Lu bơ̆n ngăl đei tơdrong kơnhăm wă kơdih bơ̆n pơgơ̆r tôm tơdrong. Lu bơ̆n tơchĕng khan lăp kăl adrin lei gô gơh hlôi. Mă lei tơpă, đei dôm kơplah rai pơpơ̆ pơpol, lu bơ̆n rai wă huŏng lăm tơdrong gleh lap păng tơsŭl tơwŏk. Jơ̆ bơngai lui kơ Kră Yang, lu bơ̆n kăl kơ ‘bôh băt jơhngơ̆m pran đơ̆ng kon bơngai jơ̆ đei hơgăt, păng lu bơ̆n đei minh tơdrong pơlung tih kơplah băt ‘Bok Kei-Dei ling lang oei hơdai bơ̆n lăm tôm tơdrong arih păng yua tơpang ti jơhngơ̆m pran đơ̆ng Sư wă dŏng tơgŭm lu bơ̆n.

Năr ‘nâu, ‘năr 18/06/2026, tơdrong tơdă Amăn Jơ Krao Khan Rim Năr, apinh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Maria Schleicher kơ̆l ‘bai TI KRĂ YANG RÔP WEI KON.

  “Tơdah inh đei pơnăr păr đơ̆ng pơgê năm oei tơ tôch đak dơsĭ. Tơ noh ti Ih kư̆m chông ba inh. Ti ‘ma Ih gô rôp wei inh.” (Hơriso 139:9-10)

Hăm đei layơ ih mơn ‘bôh rơhông păng ưh kơ đei tơdrong kơnhăm ưh? Nhen thoi ih lăp oei đei mă lei ưh kơ đei arih tơpă. Ih oei arih rim năr, oei lăng ‘bôh tôm tơdrong jum dăr, mă lei lăm jơhngơ̆m đei ‘bôh mĭnh adrô̆, ưh kơ tơpă gah tơdrong arih ‘nâu. Inh kŭm đei hlôi tơ’bơ̆p dôm kơ năr thoi noh. Gah ‘ngoaih, tôm tơdrong nhen thoi oei hmă, mă lei gah lăm jơ̆ minh anih rơhông păng minh tơdrong rơhing mă ưh kơ đei kiơ gơh klơ̆p. Inh adrin chă trong tơdrong arih hăm jơhngơ̆m pran đơ̆ng kơdih tơplih kơ gơnang lăm Nơ̆r Kră Yang. Mă lei rai adrin, inh rai ‘bôh tôm tơdrong tơsŭl tơwŏk păng hiong tơdrong kơnhăm.

Mă lei ră, lăm dôm kơ năr măng mu ‘noh, ‘Bok Kei-Dei oei jơ̆ Tơ’ngla băt hơđăl, oei hơdai, păng ba ăn tơdrong hiôk hian. Pơtao Đawit, bơngai đơ̆ng đei hlôi tơ’bơ̆p dôm tơdrong ơh sơ’ngon păng kơdâu ôn, đei chih khan:

“Inh năm tơ yơ gơh weh ataih đơ̆ng Yang Bơhngol Ih? Inh wă klĕnh tơ yơ gơh hlơp đơ̆ng muh măt Ih? Dah inh tŏk tơ plĕnh, Ih oei tơ noh, Mă inh jur ‘bĭch lăm dêh hơtâu to Ih kư̆m tơ noh. Tơdah inh đei pơnăr păr đơ̆ng pơgê năm oei tơ tôch đak dơsĭ. Tơ noh ti Ih kư̆m chông ba inh. Ti ‘ma Ih gô rôp wei inh.” (Hơriso 139:7-10)

Hơriso 139 jơ̆ nơ̆r hơri ư-ang kơ ‘Bok Kei-Dei gah tơdrong ‘bôh băt đĭ đăng păng oei tơ jơ̆p anih. Pơtao Đawit pơma khan Kră Yang băt hơđăl rim tơdrong lăm chăl arih sư: kơplah sư hơoei, kơplah sư iung, dĭng truh kơ dôm tơdrong tơchĕng păng nơ̆r pơma ưh tim mă tam tơlĕch. Sư ưh kơ hlôh gah Đawit kiơ̆ hăm tơdrong lĕi lăi hmă, mă lei hơđăl kơdih păng jê̆ hơdai. Kră Yang băt dôm tơdrong ‘lơ̆ng truh kơ dôm tơdrong yoch glăi, tơdrong yoch lăm lu bơ̆n. Sư ‘bôh hơđăl dôm tơdrong wơ̆l jrok, rơdu păng ơh sơ’ngon lăm jrŭ hloh lăm tơdrong arih lu bơ̆n.

Yua kơ ‘bôh băt ‘Bok Kei-Dei jơ̆ Tơ’ngla ‘bôh đĭ tôm tơdrong, na Đawit đei dan nơ̆r jet: “Inh năm tơ yơ gơh weh ataih đơ̆ng Yang Bơhngol Ih? Inh wă klĕnh tơ yơ gơh hlơp đơ̆ng muh măt Ih?” Yua kơ sư băt khan mă kơpal plĕnh, dêh hơtâu dah tơ tôch đak dơsĭ, ‘Bok Kei-Dei tơ jơ̆p anih. Sư oei hơdai hăm lu bơ̆n lăm dôm tơdrong hiôk chơt hăm lăm dôm tơdrong ơh sơ’ngon. Mă khan đei dôm kơplah lu bơ̆n ‘bôh bơ̆n huŏng lăm “dêh hơtâu” đơ̆ng tơdrong ơh sơ’ngon, bơ̆l hăl, dah ‘bôh kơdih oei tơ “tôch đak dơsĭ” đơ̆ng tơdrong oei minh drô̆, lei “tơ noh ti Kră Yang kư̆m chông ba” lu bơ̆n. Ưh kơ đei tơdrong kiơ gơh pơgăn lu bơ̆n hlôi kơ măt ‘mêm mơnat đơ̆ng Sư.

Rim lu bơ̆n đei oei lăm dôm kơ tơdrong arih kơdih, mă lei mă anih ‘noh thoi yơ, lu bơ̆n jơhngơ̆m oei kơjăp lui kơ ‘Bok Kei-Dei oei hơdai hăm bơ̆n, yua kơ trŏ Nơ̆r Kră Yang đei pơkă pơkăm tơdrong ‘noh. mă khan kơplah mơn lăm jơhngơ̆m pơm kơ lu bơ̆n tơchĕng khan Kră Yang ưh kơ ‘bôh dah mơ̆ng gah tơdrong đơ̆ng lu bơ̆n, lei tơdrong tơpă noh kŭm ưh kơ tơplih.

Tơdrong klaih praih pơtơm kơplah lu bơ̆n rơih lui lăm tơdrong tơpă păng pơdrơ̆ng khan mă khan lăm dôm kơ sơlŭng đơ̆ng tơdrong ưh pă hơmĕng păng ơh sơ’ngon, Kră Yang oei ling lang ‘bơ̆t doh păng pơklaih dôm lu bơngai jơhngơ̆m pơchah. Păng lăm dôm anih noh, lu bơ̆n oei gơh kơnăl thoi Đawit khan: “…tơ noh ti Ih kư̆m chông ba inh. Ti ‘ma Ih gô rôp wei inh.”

Apĭnh đĭ đăng krao khan hơdai: Kơkuh kơ Kră Yang, kon bơnê kơ Ih yua kơ ling lang oei hơdai kon lăm dôm tơdrong chơt hiôk păng tơdrong sơ’ngon đơ̆ng kon. Apinh ăn kơ jơhngơ̆m kon gơh hiôk hơdai păng hiôk chơt kơplah gơh oei lăm tơdrong oei hơdai đơ̆ng Ih. Mă tơdrong arih kon thoi yơ, apinh tơgŭm kon ưh kơ gơnang kơ jơhngơ̆m pran kơdih mă lei băt rôp kơjăp ti pran kơtang đơ̆ng Ih. Kon lui khan Ih gô chông kon yak hlôi kơ dôm sơlŭng đơ̆ng đak măt păng ơh sơ’ngon wă hơri ư-ang kơ Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, mă đei adrin truh dang yơ, lei lu bơ̆n kŭm ưh kơ gơh yak ataih dah kơdâu ôn hlôi kơ tơdrong oei hơdai đơ̆ng Kră Yang. Yua kơ thoi noh, năr ‘nâu, athei bơnê kơ Kră Yang yua kơ Sư ling lang oei hơdai hăm lu bơ̆n. Na athei pơma hăm Kră Yang gah dôm tơdrong tơblah lăm tơdrong arih ih, păng krao apinh tơdrong dŏng pơklaih đơ̆ng Sư. Athei ăn kơ tơdrong tơpă đơ̆ng Nơ̆r Kră Yang pơgơ̆r iŏk đon tơchĕng ih, mă khan lăm tơdrong arih thoi yơ, ih oei gơh ‘bôh băt khan Sư oei pơgơ̆r, păng ling lang gơh pơthim jơhngơ̆m pran lăm tơdrong ‘mêm păng tơdrong mơnat ăn hlich chrơp đơ̆ng Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.