Đei yua tuch luch- ‘noh jơ̆ đĭ đăng dôm tơdrong kiơ teh đak ‘nâu đei hiơ̆k bơngơ̆t. Ih adrin dôm yơ ưh kơ gĭt kăl, lu sư lăp kăl kơ băt ih đei dôm yơ điêm. Tơdrong chhur nuih noh mưh lăp đei hơdai lăm tơdrong arih đon lui, pơm kơ lu bơ̆n gleh lap yua kơ mơn ‘bôh kơdih ưh tim mă ‘lơ̆ng tôm. Lu bơ̆n adrin lăm tơdrong jang, pơyơ̆r lăm tơdrong bơwih bơwăn, mă lei mưh lăp dôm kơ tơdrong ưh kơ đei kĕ jei đơ̆ng tơdrong truh oei nŏng kơ truh. Mă lei đei minh tơdrong tơpă tih hloh kơ đĭ đăng dôm tơdrong ưh kơ đei kĕ jei lăm anih tơblah teh đak ‘nâu: lu bơ̆n gah khŭl kĕ jei, yua kơ ‘Bă Kơpal Plĕnh lu bơ̆n trŏ jơ̆ kĕ jei tôm tơdrong bơih.

Năr ‘nâu, ‘năr 16/06/2026, tơdrong tơdă Amăn Jơ Krao Khan Rim Năr, apinh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Ben Ledger kơ̆l ‘bai PƠKEH KĔ JEI.

“’Bôh ră ‘ba lơ dôm noh, mă-lei hui bơngai wă năm kĕch iŏk. Thoi noh na bơ̆n athei adrin krao khan apinh tơ’ngla tơm mir âu wă wơh lơ bơngai năm tơgŭm kĕch iŏk ‘ba âu.” (Mathiơ 9:37-38)

Inh hơ iă dêh kơ tơdrong đă ‘bŏng lŏng, păng kŭm ‘mêm hơiă kơ tơdrong jang tơblang tơdrong lăm kơmăi. Kiơ̆ kơ juăt lei ‘bar tơdrong ‘nâu ưh kơ đei hơtŭt ‘bơm băl, mă lei đei minh jơ năr gĭt kăl kơplah ‘bar tơdrong hơdai tơ’bưh băl păng bơtho kơ inh minh tơdrong pơhrăm iŏk đon lui gĭt kăl.

Sơnăm sơ̆, kon drŏnglo inh đei pơtơm đă ‘bŏng lŏng. Kon ‘lơ̆p đei hơiă kơ anih răp ‘măng. Inh tơchĕng hơiă tơpă dah kơdih pơpôi hơmet đêl dôm wơ̆t kon dŏng kĕ jei dah ‘bŏng lŏng mơ̆t tơ ‘măng lăm rim wơ̆t đă pơjei. Ưh kơ sĭ wă pơhiôk jơhngơ̆m wă kơbăt gah kơsô̆ dôm yơ đơ̆ng inh, ‘nâu kŭm jơ̆ trong tơgŭm kon hlôi đơ̆ng tơdrong ‘blŏk ling lang gah dôm tơdrong ưh kơ đei kĕjei. Pơtih gia, đơ̆ng rŏng kơ minh wơ̆t pơjei đă ‘bŏng lŏng noh, kon ‘nă hal roi hăm ‘bok yă khan: “ii, kon ăn mơ̆t lăm gôn ‘bar wơ̆t, mă lei kŭm đei găn kĕ jei truh kơ pơđăm wơ̆t đă wăi!”

Mălei, đei tơdrong chhŭr nuih tơpă kơplah dơ̆ng ‘bơ̆t anih răp ‘măng: mă buăl dŏng ăn kĕ jei truh tơ dang yơ hĭ, na tơ hơtuch tơdrong pơjei jô̆ hăm ‘bŏng lŏng mơ̆t tơ ‘măng lơhloh. Bơngai hưch wă kơ pơjei kơdeh ‘bŏng lŏng ưh kơ đei layơ hiơt kơ Tim Howard tơ World Cup 2014. Sư đei dŏng rôp bŏng lŏng 16 wơ̆t kơplah pơjei hăm khŭl lu Bi oei đei jơhngơ̆m ‘nă hal. Mălei hmach dêh, sư oei rôp ưh kơ đei ‘bơm ‘bar tŏ na ‘bŏng lŏng mơ̆t tơ ‘măng khŭl sư. Yua kơ khŭl pơjei bŏng lŏng Mi kăl kơ tơ ‘mơ̆t ‘bŏng lŏng tơ ‘măng minh pôm đĕch, kơlih kơ thoi thoi mă kơdeh ‘bŏng lŏng mă khan hơ-iă dang yơ hĭ, lu sư kư̆m pơdơh kơ pơjei ‘bơ̆t doh bơih.

Kon drŏnglo inh kŭm đơ̆ng hlôi tơ’bơ̆p tơdrong ơh sơ’ngon thoi noh. Đei dôm kơ jơ pơjei, khŭl kon ưh kơ đei kĕjei mă khan kon đei dơ̆ng găn dôm kơ bơlŏng đă tơklă gah sư. ‘Bơ̆t tơdrong pơjing đă bơlŏng khŭl hơ’lơ̆p, đĭ đăng lu hơ’lơ̆p đei tơplih pơlong lăng jơhngơ̆m pran rim anih, păng dôm kơ khŭl nai kơplah pơm ‘bơ̆t anih răp ‘măng đei ăn mơ̆t tơ ‘măng lơ hloh kơ ‘bŏng lŏng khŭl sư mơ̆t tơ khŭl gơ̆p.

Tơchĕng pơwao gah tơdrong ‘nâu, inh tơchĕng truh kơ rup Khŭl Bơngai Lui. ‘Nâu jơ̆ tơdrong pha ra lăm “kơdeh ‘bŏng lŏng mă khan hơ-iă” đơ̆ng ‘Bok Dŏng Pơklaih Yang Yêsu kơplah Sư oei lăm teh đak, păng adrin đơ̆ng lu bơngai pơhrăm roi đơ̆ng kơplah Sư Tŏk Tơplĕnh? Chăl lăm Sơ̆p Hla Bơar Nơ̆r ‘Bok Kei-Dei kơđeh lăm Mathiơ 9:18-33 jơ̆ tơ’bôh kơ tơdrong mơsêh mơyang đơ̆ng Sư. Tơdrong lôch, jĭ jăn ưh kơ gơh hơmet, tơdrong măt tol, păng hăm tơlei glang đơ̆ng yang kơnê̆ pơm kơ kon bơngai thĕng hreh- đĭ đăng đei kơkuh ‘bơ̆t anăp Sư. Ưh kơ đei minh tơdrong blah ayơ đơ̆ng ayăt gơh hlôi kơ Sư!

Mă lei, đơ̆ng rŏng kơ dôm tơdrong mơsêh hlĭch noh, Sư đei ba ăn nơ̆r…., krao wơ̆n lu bơ̆n mơ̆t lăm anih pơjei: “Yêsu ‘bôh bơngai tơpôl lơ noh, na Sư pơma pơtih gia kơ lu bơngai pơhrăm păng Sư gah tơdrong đei lơ bơngai tam mă lui, mă-lei hui bơngai năm bơtho lu sư: “’Bôh ră ‘ba lơ dôm noh, mă-lei hui bơngai wă năm kĕch iŏk. Thoi noh na bơ̆n athei adrin krao khan apinh tơ’ngla tơm mir âu wă wơh lơ bơngai năm tơgŭm kĕch iŏk ‘ba âu.” (Mathiơ 9:37-38)

Đơ̆ng tơdrong lôch păng iung arih, Kră Yang Yêsu đei tơ’bôh tơbăt khan lăm blah lôch arih kơ kon bơngai, tơdrong arih đei kĕjei tơdrong lôch. ‘Noh kŭm jơ̆ minh tơdrong kĕjei băt hơđăl! Kơplah oei wă pơjei băl lăm anih ‘nhĕt teh đak ‘nâu, lu bơ̆n athei ling lang ‘blŏk ngơk lăng tơ kơ’bang chih jô̆ gah bơhngol. Trŏ jơ̆ mưh lăp lu bơ̆n đei ăn bơ’lŏng mơ̆t lăm ‘măng, kŭm đei kơplah tơtăm păng ưh kơ băt pơm thoi yơ ‘bơ̆t anăp dôm tơdrong pơhlŭ pơlung mă trŏ đei hơmet hơđăl hloh. Mă lei athei ‘blŏk khan: lăm khŭl linh ‘Bok Kei-Dei, lu bơ̆n ling lang gah khŭl gô kĕ jei.

Khul linh noh ưh kơ sĭ lăp dôm “sơnglŏng” hơdah tơ anih bơtho. ‘Noh jơ̆ kĕ đei jei đơ̆ng minh khŭl tơpôl Bơngai Lui. Minh ‘nu bơngai gơh đei ba ăn dôm tơdrong kĕ jei hlĭch chrơp, mă lei đĭ đăng jơ̆ yua kơ đơ̆ng tơdrong hơdai băl minh jơhngơ̆m, tơdrong tơnăp hrĕp hreh păng jơhngơ̆m pơyơ̆r đơ̆ng dôm lu ‘nhŏng mŏ oh hơdai năm pôm trong.

Yua kơ thoi noh, kơplah truh ‘bơ̆t bơ̆n tơ’bơ̆p hăm tơdrong pơlong lăng, athei mĭnh jơhngơ̆m hơdai hăm Yang Bơhngol ‘Lơ̆ng wă pơjing jơ đei chih thim điêm ‘lơ̆ng rŏ. Dah tim mă truh kơ bơ̆n, athei pơtrơp hơdai păng ‘nhŏng mŏ ŏh bơ̆n ăn kơ tôm tơdrong jang lu bơ̆n pơm đei tơdrong minh jơhngơ̆m đon păng jơhngơ̆m pơ̆n nuih. Yua kơ kơplah re tơgiĕp đĭ jơ, tơdrong sŏng sa hiôk chơt gô ưh kơ sĭ lăp đei đunh na gô hiong đĭ, lăm tơdrong hiơ̆k bơngơ̆t đơ̆ng “bơyan bơjei tơ anăp”. Lăm Kră Yang, lu bơ̆n jơ̆ dôm lu bơngai kĕ jei ư-ang dĭng truh ning mônh!

Apĭnh đĭ đăng krao khan hơdai: Kơkuh kơ ‘Bă mă ‘mêm, bơnê kơ Ih yua kơ lăm dôm kơ tơdrong tơplih ling lang lăm chăl arih, Ih oei jơ̆ Tơ’ngla bơwei bơhngol kon lăm tơdrong hiôk hian. Bơnê kơ Kră Yang yua kơ kĕjei tih hloh Ih đei ‘măn ăn kơ kon đơ̆ng tơdrong iung arih ư-ang. Apinh Kră Yang huei kơ jô̆ yo kơ dôm kơplah kon kơnhăm dêh lăm dôm tơdrong ưh kơ đei kĕjei, dôm kơ plah kon đei pơ̆k huŏng lăm tơdrong pơhlŭ păng gleh lap, na hiơt bơih khan kon đei rôp kơjăp gah kĕjei yua kơ tơdrong mơnat ăn đĕch đơ̆ng Ih. Apinh Yang Bơhngol ‘Lơ̆ng ăn kơ kon tơdrong pơ̆n nuih wă ăn akâu jăn, pơgơ̆p kon hăm dôm lu ‘nhŏng mŏ ŏh jum dăr lăm mĭnh jơhngơ̆m đon, wă kơ rim tơdrong kon jang, rim nơ̆r kon pơma đei tơgŭm lăm tơdrong tơ’bôh tơdrong ư-ang Ih kơ teh đak. Kon hơpơi yak lăm năr ‘nao plơ̆ng hăm jơhngơ̆m hiôk hian tôm mah, yua kơ băt khan đei yua tuch luch đei bơih sư pơkă lăm tơdrong ư-ang. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơgiĕp re đĭ jơ đơ̆ng chăl arih ‘nâu tơpă ưh kơ trŏ jơ̆ pơtôch. ‘Noh trŏ jơ̆ blŭng a đơ̆ng tơdrong sŏng sa hiôk chơt kĕ jei. ‘Nĕ kơ ăn dôm kơ tơdrong ưh kơ đei kĕjei pơm kơ ih bơ̆l hăl, kŭm ‘nĕ kơ ăn dôm kơ tơwŏk đơ̆ng năr brei rôp jơ̆ng ih lăm trong yak năm đon lui. Athei hơđơ̆ng bĕ, yua kơ tơ lăm anih pơjei băl ‘nâu ih ưh kơ đei minh drô̆ ôh. Lu bơ̆n gah minh khŭl đei rôp kơjăp tơpă gah kĕ jei, yua kơ kơdih ‘Bok Dŏng Pơklaih Yang Yêsu đei bơih “kĕjei maih” tơplih kơ lu bơ̆n tơ kơpal ‘long pơglang sơ̆ bơih. Tơdrong jang ih păng inh dang ei jơ̆ adrin yak tơ anăp, hơdai hăm ‘nhŏng mŏ oh khŭl hơdai păng ling lang lăng tơ kơ’bang chih điêm đơ̆ng chăl arih khŏm khŏm- anih mă anăn ih đei chih hơmet lăm sơ̆p dôm lu bơngai kĕ jei. Tơdrong hiôk chơt ‘nâu gô ưh kơ layơ pĭt, păng kĕ jei ‘nâu ling lang gah ih.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.