Peb muaj tus cwjpwm xav tswj txhua yam. Peb xav tias tsuas yog siv zog xwb ces yuav tiv dhau. Tiamsis qhov tseeb, muaj tej lub sijhawm peb yim nti, peb ho yuav poob rau txoj kev qaug zog. Yog ib tug ntseeg Vajtswv, peb yuav tau paub tib neeg lub zog kuj muaj nrim, thiab peb muaj ib txoj kev txhawb zog loj thaum paub tias Vajtswv nyob rawv ntawm peb ib sab rau txhua lub caijnyoog thiab siv Vajtswv txhais tes muaj zog los rub peb.

Hnub no, yog hnub 18/06/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Maria Schleicher dhau ntawm Zaj kawm VAJTSWV TXHAIS TES TUAV KUV

“Yog kuv ya mus dhau rau sab hnubtuaj lossis sab hnubpoob  los koj yuav nyob qhov ntawd coj kuv kev, koj yuav nyob qhov ntawd pab kuv.” (Ntawv Nkauj 139:9-10).

Puas tau muaj zaum twg koj hnov khoob lug thiab tsis muaj kev mus lawm tau? Ib yam li koj tab tom nyob tiamsis tsis muaj txojsia. Koj yeej tseem ua neej txhua hnub, yeej ntsia pom txhua yam ib ncig, tiamsis hauv lub siab ho hnov cuag li tsis muaj dabtsi, yus tsis yog nyob rau lub neej no tiag. Kuv kuj ntsib dhau tej hnub zoo li ntawd. Sab nraud, txhua yam cuag li tsis ua cas, tiamsis sab hauv yog ib qhov khoob lug thiab ib qhov kev ntshaw uas tsis muaj dabtsi yuav txhawm tau. Kuv siv zog nrhiav txhua txoj kev los ntawm tus kheej lub zog pauv qhov uas vam khom rau Vajtswv tej lus. Tiamsis yim siv zog, kuv hnov txhua yam txhov nyho thiab tsis paub kev mus.

Tiamsis, nyob rau tej hnub tsaus ntuj ntawd, Vajtswv yeej tseem yog tus paub zoo, nws tshwm ntsej muag thiab ua rau muaj kev kaj siab. Vaj ntxwv Daviv tus neeg uas ntsib dhau tej kev txomnyem thiab khiav nkaum tau sau tias:

“Kuv yuav khiav mus nkaum qhov twg thiaj khiav dim koj? Kuv yuav khiav mus nkaum qhov twg, koj thiaj tsis porn kuv? Txawm yog kuv nce mus txog saum ntuj ceebtsheej los koj yeej nyob saud, yog kuv nqis mus rau hauv tubtuag teb los koj yeej nyob hauv thiab. Yog kuv ya mus dhau rau sab hnubtuaj lossis sab hnubpoob los koj yuav nyob qhov ntawd coj kuv kev, koj yuav nyob qhov ntawd pab kuv.” (Ntawv Nkauj 139:7-10).

Ntawv Nkauj 139 yog cov lus qhuas txog Vajtswv yog tus paub txhua yam thiab nyob tau txhua qhov. Vajntxwv Daviv hais tias Vajtswv paub zoo txhua yam hauv yawg lub neej: thaum yawg zaum, thaum yawg sawv, txog rau tej kev xav thiab cov lus uas tsis tau hais tawm. Vajtswv tsis yog tsuas lam paub Daviv xwb, tiamsis paub zoo thiab nyob ze Daviv. Vajtswv paub tej yam zoo thiab tej qhov yuam kev, nrog peb tej kev txhaum. Nws pom tej uas peb yuam kev, tej kev qaug zog thiab tej kev tu siab nyob puag hauv peb lub neej.

Vim paub tias Vajtswv yog tus paub zoo, yog li Daviv thiaj nug lo lus nug: “Kuv yuav khiav nkaum Vajtswv qhov twg? Kuv yuav ua cas khiav dim ntawm Vajtswv txoj kev tshwm ntsej muag? Vim yawg paub tias txawm yog nyob saum ntuj, hauv ntiajteb lossis puag hauv qab tiv txwv, tub tuag teb los, Vajtswv yeej muaj ntsej muag nyob txhua qhov. Nws tshwm ntsej muag hauv peb tej kev zoo siab thiab nyuaj siab tib si. Txawm yog muaj tej lub sijhawm peb pom cuag li peb poob rau hauv “tub tuag teb” ntawm txoj kev tag kev cia siab, tsis paub ua cas, lossis pom tias yus tab tom nyob “puag hauv nruab tiv txwv” ntawm txoj kev nyob ib leeg los qhov ntawd “Vajtswv txhais tes yuav tuav peb tes”. Yeej tsis muaj ib yam dabtsi yuav thaiv tau peb kom Vajtswv tsis pom peb li.

Peb txhua tus ib leeg nyias muaj nyias ib lub neej txawv, txawm yog yuav zoo li cas los peb yeej ruaj siab ntseeg tias Vajtswv tab tom tshwm ntsej muag nrog nraim peb, vim Vajtswv tej lus twb hais meej meej txog tej no lawm. Txawm yog tej kev xav ua rau peb xav tias Vajtswv tsis pom lossis tsis hnov txog peb qhov teeb meem los, qhov tseeb ntawd yeej yuav tsis hloov pauv.

Txoj kev hloov dua tshiab rov qab pib thaum peb xaiv rau qhov tseeb thiab lees tias txawm yog nyob rau hauv lub tiaj ntawm txoj kev tag kev cia siab thiab nyuaj siab los, Vajtswv yeej nyob ntawd thiab kho zoo peb tej qhov txhab. Thiab nyob rau hauv tej qhov chaw ntawd, peb yeej lees tau li Daviv tias: “…nyob ntawd Vajtswv yuav tuav kev tes, Vajtswv sab tes xis yuav tuav kuv.”

Thov caw nrog kuv peb thov Vajtswv ua ke: Tus Tswv, kuv ua koj tsaug vim koj nrog nraim kuv nyob hauv tej kev zoo siab thiab kev nyuaj siab. thov pub kom kuv muaj lub siab txaus siab thiab zoo siab thaum tau nyob hauv Vajtswv kev tshwm ntsej muag. Txawm yog kuv lub neej yuav zoo li cas los, thov Vajtswv pab kom kuv tsis vam khom rau kuv lub zog tiamsis paub tuav Vajtswv txhais tes muaj zog. Kuv ntseeg tias Vajtswv yuav coj kuv mus dhau tej hav kua muag thiab kev nyuaj siab los qhuas Vajtswv. Kuv thov hauv Tswv Yexus Khetos lub npe, Amees.

Cov kwv tij txhua tus, txawm yog yuav siv zog npaum twg los, peb kuj yuav khiav tsis tau mus nkaum qhov twg thiab nkaum tsis tau Vajtswv kev tshwm ntsej muag. Yog li, hnub no, cia li ua Vajtswv tsaug vim Vajtswv yeej tseem nrog nraim peb nyob. Tib txhij ntawd cia li hais rau Vajtswv txog peb tej kev sib tawm tsam nyob hauv lub neej, thiab thov Vajtswv tso kom kuv dim. Cia qhov tseeb thiab Vajtswv tej lus txeeb tau koj lub siab, txawm yog nyob rau lub caijnyoog twg los, koj kuj yuav pom tias Vajtswv tab tom tswj, thiab yuav tau ntxiv zog nyob hauv Vajtswv txoj kev hlub zoo kawg nkaus.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.