Lơ bơngai lăm lu bơ̆n đei tơpŭ lăm hnam dơnŏ lui kơ Kră Yang, wơ̆ ‘lŏ hơdai lăm Hnam Akŭm, băt rơđah kơ Nơ̆r ‘Bok Kei-Dei, băt hlôh răk nơ̆r bơtho păng đei ră roi gah Kră Yang Yêsu. Na đei tơdrong lăng nhen jê̆ mă lei tă kơ ataih dêh: ‘noh jơ̆ ataih đơ̆ng kơ̆l ‘ngok truh tơ plei nuih. Lei ‘Bok Krist mă lu bơ̆n oei hlôh băt ‘noh hăm sĭt tơpă jơ̆ Kră Yang pơgơ̆r tơdrong arih lu bơ̆n dah ưh, lei Sư nhen thoi bơngai pơjing tơdrong lui kiơ̆ kơ hlôh băt lu bơ̆n đĕch?

Năr ‘nâu, ‘năr 30/07/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Maria Schleicher kơ̆l ‘bai ‘MĂNG IĔ

“Yêsu pơma pơtih gia dơ̆ng kơ đe tơdrong ‘Bok Kei-Dei wă pơgơ̆r bơ̆n thoi âu: “Đei minh ‘nu bơngai năm rei adrĕch ‘ba ‘lơ̆ng tơ mir sư. ” (Mathiơ 13:24)

“Đei bơngai jet Sư: “Ơ ‘Bok, bơngai gơh klaih đơ̆ng tơdrong yoch lăp tŏ sĕt đĕch dah kiơ?” Na Yêsu khan kơ lu sư: “Iĕm athei adrin mơ̆t trong ‘măng iĕ bĕ yua kơ đei lơ bơngai nŏng wă mơ̆t ră ưh kơ gơh. Pơtih gia Inh mă ‘Bok tơ’ngla hnam gô tang lê̆ ‘măng, na lăp iĕm dơ̆ng dơdŭ ‘măng ‘bơ̆t ‘ngoaih khan: ‘Ơ ‘Bok, pơih ăn kơ nhôn ‘măng,’ na Inh khan: ‘Inh ưh kơ băt iĕm đơ̆ng yơ.’ Na iĕm khan tơwih kơ Inh dơ̆ng: ‘Nhôn bơngai đơ̆ng đêl sŏng sa păng Ih lah. Ih kư̆m bơtho tơ pơlei nhôn.’ Na Inh tơl tơwih dơ̆ng: ‘Inh khan kơ iĕm tơpă, Inh ưh kơ băt kơ lu iĕm ôh. Weh tơ nai năm, iĕm bơngai kơnê̆ ngăl.” (Luka 13:23-27)

Kơplah đơ̆ng oei ‘lơ̆p, inh băt kơ Kră Yang Yêsu noh bu: Sư jơ̆ Kon ‘Bok Kei-Dei, Tơ’ngla jur tơ teh đak wă dŏng pơklaih kon bơngai đơ̆ng tơdrong yoch. Tơdah đei bu jet, inh gơh tơl drơ̆ng rơđah dôm tơdrong tơpă tơpăt noh ‘bônh đĕch. Mă-lei, pơma mă tơpă, đơ̆ng lăm jơhngơ̆m, inh tam mă băt kơ dôm nơ̆r mă đơ̆ng kơdih. Yua kơ kiơ inh kăl kơ bu dŏng pơklaih? Yua kơ kiơ lăp minh Yang Yêsu đĕch pơkeh tơdrong dŏng pơklaih noh? Inh ưh kơ rơđah nơ̆r jet ‘nâu. Krê dêh, đon tơchĕng đơ̆ng minh ‘nu bơngai ‘lơ̆p lăm “tơdrong lui kŏng yăo” ba ăn kơ inh hơđơ̆ng ưh kơ tơpă, pơm kơ inh lăp đon dêh kơ tơdrong ưh kơ tơpă đơ̆ng kơdih inh, hue lăng pơm ưh kơ băt kơ tơdrong trŏ tơpă.

Tơdrong arih đon lui inh kơplah ‘noh jơ̆ tơ’bưh gah ‘nguaih hăm Nơ̆r ‘Bok Kei-Dei đĕch. Inh ling lang mơ̆ng dôm nơ̆r hơ’mon lăm Nơ̆r ‘Bok Kei-Dei, đei răk iŏk păng pơma rok pơlơ̆k dôm nơ̆r bơtho, dôm tơdrong gơh hơgei gah Tơdrong ‘Nao ‘lơ̆ng. Mă-lei, đon lui inh hăm ‘Bok Kei-Dei lăp lăm đon tơchĕng ưh kơđei jrŭ. Đon lui inh ưh kơ đei chăt rơh lăm jơhngơ̆m. Inh pơsĭt hăm nơ̆r pơma khan Kră Yang Yêsu jơ̆ ‘Bok Dŏng Pơklaih, mă-lei gah lăm, inh tam mă hlôi mơn đei tơdrong tơplih mơsêh mơyang đơ̆ng ‘Bok Krist. Tơdrong drơ̆ng iŏk đơ̆ng tơdrong gơh hơgei kơdih sư tơhiong lê̆ jơhngơ̆m pran wă kơ gơ̆ lê̆ tơdrong yoch lăm jơhngơ̆m tam mă sơng iŏk tơdrong ‘mêm mơnat.

Đon lui inh ăn kơ Kră Yang Yêsu, jơ̆ dôm lu nơ̆r pơma ‘bơ̆t ‘bơ̆r đĕch. Kơplah tơchĕng ling lang pơdŏng păng hơlĕnh kơdih, inh hlôi pơm kơ Kră Yang Yêsu nhen thoi “tơmam bơwei akâu wă huay kơ lôch” ăn kơ tơdrong arih kiơ̆ kơ sĕch akar. Rim ‘măng huŏng lăm hlŭt tơdrong yoch, inh pơlung kơdih păng tŭk lê̆ đĭ-đăng tơdrong areh kơ tơdrong yoch mă oei đei lăm jơhngơ̆m hăm tơdrong tơchĕng kơnê̆ tơpă: inh lui sơng iŏk Kră Yang Yêsu, sĭt Sư gô mơnat ăn kơ inh, păng tơmam apah đơ̆ng pơlei ‘lơ̆ng Sư đei hơmet ăn boih. Inh đei yua tơdrong ‘mêm tih đơ̆ng ‘Bok Kei-Dei jing tơmam pĕng pah ‘nguaih kơ jơhngơ̆m pơ-ang đơ̆ng kơdih, dan kơdih lăm anih kơnhăm tŏkbŏk, arih kư̆ kă păng ưh kơ ‘mơ̆ng nơ̆r krao athei tơbral kơdih tơdrong yoch hăm chu yom mă Kră Yang Yêsu wă.
Truh tơ minh năr, tơdrong ‘mêm mơsêh mơyang đơ̆ng Yang Yêsu mơ̆t păng tơplih tôm tơdrong trong tơdrong arih inh. Yua kơ tơdrong ‘mêm Sư, dôm tơdrong mă inh tam mă băt đơ̆ng tơdrong hlôh wao hăm kơ̆l ‘ngok, tĕnh kơ ‘bôh rơdah, hơtŭt bơm jrŭ lăm jơhngơ̆m inh yua kơ jơhngơ̆m pran mơsêh mơyang Yang Bơhngol ‘Lơ̆ng. Lăm jơ phŭt noh, inh sơtơ̆p kŭl tăng, tơbral tơdrong yoch tơpă păng chu yom, pơyơ̆r tôm tơdrong arih wă pơ-ư tưk tơ iung Kră Yang Yêsu jing ‘Bok Dŏng Pơklaih păng Tơ’ngla Pơgơ̆r jơhngơ̆m inh.

Thoi Nơ̆r Kră Yang đei chih lăm Luka 13:23-27, kơplah đon lui rai wơ̆ ‘lŏ păng đei lăng lăm Nơ̆r ‘Bok Kei-Dei, inh ling lang mơn đei jơhngơ̆m ơh sơ’ngon ưh kơ gơh pơma thoi yơ rim ‘măng đŏk truh tơ anih âu. Tơdrong pơm kơ inh chhŭr nuih ưh kơ sĭ đơ̆ng tơdrong pơtă kơ đe, dah ‘maih wă đei dơ̆ng minh trong nai ba truh tơ tơdrong arih khŏm khŏm hơdai hăm ‘Bok Krist. Mă tơpă, tơm rơh đơ̆ng tơdrong âu jing đơ̆ng tơdrong inh ‘bôh dơ̆ng kơdih inh jơ̆ dôm lu tơdrong hlôi hloh đơ̆ng ki sơ̆ yua kơ dôm nơ̆r chih âu, păng hlôh wao minh tơdrong tơpă ưh kơ wă drơ̆ng: đei lơ bơngai hrei ‘nâu oei arih lăng nhen lei-lăi thoi kơdih inh lăm dôm năr sơnăm măt tol sơ̆ ‘noh.

Kră Yang Yêsu bơtho lu bơ̆n khŏm “adrin mơ̆t trong ‘măng iĕ, yua kơ… đei lơ bơngai nŏng wă mơ̆t ră mă ưh kơ gơh.” Nơ̆r “adrin” âu pơtih kơ dôm tơdrong tơblah gah đon lui tih dêh, vă tơbăt đĭ-đăng tơdrong arih kư̆ kă kiơ̆ kơ sĕch akar. Kơplah jơhngơ̆m oei đei kron lăm hlŭt tơdrong yoch, tŭk lê̆ dôm lu tơdrong hiôk hian lăm kiơ̆ kơ lăm teh đak. Đei lơ bơngai băt kơ Kră Yang Yêsu, mă-lei Sư tam mă đei băt kơ lu sư. Lu bơ̆n đei pơyom lăm dôm jơ akŭm kơkuh, hơri dôm ư-ang kơ ‘Bok Kei-Dei, păng thoi nơ̆r pơma rok pơlơ̆k gah Kră Yang Yêsu prăt năr. Mă-lei, tơdah jơhngơ̆m lu bơ̆n tam mă mơn đei tơplih tôm tơdrong đơ̆ng tơm rơh păng tam mă chu yom ‘bơ̆t anăp ‘Bok Krist, lu bơ̆n oei dơ̆ng ‘bơ̆t anăp gô pơ̆k huŏng, glăi răm kơplah mơ̆t tơ ‘măng iĕ mă ba truh tơ tơdrong arih khŏm khŏm. Truh tơ jơ lu bơ̆n kăl lăng tơ lăm jơhngơ̆m kơdih, păng rơih iŏk “’măng iĕ” rim năr. Wă kơ kơplah năr ‘noh truh, ‘Bă Tơ Plĕnh gơh ư-ang pơma hăm lu bơ̆n: “Inh băt kơ kon!”

Apĭnh đĭ đăng krao khan hơdai: Kơkuh kơ Kră Yang, jơ̆ ‘Bă Tơ Plĕnh ti, kon băt kơ ‘măng ba mơ̆t tơ dêh char Ih jơ̆ ‘măng iĕ. ‘Măng ‘noh ‘iĕ’ ưh kơ sĭ yua kơ Ih ưh kơ sơng iŏk đĭ-đăng kon bơngai, yua kơ lăp minh trong đĕch mơ̆t tơ lăm. ‘Măng ‘noh ăn kơ lu bơngai mă lui gơnang tơpă kơ Kră Yang Yêsu đĕch. Apinh Kră Yang ‘mêm mơnat păng dŏng kon tŭk lê̆ đĭ-đăng tơdrong pơgăn, dôm tơdrong đơ̆ng sĕch akar oei dui iŏk kon, pơm kơ kon tam mă lui sơng iŏk tơpă păng pơjao tơdrong arih kon ăn kơ Kră Yang Yêsu. Apinh Yang Bơhngol ‘Lơ̆ng Ih tơ’blŏk lăm jơhngơ̆m kon, tuh ăn kơ kon đei jơhngơ̆m pran wă kơ kon băt tơbral tơdrong yoch tơpă, arih ataih đơ̆ng tơdrong yoch. Apinh Ih tơplih tôm tơdrong pơjao tơdrong arih kon ăn kơ Ih. Đơ̆ng jơ phŭt ‘nâu, kon tŭk lê̆ tơdrong pơgơ̆r kơdih lăm trong tơdrong arih kon, lăp minh Ih đĕch jơ̆ ‘Bok Kei-Dei kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơdah Nơ̆r Kră Yang hrei ‘nâu pơm kơ đon tơchĕng buăl, pơm kơ buăl tơtăm kơ đơ̆ng kơdih đei lăm anih dêh char ‘Bok Kei-Dei, inh krao apinh buăl athei ‘măn jơ krao khan hăm Sư. Apinh Kră Yang pơchrang păng tơ’bôh rơđah đĭ-đăng dôm lu tơdrong yoch mă oei chăt rơh lăm jơhngơ̆m, pơgăn buăl đei tơdrong arih hiôk hian lăm ‘Bok Krist. Apinh Yang Bơhngol ‘Lơ̆ng pơm kơ jơhngơ̆m đon buăl rơmuăn, wă kơ buăl băt hlôh tơdrong tơpă păng chu yom Kră Yang . Athei tơwih rŏng kơ tơdrong yoch, tŭk lê̆ trong arih so, păng kơdâu mă hrĕnh năm tơ tơpang ti ‘mêm mơnat tih đơ̆ng ‘Bok Dŏng Pơklaih Yang Yêsu.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.