Đei layơ ih mơn ‘bôh kơdih mĭnh drô̆, nhen thoi suăn kơ đak glung ro? Kơplah pơdrơ̆ng arih tơnăp hăm Kră Yang lăm minh teh đak ‘bĕnh kơ dôm tơdrong tơchĕng ưh kơ trŏ, lơ wơ̆t lu bơ̆n đei ‘mong ăn hăm tơdrong pơjăm, dah phŏ kŭm dôm tơdrong răm ‘băm, ưh kơ đei kĕjei lăm tơdrong arih. Mă lei, maih ưh kơ hli kơ ŭnh, păng đon lui tơpăt lei ưh kơ hli dôm nơ̆r pơma tơblĕk.

Păng đơ̆ng rŏng kơ đĭ đăng dôm kơ tơdrong tơtŏ noh, tơdrong oei đei ưh kơ trŏ jĭ ‘mui tơnuh, na jơ̆ minh đon lui rang hơdah- tơdrong hơdah mă teh đak ‘nâu ưh kơ gơh wă pĭt tŭk lê̆.

Năr ‘nâu, ‘năr 08/06/2026, tơdrong tơdă Amăn Jơ Krao Khan Rim Năr, apinh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Kim Nanney kơ̆l ‘bai KƠJĂP THOI MAIH PƠLONG SƯ TƠ ŬNH

“Tơdrong gleh ‘Bok Kei-Dei wă pơlong lăng tơdrong lui bơ̆n, wă kơ băt bơ̆n lui tơpă dah ưh. Bĭ maih đe kư̆m ‘buh pơlong sư tơ ŭnh wă kơ băt sư maih tơpă dah ưh; na tơdrong bơ̆n lui kơ Yêsu Krist kăl hloh kơ maih tơpă, yua kơ maih sư gô hiong răm. Na bơ̆n kon bơngai trŏ kơ ‘Bok Kei-Dei pơlong lăng tơdrong lui bơ̆n wă kơ bơ̆n lui kơjăp, na Sư gô bơnê kơ bơ̆n, hăm ăn kơ bơ̆n hiôk kơplah năr Yêsu Krist jur ning-mônh.” (I Pêtrôs 1:7)

Đơ̆ng dôm kơ năr blŭng a pŭ kơdŭng hla ar năm hŏk hnam trưng, inh đei ling lang kơnhăm kơdâu kiơ̆ dôm kơ tơdrong kĕ jei- jơ̆ kơ dôm “hla ar ‘lơ̆p chu yom” chăl hơ’lơ̆p, dôm kơ trong chih “đei jơhngơ̆m hŏk ‘lơ̆ng” đơ̆ng thây kô chăl hŏk mơlôh, dĭng truh kơ dôm điêm A rang hơdah chăl đăi hŏk. Kĕjei trŏ jơ̆ rup kơ tơdrong adrin ưh kơ pơdơh đơ̆ng inh. Mă lei kơplah lăng dơ̆ng, inh thar hlôh khan dôm kơ kĕ jei ‘lơ̆ng rŏ ‘noh tơpă lăp jơ̆ bôl pơchrang đơ̆ng minh tơdrong gĭt kăl ling lang hloh- ‘noh jơ̆ tơmam “maih” lăm bơhngol mă Kră Yang wă kơ inh gơh đei.

Maih tơpă ưh kơ truh đơ̆ng dôm tơdrong kĕ jei ‘bônh đĕch, sư lăp jing rup lăm ŭnh. Maih đei pơjâm, gơh hơgei păng jing ‘lơ̆ng rŏ hloh đơ̆ng tơdrong pơlong lăng. Lăng đêl dôm kơ khei sơnăm đăi hŏk, inh ‘bôh băt ‘noh trŏ jơ̆ “anih ŭnh man” mă ‘Bok Kei-Dei đei yua wă kơ inh pơhrăm pơjuăt chăl arih inh. Inh yak năm lăm hŏk Jơhngơ̆m Đon Tơchĕng hăm tơdrong tơchĕng hmă jơ̆ pơthim ăn tơdrong gơh hơgei tơpă lăm jơhnơr dang ei dah ưh- inh thar ‘bôh băt ‘nâu ưh pă jơ̆ minh ‘bai pơm tơdrong gơh hơgei hmă đĕch tơ anih bơtho bơih. Đơ̆ng rŏng kơ dôm tơdrong gơh tơlĕch tơblang nơ̆r hơđăl jơ̆ minh tơdrong tơblah bơhngol tơpă, dah mă dôm tơdrong gĭt kăl ling lang oei tơ’bơ̆p hăm dôm tơdrong tơchĕng teh đak.

Lăm kơthơ gưih ăn kơ bơngai lui blŭng a oei tơ’bơ̆p hăm rơbâu tơdrong pơlong lăng, Pêtrôs đei tơ’blŏk khan:

“Tơdrong gleh ‘Bok Kei-Dei wă pơlong lăng tơdrong lui bơ̆n, wă kơ băt bơ̆n lui tơpă dah ưh. Bĭ maih đe kư̆m ‘buh pơlong sư tơ ŭnh wă kơ băt sư maih tơpă dah ưh; na tơdrong bơ̆n lui kơ Yêsu Krist kăl hloh kơ maih tơpă, yua kơ maih sư gô hiong răm. Na bơ̆n kon bơngai trŏ kơ ‘Bok Kei-Dei pơlong lăng tơdrong lui bơ̆n wă kơ bơ̆n lui kơjăp, na Sư gô bơnê kơ bơ̆n, hăm ăn kơ bơ̆n hiôk kơplah năr Yêsu Krist jur ning-mônh.” (I Pêtrôs 1:7)

Inh hơ iă tơchĕng pơwao lăng hơlen dôm tơdrong pơtih gia gah maih lăm chăl ‘nâu, yua kơ sư đei tơ’bôh ăn lơ tơdrong gah ‘Bok Kei-Dei trŏ thoi noh. Maih trŏ jơ̆ tơmam oei lei lăi thoi đêl, sư ưh kơ đei tơplih kơplah tơ’bơ̆p kial dah đak, na đei băt truh hăm tơdrong gơh găn huei kơ lĕch gôh trŏ hlĭch tơpă. Pơma pha dơ̆ng, dah đei pơjâm, maih ưh kơ đei hiong lê̆ tơdrong rang hơdah mă khan kơplah đei dan lăm minh anih ‘bĕnh tơdrong đei hơgăm.

Kơplah dang ei, inh oei tim mă gơh tơ’bưh dôm tơdrong pơm pơjing hơdai băl. Mă lei dang ei lăng dơ̆ng, inh hlôh khan dôm tơdrong pơjah băl tơ lăm hŏk- kơplah mă tơdrong tơpăt đơ̆ng Kră Yang ưh kơ sĭ lăp tơgar iŏk na kŭm đei pơdah pơđĭ, pơtrŭt đơ̆ng rim pah- trŏ jơ̆ gleh lap đei ‘măn ăn kơ inh. Sư pơm kơ inh ưh kơ sĭ dơ̆ng ‘bơ̆t tơdrong bơwei đon lui hăm tơdrong tơchĕng, na kăl kơ athei năm truh minh tơdrong pơdrơ̆ng gĭt lôch arih: lei inh hăm đei lui gơnang kơ Kră Yang tơpă truh lôch arih yua kơ Sư hloi dah ưh?

Hơdai hăm tơdrong kơjăp, maih jơ̆ bơsei ‘bônh kơ ‘bơ̆ hơmet hloh. Sư gơh dui pơdăng dah teh pơjâm na ưh kơ đei kơtĕch. ‘Bok Pêtrôs tơpă đei hlôh hơđăl mơn đei “ ‘bơ̆ ưh kơ tơpăt” hăm tơdrong gleh pơmat jơ̆ thoi yơ. Sư đơ̆ng pơm đĭ jơhngơ̆m pơkă gô ưh kơ layơ achăng Kră Yang, na gô đơ̆ng rŏng kơ noh đei sơngah kơ Sư pêng wơ̆t lăp lăm minh măng. Mă lei ră, lăm tơdrong mơnat ăn hlĭch chrơp, ‘Bok Dŏng Pơklaih Yang Yêsu đei pơklaih păng pơjao ăn kơ sư tơdrong jang chông anhăk kon triu Sư. Hơ’mon đơ̆ng Pêtrôs jơ̆ minh tơdrong tơ’bôh arih khan: lăm tơpang ti đơ̆ng bơngai Thơ̆ Pơjâm Tih Hloh, ưh kơ đei kĕ jei ưh kơ trŏ jơ̆ chư pơtôch kơ đon lui. Tơplơ̆ dơ̆ng, sư jơ̆ tơdrong yak năm sŭt rơgoh wă kơ đon lui gơh jing pran hloh. (Lăng Luka 22:54-62, Yôhan 21:15-19).

Lăm anih hŏk noh, inh đei năm truh minh tơdrong pơdrơ̆ng gĭt kăl: ‘Bok Kei-Dei gĭt kăl hloh kơ dôm kơ sơ̆p hla ar pơ-ư dah kĕ jei hŏk tơdrong ayơ. Inh gô pơdrơ̆ng iŏk tơdrong kăl kơdŭn tơrŏng, đei ‘bai ưh kơ hlôi, dah phŏ kŭm jơ̆ đei tơdrong pơjăm yua kơ đon lui kơdih. Yua kơ đơ̆ng, bơhngol inh đei hlôh băt minh tơdrong tơpăt: Trong yak năm Kră Yang jơ̆ trŏ, na kŭm jơ̆ trong năm ‘lơ̆ng hloh kơ chăl arih inh. Đon lui đei inh pơjâm noh gĭt kăl hloh kơ dôm tơmam hu maih, pơchrang hơdah hloh kơ dôm tơmam apah gô hiong răm mă teh đak ‘nâu gơh pơkă ăn.

Lăng dơ̆ng trong yak năm đei hlôi, inh hlôh khan dôm tơdrong pơlong lăng lăm hŏk ‘noh ưh kơ đei kơnhăm pơrăm inh. Lu sư đei gơh truh wă tơ’bôh dôm anih hlơp rơdu tơrăn păng soh tŭk dôm tơdrong kiơ ưh kơ đei tơpăt tơpă lăm jơhngơ̆m inh, lei lăi thoi ŭnh đơ̆ng thơ̆ pơjâm rơih iŏk maih ‘lơ̆ng, păng kŭm trŏ jơ̆ tơdrong ‘Bok Kei-Dei oei hơmet ming lu bơ̆n. Tuch luch, inh oei đei điêm A, mă lei tơdrong ‘noh ưh kơ đei pơting hăm tơdrong hiôk chơt kơplah băt kơdih đei Sư pơsĭt. Inh đei dơ̆ng kơjăp lăm đon lui wă kơ gơh pơma pơkăm khan: tơdrong Kră Yang wă jơ̆ tôm mah hloh.

Apĭnh đĭ đăng krao khan hơdai: Kơkuh kơ Kră Yang ‘mêm! Kon bơnê kơ Kră Yang yua kơ Ih jơ̆ Thơ̆ Pơjâm Tih Hloh kơ chăl arih kon. Kon bơnê kơ Ih yua kơ đĭ dôm kơplah kon gơh hiôk hian hăm dôm kơplah kon đei mơ̆t lăm anih ŭnh pơlong lăng. Mă khan đei dôm kơplah nhen thoi hloh kơ jơhngơ̆m pran, mă lei apinh Kră Yang tơgŭm kon ‘blŏk răk khan, maih tơpă lăp rang hơdah kơplah pơlong lăng lăm unh. Apinh ăn kơ kon minh đon lui pran kơtang, wă kơ kon pơ̆n nuih arih tơ’bôh anăn Ih hăm đĭ tơdrong arih kon. Apinh tơgŭm kon ‘bôh băt khan, tơmam apah gĭt kăl hloh ưh kơ trŏ jơ̆ tơdrong sơng iŏk đơ̆ng kon bơngai, mă jơ̆ tơdrong lăp đon đơ̆ng ‘Bă kơpal plĕnh. Hơpơi tơdrong arih kon đơ̆ng rŏng kơ dôm tơdrong truh gô jing ‘lơ̆ng rơgoh thoi maih gĭt, pơchrang hơdah tơdrong ư-ang kơ dêh char Ih pơgơ̆r. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng kơplah ‘nâu inh kŭm oei yak hlôi kơdôm ŭnh pơjâm pơlong. Rŏ lăng ih oei mơn ‘bôh bơhngol kơdih đei dui pơdăng mah truh kơ pă kĕ, dah oei đei minh adrô̆ bơwei đon lui lăm minh anih oei ‘bĕnh kơ dôm tơdrong blah păng ngĭl ngŭl. Dah thoi noh, apinh ih athei ăn jơhngơ̆m kơjăp. Athei lui gơnang khan tơpang ti ‘mêm mơnat đơ̆ng Kră Yang oei rôp iŏk ih kơjăp, ưh kơ đei achăng. Sư ưh kơ ăn dôm tơdrong pơlong lăng ‘noh đei truh hăm tơdrong ưh kơ đei yua ôh, na Sư oei yua trŏ anih ŭnh noh wă rơih hơmet păng pơjâm ih. Na đơ̆ng rŏng kơ đĭ đăng, ih gô yak năm thoi minh pôm maih gĭt kăl, rang hơdah tơdrong ư-ang kơ dêh char Sư pơgơ̆r. Apinh ‘nĕ kơ achăng, yua Kră Yang ling lang đei tơdrong tơdă ‘lơ̆ng hloh kơ chăl arih ih.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.