“Minh ‘nu kon drŏ kăn ‘lơ̆ng hơ iă đơ̆ng rŏng kơ sư ling lang đei minh nu ‘bă gơh hơgei.” Rŏ lăng ‘noh jơ̆ minh lăm dôm kơ nơ̆r pơma ‘lơ̆ng hloh gah tơdrong ‘mêm ‘bă păng tơdrong hơtŭt ‘bơm đơ̆ng bơngai ‘bă lăm tơdrong arih lu kon sư kơdih. Tơpă thoi noh, lăm minh teh đak ‘bĕnh tơdrong ưh kơ hơđơ̆ng păng tơplih, gơh wơ̆ ‘lŏ lăm tơdrong ‘mêm mơnat, chông anhăk păng krao khan đơ̆ng minh ‘nu bơngai ‘bă hli yom kơ Kră Yang jơ̆ minh lăm dôm tơdrong pŭn hiôk tih hloh mă minh ‘nu bơngai kon hơpơi wă.

Năr ‘nâu, năr 24/06/2026, tơdrong tơdă Amăn Jơ Krao Khan Rim Năr krao wơ̆n bơngai mơ̆ng hơdai tơchĕng pơwao nơ̆r Kră Yang hăm kơ̆l ‘bai KON ADRUH KƠ MINH ‘NU ‘BĂ

“Apinh ih ăn kơ inh tơdrong pŭn hiôk. Yua kơ ‘Bă ăn boih teh gah gơal, ưh kơ đei đak, apinh ih kư̆m ăn dơ̆ng kơ inh teh đei tu đak. Na Kalep ăn kơ kon sư teh đei ‘bar ‘bôt tu đak tơ gah kơpơ̆ng păng tơ gah ala.” (Lu ‘Bok Sek Tơlang 1:15)

“Kalep khan: Bu năm blah iŏk đei Kirat Sêpher, na gô ăn sư oei kơ kon adruh inh Aksa. Kơplah noh, Ôtniêl kon tơdăm Kêna, oh Kalep blah iŏk pơlei noh na Kalep iŏk kon adruh sư anăn Aksa pơm akăn Ôtniêl. Wă sư brŏk tơ Ôtniêl boih sư athei klo sư apinh đơ̆ng ‘bă sư minh hlak chŭn đei tu đak. Adruh ei ‘nao jur đơ̆ng aseh na Kalep jet: Kon wă kơ kiơ? Kon sư tơl: Apinh ih ăn kơ inh tơdrong pŭn hiôk. Yua kơ ‘Bă ăn boih teh gah gơal, ưh kơ đei đak, apinh ih kư̆m ăn dơ̆ng kơ inh teh đei tu đak. Na Kalep ăn kơ kon sư teh đei ‘bar ‘bôt tu đak tơ gah kơpơ̆ng păng tơ gah ala.” (Lu ‘Bok Sek Tơlang 1:12-15)

“ ‘Bă ơi!!!” Nơ̆r kon adruh lu nhôn re đơ̆ng ataih hăm nơ̆r “ơi” nhen thoi minh pôm kĕo dui, gơh kơjung dĭng dang yơ, hơdai hăm tơdrong ‘ngam băt dêh. Hăm nơ̆r pơma ‘noh, inh hăm klo đei hiĕk lăm jơhngơ̆m yua kơ băt hơđăl nơ̆r pơtrơp đơ̆ng rŏng bŏ lăng kon adruh gô apinh tơdrong kiơ noh, hloh jơ̆ kơplah sơnăm hŏk ‘nao wă tôch, kon đei adrin lơ tơpă păng tơdrong hŏk kĕ đei ‘lơ̆ng.

“Kon ‘maih năm hơdai kăm trăi hăm hnam trưng, mĕ ‘bă ăn kơ kon năm hơ!!!” Pơthim minh nơ̆r “hơ” kơjung tơpă. Hơdai hăm tơdrong hiôk chơt đơ̆ng kon kơplah sơnăm hŏk ‘nao đĭ, klo inh hơli kơ̆l, hiĕk hăm kon păng pơma: “Gơh!” Klo inh ling lang đei tơdrong juăt pơdrơ̆ng hăm kon, ưh kơ đei hiơt pơkă pơkăm: “ ‘Bă jet pơthim thây kô gah bơyan kăm trăi na gô chih anăn ăn kơ kon.”

Lăng bre ‘bă kon pơma dơnuh, inh đei ‘blŏk truh kơ rup minh ‘nu adruh păng ‘bă sư lăm Sơ̆p Hla Bơar Nơ̆r ‘Bok Kei-Dei. Bơngai kon adruh noh đei minh ‘nu ‘bă gơh hơgei, sư kŭm đei minh nơ̆r krao apinh hăm ‘bă đei gĭt kăl. Bơngai kon adruh noh trŏ jơ̆ Aksa.

Hơ’mon gah Aksa, kon adruh Kalep đei chih roi lăm Yôsuê 15:16-19 păng Lu ‘Bok Sek Tơlang 1:12-15. Sư đei minh nơ̆r krao apinh gĭt kăl tơpă hăm ‘bă sư:
“Kon sư tơl: Apinh ih ăn kơ inh tơdrong pŭn hiôk. Yua kơ ‘Bă ăn boih teh gah gơal, ưh kơ đei đak, apinh ih kư̆m ăn dơ̆ng kơ inh teh đei tu đak. Na Kalep ăn kơ kon sư teh đei ‘bar ‘bôt tu đak tơ gah kơpơ̆ng păng tơ gah ala.” (Lu ‘Bok Sek Tơlang 1:15)

Gơal jơ̆ anih teh char glă, hrĕng kro, ưh kơ đei ‘mi, tŏ hang hơt păng ưh kơ đei tu đak, kŭm jơ̆ minh lăm pêng anih tơm (hơdai hăm anih groi kông păng anih dơhnă) mă adrĕch Juđa đei jur năm blah kon pơlei Kanaan. Gơh đei pơma, teh gah Gơal jơ̆ minh tơdrong pơlong tih hăm minh ‘nu “adruh ‘lơ̆p”. Mă lei Aksa jơ̆ bu? Sư jơ̆ kon adruh Kalep, minh lăm ‘bar ‘nu đĕch lăm dôm lu bơngai weh hlôi đơ̆ng Êyiptơ gơh yak truh tơ dêh char đei pơkă, minh ‘nu pran kơtang gah đon lui, minh ‘nu yŏng lĭnh Isơrael. Sơ̆p Hla Bơar Nơ̆r ‘Bok Kei-Dei ưh kơ đei chih dôm tơdrong hơđăl lăm chăl arih rim năr kơ Kalep lăm hnam dơnŏ, sư pơma kiơ, sư pơm tơ’bôh thoi yơ, sư hơnul hơdai hăm kon, bơtho ăn kơ kon, ‘mêm mơnat kơ hnam dơnŏ, ‘mêm kơ khôi juăt Kră Yang, chơchă tơdrong bơtho tơ’bôh đơ̆ng Kră Yang thoi yơ? Mă lei lăp đơ̆ng nơ̆r krao apinh đơ̆ng Aksa, lu bơ̆n gơh ‘bôh băt lơ tơdrong.

Aksa sơng iŏk teh gah Gơal pơm mŭk tơmam. Minh tơmam ăn đĕch, kŭm jơ̆ minh tơdrong pơlong lăng păng minh tơdrong jang tih hloh ăn kơ sư păng klo sư jơ̆ Ôtniêl, gơh đei păng bơwei. Aksa ưh kơ đei hơngah tơdrong jang ‘bĕnh tơdrong pơmat tat ‘nâu. Mă lei sư apinh ‘bă ăn kơ sư teh đei tu đak tơ gah kơpơ̆ng păng tơ gah ala, dôm kơ tu đak, ‘noh trŏ jơ̆ tơdrong gô ba ăn tơdrong arih kơ teh gah Gơal hrĕng kro mă sư đei bơwei. Nơ̆r krao apinh ‘nâu minh kơnao yak ‘bĕnh tơdrong gơh hơgei păng đei lăng tơ ataih đơ̆ng Aksa. Tơdrong ‘nâu ưh kơ đei thar truh, mă lei inh lui khan tơdrong gơh hơgei ‘nâu truh đơ̆ng dôm kơ khei ‘năr oei ‘lơ̆p kơplah Aksa gơh oei hơdai ‘bă, đei lăng păng pơhrăm iŏk đơ̆ng kơdih ‘bă sư.

Dôm kơ đak glung kŭm jơ̆ tu tơmam gĭt kăl lăm khŭl linh truh tơ tơdrong arih rim năr. Tơdrong pơm kơ inh tơchĕng jơ̆: Aksa băt kơdih gơh apinh ‘bă. Sư ưh kơ pơmơ̆ng ‘bơ̆t anih tơdrong arih, kŭm pơ̆n nuih tơ ‘bôh tơdrong kăl wă kơ sư hăm ‘bă. ‘Noh jơ̆ tơ’bôh đơ̆ng minh ‘nu bơngai kon đei wei rong lăm tơdrong ‘mêm mơnat păng kơjăp. Minh ‘nu bơngai đei wơ̆ ‘lŏ lăm hnam dơnŏ hli yom kơ Kră Yang gô hŏk iŏk lăng tơ ataih hloh dôm kơ tơdrong ‘bôh ‘lơ̆ng rŏ ‘bơ̆t măt wă chơchă tơdrong đei gĭt kăl tơpă.

Trŏ lăp, lu bơ̆n kŭm lei lăi thoi oei arih lăm “teh gah Gơal” hrĕng kro lăm chăl arih bơ̆n. Lu bơ̆n đei tơdrong jang, đei jơhngơ̆m bơ̆jang, đei anăn bơngai jang…mă lei bơhngol đei hrĕng kro. Păng tơdrong lu bơ̆n kăl hloh jơ̆ dôm kơ “tu đak” đơ̆ng ‘Bok Kei-Dei, jơ̆ tơdrong oei hơdai, jơ̆ tơdrong arih đơ̆ng kơdih Sư.

Tơdrong ‘lơ̆ng rŏ dơ̆ng jơ̆ Kalep đei tơl tơwih nơ̆r apinh đơ̆ng Aksa, kon adruh sư păng ăn kơ sư “tu đak tơ gah kơpơ̆ng păng tơ gah ala”. Rup noh pơm kơ inh tơchĕng truh kơ jơhngơ̆m ‘Bok kei-Dei păng tơdrong ‘măn ăn rơkah rơkai đơ̆ng Sư, kơplah nơ̆r apinh đơ̆ng kon Sư truh đơ̆ng dôm tơdrong kơnhăm trŏ lăm tơdrong Sư wă.

Wă kơ gơh đei dôm lu kon adruh, kon drŏnglo đei đon lui kơjăp anih Kră Yang, gô sơng iŏk tơdrong jang hloi, đei tơdrong lăng gơh hơgei…Lei trŏ tơpă, lu bơ̆n kăl kơ đei dôm lu mĕ ‘bă Bơngai Lui, dôm lu bơngai ‘bă thoi Kalep.

Năr phĕt ‘blŏk kơ ‘bă lăm khei 6 rim sơnăm, kŭm jơ̆ jơ ăn kơ dôm đon tơchĕng jơhngơ̆m ‘lơ̆ng rŏ đơ̆ng bơngai ‘bă đei ‘blŏk truh, đei ‘blŏk răk. Hơpơi lăm Khŭl Bơngai Lui kơ Kră Yang gô râu tơiung dôm lu bơngai ‘bă kiơ̆ rup đơ̆ng Sơ̆p Hla Bơar Nơ̆r ‘Bok Kei-Dei, wă kơjing dôm lu bơngai chông anhăk bơhngol kơ hnam dơnŏ, kơ kon hơ’lơ̆p… (Êphêsô 6:4). Rŏ lăng lơ bơngai lăm lu bơ̆n ưh kơ đei minh ‘nu bơngai ‘bă gơh hơgei thoi Kalep, mă lei lu bơ̆n gơh krao apinh Kră Yang khan kơdih bơ̆n, gô jing dôm lu bơngai ‘bă, bơngai mĕ, bơngai chông anhăk bơhngol thoi Nơ̆r Kră Yang bơtho, wă kơ đơ̆ng kơdih lu bơ̆n, dôm kơ jơhnơr pơtrơp gô đei lơ dôm lu Aksa, Ôtniêl kơ ‘Bok Kei-Dei.

Wơ̆t dơ̆ng hơ’mon gah kăm trăi bơyan pơdơh hăm hnam trưng kon drŏkăn, klo inh đei jet hơđăl tơdrong tơbăt đơ̆ng thây cô bơwei. Bơyan kăm trăi ưh kơ sĭ jơ̆ minh bơyan pơdơh đơ̆ng rŏng kơ sơnăm hŏk đĭ, mă jơ̆ minh jơnăr kơ lu kon hŏk pơhrăm Nơ̆r Kră Yang, hơri ư-ang kơkuh kơ Kră Yang, lăng dơ̆ng tơdrong pơgơ̆p kơdih kâu hăm Kră Yang. Tơpă jơ̆ minh bơyan kăm trăi đei yua gah sĕch akar truh bơhngol. Lăng ‘bôh kon bơnê, roi tôm tơdrong proh hơmet kơ bơyan kăm trăi wă truh… Inh đei bơnê kơ Kră Yang yua kơ lu kon inh gơh đei minh ‘nu bơngai ‘bă ‘mêm kơ Kră Yang păng ‘mêm kơ lu kon, hơdai hăm kon lăm tôm tơdrong jang.

Apĭnh đĭ đăng krao khan hơdai: Kơkuh kơ Kră Yang ‘mêm mơnat. Apinh Kră Yang ăn kơ kon minh jơhngơ̆m gơh hơgei thoi Aksa, băt chơchă dôm kơ “tu đak bơhngol” tơplih yua kơ kơdâu kiơ̆ dôm tơdrong ‘bônh kơ hiong hlôi đơ̆ng teh đak. Hơpơi kơ hnam dơnŏ kon jing anih đon lui gơh wei răk păng đei yua kơ dêh char ‘Bok Kei-Dei.

Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, Khŭl bơngai lui dang ei kăl kơ dôm lu bơngai ‘bă lui yom hloi đơ̆ng lăm hnam dơnŏ wă pơm bơngai pơgơ̆r bơhngol kơ hnam dơnŏ, trŏ thoi tơdrong jang Kră Yang bơjing. Rim kơ tơdrong iĕ ioch rim năr, rim kơ nơ̆r pơma, rim kơ tơdrong jang, rim kơ nơ̆r krao khan, rim kơ tơdrong pơyơ̆r, rim kơ tơdrong bơtho Nơ̆r Kră Yang ăn kơ kon…lăm minh năr ayơ noh, trŏ dôm tơdrong noh jơ̆ dôm ‘bai hŏk đon lui arih hloh. Athei arih thoi yơ ăn kơ kon hơ’lơ̆p ưh kơ sĭ lăp mơ̆ng gah Kră Yang đơ̆ng nơ̆r ih pơma, mă kŭm lăng ‘bôh Sư đơ̆ng lăm kơdih chăl arih ih. Păng dah ih jơ̆ bơngai ‘lơ̆p, athei hŏk iŏk thoi Aksa: pơyơ̆r ăn kơ Kră Yang dôm nơ̆r krao apinh gơh hơgei, dôm kơ “tu đak” bơhngol wă kơ tơdrong arih ling lang đei yua kơ Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.