Muaj ib qho uas zoo li txawv thiab xav tsis thoob nyob rau ntawm peb tus kheej: Peb txhua tus yeej ntseeg ruaj khov kho tias Vaj Tswv yeej muaj fwjchim cawm tau peb sab ntsuj plig dim ntawm lub pas hluav taws uas cig mus ib txhis, tabsis peb ho tsis kam ntseeg ruaj khov kho tias Vaj Tswv muaj txaus peev xwm los mus ua Tus Tswv kav thiab tswj peb tej teeb meem nyiaj txiag, txoj kev tu tub tu kiv lossis tej kev txhawj xeeb rau tag kis. Vim li cas peb tau tshaj tawm tias peb twb tau ywj pheej hauv Tus Tswv Yexus Khetos tabsis peb lub siab tseem raug kaw rau hauv tej kev txhawj kev ntshai, kev ntxhov siab hauv lub neej? Tej ntawm no yuav yog lo lus teb rau koj: Peb txaus siab txais yuav Tus Tswv Yexus los rau hauv peb lub neej kom peb txais tau txoj kev cawm dim, tej zaum tsis tau zoo siab hlo txais Vaj Tswv los ua Tus Tswv Kav peb lub neej txhua hnub. Peb lees txais Tus Tswv Yexus Khetos los ua peb Tus Tswv Cawm Seej tabsis peb tseem tsis tau muab Nws ua tus Tswv kav peb lub neej tiag tiag.

Hnub no, yog hnub 27/06/2026, peb kev thov Vaj Tswv Txhua Hnub thov caw koj los nrog peb sib cog kawm Vaj Tswv Txoj Lus ua ke dhau los ntawm Mariel Davenport muaj lub ntsiab lus LEEJTWG TAB TOM UA TUS TSWV HAUV KOJ LUB NEEJ?

“Nej cov uas Yexus Khetos hu los koom ua ib lub cev, nej yuav tsum cia Yexus Khetos txojkev ncaj ncees coj nej lub neej” (Khaulauxais 3:15).

“Nej cov uas Yexus Khetos hu los koom ua ib lub cev, nej yuav tsum cia Yexus Khetos txojkev ncaj ncees coj nej lub neej. Nej yuav tsum niaj hnub ua Vajtswv tsaug. Nej yuav tsum khaws Yexus Khetos tej lus huv tibsi cia rau hauv nej lub siab. Nej ib tug yuav tsum ua tib zoo qhia ib tug, thiab ib tug ntuas ib tug tsis txhob lam tau lam hais li tej neeg uas tsis muaj tswvyim. Thaum nej hu nkauj, tsis hais tej nkauj uas Daviv sau lossis tej nkauj qhuas Vajtswv lossis tej nkauj uas cov ntseeg ibtxwm hu qhuas Vajtswv, nej yuav tsum zoo siab hlo ua Vajtswv tsaug. Txhua yam uas nej ua, nej yuav tsum ua kom tsimnyog qhov uas nej yog cov ntseeg tus Tswv Yexus. Nej cov uas ntseeg Yexus, nej cia li ua Vajtswv tus uas yog peb leej txiv tsaug” (Khaulauxais 3:15-17).

Kuv tau ntsib Tus Tswv Cawm Seej Yexus thaum uas kuv tseem hluas hluas, kuv yeej paub tseeb tias kuv xav tau Tus Tswv npaum li cas. Hnub uas Tus Tswv nrhiav tau kuv, kuv tab tom tsau tsawv, ua tsis taus pa hauv kuv tej kev txhoj kev txhaum uas tab tom nrhuav tshem kom kuv lub neej puas tshuaj mus. Twb yog vim li ntawd, kuv txawm pom tias kuv tus ntsuj plig tab tom poob rau txoj kev uas tsis muaj kev cia siab thiab ntshaw kom tau Vaj Tswv txoj kev cawm dim npaum li cas.
Tabsis tsis ntev los no, thaum thaum kuv tab tom kawm Vajlugkub, kuv rov pom ib qho tseeb uas kuv twb paub lawm ntev los lawm, tabsis kuv yeej tsis tau tseg lub sijhawm los mus saib thiab ua tib zoo xav qhov ntawd npaum li zaum no.

Ntawd yog Tes Hauj Lwm 2:36: “Yog li ntawd cov Yixalayees, nej sawvdaws yuav tsum paub hais tias tus Yexus uas nej muab ntsia rau saum ntoo khaublig, yog tus uas Vajtswv tsa ua tus Tswv thiab ua tus Mexiyas lawm.”

Nqe Vajlugkub ntawm no qhia rau peb paub txog ib qho tseem ceeb heev: Tus Tswv Yexus nqis los tsis yog tsuas los cawm kom peb dim ntawm txoj kev puas tshuaj sab kev txhaum xwb – txawm tias qhov ntawv yeej yog ib txoj koob hmoov uas loj kawg nkaus. Tus Tswv Yexus yog Tus Tswv Cawm Seej, Tus Tswv Mexiyas tau ywg roj los cawm kom peb dim ntawm tus yam ntxwv sab cev nqaij daim tawv thiab txoj kev ntshaw nyob rau hauv peb lub siab. Tabsis Tus Tswv nqis los yog vim ib lub hom phiaj loj dua qhoav ntawd thiab… Yog Nws los ua peb Tus Tswv.
Raws li hauv lus Kilis (Greek) txwm ntawv uas tau siv ntawm no yog “kyrios” muaj lub ntsiab hais tias Vaj Tswv, yog Tus Tswv Kav. Tus Tswv Tsim tsis yog txib Nws Leej Tub los cawm ib puas tsav yam uas tau poob rau txoj kev puas tshuaj xwb, tiamsis tseem yog los mus tsim txoj cai lub hwjchim los kav ib puas tsav yam ntawd. Tus Tswv nqis los yog los ua Tus Tswv Kav thiab ua Tus Tswv rau txhua lub kaum uas tob tshaj plaws ntawm peb lub neej.

Lo lus nug rau peb: Peb puas tau txaus siab thiab zoo siab hlo muab muab txhua feem ntawm peb lub neej rau Tus Tswv Yexus Khetos los tseem tsis tau?

Tseeb tiag, muaj qee yam hauv kuv lub neej uas kuv zoo siab heev thiab ua Vajtswv tsaug uas kuv cia Yexus tus Cawmseej ua Tus Tswv kav. Xws li kev qhuab qhia tu menyuam, kuv txaus siab muab txhua yam rau Tus Tswv ua Tus kav thiab tswj. Kuv paub meej tias yog tsis muaj Nws, kuv yeej ua tsis tau txoj hauj lwm ntawd. Muaj ntau zaus kuv los cuag Nws hauv kev thov Vajtswv, kuv tau Vaj Tswv qhia tias, yog Vaj Tswv Nws hu kuv los ua lub meej mom ntawm ib leej niam. Kuv taij thov Vaj Tswv foom koob hmoov zoo kom kuv paub qhuab qhia tej me nyuam raws li Vaj Tswv Koj txoj hau kev, vim kuv paub tseeb tias kuv tus kheej yeej raug swb lawm ntau heev. Paub tias Tus Tswv Yexus Koj los ua Tus Tswv kav rau txoj kev tu tub tu kiv ces kuv lub siab cia li hnov muaj kev kaj siab, muaj kev thaj yeeb thiab ua Vaj Tswv tsaug kawg nkaus.

Tabsis muab los hais tseeb tiag ces muaj ntau feem hauv kuv lub neej tseem zais cia rau kuv tus kheej, tsis xav muab rau Tus Tswv ua tus tswj. Kuv siv zog tuav “ua tus tswj” ntawm kuv siab qia dub. Tej qhov kaum no pheej yog zais kuv tej xav hauv lub ntiaj teb. Yeej tsis muaj leej twg paub tias kuv tab tom tsis lees txais thiab muab rau Vaj Tswv, tsuas yog Vaj Tswv tib leeg xwb thiaj paub. Tseeb tiag Vaj Tswv yeej paub meej txhua yam hauv kuv lub neej.

Muaj ntau qhov chaw tob kawg nkaus hauv kluv lub neej uas kuv ntshai tsis kam muab rau Vaj Tswv. Kuv txoj kev xav ntawm sab nqaij tawv pheej txhawj xeeb: “Xyov Vaj Tswv puas kom kuv ua dab tsi thaum uas muab rau Nws lawm? Vaj Tswv puas yuav tshem kuv txoj kev txiav txim tawm ntawm kuv mus?”

Tsis ntev los no, Vaj Tswv tau ceeb toom rau kuv txog ib qho kev tseeb uas qab zib tshaj: Qhov twg muaj Vaj Tswv ua Tus Tswv kav ces qhov ntawd muaj txoj kev thaj yeeb.

Zoo ib yam li Vaj Tswv Txoj Lus tau sau hauv Khaulauxais 3:15: “Nej cov uas Yexus Khetos hu los koom ua ib lub cev, nej yuav tsum cia Yexus Khetos txojkev ncaj ncees coj nej lub neej”.

Vajtswv txoj cai kav yeej ib txwm coj kev thaj yeeb tiag tiag los. Nws tau qhib kuv lub qhov muag kom pom ib qho tseeb tias: yog muaj ib feem twg hauv kuv lub siab lossis hauv kuv lub neej uas tseem tsis muaj kev thaj yeeb, ces qhov ntawd yog qhov uas kuv tseem tsis tau cia Nws ua Tus Tswv kav.

Tej yam uas ua rau kuv niaj hnub tawm tsam rau hauv txoj kev txhawj xeeb tsis muaj kev thaj yeeb, tsis paub yuav ua li cas thaum uas muaj txoj kev txiav txim siab lossis rau hauv tej kev xav, tej qhov ntawv yog tej uas kuv yuav tsum muab fij rau Vaj Tswv tam sim no ntag. Thaum uas rau siab los mus tswj, npaj thiab ua txhua yam raws li yus lub siab xav ces yus haj yam yuav ua poob txoj kev thaj yeeb uas Vaj Tswv pub.

Txoj kev sim siab yeej tseem yuav los, thiab txoj kev nyuaj siab yog qhov uas yuav khiav tsis dhau hauv lub neej no. Tabsis muaj ib txoj kev thaj yeeb uas loj dav dua tib neeg txoj kev to taub. Ntawd yog txoj kev thaj yeeb uas koj thiab kuv puav leej tau ntsib rau txhua txhia yam hauv lub neej – los ntawm kev qhua qhia me nyuam, hauv lub neej txij nkawm, chaw ua haujlwm, sab nraum zoov mus rau txhua txoj kev sib raug zoo ib ncig ntawm yus tus kheej.

Thaum uas kuv cia kuv tus kheej ua tus tswv kav kuv txoj kev xav thiab kav liam cia nws khiav mus raws li tej kev xav tsis zoo ces txoj kev tsis sib haum xeeb thiab kev tawm tsam yuav teeb tau los ua tus tswv kav thiab tswj ntawm koj lub neej. Tabsis thaum uas kuv lub siab lub ntsws thiab kuv txoj kev xav fij tag nrho rau Vaj Tswv ces txoj kev thaj yeeb yuav los ua tus tswv kav txawm yog thaum kuv lub neej yuav nyob rau lub sijhawm uas tsaus ntuj nti.

Thov caw nrog kuv peb thov Vajtswv ua ke: Vaj Tswv uas yog peb Leej Txiv hlub tshua, yog Tus Tswv Cawm Seej thiab yog tib Tus Tswv kav nyuam yaus lub neej! Nyuam yaus ua Koj tsaug vim Koj tau nrhiav tau nyuam yaus thaum uas tab tom tsau tsawv rau txoj kev kev txhaum. Tabsis Vajtswv aw, thov Koj zam lub txim rau nyuam yaus vim tias nyuam yaus lub neej tseem tsis tau muaj kev thaj yeeb vim yog nyuam yaus txoj kev tsis ncaj ncees thiab tseem xav ua tus tswj nyuam yaus lub neej. Nyuam yaus tseem zais ntshis txhua yam rau hauv txoj kev xav, tsis xav cia Koj los ua tus tswv tswj txhua yam txhua feem. Hnub no nyuam yaus txo hwjchim los mus fij thiab muab txoj kev tswj tag nrho rau Vajtswv txhais tes. Thov txoj kev yeeb ntawm Vajtswv uas hla dhau nyuam yaus txoj kev to taub yuav tswj thiab kav tag nrho nyuam yaus lub siba lub ntsws, txawm yog yuav nyob rau txoj kev nyuaj siab thiab txhawj xeeb npaum li cas los xij. Nyuam yaus koom siab ntawm Tus Tswv Yexus Khetos lub npe, Amees.

Tus phooj ywg ua hlub thiab tshua, tej zaum lub sijhawm no, koj tab tom ntsib ntau yam kev nyuaj siab, kev ntxhov siab thiab ntau txoj kev sim siab. Txawm yog li ntawd los, thov kom koj nco ntsoov tias Vaj Tswv tau txib Nws Leej Tub nqis los, yog los ua Tus Tswv tswj thiab kav txhua yam hauv koj lub neej raws li Nws txoj hau kev. Hnub no kuv thov kom koj muab koj txoj kev xav, thiab kuv zoo siab los mus muab txhua yam uas tab tom tswj kav koj lub neej fij rau Vaj Tswv, kom koj yuav paub txoj Vaj Tswv txoj kev thaj yeeb uas zoo kawg nkaus uas Vaj Tswv tau cog lus tseg yuav muab rau koj.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.