Tos tsis tau yog ib yam uas yooj yim li. Txawm yog koj tab tom tos kom qhov tseeb tau ua, lossis tau kho zoo lub cev ntaj ntsug muaj mob lossis tos ib qhov kev thov Vajtswv uas koj twb tos tau ntev xyoo dhau los – ces qhov sib nrug ntawm lo lus cog tseg thiab muaj tiav ntau zaug zoo li lub moj sab qhua dav heev thiab ntsiag to. Nyob rau ntu ntsiag to ntawd, peb txoj kev ntseeg raug sim dhau. Ntawd yog qhov chaw uas peb lub siab yuav tau sib txeeb nrog lo lus nug: “Tus Tswv, koj puas tseem nco txog kuv?”

Hnub no, yog hnub 19/06/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Maria Schleicher dhau ntawm Zaj kawm CIA SIAB RAU LO LUS COG TSEG YWJPHEEJ

“Yog Leej Tub tso nej dim, ces nej thiaj yuav dim tiag tiag li.” (Yauhas 8:36).

“Yog li ntawd, Yexus hais rau cov Yudais uas ntseeg nws hais tias, “Yog nej ua raws li tej lus uas kuv qhia, nej thiaj yog kuv cov thwjtim tiag. Nej yuav paub qhov tseeb, thiab qhov tseeb ntawd yuav tso nej dim.” Lawv teb hais tias, “Peb sawvdaws puavleej yog Anplahas cov xeebntxwv, thiab peb yeej tsis tau ua leejtwg qhev li. Lo Ius uas koj hais tias, ‘Nej yuav dim,’ yog koj hais li cas? ” Yexus hais rau lawv hais tias, “Kuv qhia tseeb rau nej hais tias txhua tus uas ua txhaum puavleej ua txojkev txhaum qhev. Tus uas ua luag qhev yeej tsis nrog ib tsevneeg nyob mus tas simneej, tsuas yog tus tub thiaj yuav nyob xwb. Yog Leej Tub tso nej dim, ces nej thiaj yuav dim tiag tiag li. (Yauhas 8:31-36).

Hnub 19/6 nyob rau teb chaws Mekas yog hnub Juneteenth, ua kevcai nco txog hnub xaus txoj kev ua qhev rau cov neeg Mekas yug rau tebchaws Phi. Lub npe hu ua Juneteenth yog lo lus txuas ntawm ob lo lus June (hli 6) thiab nineteeenth (hnub 19).

Zaj xwm tshwj xeeb nyob tom qab ntawd ntuas kom peb nco txog ib qhov tseeb muaj nqis tias: txawm yog nyob rau lub sijhawm tos ntev los Vajtswv yeeej nyob ntawd.

Ncaj rau hnub no xyoo 1965- tau nees nkaum ntau xyoo tomqab tsab cai tso cov neeg ua qhev kom tau txais kev ywj pheej twb sam hwm tseg – cov neeg uas tab tom raug ua qhev nyob hauv Texas thaum kawg lawv kuj txais tau txoj xov tias lawv tau tso ywj pheej lawm. Qhov uas lawv pheej ua xyem xyav li no yog ib lo lus ntuas kom peb nco ntsoov tias: kev ywj pheej raug muab cia kom tos ntev tsis tau txhais tias yog tsis lees yuav kev ywj pheej. Cov lus cog tseg tau hais txog tomqab ntawd txawm yog tseem tsis tau nrov txog lawv lub pob ntseg.

Vajluskub kuj nthuav tawm txoj kev cia siab zoo li ntawd. Nyob hauv Khiavdim 3:7, Vajtswv hais tias: “Kuv porn kuv haivneeg uas nyob nram tebchaws Iziv raug kev tsimtxom heev, kuv hnov lawv tej suab quaj qw thov kuv pab kom lawv dim ntawm txojkev uas lawv raug yuam ua luag qhev. Kuv paub lawv raug kev txomnyem kawg nkaus li lawm.” Koom tib tug Vajtswv tau tso cov neeg Yixalayees thaum ub dim ntawm kev ua qhev tim Iziv ces kuj yog tus uas coj cov neeg ua qhev ntawd mus txais txoj kev ywj pheej uas lawv tsimnyog tau. Hnub no, Vajtswv yeej tseem mloog lub suab hu thov ntawm cov neeg raug caij tsuj. Vajtswv lub pob ntseg tsis tau muaj ib zaum twg kaw cia, thiab Vajtswv lub siab tsis tau muaj ib zaum twg tsis quav ntsej nws cov menyuam txoj kev mob.

Thaum uas peb rov qab nco txog lub siab tawv thiab cov neeg uas tau txais txoj kev tsis ncaj ncees li ntawd tus cwjpwm, peb yuav hnov qab tsis tau tias muaj tsheej triệu tus tib neeg nyob thoob ntiajteb yeej tseem tab tom ua neej nrog lub voj hlua khi – los ntawm raug tib neeg muab muag, tsim txom haujlwm, lossis raug khi tob tob hauv tus ntsujplig. Yog li, cov lus thov Vajtswv hnub no tsis yog tsuas yog lo lus ua tsaug xwb tiamsis tseem yog cov lus taij thov – thov Vajtswv ua kom muaj kev ywj pheej thiab tau kho zoo nyob hauv Yexus Khetos lub npe.
Ntshaw txoj kev ywj pheej ntawd yog yam uas kuv tau ntsib dhau hauv kuv lub neej. Kaum ntau xyoo dhau los, kuv khaws cia ib lo lus thov Vajtswv – ntau xyoo taij thov, ntseeg thiab tos. Tsis yog ib lo lus thov Vajtswv lam thov dhau. Nws yog cov lus thov muaj siab, yog ib txoj kev mob ntawm sab ntsujplig, ntau zaug dhau los ua kua muag hauv txoj kev pehawm, lossis lub sijhawm nyob ib leeg ntsiag to nrog Vajtswv ua ke. Ib hnub dhau mus zuj zus, thiab muaj ntau zaug kuv tau nug tias tsis paub Vajtswv puas hnov qab kuv lawm.

Kuv ntseeg tias Vajtswv yuav teb, tiamsis kuv tsis paub yog thaum twg. Kuv hnov cuag li yus raug muab dai saum nruab ntug “nyob ib nta” – tsis raug hlua khi, tiamsis yeej tseem tsis tau txais kev ywj pheej tiag. Kuj zoo li cov neeg ua qhev thaum ub, lawv twb tau lees tias ywj pheej lawm tiamsis yeej tseem tos ntsoov lawv tsis paub li – kuv kuj tab tom tos yam uas Vajtswv yeej ib txwm npaj rau kuv ua ntej lawm.

Thaum kawg lo lus teb kuj los txog – zoo tshaj tej uas kuv kam npau suav txog – kuv pom tau ib yam tias: Kev ywj pheej tsis yog thaum twg twb yuav tshwmsim los raws li peb txoj kev npaj. Tiamsis thaum nws los, txhua yam yuav pauv dua tshiab. lub sijhawm tos tau ua rau kuv muaj kev ntseeg tob, ntxiv txoj kev tiv taus rau kuv, thiab qhia kuv paub ua twjywm ntseeg tus uas tsis muaj hnub hnov qab nws tej lus cog tseg.

Hnub Juneteenth ntuas kuv nco txog ntu neej ntawm kuv lub neej. Nws yog ib zaj xwm hais txog tus Vajtswv ntsia pom, hnov, thiab ua nqes tes pab, txawm yog thaum uas peb lub qhov muag tseem ntsia tsis tau pom ib yam dabtsi. Thaum kawg, hnub koob tsheej no coj peb mus txog rau ntawm txoj kev ywj pheej loj tshaj txhua txoj kev ywj pheej – ntawd yog kev ywj pheej nyob hauv Yexus Khetos.
Tswv Yexus tso ntuj ceebtsheej tseg, ua ib lub neej tsis ua txhaum, thiab ris txhua txoj kev txomnyem – tag nrho yog tso peb dim ntawm lub nra kev txhaum thiab kev tuag. Tswv Yexus txoj kev muab mus ntawd tau qhib lub qhov rooj coj peb mus rau hauv txoj kev ywj pheej ib txhis uas tsis muaj ib lub hwjchim tib neeg twg yuav txeeb tau. Ib yam li Yauhas 8:36 tau hais: “Yog Leej Tub tso nej dim, ces nej thiaj yuav dim tiag tiag li.

Yog li hnub no, cia siab tias peb tsis yog tsuas xav txog txoj kev zoo siab ntawm kev ywj pheej xwb, tiamsis xav txog txoj kev ua siab ntev, kev tuag uas tau ua rau txoj kev ywj pheej ntawd dhau los muaj tseeb. Thiab tshaj txhua yam, thov fij lo lus ua tsaug rau Tswv Yexus – tus uas coj txoj kev ywj pheej zoo kawg nkaus los rau peb, tsis muaj leej twg yuav tav tau thiab tsis muaj leej twg yuav txeeb tau mus li.

Thov caw nrog kuv peb thov Vajtswv ua ke: Tus Tswv, kuv ua Koj tsaug vim Koj yog tus Vajtswv ntawm txoj kev ncaj ncees thiab kev cawmdim. Nyob rau hnub tshwj xeeb hnub no, kuv nco txog cov neeg uas tau tos hauv txoj kev cia siab, txawm yog lawv tsis paub tias thaum twg kev ywj pheej mam los txog rau lawv. Kuv kuj thov Vajtswv rau cov neeg uas tab tom raug khi ntawm sab nqaij tawv, lub hlwb thiab sab ntsujplig. Thov coj peb mus rau ntawm txoj kev ywj pheej thiab kho kom lawv zoo. Thov pab kom kuv tsis txhob muaj hnub saib txoj kev ywj pheej tsis muaj nqi uas Vajtswv tau muab pub rau kuv tsis tseem ceeb, txoj kev ywj pheej yuav rub kuv tes, yuav pab lwm tus. Kuv thov hauv Tswv Yexus Khetos lub npe, Amees.

Cov kwv tij txhua tus, tej zaum lub sijhawm no, koj kuj tab tom muaj ib lo lus taij thov nyob hauv siab xav hais qhia rau Vajtswv los lawm ntev tiamsis tsis tau hnov lo lus teb. Koj tos lo lus teb ntev los. Koj cim civ nug tias tsis paub Vajtswv puas tseem mloog yus. Kuv xav hais qhov no rau koj: Vajtswv ua twj ywm tsis tau txhais tias Vajtswv tsis nyob ntawd. Yuav tau nco txog cov neeg ua qhev thaum ub – txoj kev ywj pheej twb tau samhwm ntev heev ua ntej lawv paub lawm. Tej zaug Vajtswv lo lus teb koj kuj twb npaj txhij lawm, tsuas yog tsis tau txog lub sijhawm lawm xwb. Ua siab ntev tos thiab cia siab, vim Vajtswv niaj hnub tiv thaiv koj hauv Vajtswv txoj kev kaj siab.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.