19.06 Amăn Jơ Krao Khan Rim Năr: HƠ MĔNG KƠ NƠ̆R PƠKĂ GÔ RƠNGEI

Chang gô ưh kơ đei layơ ‘bônh. Mă ih oei chang hơmĕng tơdrong ‘lơ̆ng tơpăt gô sek tơlang pơkeh, hơkâu jăn jơ̆ gô pơklaih praih hiôk, dah tơdrong krao khan pran kơtang ih krao khan đunh khei sơnăm- tơdrong bơwei nơ̆r pơkă păng tơdrong ‘blĕp trŏ nơ̆r ‘Bok Kei Dei kŭm nhen thoi tơmăn glă să, rơwơ̆ng păng thĕng hreh. Lăm thĕng hreh ‘noh, đon lui bơ̆n pơlong hơjơ̆m lăng. Noh jơ̆ anih jơhngơ̆m bơ̆n tơblah hăm nơ̆r jet ling lang: “Ơ Kră Yang, Ih hăm oei ‘blŏk kơ kon ưh?

Năr ‘nâu năr 19/06/2026, tơdrong tơdă Amăn Jơ Krao Khan Rim Năr krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Maria Schleicher kơ̆l ‘bai HƠ MĔNG KƠ NƠ̆R PƠKĂ GÔ RƠNGEI

“Thoi noh na dah Kon Sư ăn iĕm rơngei, na iĕm gô rơngei tơpă.” (Yôhan 8:36)

“Na Yêsu khan kơ lu bơngai Juđê mă lui kơ Sư boih: “Dah iĕm răk kiơ̆ tơdrong Inh bơtho khŏm khŏm, lei iĕm bơngai kiơ̆ Inh tơpă boih. Na iĕm gô băt tơdrong ‘Bok Kei-Dei tơpă, thoi noh na iĕm gô rơngei.” Na lu bơngai kiơ̆ ei khan kơ Yêsu:

“Nhôn kon sâu Abraham. Nhôn ưh kơ lah đĭch đe. Lơliơ Ih khan: ‘Iĕm gô rơngei’?” Yêsu khan kơ lu sư: “Inh khan kơ iĕm tơpăt, iĕm ưh kơ rơngei ôh, yua bơngai bu pơm yoch ling-lang, bơngai ‘noh sư dang đĭch mơ̆n yua kơ tơdrong yoch sư. Bơngai đĭch đe sư ưh kơ atŏ yŏng sư ôh; pôm kon yŏng sư atŏ ‘bă sư. Thoi noh na dah Kon Sư ăn iĕm rơngei, na iĕm gô rơngei tơpă.” (Yôhan 8: 31-36)

Năr 19 khei 6 tơ My noh năr Juneteenth, ‘blŏk hơdơ̆r pơdơh tơdrong đĭch đam kơ bơngai Mi Găm. Nơ̆r krao Juneteeh noh pơklep đơ̆ng ‘bar tŏ chư June (khei 6) păng nineteenth (năr 19).

Tơdrong hơ’mon đơ̆ng rŏng kơ năr sĭt ‘nâu tơ’blŏk kơ lu bơ̆n tơdrong tơbăt gĭt kăl: lăm jơ ‘năr chang gô đunh đang, ‘Bok Kei Dei oei oei hơdai.

Lăm sơnăm 1865 – hloh ‘bar sơnăm kơplah Tơbăt Đĭch Đam Rơngei đei tơbăt. Lu bơngai oei pơm đĭch tơ Texas tuch luch đei roi tơ băt lu sư rơngei. Tơdrong hiơ̆ ‘bĕnh kơ tơdrong sơ‘ngon ‘nâu tơ’blŏk: tơdrong rơngei oei pơhiơ̆ ưh kơ sĭ tơdrong rơngei tŭk lê̆. Nơ̆r pơkă đei tơbăt đunh bơih, mă khan tơdrong tơbăt ‘nâu tam mă truh tơ lu sư.

Sơ̆p hla bơar Nơ̆r ‘Bok Kei Dei kư̆m tơbăt tơdrong chang hơmĕng thoi noh: Lĕch Đơ̆ng Êdiptô 3:7, ‘Bok Kei-Dei khan: “Inh ‘bôh bơih tơdrong gleh pơmat-tat kon pơlei Inh tơ dêh Êyiptô păng Inh kơtơ̆ng boih nơ̆r lu sư krao ôr yua kơ tơdrong jang pơmat, Inh băt hơđăl đĭ dôm tơdrong jang pơmat-tat lu sư.” Lăp minh ‘Bok Kei Dei đĕch pơklaih kon pơlei Israel đơ̆ng Êyiptô kŭm Sư jơ̆ Tơ’ngla chông anhăk lu đĭch đam noh truh tơ tơdrong rơngei trŏ kơ lu sư. Păng năr ‘nâu, Sư jơ̆ ‘Bok Kei-Dei oei mơ̆ng nơ̆r krao ôr lu bơngai oei pơđep. Đon Sư ưh kơ layơ kơdơ̆l, păng jơhngơ̆m Kră Yang ưh kơ đei layơ ưh kơ ‘blŏk kơ tơdrong ơh sơ‘ngon kon Sư.

Kơplah lu bơ̆n ‘blŏk kơ jơhngơ̆m pơ̆n nuih păng tơdrong lu bơngai pŭ iŏk tơdrong pơđep, lu bơ̆n ưh kơ đei hiơt rơbâu rơngan bơngai kơ pal teh âu oei arih lăm tơdrong chô̆ pơkơ̆ng – tĕch bơngai, jang pơđep, dah chô̆ pơkơ̆ng hlơp lăm bơhngol. Yua kơ thoi noh, nơ̆r krao khan ‘năr ‘nâu ưh kơ sĭ bơnê đĕch, noh nơ̆r krao khan đĭ jơhngơ̆m – apinh ‘Bok Kei-Dei ba ăn tơdrong rơngei păng pơklaih hăm anăn Yang Yêsu.

Rơhing kơ tơdrong rơngei noh jơ̆ đei mơn lăm tơdrong arih inh. Hloh kơ jĭt sơnăm, inh oei bơwei lăm jơhngơ̆m minh tơdrong krao khan – đunh sơnăm krao apinh, lui ngeh păng chang gô. Noh ưh kơ jơ̆ minh nơ̆r krao khan pơngôi. Noh jơ̆ minh nơ̆r krao khan trăp trĭn, minh tơdrong sơngon đunh lăm bơhngol, iung jing thoi đak măt lăm tŏk bŏk jơ hơkŭm dah lăm jơphŭt minh drô̆ thĕng hreh tơ’bưh hăm Kră Yang. Khei sơnăm hlôi, păng lơwơ̆t inh đei jet kơdih rŏlăng Kră Yang hiơt kơ inh hloi boih. Inh lui ngeh Kră Yang tơl tơwih, mălei ưh kơ băt layơ. Inh ‘bôh kơ dih inh oei hơtol dĕng dŏng kơpal rơwơ̆ng “tŏk bŏk” ưh pă đei chô̆ pơkơ̆ng, mălei ưh tam mă rơngei tơpă. Thoi lu bơngai pơm đĭch hơdrol sơ̆, lu sư đei tơbăt rơngei mălei oei chang gô ưh kơ đei băt. Inh kŭm oei chang gô tơdrong ‘Bok Kei Dei pơkă kơ inh hơdrol. Kơplah nơ̆r tơl tơwih tuch luch kŭm truh, ‘lơ̆ng rŏ păng tôm mah hloh kơ inh đei hơpơi. Inh ‘bôh băt minh tơdrong: tơdrong rơngei ưh kơ trŏ layơ kŭm truh thoi lu bơ̆n tơdă. Mălei kơplah sư truh, tôm tơdrong đei tơplih. Jơ phŭt chang gô ‘noh pơm pơthim kơ đon lui inh rai tih, tơdrong chu iŏk kơjăp, păng pơhrăm inh lui ngeh kơ tơngla ưh kơ la yơ hiơt nơ̆r pơkă Sư.

Năr phĕt juneteenth tơ ‘blŏk kơ inh chăl noh lăm tơdrong arih inh. Sư roi hơ’mon ‘Bok Kei Dei ‘bôh, mơ̆ng, păng pơm, lăm kơplah măt bơ̆n ưh kơ đei ‘bôh tơdrong kiơ. Tuch luch, năr phĕt ‘nâu kơ nhăm kơ lu bơ̆n truh tơ tơdrong rơngei ‘lơ̆ng hloh kơ dôm tơdrong rơngei- noh tơdrong rơngei lăm ‘Bok Krist.

Kră Yang Yêsu tŭk lê̆ pơlei ‘lơ̆ng ‘lơ̆ng rŏ, arih minh chăl arih ưh kơ đei pơm yoch, păng pŭ iŏk tơdrong pơmat tat- tôm tơdrong ‘noh wă pơklaih lu bơ̆n đơ̆ng tơdrong chô̆ pơkơ̆ng păng tơdrong lôch. Kră Yang chu lôch pơih ‘măng dui mơ̆t lăm tơdrong rơngei ling lang ưh kơ đei minh tơdrong pran kơtang kiơ kon bơngai gơh iŏk. Nhen thoi Yôhan 8:6 đei pơdrơ̆ng:Thoi noh na dah Kon Sư ăn iĕm rơngei, na iĕm gô rơngei tơpă.

Yua kơ thoi noh năr ‘nâu, hơpơi lu bơ̆n ưh kơ sĭ tơchĕng kơ tơ drong hiôk chơt kơ tơdrong rơngei, noh kŭm tơdrong kĕ chu iŏk păng hŭt akâu kơdih pơm kơ tơdrong rơngei noh jing đei tơpă. Păng hloh kơ dôm tơdrong, athei pơyơ̆r nơ̆r bơnê kơ Yêsu Kră Yang dŏng pơklaih – Tơ‘ngla ba ăn tơdrong rơngei tôm mah, ưh kơ đei bu gơh pơhiơ̆ păng ưh kơ đei bu gơh iŏk.

Apĭnh đĭ đăng krao khan hơdai: Kơkuh kơ Kră Yang mă ‘mêm, kon bơnê kơ Ih yua kơ Ih jơ̆ ‘Bok Kei Dei tơpăt păng dŏng pơklaih. Lăm jơ năr sĭt năr ‘nâu, kon ‘blŏk kơ lu bơngai đei chang gô lăm tơdrong hơmĕng, mă khan lu sư ưh kơ băt la yơ tơdrong rơngei gô truh. Kon kŭm krao khan ăn kơ lu bơngai bu oei chô̆ pơkơ̆ng gah akâu, gah đon tơchĕng păng gah bơhngol. Pinh Ih ba ăn tơdrong rơngei păng pơklaih kơ lu sư. Apinh tơgŭm kon huay kơ pơhơi tơdrong rơngei gĭt kăl mă Ih đei a-song ăn, păng bơtho kon yua tơdrong rơngei kơdih wă tơiung, tơgŭm bơngai nai. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏlăng lăm jơ ‘nâu, ih oei chĕp ba lăm jơhngơ̆m minh tơdrong krao khan đei apinh Kră Yang đunh boih mălei tam mă đei nơ̆r tơl tơwih. Ih chang gô đunh đang bơih. Ih jet kơdih Kră Yang hăm pă mơ̆ng. Inh ‘maih khan kơ ih thoi âu: Kră Yang thĕng hreh ưh kơ sĭ Kră Yang ưh kơ đei tơ noh ôh. Athei ‘blŏk kơ lu bơngai pơm đĭch sơ̆ – tơdrong rơngei đei tơbăt đunh bơih adrol kơ lu sư băt. Rŏlăng tơdrong Kră Yang tơl tơwih wă jê̆ boih, tam mă trŏ kơ jơ năr đĕch. Athei chân chang gô păng lui ngeh, yua kơ Kră Yang oei bơwei ih lăm tơdrong rơnŭk rơnoa Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.