răm păng chang gô đunh năr pơm kơ jơhngơ̆m kon gleh lap. Mălei đơ̆ng tơdrong hơ’mon kơ Rispa, apinh bơtho kon băt, Ih ưh kơ đei layơ hiơt kơ đak măt lu kon Ih. Apinh ăn kơ kon đei jơhngơ̆m ‘nao wă kơ tơpăt đơ̆ng tơdrong iĕ, wă kơ đei jơhngơ̆m ‘mêm mơnat kơplah ơh sơ’ngon, oei krao khan kơplah đei năr hrĕng kro tam mă đei nơ̆r tơl kơ chhŭr nuih kơdih. Apinh Kră Yang tơgŭm kon băt kơ gơnang kơ tơdrong ‘mêm Ih rim năr. Hơpơi kơ chăl arih kon, mă khan rơdu tơrăn, Ih oei yua wă chĕp ba tơdrong dŏng pơklaih păng pŭn hiôk ăn kơ bơngai nai. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng lăm năr ‘nâu ih oei lăm bơyan pơmat tat. Đei dôm lu nơ̆r krao khan ih đei pơjao đunh sơnăm mă tam mă đei tơl tơwih. Đei kơ tơdrong sơ’ngon pơm kơ ih gleh lap păng ‘maih tŭk lê̆. Mălei ‘nĕ kơ achăng lê̆. Athei pơtrơp yua dôm lu tơdrong đơ̆ng Kră Yang ăn đĕch lăm chăl arih ih. Athei pơtrơp lăm tơdrong krao khan kơ kon hơ’lơ̆p, pơtrơp tơdrong ‘mêm kơ bôl buăl, pơtrơp tơdrong topăt lăm tơdrong jang Kră Yang pơjao, mă khan ưh kơ đei bu ‘bôh păng drơ̆ng iŏk tơdrong bơ̆jang noh. Rŏlăng đơ̆ng tơdrong adrin ih năr ‘nâu jing pơm gơng ăn kơ Kră Yang dŏng pơklaih păng pŭn hiôk truh kơ kon hơ’lơ̆p, hnam dơnŏ, Hnam Akŭm dah bơngai jum dăr. Apinh Kră Yang tơgŭm lu bơ̆n jing bơngai pran kơjăp kơplah sơ’ngon, păng tơpăt truh tơ hơtuch.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.