Đei layơ ih tang lê̆ ‘măng anih phŏng, hơoei hrĕp hreh lăm măng mu păng đei kơnam kơdih kâu yua kơ đei pơma hil hăm kon kơplah gơsơ̆? Lu bơ̆n ngăl yak lăm tơdrong jang pơm mĕ ‘bă hăm lơ tơdrong chang hơmĕng, mă lei ră đei tơ’bơ̆p hăm tơdrong tơpă khan kơdih kâu kŭm jơ̆ dôm lu bơngai kon ‘bĕnh tơdrong ưh tim mă ‘lơ̆ng tôm. Lu bơ̆n ngăl đei hiơ̆k bơngơ̆t athei pơm minh ‘nu bơngai ‘bă ‘lơ̆ng tơpăt, minh anih gơnang ưh kơ đei tơdrong kơnê̆ kiơ. Mă lei tơpă jơ̆, ưh kơ đei lăm anih hnam trưng ayơ bơtho lu bơ̆n pơm ‘bă hloi. Dah ih kŭm oei chĕp ba minh tơdrong ưh kơ tơproh ‘lơ̆ng thoi noh, lei năr ‘nâu, lu bơ̆n athei hơdai dan dôm tơdrong pŭ trăp noh jur ala jơ̆ng Kră Yang jơ̆ ‘Bă Kơpal Plĕnh ‘lơ̆ng tôm, Tơ’ngla đei mah mai tơdrong mơsêh mơyang wă chông anhăk ih lăm trong yak năm pơmat tat ‘nâu.

Năr ‘nâu, ‘năr 26/06/2026, tơdrong tơdă Amăn Jơ Krao Khan Rim Năr apinh wơ̆n lu bơ̆n wang mơ̆ng pơwao hơdai Nơ̆r Kră Yang hăm bơngai chih Martha Noebel hăm kơ̆l ‘bai LU BƠNGAI ‘BĂ HUAY KƠ HIƠ̆K BƠNGƠ̆T

“Thoi ‘bă ‘mêm kơ kon hơ’lơ̆p sư dang yơ. Kră Yang ‘mêm kơ lu bơngai bu mă hli yom kơ Sư dang noh mơ̆n.” (Hơriso 103:13)

“Yua kơ plĕnh kơjung đơ̆ng teh dang yơ. Na tơdrong ‘mêm sư dang noh mơ̆n, kơ lu bơngai bu mă hli yom kơ Sư. Gah hơlĕch ataih đơ̆ng gah bơmơ̆t dang yơ, Na Sư kư̆m hŭt lê̆ dôm yoch glăi lu bơ̆n ataih dang noh mơ̆n. Thoi ‘bă ‘mêm kơ kon hơ’lơ̆p sư dang yơ. Kră Yang ‘mêm kơ lu bơngai bu mă hli yom kơ Sư dang noh mơ̆n.” (Hơriso 103:11-13)

Dôm lu bơngai ‘bă kơpal teh đak ‘nâu đei lei lăi thoi minh “tơdrong bơ̆jang ưh tim mă keh”- ưh kơ đei minh ‘nu bu ‘lơ̆ng tôm, mă khan hơya minh ‘nu bơngai. Mă khan kơplah kon kơdră inh đei 33 sơnăm, inh oei mơn đei jrŭ să tơdrong ‘noh. Inh đơ̆ng đei krao khan apinh Kră Yang ‘măn ăn kơ kon drŏkăn inh jơhngơ̆m kĕ chơ̆n tôm mah, yua kơ inh ling lang iŏk kon wă…..bơ̆jang tơdrong jang pơm ‘bă.

Tơdrong bơtho kon đơ̆ng inh juăt jơ̆ “pơlong lăng păng glăi” (mă trŏ kơ kon inh gô khan jơ̆ “pơlong lăng păng hli tơrơ”!). Inh ling lang jet kơdih: “Inh hăm đei pơm anat dêh ưh?” dah “Inh gơh proh hơmet lăm tơdrong gơret dêh păng tơdrong hiôk chơt ưh?”

‘Lơ̆ng tơpă, ‘Bok Kei-Dei đei tuh tơ’bĕnh dôm anih rơhông đơ̆ng tơdrong ưh kơ tôm mah lăm inh. Tơdrong mơnat ăn đĕch Sư đei jing tơmam tơ‘bưh hơdai tơdrong pơgơ̆p lăm hnam dơnŏ. Trŏ yua kơ băt kơdih jơ̆ minh ‘nu bơngai ‘bă ala teh ‘nâu ‘bĕnh tơdrong huay kơ hiơ̆k bơngơ̆t, inh rai kăl kơ mơ̆ng gơnang anih ‘Bă kơpal plĕnh hloh kơ layơ.

Yang Yêsu đei roi hơ’mon ‘nâu:

“Minh ‘nu bơngai đei ‘bar ‘nu kon drŏ-nglo. Kon hơdruch apinh ‘bă sư: ‘Klah asong mŭk tơmam kơ inh bĕ ‘bă.’ Thoi noh ‘bă sư klah asong mŭk tơmam kơ bre sư.” (Luka 15:11-12)

Tơdrong pŭ trăp đơ̆ng tơdrong jang wei rong bơtho ‘bar ‘nu kon hăm jơhngơ̆m đei phara băl ưh kơ đei layơ jơ̆ tơdrong ‘bônh. Na lăm minh năr ei, bơngai ‘bă noh đei dơ̆ng ‘bơ̆t anăp ‘bai anat kơ wă đei nơ̆r tơl: tơ’bơ̆p hăm tơdrong athei ‘bĕnh tơdrong hăt hot đơ̆ng kon drŏnglo hơdruch. Sư đei pơdrơ̆ng klah asong mŭk tơmam kơ ‘bar ‘nu, mă băt hơđăl rŏ lăng lu kon oei ưh tim mă wă sơng iŏk. Bơngai ŏh đơ̆ng rŏng noh đei pơhuach đĭ đăng, na bơngai ‘nhŏng đei huŏng lăm tơdrong pôk pơư kơdih, pơang khan sư ‘lơ̆ng. Dôm tơdrong tơchĕng noh jơ̆ minh tơdrong yoch glăi dêh lăm tơdrong bơtho kon, mă lei tă kơ, ‘Bok Kei-Dei đei yua trŏ tơdrong truh ‘noh wă ba kon drŏnglo hơdruch wih brŏk. Dôm lu bơngai ‘bă huay kơ hiơ̆k bơngơ̆t athei hŏk iŏk trong lui gơnang kơ Kră Yang, yua kơ Sư ling lang đei trong wă pơkeh tơdrong tơdă ‘lơ̆ng tôm đơ̆ng Sư.

“Yua kơ kon drŏ-nglo pơm kơnê̆ kơ ‘bă …. Mă-lei gah inh, inh gô lăng Kră Yang, chang gô ‘Bok Kei-Dei Tơ’ngla dŏng pơklaih inh; ‘Bok Kei-Dei Kră Yang gô mơ̆ng nơ̆r inh.” (Mika 7:6-7)

Ih hăm đei mơn ‘bôh hloh kơ jơhngơ̆m kĕ hăm tơdrong jang pơm ‘bă ưh?Tơdrong ‘mêm mơnat păng chông anhăk kon hơ’lơ̆p rim năr tơpă đei tơhiong lơ jơhngơ̆m pran hloh kơ lu bơ̆n tơchĕng lơ tơpă. Đei minh tơdrong tơpă khan: lu bơ̆n ưh kơ gơh pơm thoi yơ gơh pơkeh ‘lơ̆ng tơdrong jang ‘nâu dah ưh kơ pơhrăm iŏk đơ̆ng Tơ’ngla ‘Lơ̆ng Hloh. Dah yak kơdih, inh rŏ lăng gơh hơgei hloh kơ dôm ‘nu bơngai nai; mă lei kơplah đei dôm lu ‘nhŏng mŏ oh hơdai đon lui yak năm hơdai, ih gô jing minh ‘nu bơngai ‘bă gơh hơgei hloh. ‘Nĕ kơ mơlŏu pơtơm thim bơngai ‘bă na hơdai năm huch kaphê, hơdai pơih Sơ̆p Hla Bơar Nơ̆r ‘Bok Kei-Dei păng klah asong dôm tơdrong hlôi tơ’bơ̆p bơtho kon hơ’lơ̆p. Athei jơ̆ bơngai yơ̆r ti blŭng a tơ’bôh dôm tơdrong sơ’ngon, hiơ̆k bơngơ̆t lăm jơhngơ̆m kơdih. Yua kơ tuch luch, dôm lu bơngai ‘bă ưh tim mă ‘lơ̆ng tôm trŏ jơ̆ dôm lu bơngai thây bơtho dih băl ‘lơ̆ng hloh.

Adrol hloh, dôm lu bơngai ‘bă kơpal teh đak ‘bĕnh tơdrong ưh tim mă ‘lơ̆ng tôm thoi lu bơ̆n kăl kơ gơnang anih ‘Bă Kơpal Plĕnh tôm mah. Sư gĭt kơ rim tơdrong adrin iĕ ioch đơ̆ng lu bơ̆n, wă pơm jing dôm tơdrong hlĭch chrơp kiơ̆ kơ Sư wă. Sư gơh yua kơdih dôm tơdrong yoch glăi wă bơtho lu bơ̆n băt chu iŏk đon ala, păng yua tơdrong rơdu đơ̆ng lu bơ̆n wă tơ’bôh tơdrong mơsêh mơyang kĕ jei đơ̆ng Sư.
Tơdrong huay kơ hiơ̆k bơngơ̆t ưh kơ trŏ jơ̆ yua kơ đơ̆ng noh wă kơ lu bơ̆n drơ̆ng iŏk pơdơh. Pơm mĕ ‘bă jơ̆ minh trong yak năm pơhrăm iŏk ưh kơ pơdơh: pơhrăm tơdrong pĭnh kon huay kơ jô̆ yo, pơhrăm hơdai hăm kon krao khan păng pơhrăm hloi tơdrong hiôk chơt hơdai păng kon. Kơplah đĭ jơhngơ̆m tơ’bơ̆p hăm dôm lu tơdrong hli tơrơ păng dôm tơdrong ưh kơ hiôk lăm jơhngơ̆m, lu bơ̆n oei pơih ăn minh anih tơ’bưh ‘bĕnh ‘mêm mơnat lăm hnam dơnŏ. Minh ‘nu bơngai ‘bă lăp ưh kơ đei kĕ jei tơpă kơplah achăng lê̆, mă lei gô kĕ jei kơplah adrin hơdai hăm kon păng gơnang anih ‘Bok Krist. Tơdrong jang pơm ‘bă ưh kơ ‘măn kơ dôm lu bơhngol ‘bônh kơ bơ̆l hăl, mă lei ‘măn kơ dôm lu bơhngol lui gơnang, gô pơtrơp gơnang hloi kơ Kră Yang rim năr.

“Thoi ‘bă ‘mêm kơ kon hơ’lơ̆p sư dang yơ. Kră Yang ‘mêm kơ lu bơngai bu mă hli yom kơ Sư dang noh mơ̆n.” (Hơriso 103:13)

Apĭnh đĭ đăng krao khan hơdai: Kơkuh kơ Kră Yang jơ̆ ‘Bă ‘mêm mơnat, kon bơnê kơ Ih yua kơ tơdrong mơnat ăn đĕch gơh krao Ih jơ̆ ‘Bă, păng gơh Ih lui ngeh pơjao tơdrong jang pơm ‘bă ala teh đak ‘nâu. Apinh bơwei kon ling lang oei lăm tơdrong ‘mêm mơnat păng tơdrong mơnat ăn đĕch tôm mah đơ̆ng Ih rim năr. Apinh tuh tơ’bĕnh jơhngơ̆m kon tơdrong iơ̆m dim wă kơ kon băt chu iŏk đon ala ‘bơ̆t anăp dôm tơdrong yoch glăi, păng ăn kơ kon tơdrong gơh hơgei wă chông anhăk hnam dơnŏ yak kiơ̆ trong Ih. Apinh bơtho kon băt kơ klah asong tôm mah dôm tơdrong gĭt bơhngol gĭt kăl kơ lu kon hơ’lơ̆p kon, ưh kơ hăm nơ̆r pơma đĕch mă lei hăm kơdih tơdrong arih tơplih ‘nao đơ̆ng kon. Apinh ăn kơ kon băt kĕ chơ̆n yak hơdai păng ling lang jơ̆ pơgơ̆p ba lu kon năm jê̆ Ih hloh. Mă khan kon oei lơ tơdrong ưh tim mă ‘lơ̆ng tôm, wă kơ đơ̆ng chăl arih kon, lu kon hơ’lơ̆p kon gơh lăng ‘bôh tơdrong ‘mêm ưh kơ tôch đơ̆ng kơdih Ih.
Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, kon hơ’lơ̆p ưh kơ kăl minh ‘nu bơngai ‘bă “mơsêh” ưh kơ đei layơ yoch glăi. Tơdrong kon kăl jơ̆ minh ‘nu bơngai ‘bă hăm sĕch akar, băt kơ drơ̆ng glăi kơplah kơdih glăi păng băt sơtơ̆p kŭl tăng krao khan hăm Kră Yang kơplah ưh kơ băt pơm thoi yơ. ‘Nĕ kơ bơ̆l hăl kơplah ih ‘bôh kơdih ưh tim mă ‘lơ̆ng tôm, yua kơ lu bơ̆n đei minh ‘nu bơngai ‘Bă kơpal plĕnh ling lang gô ‘mong ăn hloi dôm kơ ưh kơ tôm mah hăm tơdrong ‘mêm mơnat ling lang. Hơpơi tơdrong tơbăt năr ‘nâu gô pơthim ăn jơhngơ̆m pran wă kơ ih pơtrơp kĕ chơ̆n hơdai hăm kon, lăm tơdrong minh jơhngơ̆m minh đon hăm ‘Bok Krist. Hơkat pŭn hiôk kơ ih hăm hnam dơnŏ đei minh năr plơ̆ng ‘bĕnh blai tơdrong hiôk hian, păng hlôi mơn đei tơpang ti ‘mêm mơnat đơ̆ng ‘Bă Kơpal Plĕnh oei kuăr iŏk kơdih tơdrong arih ih.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.