Kon bơngai đei pơma “hnam jơ̆ anih wă brŏk”. Mă lei dah minh năr, hnam noh jing rơhông, păng dôm kơ tơnăr ưh kơ ‘bôh păng măt oei tŭn tơlơ̆ bơngai lăm hnam dơnŏ ataih băl, lei lu bơ̆n athei chơ chă anih gơ‘nơp tơ yơ? Tơpă thoi noh, ưh kơ layơ hơnă hnam dơnŏ đei dơ̆ng ‘bơ̆t anăp lơ kial hơbŭt păng gô đei tơdrong pơchah răm thoi năr ‘nâu. Tơdah kơplah ŭnh hnam ưh kơ hơđơ̆ng, dôm kơ tơdrong hơtŭt ‘bơm ưh kơ ‘lơ̆ng kŭm gô lanh să hloi kơ tơpôl bơngai păng teh đak. Hnam dơnŏ trŏ jơ̆ hơdrŭng blŭng a pơjing ăn jơhngơ̆m, mơn lăm jơhngơ̆m păng tơdrong lăng đơ̆ng mĭnh ‘nu kon bơngai gah teh đak. Dah hơdrŭng noh đei pơchah, bơhngol lu bơ̆n kŭm hiong lê̆ anih gơ’nơp hiôk hian.

Năr ‘nâu năr 28/06/2026, tơdrong tơdă Amăn Jơ Krao Khan Rim Năr krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Terry Meeuwsen kơ̆l ‘bai HNAM DƠNŎ KƠJĂP LING LANG

“Mă-lei lu nhôn krao khan apinh Kră Yang ‘Bok Kei-Dei lu nhôn păng rơih chă bơngai kral gak kơmăng kơ’năr wă găn lu sư.” (Nêhêmi 4:9)

“Mă-lei tơdah Sanbalat, Tôbia lu bơngai Arâp, kon pơlei Ammôn păng kon pơlei Asdôt băt kơ tơdrong jang pơm hơmet ming dur pơlei Jêrusalem rai tŏk ‘net ‘net, lu bơlôh pơchah man hơmet ming ‘lơ̆ng na lu sư blĕk păng hil dêh. Na krao akŭm băl đĭ-đăng wă năm blah pơlei Jêrusalem păng wă pơrŭng lu nhôn hơwơ̆l hơwang. Mă-lei lu nhôn krao khan apinh Kră Yang ‘Bok Kei-Dei lu nhôn păng rơih chă bơngai kral gak kơmăng kơ’năr wă găn lu sư.” (Nêhêmi 4 :7-9)

Lăm dôm hơ’mon chăl Pah So, inh đei mơn lăm jơhngơ̆m dêh ‘bơ̆t anăp chăl arih kơ Nêhêmi păng trong yak năm man tơ iung dur pơlei Jêrusalem. Nêhêmi jơ̆ minh ‘nu bơngai đei tơdrong arih krao khan jrŭ să, sư ưh kơ layơ pơm kơdih tơdrong kiơ mă ưh kơ đei sơtơ̆p kŭl tăng krao khan hăm ‘Bok Kei-Dei adrol hloh. Krao khan đĭ jơhngơ̆m ưh kơ trŏ jơ̆ chă trong tơplih tơdrong Kră Yang kiơ̆ kơ tơdrong kon bơngai wă, mă jơ̆ tơdrong chu iŏk đon ala wă kơ jing hơdai hăm tơdrong ‘lơ̆ng rŏ đơ̆ng Tơ’ngla Mơsêh Mơyang wă. Hăm rim ‘nu kơdih kâu dah dôm kơ hnam dơnŏ, lu bơ̆n kăl kơ chơchă tơdrong tơ’bôh păng tơdrong chông anhăk đơ̆ng anih Sư adrol kơ tơdah wă pơtơm jang lăm tôm tơdrong proh hơmet ayơ. Trŏ đơ̆ng tơdrong pơgơ̆p jrŭ să noh, ‘Bok Kei-Dei gô pơgơ̆r păng bơtho tơ’bôh rim kơ jơ̆ng yak lu bơ̆n.

Rim măng, adrol kơ jơ lu kon wă tep, inh đei hơdai hăm kon sơtơ̆p kŭl tăng krao khan, apinh Kră Yang dan ăn lăm jơhngơ̆m lu kon minh tơdrong hơpo ‘bôh hơđăl gah tơdrong gĭt kăl bơhngol kơdih lăm tơdrong ‘mêm mơnat đơ̆ng Sư. Nơ̆r krao apinh hơpơi tih hloh đơ̆ng inh jơ̆ hơpơi kơ anăn păng tơdrong gĭt chăl arih lu kon ưh kơ đei pơjing đơ̆ng tơm adrĕch adrŭng, kŭm ưh kơ mơ̆ng kơ mĕ ‘bă, na gơh ‘măn lê̆ kơdih đơ̆ng trŏ tơdrong pơgơ̆p hăm ‘Bok Dŏng Pơklaih Yang Yêsu Krist păng anih pơm kon ‘Bok Kei-Dei. Jơhnơr hơ’lơ̆p dang ei đei tơblah hăm tơdrong truh anăn. Păng lăp tơdah tơdrong arih gơh kơjăp lăm tơdrong ‘mêm mơnat đơ̆ng ‘Bok Krist, kon hơ’lơ̆p lu bơ̆n gơh chă ‘bôh tơdrong gĭt tơpă, kơjăp yak hlôi kơ dôm kial hơbŭt tơdrong arih.

Tơdrong minh jơhngơ̆m ling lang jơ̆ tơm kăl kơ minh hnam dơnŏ, mă ‘noh jơ̆ ŭnh hnam iĕ đơ̆ng lu bơ̆n dah jơ̆ hnam dơnŏ tih Bơngai Lui kơ ‘Bok Kei-Dei. Lu bơ̆n kăl kơ pơgơ̆p hơdai thoi minh khŭl, rim ‘nu đei hơdai păng đei minh anih ưh kơ gơh tơplih. Nêhêmi đei ‘bôh băt tơdrong juăt noh tơdah lăng lăm dur pơlei Jêrusalem trŏ kơ đei pơchah răm đĭ hloh kơ minh jơhnơr. ‘Noh jơ̆ minh tơdrong jang tih dêh anat hloh, dĭng truh adrol noh ưh kơ đei minh ‘nu bu pơ̆n tơchĕng truh tơdrong wă pơtơm lăm tơdrong pơjing hơmet dơ̆ng. Mă lei Nêhêmi hlôh khan, wă hơmet ming dơ̆ng dur pơlei, kăl kơ đei tơdrong minh jơhngơ̆m păng jơhngơ̆m pran đơ̆ng đĭ đăng kon pơlei.

Trŏ thoi noh, akâu jăn ‘Bok Krist đei jơhngơ̆m pran kơplah rim kơ akâu pơgơ̆r trŏ tơdrong jang. Wă kơ hnam dơnŏ truh kơ Khŭl Bơngai Lui gơh arih mĭnh jơhngơ̆m hơdai păng đei yua, rim ‘nu đei kăl pŭ iŏk tơdrong jang gah kơdih.

Adrol kơ tơmo blŭng a đei dan tơ ala, ayăt đei tơlĕch nơ̆r pơjăm, tơhli kơnhăm gơ̆ tơgơ̆ tơdrong tơchĕng đơ̆ng kon pơlei. Mă lei tơdrong jang pơjing tơiung oei đei pơtơm. Đơ̆ng ‘net ‘net, tơmo pơtrơp tơmo, hnam dơnŏ mĭnh jơhngơ̆m hăm hnam dơnŏ, dur pơlei kơjăp thoi noh rai kơjung tơ kơpal.

Rim hnam dơnŏ gô pŭ iŏk tơdrong jang man tơiung tơnăr gah rŏng hnam lu sư. Kơplah dur pơlei rai kơjung, jơhngơ̆m blĕk areh đơ̆ng ayăt rai tih. Lu sư chă đon thei khŭl linh năm wang tăp dăr păng blah ‘măng dur pơlei. Dơ̆ng ‘bơ̆t anăp tơdrong truh, kon pơlei đei hli tơrơ jơhngơ̆m pă kĕ đơ̆ng rŏng kơ đunh năr bơ̆jang ưh kơ pơdơh. Tŏk bŏk tơdrong truh wang tăp dăr noh, Nêhêmi đei pơm kiơ?

“Mă-lei lu nhôn krao khan apinh Kră Yang ‘Bok Kei-Dei lu nhôn păng rơih chă bơngai kral gak kơmăng kơ’năr wă găn lu sư.” (Nêhêmi 4:9)

Adrol hloh, sư krao khan. Đơ̆ng rŏng kơ noh, sư pơtơm bơ̆jang. Kon pơlei Kră Yang đei tơlĕch minh tơdrong proh hơmet tơpă wă bơwei kơdih: minh puăt bơngai đei kơnhăm man tơiung, oei pă minh puăt chĕp đao hơlă dơ̆ng gak hloi ‘bơ̆t rŏng. Lu sư bơ̆jang đơ̆ng pơge hrôih dĭng truh kơ hơnglŏng lĕch, tơmam tơblah ling lang ‘bơ̆t akâu. Jơ̆ bơngai linh tơ’bôh lăm hnam dơnŏ, lu bơ̆n gơh pơhrăm iŏk minh ‘bai hŏk jrŭ să đơ̆ng Nêhêmi: krao khan na ưh kơ pơm hloi jơ̆ minh đon lui ưh kơ tơpă, mă lei pơm hloi na ưh kơ krao khan tă kơ jơ̆ tơdrong pơm kiơ̆ kơ sĕch akar.

Lei lăi thoi dôm hnam dơnŏ Juđê sơ̆ pŭ iŏk gah dur pơlei anih hnam kơdih, dang ei, lu bơ̆n kŭm đei tơdrong jang pơjing minh tơdrong hơgăt ‘lơ̆ng rơgoh, minh dur pơlei bơhngol kơjăp hloi lăm ŭnh hnam dơnŏ kơdih. Đei lơ trong wă hơdai lăm tơdrong jang noh- pơtrơp jơ akŭm Hnam Dơnŏ Kơkuh, krao khan tơgŭm băl, dan ti hơkat pŭn hiôk, păng ling lang roi dơ̆ng dôm tơdrong pŭn hiôk hơdai tơdrong tơpăt đơ̆ng ‘Bok Kei-Dei.

Apĭnh đĭ đăng krao khan hơdai: Kơkuh kơ Kră Yang, bơnê kơ Ih đei sơng iŏk kon lăm hnam dơnŏ bơhngol Ih. Apinh ăn kơ kon tơdrong gơh hơgei tih hloh lăm kơplah kon pơjing păng bơwei hnam dơnŏ kơdih. Dôm kơplah kon gleh lap dah bơ̆l hăl hli tơrơ, apinh tơ’blŏk kơ bơhngol kon khan Ih jơ̆ Tơ’ngla gơh pơm jing dôm tơdrong ngeh kơ ưh kơ gơh. Apinh Ih krao, pơtrŭt kon yak lăm tơdrong krao khan păng bơ̆jang yua kơ đon lui. Hơpơi apinh Ih pơgơ̆p lu nhôn jing minh hnam dơnŏ ling lang lăm anăn Yang Yêsu. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơnăr bơwei hnam dơnŏ ih ưh kơ gơh man keh đang lăm minh năr, kŭm ưh kơ gơh pơjing hăm jơhngơ̆m pran kơdih đơ̆ng minh ‘nu bơngai. Mă lei đơ̆ng rim tŏ sĕt, đơ̆ng dôm nơ̆r jet dih băl hăm iĕm kâu, dôm kơ tơ’bôh hiơ̆k bơngơ̆t bơwei, dĭng truh kơ jơ Hnam Dơnŏ Kơkuh rim kơmăng…Kră Yang gô yua rim tơmo pơchah pơchek wă pơklep dơ̆ng tơnăr kơjăp kơ ih. Ih tam hơmet wă hơdai hăm hnam dơnŏ păng lu kon hơ’lơ̆p kơdih krao khan, pơyơ̆r hnam dơnŏ kơdih kơ Kră Yang pơgơ̆r păng pơtơm pơjing “anih dur pơlei” mă Sư đei pơjao ăn kơ ih ưh? Hơpơi kơ Năr Hnam Dơnŏ sơnăm ‘nâu gô jing minh tơdrong tơm kăl, kơplah đĭ hnam minh jơhngơ̆m pơtơm lăm pơjing hơmet, tơiung minh hnam dơnŏ kơjăp ling lang lăm ti ‘Bă Kơpal Plĕnh.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.