25.06 Amăn Jơ Krao Khan Rim Năr: HIÔK CHƠT KƠ ‘BĂ

Tơpă lăm chăl arih rim ‘nu lu bơ̆n, nơ̆r pơ-ư păng drơ̆ng iŏk đơ̆ng bơngai ‘bă ling lang jơ̆ minh tơdrong pran ưh kơ đei tôch, pơjing ăn tơdrong pơ̆n nuih păng chơ̆n hơđơ̆ng tơ lăm jơhngơ̆m. Kơplah mĭnh ‘nu bơngai ‘bă khan kơ kon sư: “’Bă lăp đon kơ kon!”- kon noh thoi lĕ đei tuh ăn pơthim jơhngơ̆m pran wă tơ’bưh hăm teh đak âu. A-lơ̆k dơ̆ng, ưh kơ đei tơdrong drơ̆ng iŏk noh pơm kơ bơ̆n mơn ‘biao lăm jơhngơ̆m, mĭnh tơdrong hơpơi mă ưh kơ băt anăn pơm kơ lu bơ̆n kơdâu kiơ̆ kơ lu tơmam apah tơ gah ‘nguaih to wă tơ’bôh kơdih akâu bơ̆n. Mălei ih ‘nĕ hăt kơ sơ’ngon, yua kơ lu bơ̆n oei đei ‘Bă Kơpal Plĕnh Ti. Bơngai ‘Bă noh ling lang sơng iŏk ih, ‘mêm kơ ih păng krao ih jơ̆ kon ‘mêm kơ-eng Sư – mă khan lu bơ̆n ưh kơ hơnhŏ đei tơdrong ‘mêm noh.

Năr ‘nâu, ‘năr 25/06/2026, tơdrong tơdă Amăn Jơ Krao Khan Rim Năr apinh wơ̆n lu bơ̆n wang mơ̆ng pơwao hơdai Nơ̆r Kră Yang hăm bơngai chih Louie Giglio hăm kơ̆l ‘bai: HIÔK CHƠT KƠ ‘BĂ

“Păng kư̆m đei nơ̆r pơma đơ̆ng plĕnh khan: “Âu boih Kon Inh mă ‘mêm kơeng tơpă, Inh lăp đon kơ Sư tôm tơdrong.” (Mathiơ 3:17)

“ Hlôi kơ Sư iŏk ‘batem bơih, lăp Sư iung đơ̆ng đak, na Sư ‘bôh hloi plĕnh tơpơih păng Yang Bơhngol ‘Lơ̆ng thoi sem kơtơp jur oei tơ Sư. Păng kư̆m đei nơ̆r pơma đơ̆ng plĕnh khan: “Âu bơih kon Inh mă ‘mêm kơeng tơpă, Inh lăp đon kơ Sư tôm tơdrong.” (Mathiơ 3:17)

Lăm trong yak năm hơdai Kră Yang, tơdrong ‘lơ̆ng păng jrŭ wei rong bơhngol lu bơ̆n noh jơ̆ tơdrong ‘mêm ‘Bă Kơpal Plĕnh. Tơdrong tơpă noh hloh kơ dôm tơdrong hlôh wao, đei tơ’bôh tơbang rơđah hloh kơplah Sư pơjing anih pơtao kơpal teh. Mĭnh lăm lu chăl blŭng- a lăm Sơ̆p Hla Bơar Nơ̆r ‘Bok Kei-Dei đei chhơ̆ tôm mah păng pơm kơ jơhngơ̆m gah tơdrong ‘Bok Kei-Dei pơm jing ‘Bă noh jơ̆ sơ̆p hla bơ-ar Mathiơ chăl 3, kơplah Yang Yêsu tơjur akâu kơdih năm tơ Yôhan wă pơm ‘batem.

Ih tơchĕng pơwao lăng tơdrong noh: Yôhan oei dơ̆ng tŏk-bŏk krong Jôrđăn đak dang kơtơh sư. Ao tanh păng sŏk lăk-đa hơ-iuh đĭ. Sư pơm ‘batem kơ lơ bơngai păng bơtho rah, pơm kơdranh păng hơmet trong ăn kơ Kră Yang.

Plĭnh, Kră yang Yêsu năm tơ sư păng khan: Ih pơm ‘batem kơ Inh bĕ. Yôhan dơrơ̆ng. Kơplah tơ’bưh hăm Tơ’ngla ‘lơ̆ng rơgoh, sư hăt hot khan: “Ih trŏ pơm kơ inh ‘batem, na Ih khan athei inh pơm kơ Ih liơ trŏ?” Yôhan mơn ưh kơ trŏ- mĭnh tơdrong ataih băl dêh sơlam bơngai yoch hăm ‘Bok Dŏng Pơklaih pơm kơ sư ‘nhrơ̆t ưh kơpơ̆n. Mălei đơ̆ng rŏng kơ pơma dơnuh hơdai, Yôhan chu pơm. Sư tơmôch Yang Yêsu lăm đak krong Jôrđăn na tơiung atŏk Sư. Yang Yêsu chu pơm ‘batem wă tơ’bôh Sư jing kon bơngai lăm tơdrong tơdă đơ̆ng ‘Bok Kei-Dei wă dŏng pơklaih kon bơngai, pơih ăn trong yak năm ‘lơ̆ng rơgoh ăn kơ kon bơngai, mă khan Sư jơ̆ ‘lơ̆ng rơgoh păng ưh kơ đei yoch kiơ.

Sơ̆p Hla Bơar Nơ̆r ‘Bok Kei-Dei đei chih khan đơ̆ng rŏng kơ Kră Yang Yêsu iung đơ̆ng đak, plĕnh tơpơih păng Yang Bơhngol ‘Lơ̆ng thoi sem kơtơp kôp kơpal Sư. Păng đei nơ̆r pơma re đơ̆ng plĕnh – nơ̆r pơma roi tơbăt hăm tơdrong hlĭch păng ‘lơ̆ng rŏ tơpă. Ih hăm băt nơ̆r noh khan kiơ ưh?

Nơ̆r pơma tơbăt noh pơm pơchah đĭ dôm tơdrong tơchĕng păng pơma ‘bơm lu bơngai akŭm jum dăr đak krong Jôrđăn năr ei. Lơ bơngai dơ̆ng jê̆ Yôhan băt rơđah bơih bơngai drŏnglo tơpêng jĭt sơnăm âu – Yêsu plei Nasaret. Lăm đon tơchĕng lu sư, Sư noh jơ̆ “kon Yôsep”, kon bơngai jang ‘long dơnuh hin. Sư arih lăm mĭnh pơlei ưh kơ ataih kơ noh. Rŏlăng lu sư oei ‘blŏk rup Sư oei pơm ngôi rok trong kơplah oei hơ‘lơ̆p sơ̆, tơdah mă ‘bôh Sư kơplah đĭ ‘lŏ tơ̆l bơih, mơ̆t lĕch tơhnam akŭm păng trong kơchơ̆.

Hlôi ko noh, đơ̆ng rŏng kơ Kră Yang Yêsu iŏk ‘batem, ‘Bok Kei-Dei tơ’bôh tơbăt hăm nơ̆r pơma re, hlĭch chrơp đơ̆ng kơpal plĕnh tơ anih noh. Sư đei khan tơdrong kiơ?

Noh hăm trŏ mĭnh nơ̆r jô̆-jŏk khăng, pơtrŭt kon bơngai athei pơm mă tĕnh tơdrong juăt khŭl lui? Tơdah mă noh jơ̆ tơdrong pơma bơtho jrŭ să, ataih atŏ gah tơdrong rơnŭk rơnoa lăm plĕnh teh? Tơdah mă mĭnh tơdrong apinh, dan hơgăt lăng Kră Yang Yêsu pơm kơ Sư lăp đon dang yơ?

Ưh ko thoi noh ôh.

‘Bok Kei-Dei đei khan: “ÂU BƠIH KON INH MĂ ‘MÊM KƠENG TƠPĂ, INH LĂP ĐON KƠ SƯ TÔM TƠDRONG!”

Dang lĕ Sư oei khan tơbăt ăn kơ jơ̆p jang teh đak khan: “Inh ‘Bok Kei-Dei, păng ‘nâu Kon ‘mêm kơeng Inh! Inh ‘mêm kơ Sư lơ tơpă. Inh lăp đon tôm tơdrong Sư.” Noh jơ̆ minh tơdrong hlĭch tơpă!

Tơdah ‘Bok Kei-Dei pơma re đơ̆ng kơpal plĕnh, lu bơ̆n juăt kơ tơchĕng khan Sư gô bơtho ăn mĭnh tơdrong tih, tơdah mă pơm kơ lu bơ̆n hlĭch gah tơdrong mơsêh mơyang Sư. Mălei ưh ôh. Noh jơ̆ mĭnh nơ̆r pơma đơ̆ng lăm jơhngơ̆m wă tơ’bôh tơdrong lăp đon tơpă đơ̆ng mĭnh ‘nu bơngai ‘Bă.

Lu bơ̆n kăl kơ bơhngol bơ̆n tơmôch kơlơ̆p lăm tơdrong tơpă âu. Athei dơ̆ng, tơchĕng pơwao păng sơng iŏk tơdrong noh. Tơ jih đak krong Jôrđăn sơ̆, ‘Bok Kei-Dei đei tơ’bôh tơdrong tơ’bưh Sư păng Yang Yêsu ưh kơ trŏ mĭnh “hlak hla bơ-ar pơkă pơkăm” ưh kơ gĭt kăl, lu tơdrong pơm pơkă đĕch, dah lu tơdrong khôi juăt kăl kơ pơm kiơ̆.

Tơdrong tơ’bưh noh jơ̆ tơdrong pơgơ̆p tih tin lăm hnam dơnŏ. Noh jơ̆ tơdrong tơ’bưh đơ̆ng jơhngơ̆m hăm jơhngơ̆m, kơplah Tơ’ngla Pơjing plĕnh teh tơbăt ăn đĭ đăng noh Kon Sư.

Mă băt bơih ră ‘Bok Kei-Dei jơ̆ Tơ’ngla mơsêh mơyang, ‘lơ̆ng rơgoh păng tơpăt, păng tơdrong sek tơlang tơpăt oei răp gô bơngai bu mă sơngah kơ tơdrong ‘mêm Sư, tơm tơdrong mă Kră Yang ‘maih wă pơdah tơ’bôh ăn kơ kon bơngai noh jơ̆: ‘Bok Kei-Dei jơ̆ bơngai ‘Bă ‘bĕnh blai tơdrong ‘mêm mơnat.

Lu bơ̆n ‘bôh kơnăl tơdrong noh kơplah Sư tơ’bôh tơdrong ‘mêm tih Sư ăn kơ Kon Sư. Mơsêh tơpă, tơdrong ‘Nao ‘Lơ̆ng đei tơbăt khan ‘Bok Kei-Dei dai pơih să tơdrong tơ’bưh noh ăn kơ ih hăm inh, chĕp ba kơ ih tơdrong chơ̆n hơđơ̆ng tơ anih jrŭ lăm jơhngơ̆m.
Sư jơ̆ ‘Bă, na lu bơ̆n jơ̆ lu kon drŏnglo păng drŏkăn Sư. Kră Yang ‘mêm kơ ih, sơng iŏk ih adrol kơ ih tam pơm mĭnh tơdrong kiơ ăn kơ Sư, păng Sư lăp đon tơbăt khan ih lăm Sư. Athei pơdơh lăm tơdrong ‘mêm ‘Bă năr âu.

Apĭnh đĭ đăng krao khan hơdai: Kơkuh kơ ‘Bă Kơpal Plĕnh ti mă ‘mêm kơ-eng kơ kon, bơnê kơ Ih yua kơ Ih jơ̆ Aba, jơ̆ khan ‘Bă mêm kơ kon. Ơ ‘Bă, lơ ‘măng kon đei druh kiơ̆ tơdrong jang, tơdrong trăp trĭn păng dôm lu tơchĕng ưh kơ ‘blep khan kon kăl kơ pơm tơdrong âu, tơdrong to ‘mơ̆i na trŏ kơ đei tơdrong ‘mêm Ih. Apinh Ih mơnat ăn kơ đon lui kơ’bah păng dôm hli hlơt lăm jơhngơ̆m kon. Jơ ‘nâu, apinh Yang Bơhngol ‘Lơ̆ng bơ̆jang lăm bơhngol kon, ăn kơ kon gơh hlôh păng mơn tơdrong ‘mêm ưh kơ kăl pơm plơ̆ ăn, mă Ih ‘măn ăn kơ kon đơ̆ng Yang Yêsu. Apinh hơpơi nơ̆r pơma rơngơp Ih tơ-iung kon, tuh ăn jơhngơ̆m pran kơ kon wă yak hlôi đơ̆ng dôm tơdrong pơlong lăng tơ anăp. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơeng, dôm tơdrong anăn lăm tơdrong lui tơdah mă dôm tơdrong adrin đĭ jơhngơ̆m ưh kơ sĭ kơ tơmam pơtŏ wă kơ gơh ‘mêm ôh. Kră Yang ‘mêm kơ ih yua kơ Sư jơ̆ mĭnh ‘nu bơngai ‘Bă iơ̆m dim, ‘mêm mơnat. Kơplah ih drơ̆ng dan tơdrong lui ih tơ Kră Yang, ih đei mơ̆t lăm tơdrong tơ’bưh jrŭ tih noh. Ih đei Sư sơng iŏk, bơwei păng sơng glơng. Tŏk bŏk tơdrong arih pơmat hrơ̆ng hreng ling lang jô̆ ih gơh hơgei dah pơm yŏng, hơpơi kơ ih pơđêng jơhngơ̆m păng mơ̆ng nơ̆r ‘Bă pơma: “Âu bơih kon Inh mă ‘mêm kơeng tơpă, Inh lăp đon kơ Sư tôm tơdrong.” Pơdơh bĕ đơ̆ng kơdâu kiơ̆ tơdrong drơ̆ng iŏk tơ ala teh âu, păng pơdơh lăm tơdrong ‘mêm ‘Bă Kơpal Plĕnh Ti ưh kơ tơplih.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.