Muaj ntau zaug, peb hnov cuag li yus zoo li ib tug neeg taug kev yuam kev tom moj sab qhua. Lub nra nyhav vij puas ncig, tej teeb meem cia li tshwm los ua rau peb lub qhov muag tsaus ntuj nti. Tsis paub yuav mus ntxiv zoo li cas. Yim ris tawm tsam txhua yam, peb lub zog yim ntaug zuj zus xwb. vim peb hnov qab lawm tias, muaj tej lub sijhawm qhov uas peb yuav ua tsis yog siv zog ntsia kom pom txoj kev tseeb, tiamsis ntseeg tus uas tuav txoj kev ntawd.

Hnub no, yog hnub 23/06/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Andrew Knox dhau ntawm Zaj kawm TUAV LEEJTXIV TES

“Cov Yixalayees tus Vajtswv uas dawbhuv, tus Tswv uas cawm nej dim hais tias, “Kuv yog tus Tswv uas yog nej tus Vajtswv, tus uas qhia qhov zoo rau nej thiab coj nej taug txojkev uas tsimnyog taug” (Yaxayas 48:17).

“Txiv hnub ua rau kuv nco txog muaj ib tav su ntau xyoo dhau los, thaum kuv coj kuv ob tug tub mus khw yuav ib nkawm khau rau kuv. Lub sijhawm ntawd ntxhov nyho: ob tug menyuam nkawd ua txhua yam, muab khau pov hauv pem teb tas ntxig nkawm uas loj tshaj, tas ua si tsis tseg. Tiamsis, thaum kawg kuv kuj nrhiav tau ib nkawm tshiab tshiab rau kuv.

Tomqab them nyiaj tas, peb cov txiv tub tawm los mus tsev. Kuv siv zog tuav ob tug menyuam tes, tiamsis yeej pab tsis tau, nkawd yeej tsis quav ntsej kuv. Tus hlob khiav mus ua tom ntej. Tus yau kuj khiav caum qab. Thaum tus tub hlob khiav mus rau ntawm qhov rooj. Xwb tim nws cia li nres kiag. Kuv xav tsis thoob tsis paub vim li cas nws ho nres li ntawd. Tau ib pliag xwb, thaum tawm ntawm qhov rooj mus, kuv kuj yuav tau nres. Tas txog tus tub yau, ke mus ke hu nkauj dhia ua ntej, kuj cia li ntsiag to thaum tawm txog nraum zoov. Tag nrho peb puav leej nres vim tib qhov: tus duab tshav ntawm lub hnub.

Thaum ntawd ntshe yog 1 teev tav su, kub heev txog qhov uas sawv daws yuav tau nres, qhov muag qi nti thiab muab tes thaiv qhov muag. Qhov pom kev ntawd ci heev txog qhov uas peb ntsia tsis pom kev mus ntxiv. Ob tug tub cia li qw nrov nrov: “Txiv, ci qhov muag dhau lawm!”

Qhov tseeb nws yeej yog li ntawd, kuv ua twjywm teb: “Mus lawm tom tsheb tub.”
Peb cov txiv tub sawv daws tsis muaj lub tsom thaiv qhov muag, yog muaj no yuav zoo me ntsis. Tiamsis, cov menyuam lawv taus dua: ntawd yog muaj kuv. Ob peb feeb dhau los xwb, cov menyuam lawv tseem tsis kam tuav kuv tes, tiamsis thaum no, ob txhais tes me me ntawd tab tom nrhiav kuv txhais tes tuav txog thaum uas kuv tso tseg tsis thaiv qhov muag tuav cov menyuam tes. Thaum peb cov txiv tub sib tuav tes ruaj ruaj lawm, tus tub hlob hais rau tias: “Txiv, kuv yuav tuav koj txhais tes ruaj ruaj thiab qi qhov muag kom zoo zoo.”

Lub tswv yim zoo! Tus yau kuj thooj yim ua li ntawd.

Nkawd yeej tsis paub tias nkawd txiv kuj tab tom txomnyem heev rau tus duab tshav ci ntawd. Tiamsis, yog ib tug neeg laus, kuv yuav hloov tau thiab xyaum tau coj cov menyuam mus tomqab tsheb. Yam uas kuv cheem tsum ntawm tej menyuam yog lub siab ntseeg rau nkawd txiv. Thaum peb sib tuav tes mus ntxiv, kuv lub siab zoo siab heev ntawm txoj kev ntseeg uas cov menyuam lawv tseg rau kuv. Tag nrho ob tug menyuam puav leej qi muag, tes tuav kuv ruaj ruaj, nkawd muab tag nrho nkawd lub neej tso rau txiv coj.

Leej Txiv saum ntuj kuj xav kom peb ntseeg siab rau Vajtswv li ntawd.

Hauv tib neeg lub siab, peb nrhiav kev tswj tus kheej. Peb siv zog daws txhua yam, tiamsis Tswv Yexus hais tias: “Dhau ntawm kuv lawm nej ua tsis tau dabtsi” (Yauhas 15:5). Yog li, vim li cas peb pheej tiv tus duab tshav kub ntawd uas yog tej kev txhawj thiab tej teeb meem, ho tsis kam tuav Vajtswv txhais tes uas muaj hwjchim?

Kuv cov menyuam lawv pom tias lawv ua tsis tau thiab mus tsis taus ntxiv yog tsis tuav txiv tes. Kuv pom muaj ib yam uas yooj yim: zoo li ib tug menyuam muab nws txhais tes tso rau ntawm txiv txhais tes, peb kuj yuav tau tuav Leej Txiv saum ntuj txhais tes kom ruaj ruaj li ntawd. Tej zaug thaum pib koj yeej tseem ua xyem xyav, vim tso txojcai tswj hauv yus lub neej yeej yog ib yam uas tsis yooj yim. Tiamsis thaum twg peb tso tseg, tsis tuav ruaj ruaj tej kev ntshai, tej kev xav ntawm tus kheej, thiab ntseeg Tswv Yexus ua tus coj, peb thiaj yuav nkag siab Vajtswv tej lus cog tseg nyob hauv Vajluskub:

“Kuv yog tus Tswv uas yog nej tus Vajtswv, tus uas qhia qhov zoo rau nej thiab coj nej taug txojkev uas tsimnyog taug” (Yaxayas 48:17).

Cia li cev tes tawm, tuav Vajtswv txhais tes kom ruaj thiab cia Vajtswv ua tus coj koj kev, txawm yog thaum uas koj lub qhov muag tseem qi nti rau tej kev sim siab iab daw nyob hauv lub neej.

Thov caw nrog kuv peb thov Vajtswv ua ke: Leej Txiv saum ntuj, ua Vajtswv tsaug vim nyob rau tej txua kev hauv lub neej tshav ntuj kub nrig thiab muaj av paug txhua qhov, Vajtswv tsis cia peb nyob ib leeg. Nws yog tus Tswv yug zoo, nws yuav saib ntsoov peb txhua kaujruam. Tus Tswv thov zam txim rau txhua zaug uas kuv khav theeb, xav tias kuv cim civ nrhiav tau kev tawm tsis yuav Vajtswv koj ua tus coj. Thov pab kom kuv pom tias, thaum kuv nkaum hauv koj txhais tes muaj hwjchim, peb thiaj yuav tau txais kev kaj siab. txawm yog thaum no kuv lub qhov muag qi nti vim tej teeb meem nrhiav tsis tau lo lus daws, thov pub rau kom kuv muaj kev ntseeg tuav Tswv Yexus tes ruaj ruaj. Thov Vaj Ntsujplig coj peb kev tawm hauv lub moj sab qhua txhawj ntshai los, kom mus raws li Leej Txiv lub hwjchim ci ntsa iab. Kuv thov hauv Tswv Yexus Khetos lub npe, Amees.

Cov kwv tij txhua tus, tej zaug thaum no, tus duab tshav ntawm tej teeb meem tseem ua rau koj lub qhov muag tsis pom kev, ua rau koj txhawj nrhiav tsis tau kev mus. Txhom cim civ ris ib leeg lossis quab yuam tus kheej saib txhua yam los ntawm sab nqaij tawv uas muaj nrim. Nco ntsoov tias koj muaj ib leej txiv zoo, zoo siab hlo tuav koj tes hla dhau tej kev txomnyem – tsuas yog koj kam ntseeg muab koj txhais tes me me tso rau ntawm Vajtswv txhais tes loj. Txawm koj lub qhov muag yuav qi nti ntsia tsis pom txoj kev los ntseeg siab rau tus uas tuav koj lub neej tomntej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.