Chăl oei hơ’lơ̆p jơ̆ minh lăm dôm kơ khei jơ năr ‘lơ̆ng hloh lăm chăl kon bơngai. Năr mă lu bơ̆n oei jơ̆ dôm lu bơngai ‘lơ̆p kơdâu jơ̆ng hoh kơpal ‘nhĕt, hiĕk chơt kơplah jruh kơ krang đơ̆ng kơpal gre tang wang so. Păng gĭt kăl hloh, bơngai hơ’lơ̆p noh ưh kơ đei băt tơdrong tơchĕng pơwao “hiơ̆k bơngơ̆t”. Lu bơ̆n ngăl đei tơchĕng kơdih wơ̆ ‘lŏ jơ̆ wă jing pran kơtang hloh, mă lei tơpă, rai wơ̆ ‘lŏ, lu bơ̆n đei rai rơdu tơrăn hloh lăm lơ tơdrong hiơ̆k bơngơ̆t pŭ trăp, hơbăn ao hrŭk phe sŏng jên tơmam. Hăm trŏ, tơdrong wơ̆ ‘lŏ đei iŏk lê̆ đơ̆ng lu bơ̆n ‘bar pah măt hlăng ling lang lăng ‘bôh tơdrong oei hơdai đơ̆ng Kră Yang- Tơ’ngla ling lang bơwei păng wei rong kon Sư?

Năr ‘nâu, ‘năr 04/06/2026, tơdrong tơdă Amăn Jơ Krao Khan Rim Năr, apinh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Martha Noebel kơ̆l ‘bai CHĂ MING ĐON LUI THOI HƠ‘LƠ̆P

“Mă inh năm lăm thŭng yơ̆p tơdrong lôch, inh ưh kơ hli kơ răm, yua kơ Kră Yang oei hăm inh; ‘long băl hăm ‘long jra Ih pơlung inh.” (Hơriso 23:4)

Inh oei ‘blŏk thoi đêl dôm kơ năr oei hơ’lơ̆p, kơplah tơdrong arih lăp dăr kơ tơdrong tŏk tơ’long, pơplŏng hlôi kơ dôm dur so sĕnh, dah yoh tơ anăp jur đơ̆ng kông ‘bĕnh kơ pơkao kŭk kơpal tang wang pơngôi pêng tŏ tơwang hăm lôp hơtăng.

Dah lu bơ̆n pơdơh tŏ sĕt, tep măt păng ‘blŏk tơchĕng, bu lăm lu bơ̆n kŭm đơ̆ng đei mĭnh chăl ưh kơ đei hiơ̆k, tơchĕng tơdrong kiơ. Hăm trŏ kơplah ‘noh lu bơ̆n ưh kơ bơngơ̆t hăm teh đak yua kơ tơdrong oei hơ’lơ̆p, dah yua kơ hơ’lơ̆p jơ̆ trŏ đei minh “tơdrong pơlơ̆k” tơ ‘bưh hăm Kră Yang hrĕnh tĕnh hloh kơ bơngai ‘lŏ?
Wơ̆ ‘lŏ tơ gah yă nơ̆m teh đak My, tŏk bŏk ‘bâu phu pơkao păng dôm kơ năr Tơpơh hơlah, inh hui kơ hiơ̆k bơngơ̆t tơdrong kiơ tih hloh kơ tơdrong kơdih hăm gơh đei sa krem adrol kơ jơ sŏng sa kơmăng dah ưh. Inh kơdâu hlôi kơ dôm bri ‘nhĕt kơjung na ưh kơ đei hli kơ ‘bih. Inh tŏk hao tơ dôm tơnơm ‘long kơjung na ưh kơ hli kơ pơ̆k. Inh hơnul ôn chă băl lăm măng mu kơplah măt khei đei pĕng yua kơ đơ̆ng hơmơ̆l gah Yă Nơ̆m. Năr ‘noh, ưh kơ đei tơdrong kiơ pơm kơ inh hli tơ rơ.

Mă lei, kơplah wơ̆ ‘lŏ păng đei kon hơ’lơ̆p, dôm kơ tơdrong hiơ̆k mă inh ưh kơ tim mă đei băt thar truh sơng iŏk inh. Inh đei tơblah hăm tơdrong jĭ hiĕn kon, dôm kơ hla ar jên hơdrom kơpal gơ ‘bang, păng hăm dôm kơ jơ ưh kơ băt năr dơning gô thoi yơ. Trŏ kơ jơ ‘noh, inh đei ăn kơ dôm tơdrong hiơ̆k bơngơ̆t pơgơ̆r bơhngol inh. Inh mơn ‘bôh đĭ đăng đei blah thuơ.

Kơplah adrin pŭ iŏk kơdih teh đak tơ hơngiĕng bơ̆n, lu bơ̆n đei tŭn Kră Yang tơ ataih. Păng tơdrong hiơ̆k tơtăm rai jing minh rup yang hli tơrơ.

Khei sơnăm đei hlôi, inh pơtơm tơchĕng pơwao gah dôm kơ năr oei hơ’lơ̆p, rơhing chơ chă minh pơgang wă pơklaih dôm kơ tơdrong hli tơrơ oei pơm kơ inh wơ̆l jrok. Kơplah oei tep măt, inh ‘bôh kơdih đơ̆ng chăl sơ̆: hơnul pơngôi chơt hiôk, wă jê̆ pơ̆k tơ dôm kơ dur mă lei ưh tim mă layơ pơdơh, yak năm lăm măng mu dĭng truh kơ ‘bôh măt khei lĕch.

Kơplah ‘noh, inh thar ‘bôh băt: inh ưh kơ đei hiơ̆k tơchĕng ưh kơ trŏ yua kơ sơnăm oei ‘lơ̆p, na trŏ yua kơ đơ̆ng tơdrong lui ngeh kiơ̆ kơ tơdrong hmă khan ‘Bok Kei-Dei ling lang oei hơdai, păng Sư gô wơh linh jang dŏng tơgŭm kơplah rơdu hloh. Mă inh năm tơ yơ dah pơm tơdrong kiơ, tơdrong oei hơdai đơ̆ng Sư jơ̆ jơhngơ̆m pran tơgŭm inh yak hlôi dôm kơ roh bri brah dah dơ̆ng kơjăp lăm măng mu.

Kơplah lar măt, nơ̆r pơma lăm Hơriso 23:4 đei re kơtơ̆ng lăm đon tơchĕng inh: “Mă inh năm lăm thŭng yơ̆p tơdrong lôch, inh ưh kơ hli kơ răm, yua kơ Kră Yang oei hăm inh; ‘long băl hăm ‘long jra Ih pơlung inh.”

Kơplah inh đei pơtơm achăng tơdrong pơgơ̆r păng gơnang anih ‘Bok Dŏng Pơklaih Yang Yêsu, adruh ‘lơ̆p sơ̆ hăm đon lui pran kơtang hăm rơbâu bơngai ‘lŏ wih brŏk. Inh kuăr iŏk adruh ‘lơ̆p noh, păng inh jing bơngai drŏkăn Kră Yang lăp đon.

Mă mưh lăp dôm kơ năr kial hơbŭt oei adrin tơgar iŏk bơhngol, inh drơ̆ng ưh kơ ăn kơdih đei blah thuơ. Kră Yang jơ̆ kơđông kơ inh. Inh gô yak năm mă anih ayơ hloi kư̆ kơ jơ̆ Sư chông anhăk, yua kơ băt khan anih ayơ đei Sư, anih ‘noh inh gơh hơđơ̆ng tơpă.

Apĭnh đĭ đăng krao khan hơdai: Kơkuh kơ Kră Yang mă ‘mêm, ưh kơ băt đơ̆ng layơ kon đei ăn kơ dôm tơdrong ưh kơ hơđơ̆ng đơ̆ng chăl arih ‘nâu pơgơ̆r iŏk anih ‘măn blŭng a lăm bơhngol kon. Kon đei adrin hăm jơhngơ̆m pran kơdih, na pă kĕ păng pơ̆k. Krao apinh Yang Bơhngol ‘Lơ̆ng Ih đei hơtŭt ‘bơm bơhngol kon, rou tơ iung bơngai ‘lơ̆p ưh kơ đei hiơ̆k tơchĕng đei tep hiơt đơ̆ng sơ̆. Apinh ăn kơ kon ‘blŏk dơ̆ng mơn kơ đei Ih kuăr, đei Ih bơwei kơplah kon oei hơ’lơ̆p. Dang ei kon pơdrơ̆ng achăng dôm kơ pŭ trăp mă kon ưh kơ đei kĕ pŭ iŏk. Kon pơjao pơyơ̆r dôm tơdrong hiơ̆k bơngơ̆t kơ Ih, yua kơ băt khan Ih ling lang bơwei rong kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, dah ih mơn ‘bôh hli tơrơ đơ̆ng teh đak ‘nâu oei gom klơ̆p bơ̆n, athei tep măt tŏ sĕt. Athei tơchĕng pơwao gah minh ‘nu bơngai ‘lơ̆p đơ̆ng yak năm na ưh kơ kăl hue lăng tơrŏng, athei ‘blŏk gah kon bơngai đơ̆ng ih adrol kơ teh đak ‘nâu pơhach bơhngol ih. Hơpơi khan adrol kơ dôm “tơnơm ‘long” tơdrong pơlong lăng, ih gô rôp iŏk tơ’bla ‘long păng tŏk tơ dôm anih kơjung ‘nao. Mă tơ ‘bơ̆p hăm dôm kơ “dur” hli tơrơ, ih athei lui khan mă đei tơwŏk jơ̆ng, Kră Yang gô ưh kơ layơ ăn kơ ih pơ̆k huŏng. Păng adrol hloh, dah yak năm lăm măng mu, mă khan kơplah măt khei đei hơmơ̆l klơ̆p, ih oei ling lang đei “Tơdrong hơdah đơ̆ng Teh Đak” hơdai lăm rim kơ trong năm. Hơpơi kơ tơdrong hiôk hian đơ̆ng Tơdrong ‘Nao ‘Lơ̆ng chông anhăk ih wih brŏk tơhnam.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.