21.06 Amăn Jơ Krao Khan Rim Năr: TƠDRONG ‘BĂ CHANG GÔ

Lăm tơdrong arih, kư̆m đei lu bơ̆n ‘maih wă kơ đei tơ’bôh rơđah hơđăl. Lu bơ̆n mơn kơ hơđơ̆ng kơplah đei bơngai pơdrơ̆ng tơplih kơ kơdih akâu. Lu bơ̆n ‘maih wă kơ đei tơl trŏ wă huay kơ pŭ iŏk kơ tơdrong rơih iŏk glăi. Mălei lu bơ̆n roi ‘net ‘net mơn kơ tơdrong ‘mêm tơpă tơgŭm bơngai bơ̆n ‘mêm pơhrăm iŏk rai wơ̆ ‘lŏ.

Năr ‘nâu, ‘năr 21/06/2026, tơdrong tơdă Amăn Jơ Krao Khan Rim Năr, apinh krao wơ̆n bơngai mơ̆ng hơdai tơchĕng pơwao nơ̆r Kră Yang kơ̆l ‘bai TƠDRONG ‘BĂ CHANG GÔ

“ ‘Bă bơ̆n ‘Bok Kei-Dei ‘mêm mơnat kơ bơ̆n tơpă na Sư mah krao bơ̆n kon Sư. Bơ̆n jing kon Sư tơpă. Na kon bơngai ala teh âu ưh kơ băt kơ bơ̆n bơngai thoi yơ ôh kơlih kơ sư ưh kơ băt kơ ‘Bă bơ̆n ‘Bok Kei-Dei.” (I Yôhan 3:1)

‘Năr Phĕt ‘blŏk kơ ‘Bă ling lang pơm kơ inh ưh kơ gơh wă roi thoi yơ. Đei hlôi hloh kơ ‘bar jit sơnăm đơ̆ng năr ‘bă inh lôch. ‘Bar jĭt ‘bar sơnăm. Lăm jơ năr noh tôm ăn kơ minh ‘nu kon drŏ kăn wơ̆ tơ̆l, đei ŭnh hnam, đei tơdrong bơ̆jang, pŭ iŏk dôm lu tơdrong mă đơ̆ng sơ̆ ưh tam mă tơchĕng truh.

‘Bă inh lôch kơplah sư ‘nao loi puăn jĭt sơnăm. Inh dang ei wă dang ‘bă inh kơplah noh sơ̆. Đei năr inh lăng kơdih akâu inh lăm kơmĭl na lăng inh lei lăi thoi ‘bă inh. Kơplah oei ‘lơ̆p, puăn jĭt sơnăm noh kơsô̆ tih dêh. Noh jơ̆ sơnăm lu bơngai ‘lŏ, dôm lu bơngai đei băt kơ tơl nơ̆r jet, gơh pơm tôm lu tơdrong wă kơ ling lang đei jơhngơ̆m pran kơplah đei kial hơbŭt truh. Mălei dang ei, kơplah hloh kơ kơnao noh bơih, inh ‘bôh rơđah tơdrong tơpă ưh kơ thoi noh. Bơngai tơ̆l ‘lŏ ưh kơ đei băt tôm tơdrong, bơngai ‘lŏ ưh kơ sŭk tep kơplah kơmăng, đei lu năr mơn ưh kơ tôm mah, đei lu năr hiơ̆k bơngơ̆t, đei dôm lu tơdrong pơdrơ̆ng gô tơlĕch mă ưh kơ băt adrol thoi yơ.

Đei kơmăng, inh tơ oĕi minh adrô̆, tơchĕng tơ ‘bă hăm ŭnh hnam noh sơ̆, lăm dôm khei sơnăm ‘bă đei yak năm hlôi, dôm tơdrong gleh glăn mă ‘bă ưh kơ đei roi, dôm tơdrong pŭ trăp mă noh sơ̆ minh ‘nu bơngai hơ’lơ̆p thoi inh ưh kơ đei drơ̆ng iŏk.

Sơnăm ‘bă tôch bơih, na inh oei pơtrơp thim dơ̆ng. Inh đei tơchĕng tơ ‘bă đơ̆ng kiơ̆ kơ kon bơngai oei yak năm lăm trong wơ̆ ‘lŏ phara. Jơ̆ kon kơdră lăm hnam dơnŏ, inh ling lang chĕp ba tơdrong hơmĕng păng pŭ iŏk dôm lu tơdrong lăm ŭnh hnam. Kơplah ‘bă lôch, inh ‘net ‘net jing bơngai pŭ iŏk dôm lu tơdrong jang, bơngai tơchĕng adrol, bơngai lĕch yak năm blŭng a. Yua kơ thoi noh, đei nơ̆r jet yak kiơ̆ inh lơ sơnăm, yua kơ ‘mêm inh kăl kơ băt, na truh tơ đei gleh lap na inh kăl kơ đei nơ̆r tơl: “ ‘Bă chang hơmĕng tơdrong kiơ đơ̆ng kon?”

Inh oei ‘blŏk kơ nhi ‘bă inh pơma dơnuh adrol kơ wă pơthi pơhrăm tơlăm anih pơhrăm tih. Inh đei jet ‘bă inh: “ ‘Bă wă kơ kon pơthi gah tơdrong jang kiơ?” Na “ ‘Bă tơchĕng kon trŏ kơ jang tơdrong jang kiơ?”

Kơplah noh sơ̆ inh tơchĕng ‘bă gô tơ’bôh ăn rơđah, yua ưh kơ đei bu hlôh kơ inh thoi ‘bă. Inh hơpơi noh gô minh tơdrong jang klĕng hloi, dah đei ‘bôh minh tơdrong jang ayơ ‘lơ̆ng đei bơih. Mălei ‘bă inh hiĕk đĕch: “Tơdrong noh kon khan trŏ păng ‘maih wă na ‘bă ling lang kiơ̆ kơ kon.”

Inh oei răp gô yua kơ tơchĕng ‘bă tam mă đei nơ̆r tơl kơ nơ̆r jet inh. Mălei noh bơih nơ̆r tơl tuch luch mă inh đei kơtơ̆ng. Lơ sơnăm đơ̆ng rŏng, inh hlôh: Năr noh, inh kăl kơ đei nơ̆r tơl, ‘bă ăn kơ inh đei tơdrong juăt; inh wă kơ đei trong rơđah; ‘bă ăn kơ inh rơngei rơih iŏk; inh wă băt kơ inh wă yak năm tơyơ, ‘bă lăng wă băt kơ inh gô jing bơngai thoi yơ lăm trong yak năm noh. ‘Bă ưh kơ pơma: “Kon wă thoi yơ kư̆m bưh!”, kư̆m ưh kơ pơma: “Kon ‘maih arih thoi yơ na arih thoi noh.” ‘Bă pơma: “Tơdrong noh kon khan trŏ păng ‘maih wă na ‘bă ling lang kiơ̆ kơ kon.”

Lăm nơ̆r pơma kơ đeh noh đei ‘bar tơdrong hơdai dih băl. Tơdrong trŏ, păng tơdrong ‘maih wă. Ưh kơsĭ hưch wă đĕch, kư̆m ưh kơ drơ̆ng iŏk, mă jơ̆ pơhrăm iŏk tơdrong arih lăm jơhngơ̆m, gĭt kăl păng tơdrong ‘mêm ăn đĕch tơ’bơ̆p dih băl.
Rŏlăng tơdrong noh jơ̆ minh ‘nu bơngai ‘bă chang hơmĕng kơ kon sư: Ưh kơ jing minh ‘nu bơngai đe pôk pơ ư, chă đei jên lơ, đei dôm tơdrong kiơ̆ kơ ‘maih wă… mă jing minh ‘nu bơngai băt kơ tơdrong trŏ păng pơ̆n nuih yak kiơ̆ tơdrong noh.
Kơplah tơchĕng kơ tơdrong ‘nâu, inh rai hlôh hloh gah ‘Bok Kei-Dei chông bơngai lui kơ Sư. Đei jơ năr kơjung lăm tơdrong arih đon lui, inh đei jet: “Kră Yang wă kơ kon pơm tơdrong kiơ?” “Kră Yang wă kơ kon rơih iŏk tơdrong ayơ?” “Ayơ mă Ih wă ăn kơ chăl arih kon?” Păng inh wă kơ Kră Yang tơl thoi kơ hla bơar dơhlâu chă rơđah hơđăl. Mălei đei lơwơ̆t, tơdrong inh đei sơng iŏk mă ưh kơ hla bơar dơhlâu chă, mă tơdrong oei hơdai; ưh kơ dôm lu nơ̆r tơl, mă jơ̆ đơ̆ng Tơ’ngla chông trong. Inh đei băt mơn thoi âu Kră Yang ưh kơ adrô̆ băt kơ inh năm tơyơ, yua kơ Sư kăl kơ inh gô jing bu.

‘Bok Kei-Dei pơjing kon bơngai păng ăn kơ lu bơ̆n rơngei rơih iŏk, ưh kơsĭ lu bơ̆n chĕp ba rup Sư sơmă ăn tơdrong ‘lơ̆ng hloh, oei lăm tơdrong pơgơ̆p hăm ‘Bă. Mălei, Kră Yang wă kơ lu bơ̆n rơih iŏk tơdrong ‘mêm mơnat păng tơdrong trŏ, Sư ưh kơ pơgŏ dah pơm ăn kơ thoi Sư wă thoi kơmăi rô’bôt, na tơmam noh rai gĭt hloh păng kăl wă hloh.

Pôl đei pơma khan kơnhăm kơ Bơngai Lui thoi âu: “Đĭ-đăng kơ bơ̆n jing pôm đon yua kơ minh tơdrong lui băt kơdih kơdih tơdrong Yêsu Kon ‘Bok Kei-Dei, na bơ̆n gô jing bơngai wơ̆ tôch tơ̆l thoi Yêsu.” (Êphêsô 4:13)

‘Bok Kei-Dei ‘maih wă lăng bơngai lui kơ Sư rim năr gô jing nhen thoi Yang Yêsu rai hloh.

Inh ưh pă đei jet Kră Yang gah tơdrong jang, anih jang dah gô keh đang ‘lơ̆ng thoi kơ adrol sơ̆ noh. Tơplih kơ noh, inh kăl apinh Sư ăn tơdrong hlôh wao, đei jơhngơ̆m ‘mêm mơnat đơ̆ng Sư păng tơdrong tơpăt wă kơ arih ‘lơ̆ng trŏ mă kơplah ưh kơ đei bu ‘lăng ‘bôh. Yua kơ inh băt dôm lu tơdrong noh oei hơdai đunh hloh kơ dôm lu tơdrong nai.

Noh jơ̆ tơdrong inh ‘blŏk dêh kơ ‘bă inh. Tơdrong inh ‘blŏk ưh kơ tơdrong kiơ ‘bă inh đei. Tơdrong inh ‘blŏk noh jơ̆ kon bơngai ‘bă inh. Inh ‘blŏk kơ ‘bă pơma dơnuh. Inh ‘blŏk kơ ‘bă gơh gơ̆t. Inh ‘blŏk kơ ‘bă pơm ăn kơ bơngai đei jơhngơ̆m ‘mêm mơnat păng pơyom. Inh ‘blŏk kơplah nhi tơ oei ‘bơ̆t anăp hnam pơma dơnuh tôm tơdrong kơpal teh đak ‘nâu, mă khan tăm mă hlôh đĭ mălei inh pơhrăm iŏk adrin mơ̆ng hăm đon lui păng pơyom. Inh ‘blŏk kơ ‘bă oei hơdai.
Tơpă, mŭk tơmam gĭt hloh đơ̆ng ‘bă pơsư̆ ăn ưh kơ mŭk tơmam gah sĕch akar, mă đơ̆ng jơhngơ̆m ‘bă noh lăm chăl arih sư oei đei ling lang đơ̆ng rŏng kơ noh. Rŏ lăng yua kơ đơ̆ng thoi noh na năr ‘nâu, đơ̆ng rŏng kơ hloh kơ ‘bar jĭt sơnăm đơ̆ng năr ‘bă lôch, oei đei bơtho inh đơ̆ng tơdrong arih sư. Păng tơdrong noh tơgŭm inh hlôh hloh kơ ‘Bok Kei-Dei ‘Bă.

‘Bă inh lôch bơih, mălei ‘Bă tơ kơpal plĕnh ti ưh ôh. ‘Bă inh yak năm hăm inh lăp tŏk bŏk chăl arih đĕch, mălei ‘Bă tơ kơpal plĕnh ti oei tơ noh adrol kơ tơpŭ kơ inh, păng Sư oei tơnoh đơ̆ng rŏng kơ inh yak năm kơpal teh ‘nâu gô tôch.

Đei lu nơ̆r jet inh pă đei tam apinh ‘bă, mălei inh oei chĕp ba nơ̆r jet apinh ‘Bok Kei-Dei ‘Bă. Đei dôm lu trong sơlah mă ‘bă hăm inh ưh tam mă yak hlôi, mălei ưh kơ đei trong sơlah ayơ ‘ngoaih kơ ‘Bok Kei-Dei oei hơdai. Păng pơm kơ inh đei tơdrong pơlung hloh lăm năr Phĕt ‘Blŏk Kơ ‘Bă ưh kơsĭ inh hlôh đĭ dôm lu tơdrong ‘bă chang hơmĕng kơ inh, mă inh băt kơ inh đei ‘mêm đơ̆ng ‘Bă arih ling lang, minh ‘nu bơngai ‘bă chông anhăk trong kơ inh, yak năm hăm inh, ưh kơ adrô̆ wei lăng inh pơm, mă wei lăng tôm tơdrong inh gô pơm.

Rŏ lăng, đơ̆ng rŏng kơ khei sơnăm chơ chă, tơdrong ‘Bă wă kơ inh, ưh kơ adrô̆ minh chăl arih ‘lơ̆ng đĕch ôh, mă đei jơhngơ̆m ling lang yak năm hăm Sư, pơhrăm iŏk đơ̆ng Sư, păng rai nhen Sư hloh.

Apĭnh đĭ đăng krao khan hơdai: Kơkuh kơ ‘Bă mă ‘mêm, kon bơnê kơ Ih yua kơ ‘bă tơ kơpal teh mă Ih ăn kơ kon. Mă khan jơ năr hơdai ưh kơ thoi kon wă, mălei dôm tơdrong ‘bă ăn kơ kon oei hơdai kon truh tơdang ei. Đei dôm lu năr kon ‘blŏk kơ ‘bă. ‘Blŏk kơ nơ̆r pơma. ‘Blŏk kơ ‘bă hiĕk. ‘Blŏk dôm lu tơdrong ‘bă khan hmă đĕch mă dang ei kon hlôh noh jơ̆ tơdrong ‘mêm. Đei năr kon hơpơi kơ pă minh ‘măng dơ̆ng oei hơdai ‘bă, roi kơ ‘bă dôm tơdrong arih kon hrei âu, dôm lu kon hơ’lơ̆p oei wơ̆ ‘lŏ, dôm tơdrong hiôk chơt păng dôm tơdrong hiơ̆k bơngơ̆t mă ki sơ̆ kon tam mă hlôh.

Mălei ơ ‘Bă, kon bơnê kơ Ih yua kơ kon băt mă khan ‘bă pă đei tơ âu bơih, na Kră Yang oei hơdai kơ plah ‘bă kon lôch. Ih oei hơdai dôm lu năr kon wơ̆ ‘lŏ. Ih oei hơdai dôm lu năr kon pơ̆k huŏng. Ih oei hơdai dôm lu năr kon tơnat wă pơdrơ̆ng iŏk. Ih oei hơdai lăm rim măng mă kon mơn kon rơdu.

Bơnê kơ Ih yua kơ Ih tam mă đei ataih đơ̆ng kon.

Apinh Ih huay kơ jô̆ yo kơ kon yua kơ dôm năr kon hrăt hrot wă mơ̆ng nơ̆r Ih. Dôm lu năr kon hăt kơ pơjing tơdrong jang mă hiơt kơ hơmet akâu kơdih.

Apinh bơtho kon băt kơ arih hăm dôm lu tơdrong gĭt đei khŏm khŏm. Apinh ăn kơ kon đei đon gơh hơgei wă rơih iŏk tơdrong trŏ. Apinh ăn kơ kon đei jơhngơ̆m hơđơ̆ng wă yak năm lăm tơdrong tơpăt. Apinh ăn kơ kon đei jơhngơ̆m ‘mêm wă tơgŭm bơngai nai. Apinh ăn kơ kon oei hơdai hnam dơnŏ kon thoi kơ đêl ‘bă oei hơdai kon. Păng hloh kơ noh dơ̆ng, apinh ăn kơ kon rim năr rai nhen thoi Yang Yêsu hloh. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, năr Phĕt ‘Blŏk Kơ ‘Bă rim sơnăm gô truh păng gô hlôi. Dôm tơdrong ră roi ‘nâu gô tôch. Mălei dôm tơdrong gĭt kăl dêh noh ưh kơ ‘blŏk đĕch ôh mă lăm dôm tơdrong lu bơ̆n gô pơm đơ̆ng rŏng kơ ‘blŏk noh.

Tơdah năr ‘nâu ih oei đei ‘bă, athei chu yom sư. ‘Nĕ kơ gô truh tơ năr tôm mah ‘mơ̆i. ‘Nĕ kơ gô đei jơ năr rơhơi hloh. Athei krao điê̆n thoăi. Athei ‘măn jơ sŏng sa hơdai. Athei pơma nơ̆r bơnê. Athei pơm dôm tơdrong ‘lơ̆ng gô đei rơnguơ̆.
Tơdah ih pă đei ‘bă bơih, athei băt tơdrong ‘mêm tơpă ưh kơ pơtôch ‘bơ̆t phĕt năm ‘bŭ. Dôm tơdrong gĭt kăl sư ăn rŏ lăng oei arih lăm ih. Rim wơ̆t ih rơih iŏk tơdrong trŏ. Rim wơ̆t ih pơm ‘lơ̆ng hăm bơngai nai. Rim wơ̆t ih chơ̆n hơđơ̆ng hăm kon kơdih. Rim wơ̆t ih arih tơpăt mă khan đei tơdrong kơnê̆ truh. Dôm kơmŭk tơmam noh oei pơtrơp.

Păng tơdah năr ‘nâu ih jơ̆ minh ‘nu bơngai ‘bă, minh ‘nu bơngai mĕ, dah minh ‘nu bơngai oei pŭ iŏk dôm tơdrong lăm hnam dơnŏ, athei ‘blŏk dôm tơdrong ih pơsư̆ ăn noh ưh kơ mŭk tơmam đĕch ôh. Tơdrong tih mă ih pơsư̆ ăn noh jơ̆ akâu jăn ih. Kon hơ’lơ̆p rŏ lăng hiơt kơ nơ̆r pơma đơ̆ng ih. Mălei sư ‘blŏk kơ ih pơm lăm tơdrong arih. Lu sư ‘blŏk kơ tơdrong ‘mêm đơ̆ng ih. Lu sư ‘blŏk kơ ih đei tơdrong pơmat tat truh. Lu sư gô ‘blŏk kơ ih đei tơ’bôh đon lui.

Păng hloh kơ đĭ đăng, athei yak năm lăm tơdrong ‘lơ̆ng kơjăp ‘nâu: Ih đei minh ‘nu Bơngai ‘Bă oei hơdai khŏm khŏm. Sư ưh kơ dan ăn kơ ih yak năm kiơ̆. Sư ăn kơ ih Sư oei hơdai. Sư ưh kơ adrô̆ tơ’bôh trong đĕch. Sư yak năm hăm ih. Sư ưh kơ adrô̆ gô ih wơ̆ ‘lŏ đĕch. Sư tơgŭm ih wơ̆ ‘lŏ.

Yua kơ thoi noh, athei yak pơtrơp tơ anăp dơ̆ng. Athei ‘mêm mơnat lơ hloh. Athei huay kơ jô̆ yo tĕnh hloh. Athei arih kăl yua hloh.

Noh ưh kơsĭ ‘Bă chang gô. Noh jơ̆ chăl arih ‘lơ̆ng hloh mă minh ‘nu bơngai kon kăl kơ arih.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ ưtơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.