Đei lơ năr đei tơdrong truh, lu bơ̆n mơn ‘bôh kơdih nhen thoi thŏng nan iĕ tŏk bŏk đei kial hơbŭt tih tơ lăm đak dơsĭ ataih. Đak poh yă nhen thoi tơglăk ‘bĕnh kơ đon tơchĕng, pơm kơ bơ̆n ưh kơ gơh dui jơhngơ̆m. Đei dôm lu tơdrong chhŭr nuih ưh kơ đei gơh krao hăm anăn, păng đei dôm lu pŭ trăp mă khan adrin dang yơ, lu bơ̆n ưh kơ gơh tưk hơtŏk kơdih. Lu bơ̆n ngăl tơchĕng khan athei đei jơhngơ̆m pran wă kơ hlôi đơ̆ng tơdrong kơnê̆. Mălei đei đơ̆ng dôm kơ rim kơchăl lăm chăl arih, kon bơngai ưh kơ gơh pơm kiơ. Dôm lu tơdrong noh truh wă kơ ih mơn ‘bôh: lu bơ̆n kăl kơ gơnang kơ Kră Yang mă ưh kơ gơnang kơdih. Păng đei tơdrong hiôk noh jơ̆ lu bơ̆n đei Tơ’ngla ưh kơ pơdơh wei rong păng krao khan ăn tơgŭm kơ bơ̆n.

Năr ‘nâu, ‘năr 07/06/2026, tơdrong tơdă Amăn Jơ Krao Khan Rim Năr, apinh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Maria Schleicher kơ̆l ‘bai ĐEI TƠ’NGLA OEI LING LANG KRAO KHAN KƠ BUĂL

“Sư oei apinh ‘Bok Kei-Dei ling-lang wă tơgŭm bơ̆n.” (Hêbrơ 7:25b)

“Mă gah Yêsu Sư oei pơm ling-lang ưh kơ tôch, yua kơ Sư gơh arih ling-lang. Thoi noh na mă layơ Sư oei pơklaih ling-lang dôm lu bơngai mă gơnang kơ Sư, wă kơ bơ̆n gơh brŏk tơ ‘Bok Kei-Dei, kơlih kơ Sư arih ling-lang ưh kơ tôch. Păng Sư oei apinh ‘Bok Kei-Dei ling-lang wă tơgŭm bơ̆n.” (Hêbrơ 7:24-25)

Ih tam đei layơ chhŭr nuih truh tơ pă băt gơneh gơnơm tơyơ dơ̆ng? mă khan akâu jăn, jơhngơ̆m đon dah bơhgnol – noh jơ̆ jơhngơ̆m chhŭr nuih ket lê̆, pơm kơ lu bơ̆n ơh sơ’ngon dêh, hơpơi kơ đei hiôk hian ‘biơ̆ tŏ sĕt?

Inh kư̆m đêl đei tơdrong thoi noh. Đei tơdrong jĭ đơ̆ng kơdŭ truh tơ plei pôih, nhen thoi kiơ klep ro lăm pham tŏ dêh. Ưh kơ đei gơh pơm thoi yơ wă kơ inh hiôk ‘biơ̆, ưh kơ đei tơdrŏ tơdrĕnh ayơ pơm kơ inh phyơl ‘biơ̆. Mă khan đêl đei jĭ kơplah rơneh ưh kơ yua pơgang wă kơ dă ‘biơ̆ kơ jĭ, inh pơma tơpăt thoi âu: Ưh kơ đei layơ inh mơn đei jĭ dêh thoi noh.

Kơplah noh, inh tam mă băt kơ kơting tơ hơpok jê̆ kơ iĕng jơ̆ tơm kơ tơdrong jĭ noh. Inh mơn kơ inh pă băt bơih păng sơ’ngon dêh. Truh tơ đei tơ’bơ̆p minh ‘nu bơngai, tơplih nơ̆r pơma đơ̆ng inh – kơplah inh pă đei jơhngơ̆m hiơ̆k ăn kơdih. Tơdrong tơgŭm noh đei tơ’blŏk kơ inh tơdrong tơpă tơpăt ưh kơ đei tơplih lăm Hêbơrơ 7:25: “Sư arih ling-lang ưh kơ tôch. Păng Sư oei apinh ‘Bok Kei-Dei ling-lang wă tơgŭm bơ̆n.”

‘Bok thây pơgang ming hơmet inh athei phĭn MRI, mă lei ‘bok thây pơgang nai ưh kơ drơ̆ng pơm hla bơar tơplih anih hnam pơgang truh tơ inh đei 12 giĕng prot ming hơmet. Hăm kơdŭ gu tơ ala, yak năm pă kĕ, inh băt tơdrong noh ưh kơ đei truh kơ inh. Sư khan kơ inh ưh kơ đei jên wă phĭn MRI yua kơ phĭn noh kăp jên dêh.

Kơplah noh, bơngai bơwei tơm anih prot ming hơmet anăn Tamy đei bơ̆jang hăm inh. ‘Bôh tơdrong jĭ jăn inh pŭ iŏk, duch noh ưh kơ lăng đĕch ôh. Sư krao rim kơ hnam pơgang păng lu anih ‘nguaih kơ hnam pơgang jum dăr kơ anih noh. Sư đei gưih ăn nơ̆r pơma, đơ̆ng rim kơ sô̆ điê̆n thoăi sư krao păng ưh kơ pơdơh truh tơ chă ‘bôh tơdrong wă pơklaih.

Kơsơ̆ năr noh, Tamy chă băt kơ hnam pơgang đei tơjur jên lơ ăn kơ bơngai jĭ dah ăn hăm hlak jên hloi. Sư dan ăn kơ inh jơ năr kơplah 7 jơ pơge năr đơ̆ng rŏng. Phĭn MRI đei tơ’bôh tơm kơ tơdrong jĭ dêh noh: minh pôm kơting tơrĭ 18mm pơm kơtĭt ‘bơm hoan tơm.

Đei jơhngơ̆m adrin đơ̆ng Tamy jơ̆ tơm kơ tơdrong dŏng iŏk inh kơplah lăm chăl arih inh đei tơdrong măng mu. Inh lui ngeh đơ̆ng tơdrong pơm sư ưh kơ sĭ jơhngơ̆m ‘lơ̆ng đơ̆ng kon bơngai đĕch ôh, mă tơ’bôh tơdrong ‘mêm mơnat păng krao khan tơgŭm đơ̆ng Yang Yêsu ăn kơ inh.

Kơplah noh, tơdrong chơchă noh, păng tơdrong wĕi rong tôm mah lăng khan pơlăp dêh noh. Yang Yêsu oei bơ̆jang đơ̆ng lăm duch noh, trŏ thoi inh wă. Tơdrong krao khan tơgŭm đơ̆ng Yang Yêsu ưh kơ đei layơ khan tơchĕng pơwao ataih atŏ. Sư đei lăm tơdrong arih tơpă rim năr, đơ̆ng lăm kon bơngai hăm sĕch akar âu, păng kiơ̆ kơ Sư dan ăn.

Tơdah tơdrong adrin đơ̆ng minh ‘nu bơngai đei lơ jơhngơ̆m ‘maih tơgŭm wă kơ đei tơdrong tơplih noh hlich thoi yơ, na tơdrong krao khan tơgŭm hăm tơdrong ‘mêm mơnat, ưh kơ đei pơdơh đơ̆ng Yang Yêsu hơtŭt ‘bơm chăl arih lu bơ̆n tih dêh thoi yơ? Sư ưh kơ đei gleh lap, ưh kơ hŭt lê̆ mă khan tơdrong iĕ ayơ, păng ưh kơ đei layơ pơdơh kơ pao ‘bơm anăn ih ‘bơ̆t anăp Yang ‘Bă ‘lơ̆ng rơgoh.

Mă kơplah lu bơ̆n ưh pă đei jơhngơ̆m wă tơblah kơdih- mă khan đei jĭ lăm sĕch akar, dah sơ’ngon lăm jơhngơ̆m dah hrĕng kro lăm bơhngol – na Sư oei pơgơ̆r păng bơ̆jang mă măt lăm teh đak ‘nâu ưh kơ’bôh đĭ păng ưh kơ hlôh tôm, wă ăn kơ lu bơ̆n tơdrong bơhngol kăl wă.

Apĭnh đĭ đăng krao khan hơdai: Kơkuh kơ Yang Yêsu mă ‘mêm, đơ̆ng lăm jơhngơ̆m kon bơnê kơ Ih, yua kơ Ih jơ̆ Tơ’ngla arih ling lang, đei ling lang mă ling lang krao khan tơgŭm kon. Na kơplah kon huŏng lăm sơlŭng jrŭ pă băt pơm thoi yơ, sơ’ngon dah mơn ‘bôh kơ teh đak ‘nâu achăng lê̆ kon, apinh tơ’blŏk kơ bơhngol kon Ih ling lang hnhoi lăng păng krao khan tơgŭm kon. Hơpơi kơ bơhngol kon đei pơdơh, yua kơ kon băt kon ưh kơ đei minh adrô̆, yua kơ ling lang đei Ih oei hơdai chông anhăk păng pơlung. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, athei tơchĕng pơwao Yang Yêsu oei ngôi gah ‘ma ‘Bok Kei-Dei, păng Sư oei krao khan ăn kơ ih kơplah jơ phŭt ‘nâu. Athei pơih jơhngơ̆m păng pơyơ̆r kơ Sư nơ̆r bơnê yua đei tơdrong pŭn hiôk mă Sư ăn kơ ih – kơplah oei đei dôm jơla lăm tơdrong arih, kơplah đon lui rơdu, pơm kơ ih ưh kơ đei mơn Sư oei hơdai. Athei pơsĭt ih ưh kơ đei hiơt, ih ưh kơ đei achăng lê̆, păng ưh kơ đei tơdrong arih ayơ lăm chăl arih ih hiong tơdrong bơwei đơ̆ng Tơ’ngla ling lang krao khan tơgŭm ih.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.