Rŏlăng lu bơ̆n ngăl tơchĕng chu yom Kră Yang jơ̆ pơtơm blŭng a tơdrong kiơ noh ‘lơ̆ng rŏ dêh, nhen thoi pơih hla bơar hlak plơ̆ng đei hơdah rang mơnhal. Mălei ưh ôh, tơdrong chu yom đei pơtơm hăm tơdrong jang nhen thoi …ưh kơ rơ-a kiơ. Noh jơ̆ kơplah ih yak lĕch đơ̆ng anih mă ih đei oei đunh bơih, wă yak năm tơ anih ih ưh kơ đei kiơ lăm tơpang ti ‘nguaih kơ nơ̆r krao. Lăm kơplah thoi noh, ih noh bu: bơngai tơ’ngla adrin bơwei chăl arih sư, dah minh ‘nu bơngai lui chu yom kiơ̆ jơ̆ng Kră Yang truh tơ anih hlich?

Năr ‘nâu, ‘năr 15/06/2026, tơdrong tơdă Amăn Jơ Krao Khan Rim Năr, apinh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jessica Teed kơ̆l ‘bai BƠNGAI LUI KƠ ‘BOK KEI-DEI GÔ PŬ IŎK

“Dah bơngai bu wă kiơ̆ Inh, sư athei tŭk đĭ tơdrong sư kơdih păng tôi kơdih ‘long pơglang chu lôch yua kơ wă kiơ̆ Inh. ” (Mathiơ 16:24)

Inh dui jơhngơ̆m mă tai, năm tơ gah ‘bok bơtho păng dan ăn tơ tơpang ti sư ‘long pơih khoă hnam akŭm. Inh hiĕk păng pơma: “Inh băt kơ ‘bok bơtho ưh kơ hlôh yua kơ kiơ inh pơm thoi âu, mălei kăl kơ chu yom Kră Yang. ‘Nâu jơ̆ ‘long pơih khoă hnam akŭm mă đunh bơih inh oei chĕp bơwei. Apinh ‘bok bơtho krao inh đơ̆ng rŏng, inh gô roi tơbăt tôm.”

Đơ̆ng lăm bơhngol, inh đei mơn chông anhăk đơ̆ng Yang Bơhngol ‘Lơ̆ng đơ̆ng lơ khei adrol. Pơma mă tơpă, inh đei rơih ưh kơ drơ̆ng iŏk păng tŭk lê̆ nơ̆r krao đơ̆ng Kră Yang đunh jơ năr bơih. Kơplah ‘nâu, yak năm hăm tơdrong chu yom ưh kơ đei drơ̆ng ‘bônh ôh. Gô đei tơdrong pŭ iŏk trăp păng inh băt kơ inh kăl kơ pơm hloi. Kơplah noh, inh ưh kơ đei jơ wă roi tơblang ăn kơ bu bu dôm lu tơdrong inh oei pơm dah yua kơ kiơ. Đơ̆ng rŏng 10 sơnăm wơ̆ ‘lŏ lăm Hnam Akŭm, anih mă inh lui sơng iŏk Yang Yêsu jing ‘Bok dŏng pơkliah inh, Sư chông ba inh năm tơ tơdrong arih plơ̆ng dơ̆ng – bơ̆jang bơwih bơwăn tơ Hnam Akŭm nai. Mă blŭng a, inh achăng lê̆ dôm tơdrong juăt kơ đei mă yak năm lăm nơ̆r krao iŏk đơ̆ng Kră Yang. Lăng đơ̆ng gah ‘nguaih drơ̆ng iŏk ‘nâu nhen ưh kơ hơgei păng ưh kơ hlôh. Mălei noh tơm kơ ‘bai hŏk pơhrăm blŭng a ăn kơ inh lăm trong yak năm jing minh ‘nu bơngai lui tơpă kơ Yang Yêsu.

“Klaih kơ noh Yêsu khan kơ lu bơngai pơhrăm păng Sư: “Dah bơngai bu wă kiơ̆ Inh, sư athei tŭk đĭ tơdrong sư kơdih păng tôi kơdih ‘long pơglang chu lôch yua kơ wă kiơ̆ Inh. ” (Mathiơ 16:24)

Kră Yang ăn kơ lu bơ̆n ‘bôh tơdrong gô pŭ iŏk kơplah yak năm kiơ̆ Sư noh jơ̆ chu yom tôm tơdrong. Noh jơ̆ drơ̆ng iŏk gô achăng tôm tơdrong, tŭk lê̆ tơdrong proh hơmet păng rơhing đơ̆ng kơdih wă rơih iŏk kiơ̆ kơ Kră Yang lăp đon. Noh jơ̆ dan adrol hloh đơ̆ng Yang Yêsu păng trong yak năm Sư dan adrol hloh kiơ̆ kơ kơdih Sư. Mălei, dôm noh đĕch tam mă tơ’bôh đĭ tôm tơdrong đơ̆ng minh ‘nu bơngai lui tơpă.

“Bu ‘mêm kơ mĕ ‘bă sư hloh kơ sư ‘mêm kơ Inh, bơngai ‘noh ưh kơ trŏ kơ tơbôl hăm Inh ôh. Bu ‘mêm kơ kon sư hloh kơ sư ‘mêm kơ Inh, bơngai ‘noh kư̆m ưh kơ trŏ wă tơbôl hăm Inh mơ̆n. Bu ưh kơ chu tôi ‘long pơglang sư kơdih lôch kiơ̆ Inh, bơngai ‘noh kư̆m ưh kơ trŏ wă tơbôl hăm Inh mơ̆n. Bu ưh kơ chu lôch yua kơ tơdrong Inh, bơngai ‘noh lôch hoh hoh đĕch, ưh kơ yua kiơ ôh. Bu chu lôch yua kơ tơdrong Inh, bơngai ‘noh gô arih ling-lang.” (Mathiơ 10:37-39)

Yak năm kiơ̆ Yang Yêsu ưh kơ dơ̆ng ‘bơ̆t tơ’bôh jơhngơ̆m pơyơ̆r chăl arih. Noh jơ̆ chu pơ̆ng kơ đinh dôm tơdrong juăt kơpơm păng chu lôch yua kơ anăn Sư.
Nơ̆r Kră Yang lăm II Kôrintô 5:17 chih thoi âu: “Thoi noh na bu kiơ̆ Yêsu Krist, bơngai noh bơ̆n băt kơ ‘Bok Kei-Dei pơjing sư jing bơngai ‘nao, dôm tơdrong so ưh pă đei boih, sư đei tơdrong ‘nao ngăl, yua kơ sư jing bơngai ‘nao boih.”

Lăm trong yak năm jing bơngai lui tơpă blŭng a kơplah lu bơ̆n mơn băt: chăl arih bơ̆n đei răt iŏk kăp dêh – Yang Yêsu răt iŏk hăm tôm tơdrong, hăm pham păng tơdrong arih Sư. Sư pŭ iŏk tơplih yua kơ lu bơ̆n tih dêh, hloh kơ kơnhăm đơ̆ng kon bơngai mă lu bơ̆n oei rơih iŏk tơdrong arih rim năr. Jing minh ‘nu bơngai lui tơpă wă khan pơlô̆ch lê̆ dôm tơdrong juăt kơ pơm yoch – tŭk lê̆ tơdrong arih so, bơngai so hăm tŭk lê̆ jơhngơ̆m pơang. Đơ̆ng noh, lu bơ̆n pơtơm yak năm lăm tơplih ming ‘nao, tôm mah đơ̆ng Kră Yang dan ăn bơih kơ bơ̆n, mă khan trong yak năm noh gleh pơmat thoi yơ.

Kư̆m nhen thoi get đak so ưh kơ gơh mong tơdrô ‘nao, tơdrong arih so lu bơ̆n ưh gơh hơdai hăm tơdrong rang mơnhal ‘Bok Kei-Dei ‘Bă, yua kơ tơdrong dan ăn bơih păng krao iŏk đơ̆ng Kră Yang tih hloh kơ noh. Bơngai so noh ưh kơ hơdai lăm tơdrong hlich chrơp mă ‘Bok Kei-Dei ‘maih wă pơjing lăm ih. Jơ̆ minh ‘nu bơngai lui tơpă kơ Yang Yêsu Krist, lu bơ̆n kăl kơ “jing bơngai ‘nao” rim năr, arih hăm tơdrong arih ăn Kră Yang pơgơ̆r tôm tơdrong. Kư̆m đei, lu bơ̆n kăl kơ pơih jơhngơ̆m pơm dôm tơdrong mă teh đak, buăl juăt, dah truh tơ ‘nhŏng oh lăm Hnam Akŭm lăng khan wơnh. Mălei kơplah lu bơ̆n drơ̆ng iŏk “wơnh noh” ‘bơ̆t anăp kon bơngai teh đak yua kơ wă pơ ư pơ ang kơ Yang Yêsu Krist, noh jơ̆ kơplah lu bơ̆n jing gơh hơgei, păng jing bơngai lui tơpă kơ Sư.

Apĭnh đĭ đăng krao khan hơdai: Kơkuh kơ ‘Bă mă ‘mêm, đei dôm lu ‘long pơih khoă lăm chăl arih mă ki sơ̆ kon bơwei kơjăp- dôm tơdrong gah sĕch akar pơgăn kon yak năm lăm tơdrong tôm mah đơ̆ng Ih ăn. Apinh Yang Bơhngol ‘Lơ̆ng Ih ăn kơ kon kĕ chơ̆n wă pơyơ̆r tôm tơdrong tơchĕng păng tơdrong yoch ‘bơ̆t chơnang soi chu yom. Apinh tơgŭm kon huay kơ hli wă yak năm ưh kơ thoi kon dan bơih, yua kơ kon băt mă khan trong yak năm hlich thoi yơ, na Tơ‘ngla rôp ti kon jơ̆ Tơ’ngla ‘Lơ̆ng Tơpăt. Kon rơih iŏk chu yom kơ Ih, mă khan teh đak khan noh jơ̆ wơnh, yua kơ kon băt trong yak năm Ih noh jơ̆ trong yak năm tơdrong arih ‘bĕnh kơ pŭn hiôk khŏm khŏm. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng kơplah jơ ‘nâu, ih mơn kơ oei minh adrô̆ lăm trong yak năm, hli krê kơ đe hiĕk kơchơ̆ yua kơ drơ̆ng iŏk đơ̆ng ih. Mălei athei ‘blŏk, tơdrong kơtul lăm măt kon bơngai kư̆m đei jing tơdrong gơh hơgei tôm lăm trong tơdă đơ̆ng ‘Bok Kei-Dei. Sư ưh kơ athei ih hlôh tôm tơdrong, Sư kăl kơ ih băt lui gơnang kơ Tơ’ngla chĕp tơdrong arih. Năr ‘nâu athei đei jơhngơ̆m pơ̆n nuih apinh Kră Yang thoi âu: “Kơkuh kơ Kră Yang, kon âu, apinh Ih yua kon kiơ̆ thoi Ih wă!” yua kơ kơplah ih pơih jơhngơ̆m tŭk đĭ dôm lu tơdrong yoch yua kơ Kră Yang, na ih gô chă ‘bôh tơdrong gĭt lăm tơdrong arih.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.