Ih hăm băt ưh, đei minh anih mă lu bơ̆n ‘bônh kơ wơ̆l jrok hloh- ưh kơ trŏ jơ̆ thŭng thong bri brah, mă jơ̆ kơtă anih lu bơ̆n ngeh kơdih đei juăt dêh bơih. Lu bơ̆n ngăl wơ̆l jrok lăm dôm tơdrong juăt, wơ̆l jrok lăm tơdrong đơ̆ng kơdih kơnhăm hơmet, păng trŏ lăp jơ̆ wơ̆l jrok lăm kơdih đon lui mă kơdih ngeh jơ̆ kơjăp. Lu bơ̆n adrin bơhual chơ chă hơnơ̆ng ưh kơ ‘bôh trong, mă mưh lăp trong lĕch oei ‘bơ̆t hơnăp măt. Hăm trŏ, lu bơ̆n rai adrin kơdih kâu pơm yŏng rim kơ trong, tă kơ jơ̆ kơplah nơ̆r krao đơ̆ng Kră Yang jing ataih hloh dơ̆ng?

Năr ‘nâu năr 20/06/2026, tơdrong tơdă Amăn Jơ Krao Khan Rim Năr krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Kim Nanney kơ̆l ‘bai WƠ̆L JROK TŎK BŎK TƠ ANIH KƠDIH JUĂT DÊH

“Ơ Kră Yang! Inh băt kon bơngai ưh kơ gơh pơm yŏng kơ sư kơdih, Kŭm ưh kơ gơh bơwei kơnao yak lu sư kơdih mơ̆n.” (Jêrêmi 10:23)

Kơplah inh ‘nao iŏk hnam dơnŏ păng hơmet brŏk arih hăm klo, inh đei wơ̆l jrok lăm cham hnam kơdih.

Gô inh roi kơ ih mơ̆ng.

Anih tơpah rŏng hnam să truh tơ jĭt ‘bar hecta – lơ tơdrong teh hơbĭ băl ‘nhĕt dơhnă ‘lơ̆ng, đei dôm lu thŭng thong đei pơkao ‘long mul giông, đei bri tơnơm ‘long hơkưr hơkar, chăt kiĕr ‘bĕr truh tơ nhen thoi tơnăr hnam jơla ngăl, hăm trong iĕ wing kiơ̆ kơ đak glung.

Minh năr, lăm kơplah chă nơnăm rok trong iĕ noh lăm jơ pơdơh ‘năr dơ̆ng, inh oei mơ̆ng minh ‘bai bơtho pơma gah tơdrong ‘Bok Kei-Dei đei ăn kơ kon pơlei Isơrael oei lăm char glă lăm puăn jĭt sơnăm, mă khan trong yak năm noh trŏ lăp jit mônh năr (lăng Jô̆ Bơngai 32:13). Inh nŏng kơ tơchĕng gah tơdrong tơtă noh, khan ‘Bok Kei-Dei gơh pơm kơ minh trong yak năm kơđeh jing kơjung thoi yơ- dĭng truh ưh kơ băt kơdih đei yak wơ̆l jrok kơ trong layơ ưh kơ băt. Nhen thoi inh đei pơrơ̆ng tơ’bôh dơ̆ng đêl hlôi tơ’bơ̆p đơ̆ng kon pơlei Isơrael, lăp jơ̆ oei lăm anih iĕ hloh đĕch.

Tơpă lăp pơđăm phŭt chă thông brŏk đơ̆ng đak glung, thoi noh na inh đei lăm ‘bar jĭt phŭt chă nơnăm lăm tơdrong hli tơrơ, ơh sơ’ngon chă ‘moi kiơ̆ dôm kơ jơ̆ng yak đơ̆ng sem bri brah tơ kơpal teh, hŭl hang hơnhŭr hơnhăr. Inh đei chang hơmĕng kon kŏ inh gô chông trong brŏk tơhnam, mă lei sư oei ‘nă hal druh kiơ̆ dôm kơ ‘bâu phu hlĭch na ưh kơ gơh tơgŭm kiơ.

Kơplah jơ pơdơh ‘năr dơ̆ng đei hlôi na trong lĕch oei ưh kơ ‘bôh, tơpă inh đei hli tơtăm. Ưh kơ sĭ yua ưh kơ chă ‘bôh trong, mă kŭm yua kơ tơpă inh ưh kơ đei hơmet kiơ wă pơih trong. Jum dăr inh ‘bĕnh ‘bang kơ jơla puăn pah, lăm akâu inh lăp mĭnh blah hơbăl kăl sŏng hơtăng, tơpă ưh kơ trŏ wă pơjăng băl hăm jơ‘bôt jơla, păng lăm ti kŭm ưh kơ đei tơmam tơblah wă blah hăm dôm kơ ‘bih tur đei blư thar lĕch kơplah inh oei chơ lon lăm ‘nhĕt ‘nhot.

Lăp minh tơdrong tơchĕng truh kăl kơ đei roi tơbăt hăm yŏng khan kơdih brŏk tơhnam hloh kơ jơ pơdơh ‘năr dơ̆ng yua kơ wơ̆l jrok trong lăm cham hnam kơdih- thoi noh jơ̆ mơlâu tôm bơih wă pơm kơ inh pơdrơ̆ng chơ chă tơdrong tơgŭm. Inh pơtơm hơmet dôm tơdrong rơih iŏk. Inh gơh krao klo inh truh dŏng tơgŭm, mă lei anih kăl kơ roi tơbăt khan kơdih wơ̆l jrok ‘bơ̆t anih jê̆ hnam lăp ‘bar hrĕng met mơ̆ng kŭm ưh kơ đei hiôk tŏ sĕt. Tuch luch, inh pơdrơ̆ng krao apinh Kră Yang.

Lăp dôm yây đơ̆ng rŏng, inh lăng ‘bôh minh pôm măt mêng. Inh druh kiơ̆ sư, păng blư hlĭch ‘bôh mĭnh pôm nih nŭn chô̆ hăm lôp gre mă inh ưh tim mă băt đei ‘bơ̆t doh. Tơdrong ‘noh hơdai hăm tơdrong ‘bơ̆t dâu trŏ kơ đei minh trong yak, chông hơdrơ̆k brŏk tơhnam. Tuch luch, inh kŭm đei lĕch hlôi.

Ô, hlôi đei tơ’bơ̆p noh đei pơm kơ tơdrong tơtă đơ̆ng ‘bai bơtho đei răk mong lăm jơhngơ̆m inh jrŭ să tơpă. ‘Bok Kei-Dei tơpă gơh pơih trong tŏk bŏk char glă, mă lei Sư kŭm gơh ăn kơ lu bơ̆n yak wing dăr, pơm kơ minh trong yak năm kơđeh jing ataih atŏ, dah lu bơ̆n kư̆ nŏng kơ adrin chơ chă minh adrô̆.

Ih mă ‘mêm, ‘nâu trŏ jơ̆ minh tơdrong tơpă jrŭ gĭt lăm tơdrong arih bơhngol. Đei dôm kơplah, lu bơ̆n “wơ̆l jrok” ưh kơ trŏ yua kơ Kră Yang ưh kơ ‘bôh ‘bơ̆t doh, mă lei yua kơ jơhngơ̆m pơ ang hrĕp hreh pơm kơ lu bơ̆n lui khan kơdih gơh chơ chă trong yak năm. Lu bơ̆n tơchĕng khan kơdih băt kơ trong, dĭng truh kơplah jơla tăp dăr puăn pah ‘mơ̆i na đei ‘brĕng ‘bôh băt: kon bơngai trŏ ưh kơ đei pơjing wă yak năm mĭnh drô̆. Đon tơchĕng “adrin kơdih” mă rŏ lăng nhen kơdih păng pran kơtang, mă tơpă tă kơ jơ̆ ayăt ôn muh măt đơ̆ng đon lui. Sư pơm kơ lu bơ̆n pơhiơ̆ nơ̆r krao apinh, pơm kơ tơdrong pơang jing tơdrong pơgăn lăm lu bơ̆n hăm Tơ’ngla ling lang ‘mêm kơ bơ̆n.

‘Noh trŏ jơ̆ yua kơ đơ̆ng kiơ lu bơ̆n mơ̆ng nơ̆r Kră Yang krao bơ̆n wơ̆t brŏk yak trong ‘lơ̆ng tơpăt. Yôhan khan kơ lu sư: “Inh bơngai mă bơtho tơ char glă athei hơmet trong Kră Yang mă tơpăt dang khan tơbral kơdih tơdrong yoch, yua kơ Sư wă truh tơ bơ̆n boih kư̆m thoi Êsai khan lê̆ hơdrol sơ̆.” (Yôhan 1:23)

Tơdrong jang Yôhan trŏ jơ̆ tơ’bôh kơ bơngai nai ‘bôh trong wơ̆t brŏk, hơmet trong, hơmet jơhngơ̆m wă sơng iŏk tơdrong ‘Bok Kei-Dei oei bơ̆jang.

Păng ‘noh kŭm trŏ jơ̆ tơdrong inh kăl lăm năr ‘noh: minh nơ̆r pơma lăm char glă tơ’bôh kơ inh trong wơ̆t brŏk. Mă nơ̆r krao noh truh đơ̆ng minh ‘bai bơtho, minh nơ̆r krao khan, dah đơ̆ng minh pôm măt mêng chông trong truh kơ nih nŭn chô̆ hăm lôp gre, ‘Bok Kei-Dei đei pơma hơđăl hăm inh: athei pơdơh kơ chă thông, athei wơ̆t brŏk hăm Sư, athei kơnhăm, păng athei yak kiơ̆ tơdrong tơgŭm Sư ba ăn.

Athei kơnhăm truh trong Kră Yang tơl tơwih nơ̆r inh: ưh kơ trŏ hăm grơ̆m re kơpal plĕnh, kŭm ưh kơ trŏ hăm minh tơdrong ‘bôh linh jang hơdah hơdong, mă lăp jơ̆ minh măt mêng iĕ ioch. ‘Noh jơ̆ trong ‘Bok Kei-Dei đei bơ̆jang: Sư ưh kơ đei tơl nơ̆r kiơ̆ trong lu bơ̆n tơchĕng, mă lei Sư gô tơl nơ̆r kiơ̆ trong lu bơ̆n kăl. Tơdrong chông anhăk đơ̆ng Sư đei iơ̆m dim, thĕng hreh, păng athei măt bơhngol krăng kơchăng wă ‘bôh băt. Dah nŏng kơnhăm chơ chă dôm kơ tơdrong mơsêh hlĭch tih, bơ̆n ‘bônh kơ achăng dôm kơ “măt mêng” Kră Yang ba ăn rim năr lăm chăl arih bơ̆n.

Thoi noh na, dah ih đei hlôi tơ’bơ̆p jơ năr wơ̆l jrok nhen thoi đunh ưh kơ tôch, dah oei dơ̆ng tŏk bŏk jơla tăp dăr puăn pah na jet kơdih yua kơ liơ kơdih jing đei tơdrong truh thoi noh- apinh athei kơjăp. ‘Bok Kei-Dei ưh tim đei layơ achăng ih chơ chă trong minh drô̆ ôh. Sư ling lang gô pơih trong, mă lei ih athei chu pơdơh, iŏk đon ala krao apinh Sư dŏng tơgŭm, păng đĭ jơhngơ̆m lui gơnang wă kơ Sư chông ih wih brŏk tơhnam.

Apĭnh đĭ đăng krao khan hơdai: Kơkuh kơ Kră Yang ‘mêm! Bơnê kơ Kră Yang yua kơ Ih jơ̆ Bơngai Wei ‘Lơ̆ng Tơpăt, ưh kơ layơ ăn kon wơ̆l jrok ataih dêh đơ̆ng ti Ih. Kră Yang ơi, đei dôm kơplah kon nŏng kơ hăt druh kiơ̆ dôm trong yak kơdih, lui gơnang lăm jơhngơ̆m pran kơdih na jing sơng iŏk tơdrong gleh lap păng hli tơrơ. Apinh huay kơ jô̆ yo kơ tơdrong pơang ôn hlơp lăm jơhngơ̆m kon. Dang ei, kon kŭp kơ̆l krao apinh Ih tơgŭm. Apinh pơih măt bơhngol ăn kơ kon ‘bôh băt tơdrong chông anhăk mă Ih ăn kơ kon rim năr. Apinh hơmet lê̆ dôm kơ jơ’bôt jơla đơ̆ng hiơ̆k bơngơ̆t păng mơlâu, hơmet tơpăt trong yak lăm jơhngơ̆m kon, ăn kơ kon yak năm kơjăp lăm tơdrong Ih wă. Mă char glă đei hrĕng kro dah jơla, kon lui khan lăp kăl kơ đei Ih rôp ti, kon gô ling lang chă ‘bôh trong brŏk tơhnam.
Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, trong yak năm lu bơ̆n mưh lăp kŭm lĕi lăi thoi tơdrong chă thông lăm anih teh đơ̆ng rŏng hnam ‘noh. Đei dôm kơplah bơ̆n ngeh kơdih đei juăt dêh hăm rim kơ anih kơ chăl arih, dĭng truh kơ plah dôm tơdrong truh, dôm kơ gleh lap klơ̆p gom thoi kơ jơla suĕng, lu bơ̆n ‘nao ‘bôh băt kơdih iĕ ioch păng ‘bônh kơ ơh sơ’ngon thoi yơ. ‘Nĕ kơ bơ̆l hăl kơplah ‘bôh kơdih oei yak năm dăr ling lang na ưh kơ ‘bôh trong lĕch. Trŏ lăp Kră Yang ăn kơ tơdrong ‘noh truh wă kơ lu bơ̆n pơhrăm iŏk achăng dôm tơdrong pơrŏ pơ ang wă kơdih chă ‘bôh nơ̆r tơl. Dah ih iŏk đon ala krao apinh hloi, lei tơdrong chông anhăk đơ̆ng Sư gô truh: rŏ lăng jơ̆ nơ̆r pơlung tơiung đơ̆ng minh ‘nu bơngai nai, minh trong Nơ̆r ‘Bok Kei-Dei thar đei ‘bôh lăm đon tơchĕng, dah minh tơdrong hiôk hian hlĭch chrơp tŏk bŏk kial hơbŭt. Sư ling lang đei trong wă tơ ‘bôh kơ ih ‘bôh khan: trong brŏk tơhnam ling lang ‘bơ̆t doh, ‘bơ̆t anăp ih, dah ih chu yak năm hơdai Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.