Hăm đei layơ ih đĭ jơhngơ̆m wă pơkeh minh tơdrong jang wă kơjah pơkeh, na kơplah lăng đêl, ih hlĭch hlăch ‘bôh băt kơdih đei hiơt lê̆ kơ tơdrong gĭt kăl hloh? Trŏ lăp lu bơ̆n hrăt hrot bơ̆jang tơdrong jang Kră Yang, hăt kơnhăm dêh lăm dôm tơdrong jang wă pơjing, dôm tơdrong kơnhăm gah ‘ngoaih, na gô đei pơrơ̆ng ăn rơhông jơhngơ̆m bơ̆n kơdih- anih trŏ jơ̆ anih tơm tŏk bŏk kơ dôm tu tơdrong arih. Yua kơ ayăt kơ bơhngol lu bơ̆n jơ̆ minh ‘nu bơngai chă đon pơdăr dan hơmet linh blah. Sư ưh kơ blah tơklă, mă lei đei hơgei dêh tơ‘bôh ăn dôm “bơngai wă chă hơlĕnh” pơm kơ tơdrong kơnhăm đơ̆ng lu bơ̆n lĕch hlôi đơ̆ng kơđông kơjăp bơhngol. Ih hăm băt hơđăl tơpă anih mă Kră Yang pơjao kơ ih bơwei dang ei oei hơđơ̆ng ‘lơ̆ng?

Năr ‘nâu, ‘năr 30/06/2026, tơdrong tơdă Amăn Jơ Krao Khan Rim Năr apinh wơ̆n lu bơ̆n wang mơ̆ng pơwao hơdai Nơ̆r Kră Yang hăm bơngai chih Ben Ledger kơ̆l ‘bai TƠDRONG GĬT KĂL KƠ BƠWEI

“Kơchăng bĕ ling-lang wă kơ wei-lăng jơhngơ̆m ih, Yua kơ tơdrong arih tơm lĕch đơ̆ng noh.” (Tơdrong Pơđơ̆k 4:23)

“Ơ dăm, mơ̆ng bĕ nơ̆r inh pơma; Pơgling bĕ đon mơ̆ng bĕ dôm nơ̆r inh khan. ‘Nĕ ăn kơ lu nơ̆r noh ataih đơ̆ng măt ih, Iŏk răk bĕ lăm jơhngơ̆m ih. Yua kơ sư jing tơdrong arih kơ lu bơngai bu chă đei sư, Tơdrong pơklaih jĭ jăn lăm akâu.

Kơchăng bĕ ling-lang wă kơ wei-lăng jơhngơ̆m ih, Yua kơ tơdrong arih tơm lĕch đơ̆ng noh.” (Tơdrong Pơđơ̆k 4 : 20-23)

Inh dơ̆ng kơpal ‘nhĕt oei hơiuh đak ngom, lăng tơmang jơ̆p kơ cham să. Dôm kơ jơ ‘bôt ‘long hơkưr hơkar tăp dăr pĕng găn hlơp kơ bơngai, mă lei ưh kơ gơh wă kĕ ôn yua kơ re tơdrŏ. Nơ̆r ôr re krao hăm kơtơ̆ng re hiĕk chhôk hơnul kơplah jê̆ kơplah tơ ataih re jơwa đơ̆ng rim pah. Inh hul hơl yak năm, pơyar măt lăng jum dăr, phŏ kŭm ưh kơ hiơt hue lăng tơgah rŏng. Hnam pơk so bơih ‘bơ̆t tuch luch teh pơgar ‘nâu trŏ jơ̆ anih gĭt trŏ kơ wă ôn hla kơ đơ̆ng khŭl lu nhôn, mă lei hăm anăn bơngai gak kơđông, inh đei blĕk areh kơ dôm tơnăr ưh kơ băt kiơ noh- trŏ lu sư đei pơgăn tơdrong lăng đơ̆ng inh gah bri brah tơ gah rŏng.

Blư thar, dôm kơ nơ̆r ôr jreo re đơ̆ng pah to pơgar teh. ‘Bar khŭl nhôn blŭng hlôi kơ bri, druh kiơ̆ hloi đơ̆ng rŏng jơ̆ minh ‘nu khŭl gơ̆p. Inh pơ‘nher măt lăng, adrin lăng lu sư hăm đei chĕp ba hla kơ ayơ ưh. Mă lei ưh, tơpă lu sư đei khŭl buăl ‘bôh băt adrol kơ wă rôp iŏk hla kơ. Dang ei, kơdih lu sư đei hơyak jơ̆ng tơ kơpal kơdâu ôn wă kơ huay kơ đei rôp pơm bơngai đe phak.

Lăm kơplah lu sư ‘nao wă truh tơ anih hơđơ̆ng đơ̆ng khŭl kơdih, inh thar ‘bôh bôl bơngai tơdrŏ gah ‘ngiĕo. Minh ‘nu bơngai khŭl gơ̆p nai oei chop wă mơ̆t lăm anih cham rơhông, păng minh ‘nu bơngai dơ̆ng druh kiơ̆ đơ̆ng rŏng. ‘Bar ‘nu bơngai khŭl hơdai ‘nao wă jơ̆ bơngai đei druh, na wơ̆t dơ̆ng druh hloi khŭl gơ̆p.

Lăp tŏ sĕt, pêng ‘nu lu nhôn kơdâu lăm tơdrong druh puh ‘bar ‘nu bơngai oei kơdâu. Mă lei ră, lăp dôm dây đơ̆ng rŏng, đei mơn hrel hơngiĕo tơrŏng gah kơting kơdŭ: inh đei tơdrong jang gĭt kăl dêh- inh jơ̆ bơngai bơwei hla kơ!

Mă lei inh thar hơdơ̆r ră kŭm ưh pă tam bơih. ‘Nao wă hue lăng tơrŏng, plei nuih inh nhen thoi hơ oi: minh ‘nu lăm khŭl buăl đei năm tơ anih hlơp kơ hnam pơk đơ̆ng kơplah ayơ, tưk hla kơ khŭl nhôn na kơdâu hloi gah pah to cham.

Inh ôr re kher hơlŏng, athei ‘nhŏng oh pơdơh hloi tơdrong druh kiơ̆ dôm kơ ‘bôl tơmam pơhlŭ, mă lei ưh kơ đei yua. Hrŏng đăk “pơhlŭ kiĕk weh đơ̆ng kông” gơh hơgei dêh đơ̆ng khŭl buăl đei tơkơ̆l pơ̆k tơpă. Dang ei wă pơgăn bơngai tơtông hla kơ, khŭl nhôn ưh kơ pă đei trong ayơ nai jơ̆ kăl kơ blŭng tơ anăp tơklă gah cham khŭl pah noh, anih hơđong păng khŭl ayăt đei răp gô bơih. Inh kŭm đĭ jơhngơ̆m druh kiơ̆, mă lei bôl sư rai ataih na hiong ‘biao.

Ưh tim mă đei ‘bar phŭt đơ̆ng rŏng, tôm tơdrong đei truh tơ pơkeh đĭ. Anih kăl kơ bơwei, hla kơ đei hiong lăm ti khŭl buăl.

Đĭ đăng glăi răm ‘noh pơwao tơ tuch luch ‘bơ̆t ‘bar chư “pơlei”. Inh đei ‘bôh hloi ‘bơ̆t tŏk bŏk anih kơ̆l tơm đơ̆ng khŭl kơdih, răp bơwei đĭ đơ̆ng blŭng, mă lei đei pơrơ̆ng achăng anih kăl bơwei lăm minh jơ ưh kơ bơngơ̆t jơ̆ minh đĕch- jơ mă pơdrơ̆ng đĭ tơdrong pơjei mă inh ưh kơ đei tơchĕng truh.

Đei lơ chăl trong lăm Sơ̆p Hla Bơar Nơ̆r ‘Bok Kei-Dei pơma gah kơ̆l ‘bai pơlei. Kơplah ‘Bok Kei-Dei krao Abram, sư đei yak năm truh tơ minh dêh char ‘nao păng pơm bơsŭn lăm tŏk bŏk kơ pơlei ‘noh. Mă lei, sư ưh kơ sĭ hmă đĕch jơ̆ pơm minh pôm bơsŭn:

“Đơ̆ng noh, sư yak găn kông groi gah hơlĕch kơ pơlei Bethel, na pơm bơsŭn; bơmơ̆t kơ noh Bethel, tơ gah hơlĕch đei Ahi. Na sư pơm minh pôm chơnang soi tơ noh kơ Kră Yang wă krao apinh Sư.” (Blŭng a 12:8)

Chơnang soi kŭm lei lăi thoi sơtơ̆p minh pôm hla kơ bơhngol. ‘Noh jơ̆ nơ̆r roi tơbăt đon lui, pơkă pơkăm anih pơgơ̆r đơ̆ng Kră Yang lăm pơlei bơ̆n, hơdai hăm gơnang tơdrong mơsêh mơyang wă bơwei anih noh. Hơđăl, Sư đei pơgơ̆r hloi lăm tŏk bŏk anih teh đei pơkă.

Rơbâu sơnăm đơ̆ng rŏng, minh ‘nu Bơngai Tơmoi nai đei truh. Nhen thoi gah rŏng bơmơ̆t anoh Abram pơm chang nang soi sơ̆, Yang Yêsu đei pơm ‘batem. “Đơ̆ng noh na Yang Bơhngol ‘Lơ̆ng anhăk ba Yêsu tơ char glă kơdrô̆ Sư, wă kơ yŏng pơgơ̆r yang kơnê̆ anăn sư Satan pơlong lăng Sư.” (Mathiơ 4:1). Đơ̆ng tơdrong kĕjei mơsêh mơyang ‘bơ̆t anăp ayăt, Yang Yêsu pơtrơp tơdrong jang pơjing dêh char Sư pơgơ̆r lăm teh đak. Dang ei, tơdrong lăng ‘noh ưh pă đei lăp ‘bơ̆t dêh char Isơrael lăm teh đak, mă Sư oei pơih trong wă yak lăm trŏ bơhngol kơ rim ‘nu lu bơ̆n. Lăm kơplah oei lăm hnam phak đơ̆ng tơdrong yoch, Tơ’ngla Dŏng Pơklaih tôm mah đei ‘bôh bơih wă hrĕch kơtĕch tơlei glang, ba ăn tơdrong rơngei truh kơ dôm lu bơngai oei lăm hnam phak.

Mă lei Sư pơklaih lu bơ̆n wă pơm kiơ?

Ăn kơ lu bơ̆n pơ̆n nuih yak mơ̆t păng tơgar iŏk dôm “pơlei” mă ‘Bok Kei-Dei krao. Wă kơ lu bơ̆n krăng kơchăng ‘bơ̆t anăp dôm tơdrong chă đon hơlĕnh pơdăr đơ̆ng Satan, adrin huay kơ aleh hơđong yua kơ đơ̆ng dôm “tơmam pơhlŭ” teh đak kơplah sư chă trong tơgar iŏk dôm anih teh ‘lơ̆ng rŏ trŏ gah Kră Yang. Păng ăn kơ lu bơ̆n tơdrong pơlung tơiung, hơmet ăn kơ ‘nhŏng ŏh hơdai đon lui, hơdai băl yak tơ anăp wă pơih dêh char Tơdrong ‘Nao ‘Lơ̆ng lăm dôm kơ trong ‘nao.

Apĭnh đĭ đăng krao khan hơdai: Kơkuh kơ Kră Yang ‘mêm mơnat, Tơ’ngla bơwei păng pơgơ̆r lăm chăl arih kon! Apinh Kră Yang huay kơ jô̆ yo kơ dôm kơplah kon rơdu, ăn kơ jơhngơ̆m kơdih đei hlŭ kiơ̆ dôm kơ tơmam pơhlŭ đơ̆ng teh đak păng ưh kơ hiơ̆k bơngơ̆t anih mă Ih pơjao. Apinh Yang Bơhngol ‘Lơ̆ng Ih rŏu tơiung bơhngol kon, tơgŭm kon ling lang kral kơchăng bơwei kơđông đon lui, gơh ‘bôh băt dôm tơdrong chă trong đơ̆ng khŭl linh ayăt. Apinh ăn kơ kon jơhngơ̆m pơ̆n nuih păng tơdrong chu yom tôm mah wă yak năm lăm tơdrong ‘lơ̆ng rơgoh Ih wă na pơih Dêh Char Ih Pơgơ̆r. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, athei pơdơh tŏ sĕt tŏk bŏk dôm tơdrong hiơ̆k bơngơ̆t đơ̆ng tơdrong arih păng jet jơhngơ̆m kơdih: ‘Bok Kei-Dei dang ei oei krao ih dơ̆ng gak bơwei ‘bơ̆t anih ayơ lăm chăl arih bơhngol! Lei jơhngơ̆m ih- anih trŏ gah tơdrong pơgơ̆r đơ̆ng Kră Yang- hăm oei đei achăng rơhông yua kơ ih hăt kơ druh kiơ̆ dôm “lu bơngai pơdăr” mă yang kơnê̆ wơh truh dah ưh? Ayăt hơlĕnh pơdăr, sư ling lang yua tơdrong hrăt hrot păng tơmam pơhlŭ teh đak wă pơm kơ lu bơ̆n ưh kơ hiơ̆k bơngơ̆t kơ anih trŏ bơwei. Mă lei Tơ’ngla Dŏng Pơklaih lu bơ̆n đei kĕ jei. Sư wă kơ ih bơwei kơjăp kơđông bơhngol, păng pơtrŭt ih năm tơ anăp wă iŏk pơgơ̆r minh “anih teh ‘nao” kơ Tơdrong ‘Nao ‘Lơ̆ng. ‘Nĕ kơ ăn tơdrong pơhlŭ đei anih lăm trong yak năm bơhngol ih. Athei krăng kơchăng, dơ̆ng kơjăp anih tơdrong jang gak kơđông, păng wă yak năm hloi tơdah Sư krao.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.