Hla bơar iĕ chih trong yak năm lu bơ̆n jơ̆ tơnăp tơnen dêh, mălei chăl arih lu bơ̆n khăi dêh thoi kơ proh hơmet lê̆ adrol. Na gô đei dôm lu năr dôm kơ tơdrong truh pơm tơsŭl tơwŏk kơ dôm lu tơdrong đei proh hơmet lê̆ adrol, na pơm kơ lu bơ̆n lĕch đơ̆ng anih tơdrong arih ‘lơ̆ng kơjăp wă tơ’bơ̆p tơdrong kăl hloh mă kăl adrol hloh. Lu bơ̆n rơih iŏk tơdrong ayơ adrol lăm tơdrong jang kơdih, athei rơih iŏk pơdơh ‘mơ̆i yua kơ đei tơdrong yua ăn kơ bơngai nai? Tơdrong hơ’mon năr ‘nâu gô tơgŭm lu bơ̆n lăng ming trong yak năm hăm Kră Yang, wă lăng lu bơ̆n hăm pơ̆n wă achăng lê̆ kiơ̆ kơdih proh hơmet lê̆ adrol mă ăn kơ tơdrong tơdă ‘lơ̆ng đơ̆ng Kră Yang dah ưh.

Năr ‘nâu, ‘năr 29/06/2026, tơdrong tơdă Amăn Jơ Krao Khan Rim Năr apinh wơ̆n lu bơ̆n wang mơ̆ng pơwao hơdai Nơ̆r Kră Yang hăm bơngai chih Paula L. Stansbury kơ̆l ‘bai GƠNANG KƠ KRĂ YANG KƠPLAH JƠHNGƠ̆M BƠNGAI PĂ BĂT PƠM THOI YƠ

“Mă-lei Inh krao khan kơ ‘Bok Kei-Dei wă kơ Sư tơgŭm ih huay kơ tŭk lê̆ tơdrong lui ih. Na lăp ih kơnăl tơdrong ih wă sơngah kơ Inh noh kơnh, na ih athei pơlung lu ‘nhŏng oh ih âu wă kơ lu sư kư̆m lui kơjăp dơ̆ng.” (Luka 22:32)

“Mă-lei Inh krao khan kơ ‘Bok Kei-Dei wă kơ Sư tơgŭm ih huay kơ tŭk lê̆ tơdrong lui ih. Na lăp ih kơnăl tơdrong ih wă sơngah kơ Inh noh kơnh, na ih athei pơlung lu ‘nhŏng oh ih âu wă kơ lu sư kư̆m lui kơjăp dơ̆ng.” (Luka 22:32)

Năr hơgăt gưih ‘bai tưk tơiung gah bơhngol hlôi bơih. Ưh kơtam gưih minh năr, inh achăng lê̆ tơdrong jang nai, ‘măn minh kơsơ̆ wă kơnhăm pơkeh kơ ‘bai chih.
Kơplah noh, buăl juăt inh đei krao. Nơ̆r sư krao gơnhĕk đơ̆ng lăm điê̆n thoăi: “Inh kăl kơ buăl tơgŭm.”

Inh ‘bôh mơnat kơ tơdrong arih sư, yua kơ inh băt kơ dôm sơnăm adrol sư đei bơwei klo sư jĭ pham tŏk tơ’ngok lơ wơ̆t. Buăl pơwao lăng tơdrong tơ’blah lăm jơhngơ̆m inh kơplah jơ noh: minh pah noh inh trŏ kơ hiơ̆k kơ đei chih pơkăm, minh pah jơ̆ gleh lap đơ̆ng rŏng kơ tơdrong pơlong lăng kơdih. Inh dơ̆ng ‘bơ̆t tơdrong rơih iŏk pơmat tat.

Bơnê kơ Kră Yang tơpă, minh ‘bar năr adrol noh, inh đei mơ̆ng ‘bai hơri ư ang kơ ‘Bok Kei-Dei “Tơdrong noh ăn kơ inh đei jơhngơ̆m pran” bơngai pơcheh Rich Cook, pơcheh sơnăm 1987. Nơ̆r ‘bai hơri pôk pơ- ư kơ Kră Yang lăm kơplah thŭng tơdrong lôch đei tưk tơ iung păng pơlung inh lơ dêh lăm jơ krao khan pơge năr noh. Na lăm kơplah arih gleh glăn ‘nâu, dôm kơ nơ̆r hơri noh đei râu krao lăm jơhngơ̆m đon inh. Inh mơn băt rơđah inh kăl kơ đei jơhngơ̆m ư-ang kơ ‘Bă ‘Lơ̆ng Rơgoh. Kơplah năm tơ Kră Yang, inh đei mơn kơ hiôk hian păng đei jơhngơ̆m pơm kiơ̆ kơ thoi Sư wă. Yua kơ thoi noh, inh đei tơl buăl inh: “Gơh mơ̆n, inh gô năm truh hloi.”

Tơdrong ‘nâu pơm kơ inh tơchĕng pơwao kơ tơdrong pơma dơnuh Yang Yêsu hăm Pêtrôs.

Lăm Luka 22:31-32, Yang Yêsu pơma khan kơ Pêtrôs: “Ơ Pêtrôs, ih mơ̆ng Inh ‘biơ̆ bĕ. Yang Satan apinh ‘Bok Kei-Dei wă pơlong lăng tơdrong lui lu iĕm thoi lĕ đe wă um ‘ba. Mă-lei Inh krao khan kơ ‘Bok Kei-Dei wă kơ Sư tơgŭm ih huay kơ tŭk lê̆ tơdrong lui ih. Na lăp ih kơnăl tơdrong ih wă sơngah kơ Inh noh kơnh, na ih athei pơlung lu ‘nhŏng oh ih âu wă kơ lu sư kư̆m lui kơjăp dơ̆ng.”

Hăm tơdrong lui ngeh đơ̆ng lăm sĕch akar, Pêtrôs pơ̆n nuih pơma khan: “Ơ ‘Bok, mă đe tah inh lăm hnam phak hơdai păng Ih, dah pơlôch inh hơdai păng Ih, mă-lei inh kư̆m ưh kơ wă sơngah kơ Ih ôh” (Luka 22:33). Jơhngơ̆m păng đon tơchĕng sư kơplah noh tơpăt wă yak kiơ̆ Yang Yêsu hăm tôm tơdrong.

Mălei Yang Yêsu tơl sư thoi âu: “Ơ Pêtrôs, Inh khan kơ ih tơpă, măng kơnh boih, hơdrol kơ iĕr wă ŏ, ih gô sơngah kơ Inh pêng ‘măng khan ih ưh kơ băt kơ Inh.” (Luka 22:34)

Mă khan đei nơ̆r pơma pơsĭt trŏ thoi noh tơpă, Pêtrôs sơngah tơpêng ‘măng. Lăm jơhngơ̆m rơdu kon bơngai, ‘bơ̆t anăp bơngai tơpôl lơ đei tơdrong truh thoi noh, Pêtrôs pă băt pơm thoi yơ, ưh pă pơm kiơ̆ kơ jơhngơ̆m đon rơih iŏk kơdih. Sư mơn kơ kơdih sư đĕch noh ưh kơ tôm ôh. Sư kăl kơ tơdrong trŏ hloh dơ̆ng: mơsêh mơyang đơ̆ng Kră Yang wă bơwei đon lui kơ plah đei tơdrong pơlong lăng.

Mă khan tơdrong pơlong lăng inh pơting hăm Pêtrôs truh kơ inh lăp ai đĕch, tơdrong proh hơmet ưh kơ thoi sư tơchĕng. Mălei inh băt ‘Bok Kei-Dei đei tơdă ‘lơ̆ng hloh kơ inh lăm năr noh. Na kư̆m nhen thoi Pêtrôs, inh kăl kơ đei jơhngơ̆m pran đơ̆ng Kră Yang wă tơgŭm buăl đei tơdrong truh. Kơplah inh đĭ jơhngơ̆m kơkuh kơ Sư lăm kơsơ̆ năr noh, tơdrong mơsêh Sư pơm kơ inh jing bơngai trŏ kơ pơlung ăn kơ duch noh.

Na tuch luch, tơdrong inh pơdơh kơ tơgŭm buăl inh năr noh huay kơ pơhiơ̆ kơ tơdrong tơlĕch hla bơar tưk tơiung gah bơhngol noh. Pêtrôs đêl đei hiong răm, đêl đei sơngah kơ Kră Yang, đêl đei pă băt pơm thoi yơ đơ̆ng lăm jơhngơ̆m rơdu kơdih. Mălei Kră Yang ưh kơ đei tơweh sư tơ minh pah. Tơplơ̆ dơ̆ng, Sư pơklaih Pêtrôs păng pơjao ăn kơ sư tơdrong bơ̆jang hăm Hnam Akŭm blŭng a ( Tơdrong Jang 2:40-41), pơm kơ ‘nhŏng mŏ oh đei jơhngơ̆m đon lui pran. Kư̆m thoi noh, dôm tơdrong gleh glăn inh đei hlôi ưh kơ yua kơ noh na inh pơdơh kơ ‘mêm, pơdơh kơ tơgŭm dah pơdơh arih ăn kơ Kră Yang.

Apĭnh đĭ đăng krao khan hơdai: Kơkuh kơ Kră Yang mă ‘mêm, kon bơnê kơ Ih yua kơ Ih ling lang chơ̆n chông ba chăl arih kon, mă kơplah năr kon kơchu pơm kiơ̆ dôm lu tơdrong proh hơmet đơ̆ng kơdih. Apinh huay kơ jô̆ yo kơ kon yua kơ dôm wơ̆t kon hrăt hrot yua kơnhăm kơdih mă hiơt lê̆ kơ tơdrong sơ’ngon bơngai nai. Apinh Ih gơ̆ lê̆ jơhngơ̆m pơ-ang wă kơ kon băt kơ tơjur jơhngơ̆m đon tơ ala gơnang kơ tơdrong mơsêh mơyang Ih. Apinh pơih măt bơhngol kon, ăn kơ kon pơ̆n nuih yak năm jing tơm kơ tơdrong pơlung bơngai nai. Kon dan tôm tơdrong hiơ̆k bơngơ̆t, gleh lap lăm năr ‘nâu ăn kơ ‘Bă ‘Lơ̆ng Rơgoh pơgơ̆r. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏlăng lăm năr ‘nâu ih oei tơ’blah hăm dôm tơdrong trăp trĭn kơdih mă ưh kơđei bu ‘bôh. Rŏlăng noh jơ̆ tơdrong jĭ jăn đunh bơih, trăp trĭn kơ jên tơmam, dôm kơ tơdrong pơgơ̆p hơđang hơđah bơih, dah dôm lu tơdrong hiong răm pơm kơ ih ưh pă đei tơdrong kiơ wă klah song ăn. Ih lăng tơdrong arih kơdih na tơchĕng khan: “Inh kăl kơđei tơgŭm, pơm liơ wă tơgŭm bơngai nai?” Mălei tơm đơ̆ng tơdrong rơdu tơrăn noh, ‘Bok Kei-Dei oei yua iŏk lu bơ̆n pran dêh. ‘Nĕ kơ gô jing tôm tơdrong yoch pă đei bơih na pơtơm bơ̆jang. Athei krao khan dơ̆ng, pơlung, tưk tơ iung păng’mêm kơ lu bơngai jum dăr hăm dôm lu tơdrong kiơ mă Kră Yang ăn kơ ih năr ‘nâu. Đơ̆ng tơm kơ tơdrong pŭn hiôk ăn kơ bơngai nai kơplah bơ̆n oei rơdu, ih mơn hloh dơ̆ng kơ tơdrong mơsêh mơyang păng tơdrong ‘mêm tôm mah đơ̆ng ‘Bok Kei-Dei lăm chăl arih ih. Hơpơi kơ Kră Yang tuh ăn jơhngơ̆m ‘nao wă kơ ih pơtrơp yak năm, păng jing tơm kơ tơdrong pơlung ăn kơ lơ bơngai lăm năr ‘nâu.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.