Tej zaug peb pheej xav tias mloog Vajtswv lus yog ib kaujruam twg ntawd nws zoo heev, zoo yam li nthuav dua ib nplooj ntawv tshiab puv npo lub tshwjchim. Tiamsis tsis yog li ntawd, txoj kev mloog lus ntau zaug nws pib los ntawm ib txoj haujlwm saib cuag li … tsis zoo. Ntawd yog koj yuav tau tawm ntawm qhov chaw koj ib txwm nyob ntawd ntev ntev los mus rau ib qhov chaw uas koj tsis muaj dabtsi dhau ntawm lub suab hu. Tej lub sijhawm zoo li ntawd, koj yuav yog leej twg: tus neeg xav ua tswv tuav nws lub neej, lossis ib tug thwjtim mloog lus mus raws li Tswv Yexus qab rau tej thaj chaw tshiab?

Hnub no, yog hnub 15/06/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jessica Teed dhau ntawm Zaj kawm TUS NQI YUAV TSUM THEM NTAWM IB TUG THWJTIM

“Yog leejtwg xav nrog kuv mus, tus ntawd yuav tsum tswj nws lub siab, thiab kwv nws tus ntoo khaublig nrog kuv mus.” (Mathais 16:24).

Kuv txog ib zaj siav loj loj, txav los rau ntawm xibhwb thiab muab tus yaum sij qhib tuam tsev cev rau yawg. Kuv luag thiab hais tias: “Kuv paub tias xibhwb tsis tau nkag siab tias vim li cas kuv ho ua li no, tiamsis kuv yuav tau mloog Vajtswv lus. Ntawm no yog tus yaumsij qhib tuam tsev uas kuv ib txwm tuav ntev los no thiab yeej tseem tuav cia. Thov xibhwb koj hu rau kuv, kuv mam hais meej meej rau koj.”

Nyob tob tob hauv sab ntsujplig, kuv hnov cuag li tau Vaj Ntsujplig ua tus coj ntau hli dhau los. Tiamsis hais tiag, kuv xaiv tsis txais thiab txhob txwm tsis hnov Vajtswv lub suab hu lub sijhawm ntev los no. Zaum no, txhais ruam mus nrog txoj kev mloog lus yeej tsis yog lub nra nyhav tiamsis yog ib txojkev txiav txim yooj yim. Nws yuam kom yuav tau them ib tug nqi kim kim thiab kuv paub kuv yuav tau ua haujlwm tamsim. Thaum ntawd kuv tsis muaj sijhawm los hais meej meej rau ib tug twg txog tej uas kuv tab tom ua lossis vim li cas kuv ho ua li ntawd. Tomqab 10 xyoo nrog Pawg Ntseeg nyob thiab loj hlob hauv Pawg Ntseeg no, qhov chaw uas kuv txais yuav Tswv Yexus ua kuv tus Tswv cawm seej, nws coj kuv mus rau hauv ib txoj kev tshiab – ua haujlwm ntawm ib Pawg Ntseeg txawv. Thawj zaug, kuv tso tseg tag nrho tej uas kuv ib txwm swm mus rau ib txoj kev tshiab kuv tsis paub kuv tsuas paub mus raws li Vajtswv lub suab hu xwb. Saib sab nraud, qhov kev txiav txim no cuag li tsis muaj kev txawj ntse thiab nyuaj nkag siab. tiamsis nws yog zaj kawm thawj hauv txoj kev dhau los ua Tswv Yexus ib tug thwjtim.

Tswv Yexus hais rau Nws cov thwjtim tias: “Yog leejtwg xav nrog kuv mus, tus ntawd yuav tsum tswj nws lub siab, thiab kwv nws tus ntoo khaublig nrog kuv mus” (Mathhais 16:24).

Vajtswv ua rau peb pom tias tus nqi yuav tau them thaum nrog Vajtswv mus yog mloog lus. Ntawd yog txoj kev txiav txim tso txhua yam tseg, tso tej homphiaj thiab kev xav ntawm tus kheej mus raws li Vajtswv lub siab nyiam. Ntawd yog muab Tswv Yexus tso ua ntej thiab mus raws li Vajtswv txoj kev nyob saum yus lub siab nyiam. Tiamsis, ua li no yeej tsis tau txaus nthuav tawm tag nrho ib tug thwjtim tiag lub siab.

“Tus uas hlub nws niam nws txiv heev dua hlub kuv, tus ntawd tsis tsimnyog ua kuv tus thwjtim; tus uas hlub nws tej tub tej ntxhais heev dua hlub kuv, tus ntawd tsis tsimnyog ua kuv tus thwjtim. Tus uas tsis kwv nws tus ntoo khaublig nrog kuv mus, tus ntawd tsis tsimnyog ua kuv tus thwjtim. Tus uas khuvxim nws txojsia, tus ntawd yuav tsis tau txojsia, tiamsis tus uas tsis khuvxim nws txojsia, vim nws ntseeg kuv, tus ntawd yuav tau txojsia.” (Mathais 10:37-39).

Nrog Tswv Yexus mus tsis yog tias tsuas nres ntawm tus cwjpwm kam muab nws lub neej fij xwb. nws yog txoj kev txiav txim kam muab tus cwjpwm qub ntsia saum ntoo khaublig thiab muab nws txojsia mus txhiv vim Tswv Yexus lub npe.
Vajtswv tejlus nyob hauv II Kauleethaus 5:17 sau tias: “Tus uas nrog Yexus Khetos koom ib txojsia, tus ntawd yog neeg tshiab. Nws lttb neej qub twb dua lawm nimno nws muaj lub neej tshiab.”

Lub neej dhau los ua thwjtim tiag pib thaum uas peb zeem paub tias: Peb lub neej twb tau thiv los ntawm ib tug nqi kim heev – tus nqi uas Tswv Yexus yuav tau them los ntawm txhua yam, los ntawm Nws cov ntshav thiab Nws txojsia. Nws tau them rau peb ib tug nqi loj dhau, nws mus deb tshaj tej homphiaj uas peb yeej ib txwm xaiv los ua lub neej txhua hnub. Dhau los ua ib tug thwjtim tiag txhais tias cim civ txaus siab tuag tus cwjpwm qub mus – txiav txim tso lub neej qub tseg, tus neeg qub, nrog rau tus cwjpwm khav theeb. Dhau ntawd, peb pib nkag mus rau hauv qhov chaw tshiab muaj lub neej puv npo uas Vajtswv twb npaj rau peb, txawm yog txoj kev ntawd yuam kom peb yuav tau them ntau npaum cas.

Kuj zoo li lub hnab qub yuav ntim tsis tau tej cawv tshiab, peb tus cwjpwm qub yeej tsis muaj ib txoj kev twg yuav piv tau rau Leej Txiv dawbhuv lub hwjchim, vim tej lus samhwm thiab Vajtswv txoj kev nqua hu tseg rau koj loj tshaj ntau npaug. Tus neeg qub ntawd yeej yuav koom tsis tau rau tej yam zoo uas Vajtswv xav ua nyob hauv koj thiab dhau ntawm koj. Yog Yexus Khetos ib tug thwjtim tiag, peb yuav tau “hnav tus neeg tshiab” txhua hnub, ua lub neej npaj txhij cia Vajtswv ua tus tswj. Ntau zaug, peb yuav tau zoo siab hlo ua tej haujlwm uas ntiajteb, tej neeg txheeb ze, lossis tej kwv tij hauv Pawg Ntseeg suav tias yog ruam. Tiamsis thaum peb txais yuav raug suav tias yog “ruam” ua ntej ntawm neeg ntiajteb vim txhawb nqa Yexus Khetos, thaum ntawd thiaj yog lub sijhawm peb dhau los muaj kev txawj ntse thiab dhau los ua Tswv Yexus tus thwjtim tiag.

Thov caw nrog kuv peb thov Vajtswv ua ke: Leej Txiv muaj kev hlub, muaj tej tus yaum sij nyob hauv lub neej yeej tseem tuav ruaj ruaj – tej yam uas yog nqaij tawv tau tav kuv nkag los rau hauv lub neej puv ntoob uas koj pub rau peb. Thov Vaj Ntsujplig pub rau kuv muaj lub siab tawv fij tag nrho lub hlwb thiab tus cwjpwm no tso rau saum lub thaj fij mloog lus. Thov pab kom kuv txhob ntshai thaum nkag mus rau hauv txoj kev uas tsis paub tom ntej, vim kuv paub tias txawm yog txoj kev tom ntej yuav tshiab luaj twg los, tus uas tuav kuv tes yeej tseem yog tus ncaj ncees. Kuv xaiv mloog Koj lus, txawm yog lub ntiajteb yuav suav tias yog ruam, vim kuv paub tias koj txoj kev yog txoj kev ntawm txojsia puv npo koob hmoov mus ib txhis. Kuv thov hauv Tswv Yexus Khetos lub npe, Amees.

Cov kwv tij, tej zaug hnub no, koj tab tom hnov mus ib leeg ntawm txoj kev koj taug, ntshai tsam ntiajteb thuam vim tej kev txiav txim uas yus tau xaiv. Tiamsis nco ntsoov tias, txoj kev ruam hauv tib neeg lub qhov muag ntau zaug ho yog Vajtswv txoj kev txawj ntse. Nws tsis yuam kom koj yuav tau nkag siab txhua txoj kev, nws tsuas cheem tsum kom koj ntseeg siab rau tus uas tuav koj lub neej tom ntej xwb. hnub no, muaj lub siab tawv hais rau Vajtswv tias: “Tus Tswv, kuv nyob ntawm no, thov siv kuv raws li Vajtswv lub siab nyiam” Tsuas yog thaum twg koj txaus siab hlo tso txhua yam tseg vim Vajtswv, koj thiaj yuav nrhiav tau lub ntsiab tiag ntawm txoj kev ua neej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.