05.06 Amăn Jơ Krao Khan Rim Năr: INH HIÔK KƠ PLAH INH BĂT “TÔM”

Lăm bơyan tŏ ‘nao truh, kơplah tŏ wă pơtơm pơchrang ăn kơ lu hla ‘long păng brŏ re jơwa kơ rim trong lăm pơlei, lu bơ̆n kŭm hiơ̆k bơngơ̆t kơ tôm tơdrong tơdă plơ̆ng, năm chă ngôi wă “apah” kơ kơdih. Mălei, lăm tŏk bŏk lu brŏ re hiôk chơt noh ih ‘bôh kơdih ưh kơ hơđơ̆ng? Hăm đei layơ ih ‘bôh kơ dih pơsĕl tŏk bŏk tơpôl oei hiôk chơt, yua kơ đơ̆ng tơdrong arih chă sa păng kơ’bah rim năr? Năr ‘nâu pinh ih dơ̆ng lăng tŏ sĕt, tŭk lê̆ dôm tơdrong hiơ̆k bơngơ̆t, wă chă minh pôm bŏl đak hiôk hian lăm jơhngơ̆m kơdih.

Năr ‘nâu năr 5/6/2026, tơdrong tơdă Amăn Jơ Krao Khan Rim Năr apinh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Missel Butler kơ̆l ‘bai INH HIÔK KƠ PLAH INH BĂT “TÔM”

“Dah bơ̆n lui tơpă hăm đĭ jơhngơ̆m, noh kư̆m dang bơ̆n mơdrŏng mơ̆n yua kơ jơhngơ̆m bơ̆n hiôk ‘lơ̆ng păng Sư boih.” (I Timôthê 6:6)

Dah bơ̆n lui tơpă hăm đĭ jơhngơ̆m, noh kư̆m dang bơ̆n mơdrŏng mơ̆n yua kơ jơhngơ̆m bơ̆n hiôk ‘lơ̆ng păng Sư boih. Kơplah lăm mĕ bơ̆n tơpŭ kơ bơ̆n oei nge sơ̆, bơ̆n ưh kơ đei chĕp tơmam kiơ tơlĕch tơ teh âu. ‘Noh thoi lĕ bơ̆n lôch ning-mônh, bơ̆n ưh kơ gơh chĕp ba tơmam kiơ ôh. Kơplah bơ̆n oei arih, đei tơmam sa păng hơbĕn ao hrŭk, dôm noh đĕch ‘lơ̆ng boih. (1 Timôthê 6: 6-8)

Hơiă tơpă! bơyan tŏ truh, tơdrong arih nhen thoi phiơl ‘biơ̆, hiôk hian ‘biơ̆. Truh tơ chô̆ kơwŏng tơ ala yơ̆p ‘long oei wă pơkao, tơkuh ngar khơ̆ng brê, hơmet kơ et sa ‘buh tơmam hăm lu ‘bĕng ‘bâu phu kiơ̆ kơ kơdih rim ‘nu ‘maih wă sa.

Ih ‘bôh băt hơđăl kơ tơdrong hiôk chơt kơplah bơ̆n yak năm lăm khei tơdrâu, jơ’năr trŏ kơ thoi bơ̆n lăng jơ̆ pơtơm tơdrong pơdơh mă bơ̆n chang gô.

Jơ ‘năr pơdơh sơnăm ayơ kŭm lei lăi. Tơ kơpal trong hrĕnh kơjung, gre pơtrơp băl, dơ̆ng gô băl kơjung lơ kây sô̆, nhen thoi khŭl hmôch tih hiơ̆ hyĭn wă lĕch đơ̆ng pơlei tih wă năm chă truh tơ anih chă ngôi pơdơh.

Plĕnh tơbăt tŏ hlăng prăng hiôk. Minh pôm gre păr iĕ păr kơđeh, chô̆ che đei chih chư ră roi kơ năr et sa tơmam rơih iŏk kiơ̆ kơdih ‘maih wă sa păng pơdah prah phao pơkao ‘lơ̆ng rŏ tơ anih ter đak dơsĭ.

Tơpă, tŏk bŏk bơyan pơdơh hiôk chơt noh, jơhngơ̆m nhen thoi rơdu. Rŏ lăng ih ‘bôh hlĭch “lơ liơ minh ‘nu sơ’ngon, kơplah dôm lu tơdrong, rim ‘nu bơngai jum dăr tă kơ hiôk chơt ngăl! Bơyan tŏ truh bơih.

Mălei noh đei tơdrong! Đĭ đăng kơpal teh ‘nâu oei hiôk chơt, ‘ngoai kơ inh. Kơplah noh, inh wă kơ minh ‘bai sơ’ngon re wă pơlung tơdrong pơsĕl inh.
Tơdrong pơm kơ inh sơ’ngon yua kơ jên tơmam hnam dơnŏ oei anat anot. Lu nhôn pơdrơ̆ng băl tŭk lê̆ dôm tơdrong tơdă chă ngôi. Klo akăn nhi “pơ’met jên tơmam” đunh bơih truh tơ inh ‘bôh kơdih nhen thoi pơm kĭch tơm lăm phim pơmat tat păng anat anot. Inh roi tơpă, inh ‘bôh gleh lap hăm tơdrong “băt kơ jang đĕch ưh kơ băt pơdơh”, trŏ tơpă, tơdrong noh pơm kơ inh mơkoh.

Tŏk bŏk lơ tơdrong hiơ̆k bơngơ̆t, inh mơn nơ̆r Kră Yang mơmơnh rơngơp – Buăl juăt inh ơi: “Dah bơ̆n lui tơpă hăm đĭ jơhngơ̆m, noh kư̆m dang bơ̆n mơdrŏng mơ̆n yua kơ jơhngơ̆m bơ̆n hiôk ‘lơ̆ng păng Sư boih” (ITimôthê 6:6)

“Trŏ boih, Ơ Kră Yang, kon băt hơđăl trong Nơ̆r ‘Bok Kei Dei noh, mălei apinh ăn kơ kon ngôi ‘bơ̆t dâu sơ’ngon pă tŏsĕt.”

Thoi noh, nhen thoi minh ‘nu bơngai ‘lơ̆p jŏk, inh gơning lăm tơpang ti buăl nai: chô̆ kơwŏng lăm pơgar, Inh hơgơn ti bơ̆t kongkoi, ngơk lăng tơ’bla dơng ‘long kơjung, lăng dơng hơngo yĭng yơ̆ng, găn măt ‘năr tŏ pơchrang.

Đơ̆ng rŏng kơ noh, inh tơchĕng kơ tôm tơmam inh đei wă bơnê kơ Kră Yang. Đơ̆ng noh tôm tơmam jum dăr inh tơplih kơ plah tơdrong tơchĕng inh tơplih đơ̆ng lăm jơhngơ̆m.

‘Bĭch ‘bơ̆t kơwŏng inh thĕng hreh lăng tôm tơmam: kơtơ̆ng đak ro đơ̆ng đing đak hnam rông ‘bôt, nơ̆r krao wơ̆n kơ lu adruh ‘lơ̆p pah to trong oei tĕch đak chanh hăm prel jên tŏ sĕt đĕch.

Inh hue lăng ‘bôh klo inh oei kŭp hơmet kơmăi chong răm bơih. Sư yơ̆l môk tơ plơ̆ tơ rŏng, tơ’bôh sư adrin đĭ jơhngơ̆m wă kơ kơmăi chong ‘nâu gơh đôh.

Inh lăng kŏ sŭk inh 12 sơnăm, oei hnhoi lăng kong ‘bla păr. ‘Bar tŏ kŏ nai oei dui tơlei hăm pơnhan chhĕr chai. Kơplah noh meo bronh inh kơ eng oei răp gô xem jơk.

Trŏ tơpă, tơdrong arih tơâu hơđơ̆ng, păng inh bơnê kơ Kră Yang yua kơ inh jing kon Sư!

Mă khan tơ’ngoaih to oei hrăt hrot hăm lơ tơdrong tơdă chă ngôi ‘lơ̆ng rŏ, inh ‘bôh băt nhen oei tơ hnam kơdih jơ̆ jing minh pơyan pơdơh hiôk chơt.

Tơdah năr drâu ih ‘maih tơ’bơ̆p inh, lei ih băt inh tơyơ bơih. Inh gô ‘bĭch ‘bơ̆t kơwŏng păng tơchĕng gah tơdrong hiôk ‘lơ̆ng!

Nhen thoi nơ̆r ‘Bok Kei-Dei lăm Philip 4:8 đei chih khan: “Ơ lu ‘nhŏng oh, iĕm kơtơ̆ng boih tơdrong noh na iĕm athei tơchĕng tơdrong kiơ ‘lơ̆ng, tơdrong kiơ tơpăt, tơdrong kiơ trŏ, tơdrong kiơ kăl, tơdrong kiơ đe ư-ang, tơdrong kiơ hơiă, tơdrong kiơ kon bơngai lăp đon, tơdrong kiơ đe tơ’mêm băl.”

Apĭnh đĭ đăng krao khan hơdai: Kơkuh kơ Yêsu Kră Yang Dŏng Pơklaih mă kon ‘mêm kơeng, kon bơnê kơ Ih yua kơ bơyan pơdơh truh bơih, yua kơ dôm tơdrong pŭn hiôk Ih tuh ăn kơ tơdrong arih kon. Pinh Ih huay kơ jô̆ yo yua kơ kon lê̆ jơhngơ̆m kon ‘bĕnh kơ blĕk klai, sơ’ngon kơplah lăng tơ’ngoaih ‘lơ̆ng rŏ na hiơt lê̆ tơdrong ‘mêm Ih ăn đĕch. Apinh Yang Bơhngol Ih tơgŭm kon pơhrăm băt tôm mah. Apinh bơtho kon chă ‘bôh tơdrong hiôk chơt lăm dôm tơdrong hmă đĕch hloh. Hơpơi kơ kon ling lang tơchĕng kơ tơdrong ‘lơ̆ng wă kơ tơdrong arih kon jing thoi ‘bai hơri bơnê tơdrong ‘mêm Ih ăn đĕch rim năr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai ‘mơ̆ng ‘mêm kơ eng, tơdrong arih phŏ kơnh ưh kơ ba ăn kơ bơ̆n tơdrong chă ngôi ‘lơ̆ng rŏ dah năr et sa tih nhen thoi teh đak ‘nâu đei pơkă. Mălei Yêsu Kră Yang Dŏng Pơklaih- Tơ‘ngla wei bơhngol lu bơ̆n- pơkă ăn kơ bơ̆n pơdơh, hloh kơ tơdrong hơgei bơ̆n. Lu bơ̆n sơ‘ngon ưh kơ sĭ yua kơ kơ’bah kơ mŭk tơmam, noh yua kơ bơ̆n ling lang lăng tơdrong bơ̆n ưh kơ đei hloh kơ băt gĭt dôm lu tơdrong bơ̆n đei lăm Kră Yang. Kơplah tơdrong tơchĕng bơ̆n ‘bĕnh kơ tơdrong tơpă, trŏ, păng kăl, mă khan kơwŏng so lăm pơgar kŭm jing plei ‘lơ̆ng kơpal teh âu. Ih ưh kơ kăl năm ataih wă chă tơdrong chơt, yua Tơdrong ‘Nao ‘Lơ̆ng bơ̆n lui noh Tơdrong ‘Nao ‘Lơ̆ng kơ tơdrong hiôk lăm jơhngơ̆m. ‘Nĕ kơ ăn tơdrong pơting băl bu hloh na hiong tơdrong hiôk chơt ih dang ei. Athei lăng jum dăr, ih gô ‘bôh tơdrong ‘mêm ăn đĕch Kră Yang oei ‘bôh tơ rim xem hmoi, rim kơ nơ̆r hiĕk đơ̆ng bôl buăl, păng hiôk hơđơ̆ng kơ minh jơhngơ̆m băt tôm mah.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.