Puas tau muaj ib zaug twg koj siv tagnrho koj lub zog los daws ib qho haujlwm uas cheemtsum heev, tiamsis thaum tig rov qab mus saib, koj ceeb hlo thiab pom tias koj twb tso dhau ib yam uas tseem ceeb lawm? Qee zaug peb maj nroos ua Vajtswv haujlwm, rau siab ntso siv sijhawm mus rau tej teg num, tej haum phiaj, tiamsis yus lub siab ho khoob lug – ntawd yog nplooj siab uas tuav peb txoj sia. Rau qhov peb tug yeebncuab yog ib tug txawj tsim kev tawm tsam heev. Nws yeej tsis tawm tsam peb tim ntsej tim muag, tiamsis nws yeej keej npaj “tej txoj kev zais ntxhis” los tabkaum peb nplooj siab. Koj puas pom tseeb tias lub chaw uas Vajtswv muab rau koj kav nws twb tseem nyob thajyeeb.

Hnub no yog hnub 30/6/2026, Kev thov Vajtswv txhua hnub thov caw peb sawvdaws txhua tus los nrog tus sau Ben Ledger kawm txog zaj kawm KAV QHOV CHAW TSEEM CEEB

Metub, koj yuav tsum muab siab npuab tej lus uas kuv hais. Ua tib zoo mloog kuv tej lus. 21Tsis txhob cia kuv tej lus tawm ntawm koj mus. Nco ntsoov kuv tej lus thiab khaws nkaus cia rau nruab siab. 22Tej lus ntawd yuav pub txojsia thiab kev noj qab nyob zoo rau txhua tus uas totaub tej lus ntawd. 23Koj yuav tsum ceevfaj thiab xav zoo zoo, rau qhov koj lub neej mus raws li koj tej kev xav. Pajlug 4:20-23
Kuv sawv ntawm lub tiaj nyhom tseem ntub lwg, ntsia qhov muag mus saib lub tshav puam. Tej haj ntoo loj ntsuab npog tau tib neeg, tiamsis yeej npog tsis tau tej suab nrov. Tej suab luag thiab suab hu nrov sib xyaw txhua qhov tuaj. Kuv maj mam taug kev mus, ntsia saib ib ncig, tseem nco tig saib rau tom qab. Lub tsev qub tom kawg thaj av no ib txwm yog thaj chaw zoo rau peb pab zais peb tug chij, tiamsis kuv yog tug zov lub chaw ntawd, yog li kuv thiaj ntxub daim phab ntxa ntawd heev – vim nws thaiv kuv lub qhov muag ntsia tsis tau mus tom lub hav zoov.

Kiag ntawd, muaj tej suab qw tim thaj av sab tim tuaj. Kuv ob tug phoojywg hauv pab khhiav tawm ntawm ntug zoov, tom qab yog ib tug tabtom caum lawv. Kuv tsa muag saib, saib lawv puas nqa ib tsab chij twg. Tiamsis tsis muaj, ntshe lawv twg raug lwm pab pom ua ntej tseeb tau chij lawm. Zaum no lawv tseem dhia khiav nkaum kom tsis raug ntes ua tub rog raug kaw.

Kiag thaum lawv los ncav cuag peb pab li av, kuv txawm pom ib tug nyob sab lauj. Muaj ib tug ntawm lwm pab tabtom nyiag los rau ntawm lub tshav puam khoob, thiab ib tug ntxiv tom qab. Ob tug phoojywg tabtom yog ob tug dhia khiav nkaum zaum no tseem tau tig rov qab caum lwm pab.

Kiag ib ntsais muag xwb, peb peb tug dhia mus caum ob tug uas tabtom dhia khiav nkaum, tiamsis, ib nyuas plias tom qab xwb, muaj ib txoj kev xav tshwm kiag hauv kuv lub siab: Kuv muaj ib tes haujlwm tseemceeb – kuv yog tug zov thiab kav tug chij!

Tiamsis thaum kuv tsim dheev ces twb lig lawm. Nyuam qhuav tig rov qab mus, kuv lub plawv cuag li yuav poob: muaj ib tug ntawm lwm pab twb khiav dhau lub tsev puas thaum twg lawm, nqa kiag peb tug chij thiab khiav ceev li ceev mus rau tim lawv sab tshav puam.

Kuv ua suab tshaws nyho qw nrov nrov kom kuv cov phoojywg nres kiag tsis txhob caum cov neeg lawv tso los sim peb, tiamsis tsi tau li lawm. Lawv lub tswvyim twb dag tau peb lawm. Sijhawm no yog xav kom tav tau tug nyiag chij, peb tsis muaj lwm txoj kev, tsuas yog mus rau tim lawv sab yog qhov chaw uas muaj hlua cuab thiab lawv pab tabtom nyob zov tos, tiamsis tug ntawd tug duab yim ploj zuj zug thiab tsis pom li lawm.

Tom qab twb tsis muaj ob feeb, txhua yam cia xaus. Lub chaw tseem ceeb raug swb, tug chij raug lawv pab txeeb tau.

Txhua yam kev swb ntawd puav leej yog nyob rau ntawm “thaj chaw”. Kuv twb sawv kiag ntawm peb pab qhov chaw tseemceeb, zov ib tav su, tiamsis ho tsis nco ceev faj thiab zov ib mentsis xwb – yog lub sijhawm me me tuav tag nrho lub rooj sib tw uas kuv twb xav tsis txog.

Muaj ntau qhov chaw hauv Vajluskub hais txog “thaj chaw.” Thaum Vajtswv hu Asplas, yawg tau mus rau ib thaj chaw tshiab thiab ua tsev ntaub rua nruab nrab ntawm thaj chaw ntawd. Tiamsis qhov yawg ua tsuas yog ua ib lub tsev ntaub xwb.

Tom qab ntawd, Anplas thiaj txav chaw mus rau yav qabteb ntawm lub laj roob uas nyob ntawm lub nroog Npethees sab hnubtuaj thiab nws tsa tsevntaub nyob rau ntawd. Lub nroog Npethees nyob sab hnubpoob thiab lub nroog A-is nyob sab hnubtuaj. Thaum Anplas nyob qhov ntawd nws teeb tau ib lub thaj rau tus TSWV thiab pehawm tus TSWV. Chivkeeb 12:8

Teeb ib lub thaj rau Vajtswv kuj zoo li tsa ib tug chij ntawm sab ntsujplig. Ntawm yog tsa tawm lub siab ntseeg, qhia hais tias Vajtswv tabtom kav yus thaj av, thiab kuj yog ntseeg siab rau VAjtswv lub hwjchim los povhwm thaj chaw ntawd. Tseeb tiag tiag, Vajtswv tabtom tswjhwm kiag nruab nrab ntam thaj av ntawd.

Ntau ntau txhiab xyoo dhau los. Muaj Ib tug Neeg Ua Qhua tuaj tuaj. Kuj ze rau sab hnub tuaj ntawm thaj chaw Asplas teeb chaw rau Vajtswv thaum ub, Tswv Yexus tau los ua kevcai raus dej. Kiag tom qab “Tom qab ntawd Vaj Ntsujplig coj Yexus mus rau tom roob mojsab qhua kom dab Ntxwgnyoog tau sim Yexus siab” Mathais 4:1. Dhau qhov kov yeej yeebncuab, Tswv Yexus pib Nws lub tebchaws hauv ntiajteb no. Tamsim no, lub tebchaws ntawd tsis yog tsuas hais txog tebchaws Yixalayees lawm xwb, tiamsis tus TSwv tabtom qhib kev nkag los rau hauv peb lub siab. Thaum ntiajteb tabtom raug khi rau hauv kev txhaum, Tus TSwv Cawmdim los txiav tu hlo txhua txojkev khi peb, pub peb txais tau kev ywjpheej.

Tiamsis tus Tswv cawmdim peb los ua dabtsi?

Kom peb ua tau siab tawv thiab nkag mus txeeb tej “thaj chaw” uas Vajtswv hu peb. Kom peb tsim dheev ntawm Xa-taas lub voj hluas, tsis raug ntog rau ntawm nws tej khoom qab los sim peb thaum nws nrhiav kev tuaj txeeb tej thaj av rog uas yog Vajtswv tug. Thiab kom peb sib txhawb, npaj kom txhua tug loj hlob thiab qhib Vajtswv tswv lub tebchaws Moo Zoo mus ntxiv.

Thov caw nrog kuv peb thov Vajtswv ua ke: Kuv tug Vajtswv uas muaj kev hlub, yog tus tswv kawv thiab povhwm kuv lub neej! Thov Koj zam txim rau txhua zaug uas kuv qaug zog, cia kuv lub siab qaug mus caum tej kev sim siab ntxeev txias hauv ntiajteb thiab hnov qab Koj tes haujlwm cob rau kuv. Thov kom Vaj Ntsujplig tsim dheev kuv lub siab tig rov qab los kav lub lub siab hauv txoj kev ntseeg ruaj khov, feeb paub yeeb ncuab tej voj hluas cuab. Thov pab kom kuv muaj lub siab tawv mloog lus tagnrho kom mus tau lawv li Vajtswv koj lub siab nyiam. Kuv thov txhua yam los ntawm Tswv Yexus Khetos lub npe, Amees!

Ib tsoom phoojywg sawvdaws, cia li nres ib mentsis thiab tig los nug koj lub siab: Vajtswv tabtom hu koj los kav qhov chaw twg hauv koj sab ntsuj plig? Koj lub siab – thaj chaw uas yog Vajtswv feem – puas tabtom khoob lug vim koj niaj hnub mus caum “tej kev sim” hauv ntiajteb uas dab ntxwg nyoog tso tuaj ntxias koj?

Yeebncuab yeej muaj tswvyim phem heev, nws yeej siv tej haujlwm maj nroos los sim koj ua rau koj tsis nco ceev faj. Tiamsis tus Tswv cawm peb nws twb kov yeej lawm. Nws xav kom koj ua tib zoo kav thiab zov koj lub siab, thiab txhawb kom koj mus txeeb “tej qhov chaw tshiab “ rau Vajtswv Txojmoo zoo. Txhob cia koj tsis nco ceev faj hauv koj lub neej mus. Cia li tsim dheev, sawv khov kho ntawm koj thaj chaw zov, thiab pib kuaj ruam mus thaum Vajtswv hu.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.