09.06 Amăn Jơ Krao Khan Rim Năr: ƠH SƠ’NGON PĂNG PƠCHAH

Tơdrong arih lăm teh đak ling lang đei tơdrong kơnê̆ truh ưh kơtam kơ băt. Ưh kơ đei tŏ sĕt, lu bơ̆n yak năm hăm bơhngol trăp trĭn yua kơ dôm jĭ rơka tăm mă klaih. Dôm lu chhŭr nuih đơ̆ng sơ̆ hăm dôm kơ tơdrong arih ưh kơ thoi bơ̆n wă pơjuăl ‘bônh pơm kơ bơ̆n gleh lap păng sơ’ngon. Tŏk bŏk lăm thŭng tơdrong lôch măng mu, lei hăm đei trong lĕch hlôi ayơ ăn kơ chhŭr nuih noh, lei lu bơ̆n kư̆ ăn kơ kơnam kăp sa đon lui bơ̆n?

Năr ‘nâu, ‘năr 09/06/2026, tơdrong tơdă Amăn Jơ Krao Khan Rim Năr, apinh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Beth Patch kơ̆l ‘bai ƠH SƠ’NGON PĂNG PƠCHAH

“Ơ lu bơngai mă oei pŭ trăp, năm tơ Inh bĕ, lê̆ Inh tơgŭm iĕm pŭ hơiơch.” (Mathiơ 11:28)

“Ơ lu bơngai mă oei pŭ trăp, năm tơ Inh bĕ, lê̆ Inh tơgŭm iĕm pŭ hơiơch. Yua kơ Inh bơngai dim, băt ‘mêm mơnat, na apinh iĕm pŭ iŏk bĕ, pơhrăm iŏk bĕ tơdrong Inh âu, wă kơ iĕm pơdơh hiôk. Yua kơ Inh, na iĕm rơhơi jơhngơ̆m păng pŭ hơiơch.” (Mathiơ 11:28-30)

Lăm teh đak pơ̆k huŏng ‘nâu, đei lơ bơngai ơh sơ’ngon dêh tơpă lăm chăl arih kon bơngai. Kư̆m đei, chhŭr nuih noh truh đơ̆ng tơdrong Kră Yang drơ̆ng ăn truh. Na kư̆m đei, noh jơ̆ đơ̆ng ơh sơ’ngon đơ̆ng tơdrong yoch kơdih đơ̆ng jơhngơ̆m klơm klak kon bơngai pơm.

Duch Debbie đei wơ̆ ‘lŏ đơ̆ng lăm hnam dơnŏ lui kơ Kră Yang ‘lơ̆ng dêh. Ưh kơ đei đunh đơ̆ng rŏng kơ pơhrăm tơhnam trưng ‘bơ̆t kơnao tŏk bŏk, sư đei tơ’bơ̆p Kyle, minh ‘nu tơdăm akŭm hơdai minh hnam akŭm. Đơ̆ng rŏng kơ minh sơnăm wă kơ hlôh dih băl, Kyle đei nơ̆r apinh hưch wă, jơhngơ̆m ‘bĕnh kơ hơmĕng kơ ŭnh om truh tơ sŏk ko go kơdŭ.

Mălei, lăp minh ‘bar khei đơ̆ng rŏng kơ năr pơkong, kơplah Debbie oei đei jơhngơ̆m hiôk chơt na đei tơdrong truh. Minh kơsơ̆ brŏk đơ̆ng jang, sư ‘bôh klo sư soai dêh. Jơhngơ̆m sư blĕk dêh, klo sư teh sư. ‘Bôh hlĭch chrơp tơpă, sư krao hloi ‘bok bơtho tơm. ‘Bok bơtho adrin tơ’bôh, bơwei gah bơhngol ăn kơ klo akăn măr sư lơ giĕng. Dôm tơdrong rŏ kơ ‘lơ̆ng bơih, truh tơ minh măng noh, Kyle dơhlâu hăm phao đei hơtŏk ‘brơ̆m bơih tơkơ̆l sư. Lăm kơplah hli pă băt pơm liơ, Debbie jơ̆ băt kơ minh trong wă kơdâu ôn đĕch. Mă khan hnam mĕ ‘bă sư ataih, mălei hăm tơdrong kiơ noh. Debbie kơdâu đĭ jơhngơ̆m mă trong ataih noh wă kơ hlôi đơ̆ng noh. Sư đei arih gah sĕch akar, mălei lăm pah jrŭ, đei minh tơdrong kiơ noh pơchah pơchek đĭ bơih. Đon lui lăm sư hiong răm đĭ bơih. Sư ơh sơ’ngon, ưh pă đei lui ngeh kơ bu. Debbie drơ̆ng kơ hrĕch achăng lĕ Kyle, păng sơ’ngon tơpă sư kư̆m tŭk lê̆ đon lui kơ Yang Yêsu.

Tơdrong arih Debbie tơ’bôh tơdrong tơpă kơnê̆ dêh: rim ‘nu lu bơ̆n, bu bu kư̆m đei chĕp ba kơcheh pơchah ơh sơ’ngon. Gah ‘nguaih, lu bơ̆n hrŭk tơdrong hiôk hian, ‘lơ̆ng rŏ, mălei gah lăm dôm kơ lu đak măt lĕch ro. Wă kơ chơchă pơklaih gah bơhngol păng đei gĭt pah bơhngol đơ̆ng lăm tơdrong arih mă ưh thoi bơ̆n wă noh, lu bơ̆n kăl lăng ming trong yak năm đon lui Jop, Yakơ păng Yang Yêsu wă kơ pơhrăm iŏk kơplah tơ’bơ̆p ơh sơ’ngon.

Măkhan minh ‘nu bơngai tôm mah păng tơpăt, hli yom kơ ‘Bok Kei-Dei, Jop đei pŭ iŏk dôm kơ tơdrong hiong răm: mŭk tơmam hiong đĭ, akâu jăn tơ’boch roch jĭ jăn, păng mă loi truh tơ jâu pơm tơdrong yoch, đơ̆ng buăl juăt sư. Truh tơ akăn sư, ‘bơ̆t anăp mŭk tơmam, hnam hiong răm, kư̆m rơih iŏk tŭk lê̆ jơhngơ̆m chang hơmĕng păng đon lui kơplah kơnam iung: “Hiap bĕ Kră Yang ‘Bok Kei-Dei na lôch!” Mălei Jop ưh. Tŏk bŏk thŭng tơdrong lôch, Jop rơih iŏk pơih jơhngơ̆m năm tơ ‘Bok Kei-Dei. Tơm đơ̆ng pă băt pơm thoi yơ, sư mơn băt hloh kơ tơdrong rơdu tơrăn đơ̆ng sĕch akar păng ‘maih wă kơ đei Kră Yang. Noh jơ̆ ‘bai pơhrăm gah bơhngol gĭt tơpă mă kon bơngai băt kơ ơh sơ’ngon đĕch. Đơ̆ng đei lăm jơhngơ̆m kơdih ngăl pơ-ang, adrin pơm đơ̆ng kơdih mă ưh kơ mơn băt rơhing kơ Kră Yang. Lăm jơ măng mu lăm chăl arih, Jop rơih iŏk wih brŏk tơ Kră Yang, păng lăp minh trong noh đĕch ăn kơ lu bơ̆n chă ‘bôh tơdrong tưk tơiung păng chang hơmĕng khŏm khŏm.

Tơdrong kăl yua mă ‘bar đơ̆ng ơh sơ’ngon noh jơ̆ wei rong plei gah bơhngol hăm dôm kơ jơhngơ̆m đon ‘lơ̆ng. Nơ̆r Kră Yang lăm hla bơar Yakơ 1:2-4 tơ’blŏk kơ lu bơ̆n athei lăng dôm kơ tơdrong pơlong lăng nhen thoi jơhngơ̆m hiôk chơt tôm, yua kơ tơdrong pơlong lăng đon lui gô đei jơhngơ̆m kĕ chơ̆n, tơgŭm lu bơ̆n jing ‘lơ̆ng tôm, huay kơ kơ‘bah kiơ. Tơpă, ‘Bok Kei-Dei yua iŏk dôm lu tơdrong truh lăm chăl arih wă bơtho tơ’bôh, tưk tơiung păng pơsĭt đon lui lu bơ̆n. Tơdrong phara ‘bơ̆t lăm: lu bơ̆n gô pơm thoi yơ kơplah đei tơdrong truh păng hăm wă chu yom tơdrong tơplih đơ̆ng Yang Bơhngol ‘Lơ̆ng dah ưh?

Tơdrong gleh glăn truh tơgŭm lu bơ̆n wei rong tơdrong ‘mêm mơnat kơ bơngai nai. Pơhrăm gah tơdrong ơh sơ’ngon dêh đei tơ’bôh đơ̆ng Yang Yêsu. Kơplah ‘bôh bơngai tơpôl lơ, Sư đei jơhngơ̆m ‘mêm mơnat yua kơ lu sư pơmat tat păng wơ̆l jrok. Sư ưh kơ dơ̆ng lăng đơ̆ng gah ‘nguaih tơdrong ơh sơ’ngon kon bơngai. Sư mơn tơpă, hlôh băt kơ rơka lu sư na bơ̆jang hloi. Sư yua tơdrong mơsêh pơm ‘bĕng mi jing lơ rong lu sư, pơklaih tơdrong jĭ jăn, bơtho nơ̆r ‘Bok Kei-Dei păng krôp gom hăm tơdrong ‘mêm Sư. ‘Bok Pôl đei pơtrơp jơhngơ̆m ‘mêm mơnat thoi noh lăm II Kôrintô 1:14, sư pơma pơsĭt thoi âu Yang Yêsu pơlung lu bơ̆n kơplah oei lăm gleh glăn, wă kơ lu bơ̆n yua iŏk tơdrong pơlung Sư ăn kơ bơ̆n wă pơlung bơngai nai.

‘Bơ̆t anăp tơdrong kơnê̆ truh, jơhngơ̆m kon bơngai ‘bônh kơ pơ̆k huŏng lăm Satan: jing arăng thoi tơmo, kơnam, areh kơ chăl arih dah rong tơdrong klai gar hăm bơngai nai arih ‘lơ̆ng. Mălei, tơdah ‘maih wă kơ wơ̆ ‘lŏ lăm bơhngol lăm Yang Yêsu Krist păng đei tơdrong arih hiôk tôm mah, lu bơ̆n pơsĭt ‘nĕ ăn dôm tơdrong noh kăp sa jơhngơ̆m lu bơ̆n. Tơplih kơ noh, athei rơih chu yom Kră Yang, wă kơ wơ̆ ‘lŏ kơjăp lĕch hlôi đơ̆ng kial hơbŭt păng tơiung ming dôm tơdrong arih oei gleh glăn jum dăr.

Đei brŏ reh kơ pơdah rup: “Dôm lu bơngai gleh glăn” (Les Misérables), đei minh chăl mơn kơ ‘brơ̆k tơpă kơplah ‘bok ei sơng iŏk bơngai pơm yoch oei pơngot păng ‘maih nhă, ưh kơ đei hnam “Apinh ih mơ̆t tơ lăm hnam, yua kơ sư oei tơ’nguaih tơngiĕt găng đĭ. Tơ anih ‘nâu đei giơng ‘lơ̆ng wă kơ ih pơdơh truh tơ pơge, hơmĕng kơ đei tơdrong hiôk kơplah đơ̆ng rŏng kơ ơh sơ’ngon păng dôm kơ tơdrong ưh kơ dang ăi mă oei pŭ.”

Noh kư̆m jơ̆ nơ̆r krao ‘mêm mơnat, ‘bĕnh kơ jơhngơ̆m ‘mêm mă Kră Yang ling lang tơ’blŏk kơ rim ‘nu lu bơ̆n lăm Mathiơ 11:28: “Ơ lu bơngai mă oei pŭ trăp, năm tơ Inh bĕ, lê̆ Inh tơgŭm iĕm pŭ hơiơch.” (Mathiơ 11:28)

Apĭnh đĭ đăng krao khan hơdai: Kơkuh kơ ‘Bok Kei-Dei kơ tơdrong pơlung. Ih băt rơđah kơ dôm tơdrong sơ’ngon, dôm kơ đak măt lĕch ro pŭ iŏk yua kơ oei lăm teh đak yoch âu. Apinh Ih tŭk lê̆ tơdrong kơnam, pơm plơ̆ dah arăng jơhngơ̆m yua kơ tơdrong ưh kơ thoi kơdih ‘maih wă. Apinh Yang Bơhngol ‘Lơ̆ng krôp gom, pơlung păng pơklaih kon đơ̆ng dôm tơdrong pơchah pơchek lăm jơhngơ̆m kon. Apinh ăn kơ kon đei hlôi mơn tơdrong pơdơh păng hiôk hian hloh kơ tôm tơdrong lăm Yang Yêsu krist. Apinh Ih pơgơ̆r păng tơplih tơdrong chhŭr nuih kon jing plei lăm bơhngol kon wơ̆ ‘lŏ, wă kơ kon yua iŏk đơ̆ng tơdrong pơlung Ih pơtŏ ăn kơ lu bơngai jum dăr kơ kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, mă khan ih oei tơ’bơ̆p tơdrong chhŭr nuih ayơ, ‘nĕ kơ rơih iŏk tơwih rŏng kơ Kră Yang. Athei pơ̆n nuih pơih jơhngơ̆m năm tơ ‘Bok Kei-Dei tŏk bŏk thŭng tơdrong lôch. Athei ăn kơ Yang Bơhngol ‘Lơ̆ng tơplih dôm kơ tơdrong pơchah lăm jơhngơ̆m ih jing plei ‘lơ̆ng, jing tơdrong pơlung tưk tơiung dôm kơ tơdrong arih oei pơmat tat jum dăr kơ ih. Kơplah jơ ‘nâu, tơdah ih oei chĕp ba tơdrong chhŭr nuih tih, athei dơ̆ng ‘mơ̆i, pơjao tôm tơdrong kơ Kră Yang păng pơdơh tơ anih Sư. Yang Yêsu oei chang gô ih.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.