Kư̆m đei, kơplah lu bơ̆n mơn nhen thoi bơngai yak năm tơ dêh glă tŏ hang hơt. Tơdrong gleh glăn wăr tăp dăr, đei tơdrong truh pơm kơ măt ưh kơ bang, ưh pă băt wă yak pơtrơp dơ̆ng thoi yơ. Bơhual gơnang kơdih, lu bơ̆n rai gleh lap hloh đĕch. Noh yua kơ lu bơ̆n hiơt kơ thoi âu, kư̆m đei lơ tơdrong lu bơ̆n kăl kơ pơm ưh kơsĭ lăng mă rơđah trong yak năm, mă lui kơ tôm tơdrong kơ Tơ’ngla chĕp bơwei trong noh.

Năr ‘nâu năr 23/06/2026, tơdrong tơdă Amăn Jơ Krao Khan Rim Năr krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Andrew Knox kơ̆l ‘bai RÔP IŎK TI ‘BĂ

“Kră Yang Tơ’ngla dŏng pơklaih iĕm. Tơ’ngla ‘Lơ̆ng Rơgoh Isơrael khan: “Inh bơih Kră Yang, ‘Bok Kei-Dei iĕm. Tơ’ngla bơtho iĕm mă đei tơdrong ‘lơ̆ng kơ iĕm, păng dui ba iĕm lăm trong iĕm gô năm.” (Êsai 48:17)

Năr ‘blŏk kơ ‘Bă tơ’blŏk kơ inh lăm minh kơsơ̆ đơ̆ng đunh sơ năm adrol sơ̆ bơih, kơplah inh chông kon drŏnglo inh năm tơ anih tơm mơdro sa wă răt chơkhŏ kơ kơdih akâu inh. Tơ anih noh ưh kơ đei hrĕp: ‘Bar nu kon inh pơm tôm tơdrong. Klơ̆m chơ khŏ tơ hơnă đơ̆ng noh ‘bot chơ khŏ tih hloh, na ưh kơ tơ oei minh dơnơ̆ng kơchu dêh tơpă. Mălei, tuch luch inh đei rơih chơkhŏ ‘lơ̆ng kơ inh.

Đơ̆ng rŏng kơ ăn jên đang, ‘bă kon nhôn năm lĕch tơ trong ‘măng tơm. Inh adrin rôp ti bre kon, mălei ưh kơ đei yua kiơ, măr sư ưh kơ bơngơ̆t hloi. Kon ‘lŏ kơdâu tơ adrol, oh sư nơ năm đơ̆ng rŏng. Kơplah kon drŏnglo ‘lŏ inh lĕch hlôi kơ ‘măng, oh sư dơ̆ng lê̆ tơrŏng. Inh ưh kơ hlôh yua kơ kiơ sư thar dơ̆ng hloi thoi noh. Minh ‘bar yâi đơ̆ng rŏng, kơplah lĕch hlôi kơ’măng, kơdih inh kư̆m dơ̆ng ‘mơ̆i. Na kon adruch pơplŏng kơdâu păng oei hơri rah, na thĕng hreh hloi kơplah lĕch tơ’ngoaih.

Đĭ đăng lu nhôn dơ̆ng kơtă yua kơ minh tơdrong: măt ‘năr pơchrang.

Kơplah noh minh jơ kơsơ̆, tŏ dêh pơm kơ đĭ đăng dơ̆ng ‘mơ̆i, tep măt păng pĕng hăm ti. Hơdah mơnhal pơm kơ lu nhôn ưh kơ ‘bôh trong wă pơtrơp yak năm. ‘Bar ‘nu kon inh pơma khan: “‘Bă ơi mơnhal dêh!”

Tơdrong tơpă ‘bôh thoi noh, inh pơma hăm bre kon: “Ơ bre kon yak năm tơ gre bĕ.”

Pêng ‘nu ‘bă kon ưh kơ đei măt kơmĭl găm, tơdah đei lei păi ‘biơ̆: noh jơ̆ kơdih inh. Minh ‘bar phŭt adrol, bre kon ưh kơ wă rôp ti ‘bă, mălei jơ ‘nâu đei ‘bar tŏ tơpang ti iĕ chơchă ti inh. Bre kon chơchă ti inh truh tơ inh pă bang klơ̆p măt bơih păng achăng tơ ala bre kon rôp ti inh. Kơplah ‘pêng ‘nu ‘bă kon rôp ti kơjăp bơih, kon drŏnglo ‘lŏ pơma: “‘Bă ơi, kon gô rôp kơjăp ti ‘bă păng tep măt tơpă.” Tơdrong tơchĕng noh ‘lơ̆ng tơpă! Oh sư kư̆m drơ̆ng kơ pơm thoi noh.

‘Bar ‘nu kon drŏnglo inh ưh kơ băt kơ ‘bă sư kư̆m oei tŏ hang hơt thoi noh. Mălei, minh ‘nu bơngai ‘lŏ tơ̆l, inh juăt kơ thoi noh bơih, chông anhăk măr sư năm tơgre. Tơdrong inh kăl kơ bre kon jơ̆ đei đon lui gơnang tôm tơdrong kơ ‘bă sư. Kơplah lu nhôn rôp ti yak năm, jơhngơ̆m inh hiôk yua kơ kon lui gơnang kơ inh. ‘Bar ‘nu kon bang lăng, rôp kơjăp ti inh, pơjao akâu kơ ‘bă chông anhăk.

‘Bă tơ kơpal plĕnh ti kư̆m wă kơ lu bơ̆n lui gơnang kơ Sư tôm tơdrong thoi noh.
Pah jrŭ lăm jơhngơ̆m kon bơngai, lu bơ̆n ling lang rơhing wă kơ pơm kơdih. Lu bơ̆n ngăl adrin kơdih pơm dôm lu tơdrong, mălei Yang Yêsu pơma khan: “Dah ưh kơ đei Inh, iĕm ưh kơ gơh pơm kiơ ôh” (Yôhan 15:5). Na lei, yua kơ kiơ lu bơ̆n nŏng kơ tơ’bơ̆p tŏ soh dôm tơdrong hiơ̆k bơngơ̆t hăm dôm tơdrong kơnê̆ nai, mă ưh kơ wă rôp ti mơsêh mơyang đơ̆ng Kră Yang?

Bre kon inh ‘bônh kơ mơn sư ưh kơ gơh pơm kiơ păng ưh kơ gơh yak năm dah ưh kơ rôp ti ‘bă sư. Inh đei ‘blŏk kơ minh tơdrong: thoi kơ minh ‘nu kon hơ’lơ̆p dan tơpang ti sư tơ lăm tơpang ti ‘bă sư, lu bơ̆n kư̆m kăl kơ rôp kơjăp ti ‘Bă tơ kơpal plĕnh ti thoi noh. Rŏ lăng blŭng a ih oei mơlâu, yua kơ tŭk lê̆ tơdrong bơwei kơdih ưh kơ ‘bônh ôh. Mălei, kơplah lu bơ̆n achăng lê̆, ưh pă rôp kơjăp tơdrong hli tơrơ, dôm kơ ‘maih wă kơdih, na lui gơnang tôm tơdrong đơ̆ng Yang Yêsu chông yak năm, lu bơ̆n gô hlôh nơ̆r pơkă đơ̆ng Kră Yang lăm Sơ̆p hla bơar ‘Bok Kei-Dei:

“Inh bơih Kră Yang, ‘Bok Kei-Dei iĕm. Tơ’ngla bơtho iĕm mă đei tơdrong ‘lơ̆ng kơ iĕm, păng dui ba iĕm lăm trong iĕm gô năm.” (Êsai 48:17)

Athei chro ti bĕ, rôp iŏk ti Kră Yang păng ăn kơ Sư chông anhăk, kơplah măt ih oei lăng tơbang yua kơ dôm tơdrong pơlong lăng tih dêh lăm chăl arih.

Apĭnh đĭ đăng krao khan hơdai: Kơkuh kơ ‘Bă mă ‘mêm, bơnê kơ Ih yua kơ tŏk bŏk trong lăm chăl arih đei tŏ hang hơt păng kial trôk dơhlu, Ih jơ̆ Tơ’ngla wei triu iơ̆m dim, ling lang hnhoi lăng kơnao yak năm kon. Kră Yang ơi, apinh huay kơ jô̆ yo kơ kon dôm wơ̆t kon pơ ang, ngeh kơ kơdih kon gơh chă trong yak năm mă ưh kơdrơ̆ng rôp ti Ih chông anhăk. Apinh tơgŭm kon mơn thoi âu, lăp minh gơ’nơp lăm pơnăr mơsêh mơyang Ih đĕch, lu nhôn đei hiôk hơđơ̆ng tơpă. Mă khan kơplah ‘nâu măt kon oei lăng tơbang yua kơ dôm lu tơdrong kơnê̆ tam mă đei nơ̆r tơl, apinh ăn kơ kon đei đon lui wă rôp kơ jăp ti Yang Yêsu. Hơpơi kơ Yang Bơhngol ‘Lơ̆ng chông ba lu nhôn lĕch đơ̆ng anih kueng hli tơrơ, wă yak năm lăm trong ư- ang hơdah đơ̆ng Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng kơplah jơ ‘nâu, tŏ hang hơt đơ̆ng dôm lu tơdrong kơnê̆ oei pơm kơ ih mơnhal, pơm kơ ih hơwơ̆l ưh kơ đei chă ‘bôh trong yak năm. ‘Nĕ adrin pŭ kơdih dah pơgŏ kơdih lăng ‘bôh dôm tơdrong hăm măt kon bơngai ‘nâu. Athei ‘blŏk ih đei ‘Bă ‘lơ̆ng tơpă, gô rôp ti ih yak hlôi đơ̆ng tơdrong gleh glăn – kăl kơ ih đei lui gơnang wă dan tơpang ti iĕ ih lăm tơpang ti tih să Kră Yang. Mă khan măt ih lăng tơbang păng lăng ưh kơ rơđah trong yak năm, athei gơnang tôm tơdrong đơ̆ng Tơ’ngla chĕp tơdrong arih ih tơ anăp.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.