Peb txoj kev npaj mas thaum twg twb zoo thiab muaj txheej txheem, tiamsis lub neej ces tsis yog thaum twg twb tshwm mus zoo li ntawd. Yuav muaj tej hnub uas txhua yam tshwm los tsis paub ua ntej hloov pauv tag txhua txoj kev npaj, ua rau peb yuav tsum khiav tawm ntawm txoj kev npaj thiab mus tawm tsam rau tej kev cheemtsum tamsim. Peb xaiv yus tej haujlwm ua ntej, lossis xaiv nres rau ntawm lwm tug tej kev cheemtsum? Zaj kawm hnub no yuav pab rau peb rov qab tig mus saib txog lub neej nrog tug Tswv mus, saib peb puas kam tsos yus tej haum phiaj thiab mus lawv Vajtswv txoj kev npaj rau peb.

Hnub no yog hnnub 29/6/2026, Kev thov Vajtswv txhua hnub thov caw peb txhua tus nrog tug sau Paula L. Stansbury kawm txog zaj kawm: LUB ZOG PUB THAUM TIB NEEG TSIS TXAUS ZOG

“Kuv twb thov Vajtswv pab koj lawm, kom koj muab siab rau ntseeg. Thiab thaum koj los cuag kuv, koj yuav tsum txhawb koj cov kwvtij zog.” (Luka 22:32)

“Ximoos, Ximoos! Koj mloog kuv hais! Vajtswv twb cia dab Ntxwgnyoog los sim nej txhua tus siab lawm, muab tus zoo cais tawm ntawm tus phem, ib yam li tus neeg yaj nplej muab vab ntxuaj cov npluag tawm ntawm cov nplej. 32Tiamsis Ximoos, kuv twb thov Vajtswv pab koj lawm, kom koj muab siab rau ntseeg. Thiab thaum koj los cuag kuv, koj yuav tsum txhawb koj cov kwvtij zog.” Luka 22:31-32
Lub sijhawm teem xa zaj kawm Vajluskub twb dhau ib hnub lawm. Yog li kuj thiaj tso tseg txhua yam thiab siv ib hnub qaij los ua tiav zaj kawm.

Kiag thaum ntawd, Ib tug phoojywg txawm hu tuaj. Nws lub suab cheemtsum heev “Kuv cheemtsum koj pab kuv heev li.”

Kuv yeej mob siab rau nws lub neej heev, vim ntau xyoo dhau los nws twb tag siab tu nws tug txiv uas rau mob tuag tes taw ntau zaug. Koj yeej xam pom kuv kev tawm tsam sib ntaus thaum ntawd: ib sab yog tes haujlwm txog zaj kawm kuv yuav tsum ua, ib sab yog lub zog qaug zog zig tom qab tej kev sim siab. Kuv tsis paub yuav xaiv qhov twg.

Ua Vajtswv tsaug heev, ob peb hnub ua ntej ntawd, kuv tau hnov zaj nkauj qhuas “Lub zog ceebtsheej pub rau kuv” tau Rich Cook sau xyoo 1987. Lub ntsiab lus yog qhuas Vajtswv thaum mus rau hauv qhov tsaus ntuj nti, nws tau txhawb zog ntau heev rau tagkig hnub thov Vajtswv ntawd. Thiab nyob rau lub sijhawm khwv no, lub suab nkauj ntawd rov qab tshwm hauv kuv lub hlwb.Kuv pom tias yus cheemtsum ib nplooj siab qhuas Vajtswv Leejtxiv. Thaum tig nplooj siab mus rau ntawm Vajtswv, kuv txais tau kev kaj siab thiab lub zog los ua qhov haum Vajtswv siab. Kuv txoj kev npaj yuav tsum mus raws li Vajtswv lub siab nyiam. Yog li, kuv thiaj teb kuv tug phoojywg: “tau kawg maj, Kuv mam tuaj kiag tamsim.”

Dhau tej xwm no ua rau kuv xav txog Tswv Yexus thiab Petus kev sib tham.

Hauv Lukas 22:31-32, Tswv Yexus hais rau yawg tias: “Ximoos, Ximoos! Koj mloog kuv hais! Vajtswv twb cia dab Ntxwgnyoog los sim nej txhua tus siab lawm, muab tus zoo cais tawm ntawm tus phem, ib yam li tus neeg yaj nplej muab vab ntxuaj cov npluag tawm ntawm cov nplej. 32Tiamsis Ximoos, kuv twb thov Vajtswv pab koj lawm, kom koj muab siab rau ntseeg. Thiab thaum koj los cuag kuv, koj yuav tsum txhawb koj cov kwvtij zog.”

Los ntawm lub siab khov kho sab nqaij tawv, Petus ua suab loj teb: “Tus Tswv, kuv txaus siab nrog koj raug kaw rau hauv tsev lojcuj thiab tuag nrog koj!” Luka 22:33. Petus lub hlwb thiab lub siab thaum ntawd yeej ruaj siab txiav txim siab nrog Tswv Yexus mus txawm yuav muaj dabtsi tshwmsim.

Tiamsis Tswv Yexus rov qab teb: “Petus, kuv qhia rau koj hais tias, hmo no thaum qaib tsis tau qua, koj yuav hais peb zaug hais tias, koj tsis paub kuv.” Lukas 22:34
Txawm yog twb tau cog lus ruaj khov li ntawd los, tseeb tiag Petus twb tau tsis lees Tswv Yexus peb zaug. Hauv tib neeg tug cwjpwm qaug zog, thiab ntsib tej kev tawm tsam loj li loj tshwm tuaj, Petus cia ua tsis tau, yawg ua tsis tau li yawg lub siab xav. Yawg pom tias yus tug kheej xav thiab txiav txim xwb tsis tau txaus. Yawg cheemtsum ib yam tseemceeb dua: yog lub zog loj saum ntuj tuav txoj kev ntseeg ruaj khov thaum ntsib kev sim siab.

Txawm kuv qhov kev sim siab nws me dua tej uas Petus tau ntsib dua los, kuv kev npaj kuj mus tsis tau li kuv xav. Tiamsis kuv paub Vajtswv muaj ib txoj kev npaj rau kuv zoo dua rau hnub ntawd. Thiab kuj zoo yam li Petus, kuv cheemtsum lub zog loj los ntawm Vajtswv los kom kuv thiaj txhawb zog tau rau kuv tug phoojywg thaum ntsib kev txomnyem. Thaum kuv tag siab pehawm Vajtswv rau yav hnub nqaij hnub ntawd, Vajtswv lub zog loj thiaj pab hloov pauv kuv ua tau ib qho kev txhawb zog rau kuv tug phoojywg hnub ntawd.

Muab saib los, qhov uas kuv nres thiab pab kub tug phoojywg hnub ntawd kuj tsis ua rau kuv haujlwm mus qeeb lossis tsis tiav. Petus tau qaug zog, tau tsis lees yuav Tswv Yexus, tau twg kev thaum nws tug kheej qaug zog. Tiamsis Vajtswv yeej tsis muab yawg pob rau ib sab. Tiamsis Vajtswv hloov pauv thiab kho yawg thiab cob rau yawg tes haujlwm qhib pawg ntseeg thaum pib thawj (Tes Num2:40-41), ua rau txhua tus kev ntseeg ruaj khov. Kuj ib yam li ntawd, tej kev khwv uas kuv tabtom ntsib tsis yog qhov tabkaum ua rau kuv tsis qhia tawm kev hlub, ua haulwm pub rau lwm tug lossis ua lub neej pub rau Vajtswv.

Thov caw nrog kuv peb thov Vajtswv ua ke: Kuv tug Vajtswv, kuv ua Koj tsaug vim Koj yeej niaj hnub ua siab ntev coj kuv lub neej, txawm yog thaum kuv tawv ncauj khiav caum kuv tug kheej tej kev ntshaw. Thov Koj zam txim rau kuv thaum kuv maj nroog rau ntau yam haujlwm ntawm tug kheej ho tsis nco txog lwm tug tej kev txomnyem. Thov Vajtswv rhuav tshem kuv tej kev muab hlob kom kuv paub vam khom koj lub zog. Thov qhib kuv lub qhov muag ntawm sab ntsuj plig, kom kuv ua tau lub siab tawv cia kuv txoj kev mus yog mus pab rau lwm tug tau txais kev txhawb zog nplig siab. Kuv muab tagnrho kuv tej kev txhawj, kev nkeeg hnub no tso rau hauv Koj ua tug tswjhwm. Kuv taij thov los ntawm Tswv Yexus Khetos lub npe, Amees.

Ib tsoom phoojywg sawvdaws, tej thaum hnub no koj tabtom tawm tsam nrog ntau tej kev khwv thiab nra nyhav uas tsis muaj leejtwg pom. Tej thaum ntawd yog tug mob ntev los, kev khwv nyiaj, kev phoojywg tu ncua, lossis tej kev pob puag ua rau koj pab tsis tau leejtwg lawm. Koj saib rau koj tug kheej thiab xav tias: “kuv tseem cheemtsum neeg pab kuv, ua cas kuv yuav pab tau lwm tus.” Tiamsis kiag tej lub sijhawm li ntawd, Vajtswv kuj siv tau peb muaj zog nchav. Txhob tos txog thaum txhua yam puav leej zoo koj mam ua haujlwm pab. Cia li thov Vajtswv ntxiv, ua haujlwm ntxiv, thiab txhawb pab lwm tus ib ncig los ntawm txhua yam uas Vajtswv pub rau koj hnub no. Thaum koj yog koob hmoov rau lwm tug uas koj tseem qaug zog, thaum ntawd koj yuav txais tau lub zog saum ceebtsheej thiab txais tau Vajtswv txoj kev hlub pub dawb hauv koj lub neej. Thov kom Vajtswv pub zog txhab ntxiv rau koj kom koj mus ntxiv rau tom ntej, thiab yog koob hmoov mus txhawb zog rau ntau tug hnub no.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.