Trŏ lăp, ih đei mơn đei dui jơhngơ̆m pơmat tat ưh? ‘Noh jơ̆ dui jơhngơ̆m lap kơplah ih đei jet kơdih kâu: “Inh adrin thoi ‘nâu wă pơm kiơ? Rim năr hiơ̆k kơ hnam dơnŏ na wei rong kon hơ’lơ̆p, lei kơdih tơpă hăm đei ba ăn tơdrong gĭt ayơ kơ dêh char Kră Yang ưh?” Lu bơ̆n ngăl kơnhăm dêh lăm dôm tơdrong kĕ jei rang hơdah đơ̆ng bơngai nai păng ‘bôh kơdih iĕ ioch tơpă. Mă lei, Kră Yang ưh kơ đei tơ’bôh tơdrong tih hloh hăm tơdrong kĕ jei dah anih tơdrong jang. Mưh lăp, bŏl kông kơjung hloh mă Sư wă kơ lu bơ̆n yak năm trŏ jơ̆ tơdrong tơnăp lăm hnam paigŏ iĕ, dah dôm kơ jơ phŭt adrin bơtho kon krao khan.

Năr ‘nâu năr 6/6/2026, tơdrong tơdă Amăn Jơ Krao Khan Rim Năr apinh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Beatrice Fishback kơ̆l ‘bai TRONG YAK NĂM JING MĔ ‘BĂ

“Đức Chúa Trời thấy mọi việc Ngài đã tạo dựng thật rất tốt đẹp.” (Sáng Thế Ký 1:31)

“Layơ gô truh tơ anih hei ‘nhŏng?” Nơ̆r jô̆ jŏk đơ̆ng inh jơwa đơ̆ng anih tơmo kơjung mă inh oei adrin tŏk tơ kơpal. Klo inh hăm tơdrong ‘nă hal đĭ jơhngơ̆m, đei achăng inh ataih. ‘Nhŏng yak rah kŭm ưh kơ pơdơh pơlung wă kơ inh adrin yak tơ anăp.

‘Noh jơ̆ trong yak chă lăng blŭng a mă nhi yak năm tơ kông Pinnacle, tơ dêh Arkansas, Hoa Ky. Hăm minh ‘nu bơngai juăt kơ tŏk tơ kông, anih ‘nâu rŏ lăng jơ̆ minh bŏl kông kơ đeh, mă lei hăm lu “rơdu tơrăn” thoi inh, sư ưh kơ đei pha ra kơ bŏl kông Everet ‘bĕnh tơdrong anat pat.

Năr ‘noh jơ̆ minh năr ‘lơ̆ng rŏ. Yua kơ tơdrong adrin pơtrŭt đơ̆ng klo inh, tuch luch inh kŭm yak truh tơ bŏl kông. Dơ̆ng đơ̆ng kơpal noh, lăng ‘bôh ‘lơ̆ng rŏ dêh tơpă: bri să glơch glach păng kông tơbi tơba truh tơ plĕnh. Lu sem grơ̆ păr juang kiơ̆ kơ kial dơhlu. Anih noh ‘lơ̆ng dêh tơpă, trŏ tơpă hăm dôm kơ hul hang đei kơtoh.

Thoi noh na nhi lăp oei lăng sơng iŏk minh hlak iĕ lăm teh đak tih să đơ̆ng Tơ‘ngla Pơjing. Inh mơn đei wing măt, ưh kơ sĭ yua kơ pă kĕ, na yua kơ đei ‘bôh tơdrong jang tih hloh đơ̆ng ti Sư. Hơ oei kơpal tơmo, inh dui jơhngơ̆m mă jrŭ, thoi ‘maih hiup lăm kơtơh trŏ kơ dui jơhngơ̆m păng tơdrong oei hơdai ‘lơ̆ng rơgoh đơ̆ng Sư.

Tŏk bŏk anih thĕng hreh păng hơđơ̆ng noh, đon tơchĕng inh blư thar hiơt đĭ păng pơtơm chă thông. Inh thar tơchĕng gah tơdrong iĕ ioch đơ̆ng kơdih. Inh jet kơdih lei dôm tơdrong adrin đơ̆ng ki sơ̆ hăm đei pơjing tơdrong hơtŭt ‘bơm ayơ kơ dêh char đơ̆ng Kră Yang ưh? Lăng dơ̆ng tơdrong arih, nhen thoi đĭ đăng dôm tơdrong inh gơh pơm lăp jơ̆ chă klo păng wei rong ‘bar ‘nu kon – minh drŏnglo, minh drŏkăn.

Inh ưh kơ jơ̆ bơngai jang chă wă băt đei pơ ư, kŭm ưh kơ trŏ jơ̆ bơngai pơgơ̆r tih hloh. Inh ưh kơ trŏ bơngai drŏkăn blŭng a đei yak tơ măt khei, kŭm ưh kơ đei chă ‘bôh pơgang hơmet tơdrong jĭ hyĕn hơnơ̆k kơ kon bơngai. Lei dôm tơdrong kiơ inh đei jang keh hăm tôm đei yua ưh?

Na đei, minh tơdrong tơchĕng đei ‘bôh lăm đon tơchĕng inh: Mă khan ‘Bok Kei-Dei kơ đĭ đăng teh đak- Tơ’ngla đei tơ sơng kơ rim đak ‘mi păng pơ’lơ̆ng dan hơmet plĕnh chro hơdah hơdong- kŭm trŏ jơ̆ Tơ’ngla đei pơjing bơngai drŏnglo păng bơngai drŏkăn blŭng a, Ađam păng Ewơ. Sư đei ‘măn jơ năr tơ lăm pơgar Sư, yak năm hơdai păng tơblang kơ sư hlôh gah tơdrong juăt đơ̆ng dôm kơ hơnglŏng. Lăm rơbâu tơmam pơjing, ưh kơ đei tơdrong kiơ athei đei lơ jơ năr păng tơdrong hiơ̆k bơngơ̆t đơ̆ng Sư hloh jơ̆ kon bơngai.

Sơ̆p Hla ar Blŭng a đei tơ’bôh minh rup ‘lơ̆ng dêh kơplah ‘Bok Kei-Dei pơjing kon bơngai:

“Kră Yang ‘Bok Kei-Dei đei pơjing kon bơngai hơbŏ thoi rup Sư kơdih; Sư pơjing kon bơngai hơbŏ nhen thoi Kră Yang ‘Bok Kei-Dei; Sư pơjing bơngai drŏ-nglo păng bơngai drŏ-kăn.” (Blung a 1:27)

Păng ưh kơ lăp pơdơh ‘bơ̆t doh, Sư kŭm đei kơnhăm gĭt kăl tơdrong ‘lơ̆ng tơpăt tơpă đơ̆ng tơdrong jang noh:

“Kră Yang ‘Bok Kei-Dei ‘bôh dôm tơdrong đơ̆ng Sư pơjing ‘lơ̆ng tơpă. Đơ̆ng noh đei kơsơ̆ păng pơgê noh năr mă tơdrâu.” (Blung a 1:31)

Dah ‘Bok Kei-Dei lăng tơdrong pơjing păng wei rong kon bơngai jơ̆ tơdrong gĭt kăl tơpă, thoi noh yua kơ liơ lu bơ̆n đei lăng ưh kơ gĭt tơdrong pơm ‘bă, pơm mĕ?
Lăm trong yak năm pơjing tơiung đon lui, Yang Yêsu ling lang hơdai hăm lu bơ̆n rim kơ jơ̆ng yak. Sư pơtrŭt, pơlung tơiung lu bơ̆n yak năm truh “bŏl kông” đơ̆ng tơdrong jang pơm mĕ ‘bă dah bơngai chông anhăk bơhngol. Mă ‘noh jơ̆ kon kơdih, kon rong, dah jơ̆ dôm bơngai kon gah bơhngol mă lu bơ̆n đei tơdrong mơnat ăn chông anhăk hlôi kơ khei sơnăm, lei ‘noh trŏ jơ̆ tơdrong tơtă gĭt kăl tơpă.

Kơplah trong yak năm keh, lu bơ̆n gô lăng ‘bôh mĭnh tơdrong đei yua ‘lơ̆ng dêh. Tơdrong đei yua đơ̆ng minh ‘nu bơngai ‘bă, bơngai mĕ hli yom kơ Kră Yang ưh kơ lăp dơ̆ng ‘bơ̆t dang ei đĕch, na kŭm chĕp ba truh chăl kon, sâu păng lơ jơhnơr đơ̆ng rŏng.

‘Nĕ kơ ăn dôm tơdrong hơgăt đơ̆ng teh đak pơm bơbul tơdrong gĭt đơ̆ng tơdrong tơnăp lăm hnam dơnŏ. Rei đon lui lăm jơhngơ̆m minh ‘nu bơngai ‘lơ̆p trŏ jơ̆ oei pơjing tơ iung minh dêh char ling lang.

Apĭnh đĭ đăng krao khan hơdai: Kơkuh kơ Kră Yang ‘mêm, apinh tơgŭm kon jing kơ mĭl ‘lơ̆ng hloh kơ dôm bơngai mă Ih đei pơjao ăn kơ kon wei rong. Hơpơi chăl arih kon ư-ang anăn Ih, mă khan kơplah rok trong đon lui ưh kơ tơproh ‘lơ̆ng păng pơmat. Apinh ăn kơ kon lăng ‘bôh tơdrong gĭt ling lang đơ̆ng rim bơhngol mă kon oei chông anhăk. Apinh ăn thim kơ kon jơhngơ̆m pran ‘nao ăn kơ kon ưh kơ sĭ lăp lăng ‘bôh dôm tơdrong pơmat tat ‘bơ̆t anăp, na gơh ‘bôh tơdrong mơsêh mơyang đơ̆ng Ih lăm tơdrong arih đơ̆ng dôm lu bơngai mă kon oei wei rong, dŏng tơgŭm. Kon kŭp kơ̆l krao khan hăm anăn Yang Yêsu Krist, Amen.

Ơ lu bơngai mơ̆ng mă ‘mêm kơ eng, rŏ lăng năr ‘nâu ih lăp ‘bôh jum dăr bơ̆n jơ̆ kon hơ’lơ̆p ngăl: dôm kơche hơbăn, dôm kơ ‘bai hŏk brŏk tơhnam ưh tim mă pơm đang, dah dôm kơ nơ̆r tơ’blŏk hil pơma hơnơ̆ng thoi đêl truh kơ bơ̆l hăl. Mă lei athei yua kơ mĭl đon lui wă lăng ataih hloh dơ̆ng. Tơdrong đei hơtŭt ‘bơm đơ̆ng ih ưh kơ pơdơh ‘bơ̆t anih “ala kông” ‘nâu ôh. Sư oei pơchrang đơ̆ng rim jơhnơr, ‘bơm truh chăl arih kon hơ’lơ̆p sĕch akar truh bơhngol ih, pơchrang truh tơ chăl kon sâu se ih- dôm lu bơngai rŏ lăng ih gô ưh kơ đei layơ gơh tơ’bơ̆p, mă lei gô sơng iŏk mŭk tơmam đon lui mă ih oei rei pơtăm lăm jơ ‘nâu. ‘Nĕ kơ lăp lăng lăm dôm tơdrong kiơ oei truh ‘bôh ‘bơ̆t măt, athei lăng lăm pơkao plei ling lang mă Kră Yang oei pơjing đơ̆ng tơdrong pŭ iŏk đơ̆ng ih. Hơkat kơ ih minh năr plơ̆ng ‘bĕnh tơdrong pơdơh lăm tơdrong jang ‘lơ̆ng rơgoh mă Sư ‘măn ăn.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.