Muaj ib qhov tseeb tias nyob hauv txhua tus tib neeg lub neej, txiv cov lus qhuas thiab txais yuav nws muaj zog heev, ua rau muaj kev ntseeg siab thiab muaj kev kaj siab heev hauv lub siab. thaum muaj ib leej txiv hais rau yus tus menyuam tias: “Txiv txaus siab rau koj!” – cuag tus menyuam nws tau ntxiv lub zog loj heev sab hauv kom nws ntsib lub ntiajteb no. tiamsis yog tias tsis muaj cov lus lees txais ntawd ces nws yuav yog ib qhov khoob lug, ib txoj kev ntshaw tsis muaj nrim ua rau peb pheej caum raws tej koob npe sab nraud kom ua rau sawv daws paub tias peb muaj nqis. Tiamsis thov koj txhob maj tas kev cia siab, vim peb yeej tseem tshuav Leej Txiv saum ntuj. Leej Txiv ntawd nws txais tos koj, hlub koj thiab hu koj tias yog nws tus menyuam uas nws hlub- txawm yog koj thiab kuv yeej tsis tsimnyog rau txoj kev hlub ntawd.

Hnub no, yog hnub 25/06/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Louie Giglio dhau ntawm Zaj kawm LEEJTXIV KEV ZOO SIAB

“Thaum Yexus ua kevcai raus dej tas, nws tawm hauv dej los. Tamsim ntawd rooj ntug txawm qhib plho, nws porn Vajtswv tus Ntsujplig zoo li tus nquab los tsaws saum nws taubhau. Muaj ib lub suab hais saum ntuj tuaj hais tias, “Tus no yog kuv tus Tub uas kuv hlub, kuv txaus siab rau nws” (Mathais 3:17).

Hauv txoj kev nrog tus Tswv mus, yam uas qab zib tu peb tus ntsujplig yog Leej Txiv saum ntuj txoj kev hlub. Qhov tseeb ntawd Nws nyob siab tshaj txhua txoj kablig kevcai, tau ua pov thawj ciaj sia txij thaum Tswv Yexus tsim tau nws lub tebchaws hauv ntiajteb. Ib nyob rau hauv ntu Vajluskub uas hais txog Leej Txiv tus cwjpwm uas yog Vajtswv yog phau Mathais tshooj 3, thaum Tswv Yexus txo hwjchim mus cuag Yauhas Npatitus ua kevcai raus dej.

Cia li xam txog lub sijhawm ntawd: Yauhas tab tom sawv hauv tus dej Yauladees tob nto hauv siab. nws lub tsho ntub dej tas. Yawg nyuam qhuav ua kevcai raus dej rau cov neeg coob coob, ke qhia, ke kho kev rau tus Tswv.

Xwb tim, Tswv Yexus cia li tuaj thiab hais rau yawg: Cia li ua kevcai raus dej rau kuv.

Yauhas xav tsis thoob. Tib neeg tus cwjpwm coj thaum uas ntsib tus dawbhuv yuav sawv tsees: “Kuv thiaj yog tus uas cheem tsum koj koj muab ua kevcai raus, vim li cas koj ho tuaj yuam kuv ua?” Yauhas pom tias nws tsis tsimnyog – muaj ib txua kev quas deb heev ntawm tus neeg thiab tus cawm seej ua rau yawg thaub qab. Tiamsis tomqab sib tham tas, Yauhas mloog lus. Yawg muab Tswv Yexus ua kevcai raus hauv tus dej Yauladees tas tsa Tswv Yexus sawv los. Tswv Yexus ua kevcai raus kom yog sawv rau ntawm tib neeg txhaum qhov chaw hauv Vajtswv lub homphiaj cawm dim, qhib ib txoj kev tshiab thiab dawbhuv rau tib neeg ntiajteb, txawm yog Tswv Yexus ib txwm dawbhuv thiab tsis muaj txim.

Vajluskub sau tias tomqab Tswv Yexus tawm hauv dej los, rooj ntug cia li qhib, Vaj Ntsujplig nqes los zoo li ib tug nquab tsaws saum Tswv Yexus. Tas muaj ib lub suab hais nrov nrov saum ntuj tuaj – ib lo lus ceeb toom nrog txoj kev xav tsis thoob rau lub hwjchim ntawd. Koj puas paub cov lus ntawd yog li cas?

Cov lus ceeb toom ntawd tau rhuav tshem txhua txoj kev xav ntawm tag nrho txhua tus tib neeg tab tom nyob ntawm ntus dej Yauladees hnub ntawd. Muaj ntau tus sawv ib ncig Yauhas Npatitus tej zaug lawv yuav swm tus txiv neej peb caug xyoo no – Tswv Yexus nyob hauv Naxales. Hauv lawv lub siab, Tswv Yexus yog “Yauxej tus tub”, nws txiv yog ib tug kws ua ntoo pluag. Nws loj hlob hauv ib lub zos tsis deb ntawd. Tej zaug lawv yeej tseem nco Tswv Yexus tus duab nrog tej phooj ywg ua si tom tej kev, lossis pom Tswv Yexus loj hlob, mus hauv tsev sab laj lossis tom tej kiab khw.

Thaum Yexus ua kevcai raus dej tas, nws tawm hauv dej los. Vajtswv nthuav tawm los ntawm lub suab hais nrov nrov saum ntuj ntawm lub rooj ua kevcai xaus ntawd. Vajtswv hais dabtsi?

Tsis paub ntawd puas yog ib lo lus ceeb toom nruj, tshoov kom tib neeg yuav tau maj nroos ua raws li txoj kevcai ntseeg? Lossis yog ib cov lus muaj lub ntsiab lus tob tob nws nyob deb lub qab ntuj no txoj kev kaj siab? lossis yog ib lo lus nug, quab yuam saib Tswv Yexus puas tau ua haum Vajtswv siab mus txog qib twg lawm tau?

Yeej tsis yog li ntawd.

Leej Txiv tau hais tias: “NTAWM NO YOG TUS TUB UAS KUV HLUB, HAUM KUV SIAB!”

Zoo li Nws tab tom hais rau lub ntiajteb no tias: “Kuv yog Vajtswv, thiab ntawm no yog kuv tus tub! Kuv hlub koj ntau heev. Kuv txaus siab rau koj.” Ntawm no yog ib qhov tseeb!

Yog tias Vajtswv tsa suab hais saum ntuj tuaj, peb pheej xav tias Vajtswv yuav muab ib zaj lus qhuab qhia tob tob, lossis ua rau peb tsau npo los ntawm Vajtswv tus paub txhua yam thiab txaus hwm. Tiamsis tsis yog li ntawd. Nws tsuas yog lub siab nthuav tawm txoj kev zoo siab ntawm ib leej txiv xwb.

Peb yuav tau cia peb tus ntsujplig tsau tsawv rau hauv qhov tseeb no. Cia li nres, xav thiab txais yuav tej ntawd. Nyob ntawm ntus dej Yauladees xyoo ntawd, Vaj Leej Txiv tau nthuav tawm Nws txoj kev sib raug zoo nrog Tswv Yexus tsis yog ib txoj kev “sib cog lus” qhuav qhawv, muaj tej kevcai khi lossis ib cov kablig kevcai ntev ntev yuam kom yuav tau coj raws.

Txoj kev sib raug zoo ntawd yog kev sib txuas dawbhuv zoo li tsev neeg txheeb ze. Ntawd yog kev sib cog lus ciaj sia ntawm lub siab mus txog rau lub siab, thaum tus tsim lub ntuj no nws lees yuav Nws tus tub.

Txawm yog paub tias Vajtswv yog tus muaj hwjchim, dawbhuv thiab ncaj ncees los txoj kev chim txog kev ncaj ncees yeej tseem tos ntsoov cov neeg uas tsis txais tos Vajtswv txoj kev hlub, tiamsis qhov tseem ceeb uas Tswv Yexus xav nthuav tawm meej meej rau neeg ntiajteb yog: Vajtswv yog Leej Txiv puv npo kev hlub.
Peb pom tseeb qhov no thaum Nws nrhuav daim ntaub npog kev hlub tob tob tseg rau Vajtswv cov menyuam. Zoo kawg nkaus li, lub ntsiab lus ntawm Txojmoo Zoo nthuav tawm tias Vajtswv kuj qhib txoj kev sib raug zoo ntawd rau koj thiab kuv, ua rau koj muaj kev kaj siab tob tob hauv tus ntsujplig. Nws yog Leej Txiv, tshuav peb yog Nws cov tub cov ntxhais. Vajtswv hlub koj, txais yuav koj ua ntej koj yuav siv zog ua ib yam dabtsi twg rau Vajtswv, thiab Vajtswv yuav txaus siab hais tias koj yog Nws tug. Cia li so hauv Leej Txiv txoj kev hlub hnub no.

Thov caw nrog kuv peb thov Vajtswv ua ke: Leej Txiv saum ntuj, ua Vajtswv tsaug vim Koj yog Anpas, yog Leej Txiv uas hlub kuv. Txiv, ntau zaug kuv raug nqus rau hauv tej haujlwm nrog lub nra nyhav thiab tag nrho tej kev xav yuam kev kom kuv yuav tau ua yam no yam tod thiaj tsimnyog tau txais Vajtswv txoj kev hlub. Thov Txiv zam txim rau kuv txoj kev tsis ntseeg thiab tej kev txhawj hauv kuv lub siab. thaum no, thov Vaj Ntsujplig chwv rau kuv tus ntsujplig, pab kom kuv nkag siab thiab saj tau Txiv txoj kev hlub tseg rau kuv dhau ntawm Tswv Yexus. Thov kom Txiv tej lus qab zib yuav rub kuv tes, ntxiv zog rau kuv hla dhau tej kev sim siab rau txoj kev tom ntej. Kuv thov hauv Tswv Yexus Khetos lub npe, Amees.

Cov kwv tij txhua tus, tej uas peb ua tau hauv txoj kev ntseeg lossis tej kev siv zog npaj tsis yog tus tshim los ntsuas kom tau hlub. Vajtswv hlub koj vim Nws yog ib leej txiv siab ntev, hlub. Thaum koj ntseeg nws, koj tau nkag los rau hauv txoj kev sib raug zoo ntawd. Koj tau Vajtswv txais yuav, tiv thaiv thiab rub tes. Nyob hauv lub neej phomsij no yuav ntaus nqi koj dhau ntawm lub peev xwm lossis meej mom, cia siab tias koj yuav tseg lub siab los mloog Txiv hais: “Ntawm no yog tus tub uas kuv hlub, txaus kuv siab.” txhob khiav caum lub ntiajteb kom tau ntiajteb txais yuav tiamsis so hauv Leej Txiv saum ntuj txoj kev hlub uas tsis hloov pauv.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.