Rơka đơ̆ng tơdrong sơngah trŏ lăp ưh kơ đei lĕch pham, mă lei đei jĭ dêh đĭ minh chăl arih. ‘Noh jơ̆ kơplah ih adrin đĭ jơhngơ̆m wă tơplih iŏk minh tơdrong lăng sơng iŏk đơ̆ng bơngai mă ih ‘mêm hloh, mă lei tơl tơwih lăp jơ̆ tơdrong thĕng hreh pơ‘lŏ. Dôm kơ plei nuih pơchah yua kơ đei sơngah băt chơ chă tơyơ minh tơpang ti ‘mêm mơnat, ‘mêm tơpă jơhngơ̆m sơng iŏk bơ̆n? Dah ih oei jet kơdih gah ayơ lăm teh đak ‘bĕnh blai tơdrong sơngah ‘nâu, lei hơ’mon lu bơ̆n hơdai tơchĕng pơwao năr ‘nâu trŏ jơ̆ nơ̆r tơl tơwih rơngơp ‘măn ăn kơ ih.

Năr ‘nâu, ‘năr 22/06/2026, tơdrong tơdă Amăn Jơ Krao Khan Rim Năr, apinh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Gene Markland kơ̆l ‘bai ‘BĂ KƠ LU HƠ‘LƠ̆P MƠTI

“Kră Yang ‘Bok Kei-Dei … Sư jing ‘Bă kơ lu mơti.” (Hơriso 68:5)

“Hơri pơư bĕ kơ Kră Yang ‘Bok Kei-Dei bơnê bĕ kơ anăn Sư; Man hơmet bĕ trong kơ Kră Yang hao hơmơ̆l năm rok anih glă; Anăn Sư jơ̆ Kră Yang; Chơt hiôk bĕ ‘bơ̆t anăp Sư. Kră Yang ‘Bok Kei-Dei oei tơ anih rơgoh. Sư jing ‘Bă kơ lu mơti, Păng jing Tơ’ngla wei lu drŏ-kăn adro.” (Hơriso 68:4-5)

Billy wơ̆ ‘lŏ lăm anih arih ‘bĕnh tơdrong chhŭr nuih. Tơpŭ lăm minh hnam dơnŏ dơnuh pơmat, hơngiĕng hơkĕ sư đei pŭ iŏk hrôih dôm tơdrong jang chă tơdrong arih. ‘Blŏk đêl gah minh ‘nu ‘bă lăm sư ưh kơ hơđăl dĭng truh nhen thoi ưh kơ đei. Ưh kơ ‘bôh ‘bă, Billy đei lăng lăi kiơ̆ ‘bok păng ma na pơhrăm pơjuăt jing minh ‘nu bơngai bơngai drŏnglo tơpă.

Mĕ sư jơ̆ minh ‘nu bơngai drŏkăn gơh găt. Yă oei rim năr đŏk Nơ̆r ‘Bok Kei-Dei kơ sư mơ̆ng. Tơdrong adrin đơ̆ng yă hlĭch chrơp tơpă, đei pơm mĕ, đei tuh tơ’bĕnh anih rơhông đơ̆ng bơngai ‘bă. Jơhngơ̆m pran đơ̆ng minh ‘nu bơngai mĕ adro mă thoi yơ kŭm đei hơgăt, mă lei yă đei rei lăm jơhngơ̆m sư dôm kơ găr adrĕch đon lui blŭng a. Đơ̆ng dôm tơdrong ‘blŏk so sơ̆ hloh, Billy đei ‘mêm hơiă kơ reh brŏ đơ̆ng oei ‘lơ̆p păng ling lang rơhing chang gô truh kơ pơge Năr Pơh. Rim wơ̆t khŭl hơri chông tơlĕch nơ̆r krao khŭl bơngai lui hơdai hơri ư -ang kơ Kră Yang, Billy ling lang jơ̆ bơngai ‘nă hal hloh. ‘Nhŏng rơhing pơyơ̆r ăn kơ Sư dôm nơ̆r hơri ư-ang đơ̆ng lăm jơhngơ̆m. Hăm ‘nhŏng, Hnam Kră Yang trŏ jơ̆ mĭnh anih noh đĕch ‘nhŏng mơn ‘bôh kơdih đei gah noh tơpă.

Lơ sơnăm đei hlôi, Billy kŭm đei dôm wơ̆t tơ’bơ̆p dơ̆ng ‘bă sư, mă lei tơdrong pơgơ̆p ‘noh nhen kơ thoi trong yak minh pah: dah Billy ưh kơ pơrơ̆ng chă, ‘bă sư ưh kơ đei layơ ‘blŏk truh kơ sư. Tơdrong tơplih tih đei truh kơplah klo akăn Billy sơng iŏk kon drŏkăn kơdră. Lăng hơ’lơ̆p lăm ti, jơhngơ̆m Billy ‘bĕnh blai tơdrong ‘mêm mơnat păng băt bơnê kơ Kră Yang. Sư rơhing kơ kon drŏkăn sư đei minh ‘nu ‘bok, păng sư kŭm wă kơ ‘bă gơh lăng ‘bôh sâu sư.

‘Nhŏng pơrơ̆ng krao chă wă roi tơbăt tơdrong hiôk chơt păng đĭ jơhngơ̆m krao wơ̆n ‘bă năm ngôi. Tơdrong tơ‘bơ̆p tŏ sĕt đei truh na pơtôch hrĕnh tĕnh. Lơ giĕng đơ̆ng rŏng noh, Billy oei đei jơhngơ̆m gưih rup păng roi tơbăt gah kon hơ’lơ̆p kơ đĭ hnam dơnŏ, hơdai hloi bơngai ‘bă oei arih tơ anih ataih.

Mĭnh năr ei, kơplah oei hơmet năm chă ngôi hơdai hăm hnam dơnŏ păng gô yak brih kơ anih ‘bă oei, Billy lui tơpă khan ‘bă sư gô đei chơt hiôk kơplah tơ’bơ̆p sâu. Sư krao điê̆n thoăi wă hơmet lê̆ tơdrong tơ’bơ̆p. Mă lei tơl tơwih tơdrong chang gô đơ̆ng sư jơ̆ minh đak tơngiĕt: “ ‘Bă hrăt hrot dêh, đĭ lăm giĕng ‘noh ‘bă đei tơdrong jang bơih.” Đơ̆ng rŏng kơ adrin ưh kơ đei yua lăp wă apinh dôm phŭt drong tơ’bơ̆p pơma dơnuh, Billy thar brĕng hơdơ̆r. ‘Nhŏng ơh sơ’ngon ‘bôh băt ‘bă sư ưh kơ đei hiơ̆k bơngơ̆t, sư ưh kơ wă ‘bôh sâu sư, kŭm ưh kơ wă ‘bôh hnam dơnŏ ‘nhŏng.

Jơhngơ̆m Billy đei chô̆ gơhret, păng mơn lăm jơhngơ̆m ơh blĕk. Đĭ minh chăl arih đei sơngah dang ei đei pơjing minh tơdrong ơh sơ’ngon ‘nao- kơplah kơdih kon drŏkăn sư kŭm đei ưh kơ sơng iŏk. Lăm tơdrong blĕk hrâu hăm jơhngơ̆m đei mơlŏu kơdih kâu trŏ, Billy đei iung hơmet ming sơlam kơ tơdrong arih sư. ‘Nhŏng pơma hăm ‘bă đơ̆ng lăm điê̆n thoăi: “Đĭ chăl arih ‘nâu ‘bă đei sơngah kơ kon. Kon đei pŭ iŏk tơdrong ưh kơ hiơ̆k bơngơ̆t đơ̆ng ‘bă mă khan kon ưh kơ đei pơm glăi kiơ. Dang ei ‘bă đei sơngah hloi kơ sâu ih! Kon ưh kơ layơ wă kơ kon drŏkăn kon đei jet: ‘ ‘Bă ơi, yua kơ liơ ‘bok ưh kơ ‘mêm kơ kon?’ Mă khan đơ̆ng jơ phŭt ‘nâu, kon gô ưh kơ ăn thim kơ ‘bă jơ năr ayơ wă pơm sơ’ngon kơ kon drŏkăn kon bơih. ‘Bă wă kơ gơh hiôk minh drô̆ trŏ ưh? ‘Bă kĕ jei bơih ‘noh!”

‘Noh jơ̆ jơ tuch luch lu sư pơma dơnuh dih băl. Billy pơ̆k hloi đơ̆ng rŏng kơ pĭt kơmăi. Sư mơ̆t tơhnam chă bơyơ̆ng, chơkăl ‘măng, dơ̆ng gơning ‘bơ̆t anih ‘nhao muh măt păng nhơ̆m ơh ol. Dôm kơ đak măt ro đơ̆ng tơdrong ơh sơ’ngon, hmach păng ưh pă đei hơmĕng lĕch ro thoi đak glung lăm muh măt sư. Sư mơn ‘bôh kơdih đei achăng păng minh drô̆ tơpă. Ưh kơ sĭ lăp akâu jăn sư ưh kơ đei tơdrong ‘mêm đơ̆ng ‘bă, na dang ei kon drŏkăn mă ‘mêm sư kŭm hiong lê̆ bơngai ‘bok mă ‘mêm. Tơdrong hiong răm tih hloh noh, hloh kơ tơdrong kĕ pŭ iŏk đơ̆ng sư.

Tơpang ti Billy đei rôp kơjăp ‘bar pah anih ‘nhao muh măt, sư đei hiơ̆ ngơk tơ kơpal păng tơ’bơ̆p hăm muh măt ‘bĕnh tơdrong ơh sơ’ngon đơ̆ng kơdih kâu lăm kơmĭl. Trŏ tơ anih jơ măng mu hloh đơ̆ng tơdrong ưh pă đei hơmĕng noh, jơhngơ̆m sư mơn đei tơdrong pơlung đơ̆ng ‘Bă Kơpal Plĕnh:

“Kon tơdăm ơi, kơdih Inh jơ̆ ‘Bă mă ‘mêm kơ kon. Tơdrong ‘mêm ‘Bă ‘măn ăn kơ kon jơ̆ tơdrong ‘mêm ưh kơ đei layơ tôch. ‘Bă đei ling lang ‘bơ̆t doh, ưh tim mă đei layơ ataih đơ̆ng kon. Kơplah kon đĭ jơhngơ̆m hơri hơdai hăm khŭl hơri, ‘Bă đei oei ‘bơ̆t doh hiĕk lăp đon kơ kon. Kơplah kon wơ̆l jrok lăm dôm kơ tơdrong pơdrơ̆ng tơnat, kơdih ‘Bă đei hrĕp hreh chông ba trong kơ kon yak tơ anăp. Kơplah kon adrin pơkeh tơdrong jang, ‘Bă đei oei hơdai chhôk hăm kon. Păng kơplah kon drŏkăn kon đei tơpŭ kiơ̆ tơdrong proh hơmet ‘lơ̆ng rŏ đơ̆ng ‘Bă, ‘Bă kŭm oei doh wă hiôk chơt tơpă hơdai kon. Kon tơdăm ơi, ‘Bă oei ling lang oei hơdai kon, ling lang jơ̆ thoi noh.”

Kră Yang pơtrơp pơlung jơhngơ̆m ‘nhŏng: “Bơngai ‘bă gah sĕch akar gơh achăng kon, mă lei kon ơi, kon đei minh hnam dơnŏ tih tơ kơpal plei ‘lơ̆ng, păng đĭ đăng đei ‘mêm mơnat kơ kon. Athei pơdơh lăm tơdrong hiôk hian ‘nâu hŏ, kon tơdăm mă ‘Bă ‘mêm.”

Sơ̆p Hla Bơar Nơ̆r ‘Bok Kei-Dei jơ̆: “Sư jing ‘Bă kơ lu mơti.” (Hơriso 68:5). Kơdih Yang Yêsu kŭm đei khan: “kơlih kơ ‘Bă Inh ‘mêm mơnat kơ iĕm tơpă.” (Yôhan 16:27).

Đơ̆ng lăm năr ‘noh, lăm rim kơ phĕt ‘blŏk kơ Năr ‘Bă, Billy ling lang ‘măn minh nơ̆r krao khan gĭt kăl wă ư-ang kơ ‘Bă Kơpal Plĕnh. Nơ̆r krao khan hơkat ‘bĕnh tơdrong ‘mêm mơnat: “Hơkat hiôk chơt Năr ‘Bă, kơkuh kơ ‘Bă kon tơ Kơpal Plĕnh! Kon ‘mêm kơ ‘Bă!”

Apĭnh đĭ đăng krao khan hơdai: Kơkuh kơ ‘Bă KơPal Plĕnh mă ‘mêm, kon bơnê kơ Ih yua kơ Ih jơ̆ ‘Bă ‘mêm mơnat kơ kon, jơ̆ Tơ’ngla pơklaih dôm kơ jơhngơ̆m pơchah. Apinh Ih krôp kuăr iŏk dôm kơ bơhngol oei mơn ‘bôh đei achăng, ăn kơ tơdrong hiôk hian hloh kơ dôm tơdrong hlôh băt. Apinh tơgŭm kon ‘bôh băt khan lăm tơpang ti tơnŏ đơ̆ng Ih, kon đei minh hnam dơnŏ mă ‘mêm ling lang. Apinh tơgŭm kon ưh kơ arih lăm tơdrong chhŭr nuih, mă lei arih lăm tơdrong rơngei- yua kon jơ̆ kon mă ‘Bă ‘mêm, đei ‘Bă ‘mêm wei lăng.
Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng ih kŭm oei chĕp lăm kơdih dôm kơ rơka đơ̆ng tơdrong sơngah. Rŏ lăng bơngai ‘Bă, bơngai mĕ dah dôm lu ‘nhŏng oh ‘mêm hloh đei ưh kơ gơh ăn kơ ih tơdrong ‘mêm mơnat mă ih trŏ kơ đei. Mă lei athei ‘blŏk khan, tơdrong pơ‘lŏ đơ̆ng teh đak ‘nâu ưh kơ đei pơma tơdrong gĭt tơpă đơ̆ng ih. Ih jơ̆ tơmam ‘lơ̆ng đơ̆ng bơngai Thơ̆ Man tih hloh, jơ̆ kon mă ‘mêm đei pơkăm hăm kơdih pham đơ̆ng ‘Bok Dŏng Pơklaih Yang Yêsu. Mă đĭ teh đak ‘nâu wih rŏng hăm ih, athei kư̆ kơjăp. Yua kơ đei minh ‘nu Bơngai ‘Bă ưh kơ layơ weh đơ̆ng ih, Sư đei ‘mêm kơ ih adrol kơ ih đei jing, păng gô ling lang ‘bơ̆t doh wă kuăr iŏk ih lăm jơhngơ̆m.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.