Đei tơdrong tơplơ̆ thoi âu: lu bơ̆n lui ngeh kơ Kră Yang đei tơdrong mơsêh dŏng iŏk bơhngol đơ̆ng dơnâu ŭnh đei ling lang, mă lei ưh kơ pơ̆n lui ngeh kơ Kră Yang Sư gơh pơgơ̆r hiơ̆k bơngơ̆t kơ jên tơmam, tơdrong bơtho kon hơ’lơ̆p dah tơdrong pŭ trăp năr dơning. Yua kơ kiơ lu bơ̆n roi tơ’băt bơ̆n đei rơngei lăm Yang Yêsu Krist, mălei jơhngơ̆m đon oei chô̆ pơkơ̆ng lăm lơ tơdrong ưh kơ hơđơ̆ng, tơsŭl tơwŏk? Rŏlăng ‘nâu jơ̆ nơ̆r tơl: lu bơ̆n lăp đon sơng iŏk Kră Yang mơ̆t lăm chăl arih wă kơ đei tơdrong dŏng pơklaih, mă ưh tam mă pơih jơhngơ̆m ăn kơ Sư jing Tơ’ngla pơgơ̆r rim năr. Lu bơ̆n pơma khan Sư jơ̆ Kră Yang dŏng pơklaih, mălei tam mă đei layơ pôk pơ-ư Sư jing Tơ’ngla chăl arih bơ̆n.

Năr ‘nâu năr 27/06/2026, tơdrong tơdă Amăn Jơ Krao Khan Rim Năr krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Mariel Davenport kơ̆l ‘bai BU OEI PƠGƠ̆R LĂM CHĂL ARIH BUĂL?

“Yêsu Krist ăn kơ bơ̆n hiôk hơiă dih băl, na bơ̆n athei adrin kiơ̆ thoi noh…” (Kôlôssê 3:15)

“Yêsu Krist ăn kơ bơ̆n hiôk hơiă dih băl, na bơ̆n athei adrin kiơ̆ thoi noh, yua kơ ‘Bok Kei-Dei rơih iŏk bơ̆n wă kơ bơ̆n pôm đon. Păng ling-lang ‘nĕ kơ hiơt pơma bơnê kơ ‘Bok Kei-Dei. Bơ̆n athei pơm kiơ̆ dôm nơ̆r Yêsu Krist ling-lang wă kơ bơ̆n bơtho dih băl hơgei ‘blep trŏ thoi Sư wă. Mă tơdrong hơri kư̆m lei-lăi wă kơ bơtho dih băl tơdrong Sư, wă kơ bơ̆n hơri bơnê kơ ‘Bok Kei-Dei, mă hơri tơdrong kră sơ̆, mă hơri tơdrong lu bơngai dang ei, mă hơri kiơ̆ kơ đon bơ̆n tơchĕng, mă tôm kơ tơdrong hơri nai wă kơ bơ̆n hơri bơnê kơ ‘Bok Kei-Dei ngăl. Mă dôm tơdrong kiơ kiơ bơ̆n wă pơma dah wă jang, bơ̆n athei pơma pơjao kơ Kră Yang Yêsu hăm gơnang kơ Sư wă bơnê kơ ‘Bă tơm bơ̆n ‘Bok Kei-Dei.” (Kôlôssê 3:15-17)

Đei tơ’bơ̆p Yang Yêsu đơ̆ng khei sơnăm oei ‘lơ̆p, inh băt inh kăl kơ Sư truh tơ dang yơ. Lăm năr Sư chă ‘bôh inh, inh oei lăm tơdrong yoch hiong răm kơdih akâu. Yua kơ thoi noh, inh mơn băt kơdih hloi, bơhngol inh oei sơ’ngon păng rơhing wă kơ đei dŏng pơklaih đơ̆ng Sư dêh.

Mălei brei mơsơ̆ ‘nâu, kơplah oei pơhrăm nơ̆r ‘Bok Kei-Dei, inh đei tơ’bơ̆p tơdrong tơpă tơpăt mă inh dai đêl băt bơih, mă tam mă đei layơ kơnhăm păng tơchĕng jrŭ truh tơ thoi noh.

Noh jơ̆ lăm Tơdrong Jang 2:36: “Inh wă kơ đĭ-đăng bơngai Isơrael băt mă nhên: Yêsu mă iĕm pơ̆ng pơlôch tơ ‘long pơglang, Sư boih ‘Bok Kei-Dei ăn pơm Yŏng bơ̆n păng ‘Bok Krist mă pơgơ̆r bơ̆n kư̆m Sư mơ̆n.”

Nơ̆r ‘Bok Kei-Dei ‘nâu tơ’bôh tơdrong ‘lơ̆ng tơpăt kăl tơpă: Kră Yang jur ưh kơsĭ hơdrô̆ dŏng iŏk lu bơ̆n đơ̆ng hiong răm lăm tơdrong yoch đĕch ôh – mă khan tơdrong noh đei đơ̆ng tơdrong ‘mêm tih. Sư jơ̆ ‘Bok Krist, ‘Bok Mêsi đei tuh pơgang rơmă wă dŏng iŏk lu bơ̆n đơ̆ng sĕch akar păng dôm tơdrong ‘maih wă đơ̆ng lăm jơhngơ̆m. Na Sư kư̆m jur yua kơ kơnhăm kăl hloh kơ noh dơ̆ng … Sư jur wă jing Yang kơ lu bơ̆n.

Lăm nơ̆r Grek, nơ̆r đei yua noh jơ̆ kyrios, wă khan Yang, Pơgơ̆r. Tơ’ngla pơjing ưh kơsĭ wơh Kon Sư jur wă dŏng iŏk dôm lu tơmam hiong răm, na wă pơjing ming tơdrong pơgơ̆r đĭ đăng tơmam. Sư jur wă jing pơm Yŏng păng Yang kơ đĭ đăng dôm lu tơdrong hlơp lăm chăl arih lu bơ̆n.

Nơ̆r jet dan ăn kơ rim ‘nu lu bơ̆n noh jơ̆: lu bơ̆n hăm đei pơjao dôm tơdrong arih kơdih ăn kơ Kră Yang dah ưh?

Mă tơpă, đei dôm lu tơdrong inh lăp đon păng băt bơnê kơ Yang Yêsu jing Yŏng Tơ’ngla. Pơtih gia thoi kơ bơtho kon, inh drơ̆ng chu yom ăn kơ Kră Yang jing Yŏng Tơ’ngla. Inh hlôh kơdih inh ưh kơ gơh pơm kiơ tơdah ưh kơ đei Sư. Lơ wơ̆t, inh dơ̆ng ‘bơ̆t anăp jơ̆ng Sư păng apinh, tơ’blŏk kơdih tơm đơ̆ng Kră Yang đei krao iŏk inh jing minh ‘nu bơngai mĕ. Inh apinh Kră Yang ăn kơ inh hlôh wao rong kon kiơ̆ kơ kơ Sư, yua băt kơdih ưh kơ đei băt tôm. Băt kơ Sư oei pơgơ̆r gah tơdrong ayơ noh, jơhngơ̆m inh mơn kơ hiôk păng bơnê kơ Sư ling lang.

Mălei pơma tơpă, oei đei lơ tơdrong inh oei bơwei kơdih inh, ưh kơ wă pơjao kơ Kră Yang pơgơ̆r. Inh adrin chĕp bơwei “kiơ̆ kơdih pơgơ̆r” ‘maih wă đơ̆ng kơdih ngăl. Mălei lăm mum hlơp ‘nâu ngăl ôn hlơp lăm tơdrong tơchĕng pơwao đơ̆ng inh. Ưh kơ đei bu băt ưh kơdrơ̆ng pơjao kơ Kră Yang, lăp hơdrô̆ Sư đĕch băt. Ôi, Sư băt tôm tơdrong!

Đei dôm lu anih lăm jơhngơ̆m mă inh hli kơ pơjao ăn kơ Kră Yang. Jơhngơ̆m inh ling lang hli tơrơ: “Lei Kră Yang wă kơ inh pơm kiơ ăn kơ Sư?” Sư hăm iŏk dôm tơdrong inh rơih iŏk pơm kơdih ưh?”

Mă lei, brei mơsơ̆ ‘nâu Kră Yang đei tơ’blŏk kơ inh tơdrong tơpă tơpăt: anih ayơ Sư pơgơ̆r, anih noh đei hiôk hian.

Thoi kơ nơ̆r Sư đei chih lăm Kôlôsê 3:15 “Yêsu Krist ăn kơ bơ̆n hiôk hơiă dih băl, na bơ̆n athei adrin kiơ̆ thoi noh…”

Tơdrong Kră Yang pơgơ̆r ling lang ba ăn tơdrong hiôk hian tơpă. Sư đei pơih măt inh ‘bôh tơdrong tơpă thoi âu: tơdah đei tơdrong kiơ lăm jơhngơ̆m đon dah chăl arih ưh kơ đei tơdrong hiôk hian, na tơ anih noh inh tam mă pôk Sư jing Kră Yang inh.

Dôm lu tơdrong pơm kơ inh oei tơblah lăm tơdrong hiôk hian, sơ’ngon kơplah pơdrơ̆ng dah lăm tơdrong tơchĕng jơ̆ noh bơih inh kăl kơ chu yom Sư hloi. Kơplah adrin wă bơwei kơdih, proh hơmet păng adrin hơmet chăl arih kiơ̆ kơ kơdih, lu bơ̆n gô tơhiong lê̆ tơdrong hiôk hian tơpă.

Tơdrong pơlong gô oei truh, na tơdrong chhŭr nuih ưh kơ đei gơh wer weh lăm chăl arih ‘nâu. Mălei đei tơdrong hiôk hian hloh kơ kon bơngai bơ̆n băt. Noh jơ̆ tơdrong hiôk hian ih hăm inh gô hlôi mơn đơ̆ng lăm dôm tơdrong arih rim năr – đơ̆ng lăm tơdrong bơtho kon hơ’lơ̆p, lăm ŭnh om, tơ anih jang, tơ rok trong truh tơ tơ‘bưh hăm lơ bơngai jum dăr kơ bơ̆n.

Kơplah inh tơchĕng kơ akâu inh, na ăn kơ tơdrong tơchĕng kiơ̆ kơ tơdrong kơnê̆, na tơdrong kơnê̆, klai gar gô pơgơ̆r. Na kơplah jơhngơ̆m đon inh tơchĕng pơwao kơ Kră Yang, tơdrong hiôk hian Kră Yang gô pơgơ̆r hloi mă khan tơdrong arih oei gleh glăn.

Apĭnh đĭ đăng krao khan hơdai: Kơkuh kơ Kră Yang mă ‘mêm, Tơ’ngla dŏng pơklaih păng jơ̆ Tơ’ngla pơgơ̆r lăm chăl arih kon! Kon bơnê kơ Kră Yang yua kơ Ih đei chă ‘bôh kon lăm kơplah kon oei lăm hlŭt trôk tơdrong yoch. Mălei Kră Yang ơi, apinh huay kơ jô̆ yo kơ kon, yua kơ đunh bơih kon ưh pă đei hiôk yua kơ tơdrong ‘maih wă pơm kơdih ‘nâu, adrin ‘maih wă pơm kơdih. Kon ôn tôm tơdrong tơchĕng, ưh kơ ‘maih wă chu yom dôm tơdrong Ih pơgơ̆r. Năr ‘nâu, kon apinh tơjur jơhngơ̆m, pơyơ̆r păng pơjao kơ Ih pơgơ̆r chăl arih kon lăm tơpang ti Ih. Hơpơi kơ tơdrong hiôk hian hloh kơ tơdrong hlôh băt kơ tơdrong pơgơ̆r tôm tơdrong lăm chăl arih kon, mă khan lăm dôm lu tơdrong kon ưh kơ ‘maih wă, chhŭr nuih păng trăp trĭn dêh. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng năr ‘nâu, tơdrong arih ih oei đei dôm lu tơdrong chhŭr nuih, gleh glăn păng đei lơ tơdrong pơlong lăng. Mălei, athei blŏk thoi âu, ‘Bok Kei-Dei wơh kon Sư jơ̆ Yang Yêsu jur, jing ‘Bok dŏng pơklaih păng Tơ’ngla pơgơ̆r dôm lu trong yak năm lu bơ̆n. Lăm kơplah năr ‘nâu, hơpơi kơ ih păng inh lăp đon ăn kơ Kră Yang pơgơ̆r chăl arih, wă kơ đei hlôi mơn tơdrong hiôk hlich chrơp đơ̆ng ‘Bok Kei-Dei đei pơkă wă ăn.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.