Kră Yang jơ̆ Tơ’ngla ‘lơ̆ng tơpăt. Sĭt buăl mơ̆ng tơdrong ‘nâu lơ ‘măng boih lăm dôm nơ̆r bơtho dah đơ̆ng lăm Sơ̆p hla bơar ‘Bok Kei-Dei. Mă-lei, tŏk‘bŏk tôm tơdrong hrăt hrot lăm tơdrong arih, kơplah tơ’bơ̆p tơdrong pơlong lăng, buăl hlôi đei mơn tơdrong ‘lơ̆ng tơpăt Kră Yang đơ̆ng lăm tơdrong arih đơ̆ng kơdih buăl ưh? Dah Nơ̆r Sư oei lăm tơdrong gơh hơgei thoi kơ chư ataih đĕch?

Năr ‘nâu, ‘năr 31/07/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Jessica Teed kơ̆l ‘bai DÔM NƠ̆R PƠKĂ GÔ JING KEH ‘LƠ̆NG

“Kră Yang gô pơm keh dôm tơdrong Sư pơkă kơ inh. Ơ Kră Yang, tơdrong ‘mêm Ih oei oei ling-lang; Apinh Ih ‘nĕ kơ lê̆ dôm tơdrong jang đơ̆ng ti Ih.” (Hơriso 138:8)

“Mă inh oei lăm pơmat-tat, Ih wei tơdrong arih inh. Ih yơ̆r ti tơblah plơ̆ kơ tơdrong mă lu ayăt hil kơ inh, ti ‘ma Ih dŏng pơklaih inh. Kră Yang gô pơm keh dôm tơdrong Sư pơkă kơ inh. Ơ Kră Yang, tơdrong ‘mêm Ih oei oei ling-lang.Apinh Ih ‘nĕ kơ lê̆ dôm tơdrong jang đơ̆ng ti Ih.” (Hơriso 138:7-8)

Rim ‘măng tơchĕng pơwao kơ dôm nơ̆r pơkă đơ̆ng ‘Bok Kei-Dei, đon tơchĕng inh ling lang ‘blŏk kơ Abraham. Kră Yang pơkă ăn kơ sư dôm nơ̆r pơkă tih, dôm tơdrong pơkă tih truh tơ pơm kơ tơdrong hlôh wao hăm kơ̆l ‘ngok đơ̆ng kon bơngai tơnat kơ wă lui ngeh tơpă. Kră Yang khan gô jing ‘bă kơ lơ adrĕch adrŭng păng Kră Yang ling lang bơwei sư. Păng ih hăm băt ưh, Sư kư̆m pơkă gô hiĕm ‘me wei rong lu bơ̆n thoi noh mơ̆n (Mathi-ơ 6:25-34).

Đei minh ‘măng, inh wă hiong kơ tơdrong jang, na truh tơ hiong anih oei. Lăm dôm năr noh, kơplah inh lăng ‘bôh tơdrong răm ‘băm lăm tơdrong arih kơdih. Inh băt bơnê tơpă kơ lu ‘nhŏng oh lăm Hnam Akŭm. Đĭ-đăng bôl buăl chro ti sơng iŏk inh ăn anih rai lăp kơ oei, lăm kơplah inh oei kơ’bah năm chă tơdrong jang păng hla bơar tŏk iŏk jên truh hloh kơ năr ‘mong ăn bơih. Tơpă, tơdrong khŏm tơjur jơhngơ̆m tơ ala wă drơ̆ng iŏk tơdrong tơgŭm đơ̆ng lu bơngai nai jơ̆ minh tơdrong ưh kơ ‘bônh ôh. Jơhngơ̆m pơ-ang pơm kơ inh lơ ‘măng ưh kơ gơh pơma tơlĕch dôm nơ̆r bơnê kơ dôm tơdrong inh đei, yua kơ tơdrong noh ưh kơ thoi tơdrong arih mă inh hlôi tơchĕng adrol bơih. Inh ‘bôh kơdih nhen minh ‘nu bơngai răm bơih, păng pơm tơdrong chhŭr nuih đơ̆ng kơdih inh. Hăm minh ‘nu bơngai rai wơ̆ ‘lŏ, tơdrong arih gơnang kơ lu bơngai nai jơ̆ minh tơdrong sơ’ngon dêh, hloh loi kơplah lu bơ̆n ling lang dan tơdrong tơchĕng wă kơ arih đei đơ̆ng kơdih.

Mă-lei,lăm kơplah đei tơdrong pơlong lăng mă lăng nhen wă dui tơrŏng, Kră Yang tam tưk tơiung inh. Sư pơm ăn kơ inh băt hlôh tơdrong mơsêh mơyang: tơdrong ‘mêm tih đơ̆ng Sư kư̆m wă ăn kơ bơngai răm ‘băm thoi kơ inh. Păng tơdrong kăl hloh, Sư bơtho kơ inh minh tơdrong pơhrăm tơm rơh lăm trong yak năm lăm đon lui, ‘noh jơ̆ chu yom păng lui gơnang tôm tơdrong kơ minh ‘nu Sư đĕch.

Abraham ki sơ̆ noh kư̆m đei tŭk lê̆ jơhngơ̆m pơ-ang chhŭr nuih thoi noh mơ̆n. Chang gô Kră Yang tam mă đei layơ khan ‘bônh, păng inh đei lơ ‘măng pơ̆k huŏng. Mă-lei Nơ̆r ‘Bok Kei-Dei pơlung jơhngơ̆m inh khan, mă đon lui gơnang đơ̆ng ‘bok yă kư̆m đei jơ phŭt rơdu mơ̆n.

‘Bok Kei-Dei đei pơkă hăm Abraham: sư păng Sarai ưh kơ lăp khan jing mĕ ‘bă đĕch ôh, mă-lei sư gô jing ‘bă kơ minh adrĕch adrŭng tih. Kơplah Kră Yang krao păng tơ’bôh rơđah tơdrong pơkă tih ‘noh lăm tơdrong arih sư, Abraham đei 75 sơnăm bơih (Blŭng a 12:1-4).

Mă-lei, kơplah tơdrong tơpă ‘bơ̆t anăp ưh kơ trŏ thoi jơ năr mă tơdrong hlôh wao đơ̆ng kon bơngai chang gô, Abraham pă đei hiôk. Sư tơchĕng wă “tơgŭm” ‘Bok Kei-Dei, sư ‘bich hơdai hăm Hagar, păng jing đei kon Ismael kơplah sư 86 sơnăm bơih (Blŭng a 16:16). ‘Noh jơ̆ tơdrong juăt kơ pơm đơ̆ng lu bơ̆n: kơplah ‘bôh tôm tơdrong oei dơ̆ng ‘bơ̆t minh anih, lu bơ̆n wă kơ đơ̆ng kơdih hloh kơ tơdrong adrin chang gô păng lui gơnang kơ Kră Yang.

Mă khan đei tơpŭ kơ Ismael, mă-lei tơdrong pơkă đơ̆ng tơdrong tơdă ‘Bok Kei-Dei ưh kơ tơplih ôh, Sư pơkă nơ̆r ‘noh khŏm đei pơm keh đơ̆ng Sarai. Păng, Abraham đei 100 sơnăm kơplah tơpŭ kơ Isăk. (Blŭng a 21:5).

Buăl đei layơ tơchĕng ‘bôh tơdrong khŏm chang gô đunh truh tơ 25 sơnăm, wă lăng ‘bôh nơ̆r pơkă đơ̆ng Kră Yang pơm keh ưh? Lăp tơchĕng đĕch kư̆m ‘bôh đunh dêh boih. Rŏlăng, buăl kơplah ‘nâu kư̆m oei lăm trong yak năm đunh păng gleh lap nhen thoi noh mơ̆n.

Chang gô Kră Yang ‘Bok Kei-Dei tam mă đei layơ khan ‘bônh, mă-lei Kră Yang bơ̆n jing Tơ’ngla ‘bĕnh kơ tơdrong ‘mêm mơnat. Mă khan Abraham kư̆m đei jơhngơ̆m hăt hot, mă khan đon lui sư tam mă ‘lơ̆ng tôm, Kră Yang oei lăng jơhngơ̆m băt gơnang đơ̆ng sư. Tơdrong ‘lơ̆ng tơpăt đơ̆ng Kră Yang ưh kơ gô lu bơ̆n ‘lơ̆ng tôm ‘mơ̆i. Sư lăng đơ̆ng đon lui gơnang hmă đĕch păng Sư drơ̆ng iŏk dah jơhngơ̆m băt kơ gơnang kơ Sư tŏkbŏk lu bơ̆n oei sơ’ngon. Sư krao Abraham jơ̆ bơngai ‘lơ̆ng tơpăt yua kơ đơ̆ng đon lui ‘noh (Rôm 4:13-22). Abraham chang gô Kră Yang, păng đơ̆ng lăm trong yak năm chang gô ‘noh, sư đei tơ’bơ̆p Kră Yang.

“Kiơ̆ kơ tơdrong juăt kon bơngai, mưh wă pơkă băl tơdrong kiơ wă kơ kơjăp, sư pao anăn tơ’ngla Kră Yang sư kơdih wă kơ đĭ-đăng bơngai lui kơ nơ̆r sư. Kơplah ‘Bok Kei-Dei pơkă kơ Abraham sơ̆, Sư wă kơ đe băt kơ Sư gô tơgŭm tơpă, na Sư ưh kơ đei pao anăn bu nai ôh yua kơ ưh kơ đei bu tih hloh kơ Sư, Sư pao anăn Sư kơdih đĕch. Sư khan kơ Abraham thoi âu: “Inh wă tơgŭm ih tơpă, Inh gô ăn kơ ih đei lu kon sâu lơ.” Abraham lui tơpă, sư chang gô truh tơ ‘Bok Kei-Dei ăn kơ sư tơpă.” (Hêbrơ 6:13-16)

Tơdrong ‘noh kư̆m trŏ tôm tơdrong lăm tơdrong arih buăl mơ̆n. Dah ih oei gleh lap chang gô nơ̆r pơkă wă ăn đơ̆ng Kră Yang, apinh buăl athei đei jơhngơ̆m kơjăp: tơdrong chang gô đơ̆ng buăl tam mă đei layơ khan ưh kơ đei yua ôh. Kră Yang ‘lơ̆ng tơpăt tôm tơdrong, păng kơplah trŏ kơ jơnăr đơ̆ng Sư ling lang ‘lơ̆ng tôm hloh. Sư băt rơđah đon lui gơnang đơ̆ng buăl, Sư băt hlôh buăl oei kăl tơdrong kiơ păng trŏ kơ jơnăr wă ăn. Kră Yang tam mă đei layơ khan ưh kơ trŏ. Sư sĭt gô pơm keh tôm kơ nơ̆r pơkă lăm tơdrong arih buăl kiơ̆ trŏ kơ jơnăr ‘lơ̆ng tôm hloh đơ̆ng Sư, mă khan dang ei dah tơ anih đei tơdrong arih khŏm khŏm ning mônh.
Athei dan nơ̆r lăm Hơriso 138:8 tưk tơiung jơhngơ̆m buăl jơ ‘nâu:

Kră Yang gô pơm keh dôm tơdrong Sư pơkă kơ inh. Ơ Kră Yang, tơdrong ‘mêm Ih oei oei ling-lang; Apinh Ih ‘nĕ kơ lê̆ dôm tơdrong jang đơ̆ng ti Ih.”

Apĭnh đĭ đăng krao khan hơdai: Kơkuh kơ Kră Yang mă ‘mêm, kon pơyơ̆r nơ̆r bơnê tih kơ Ih yua kơ băt rơđah dôm tơdrong arih tơ anăp đei bơwei kơjăp lăm tơpang ti Ih. Kơplah kon lăng ‘bôh dôm kơ tơnang ‘măng tang lê̆ păng dôm tơdrong hlôi hloh, apinh Ih tơgŭm kon băt hlôh Ih oei pơgơ̆r lăm tơdrong arih kon. Apinh Ih iŏk lê̆ tơdrong tơtăm, păng bơtho kon băt gơnang lăm tơdrong ‘mêm đơ̆ng Ih rim pơge. Apinh Ih ăn kơ kon đei đon lui kơjăp, dah đei tơdrong gleh truh, kon oei băt hơri bơnê kơ tơdrong ‘lơ̆ng tơpăt đơ̆ng Ih. Kon kŭp kơ̆l krao khan lăm anăn Yang Yêsu Krist. A-men.

Ơ lu bơngai mơ̆ng mă ‘mêm kơ eng, dah Kră Yang đêl hlôi đei tơdrong chơ̆n hăm Abraham lăm lơ tơdrong rơdu, Sư kư̆m gô thoi noh hăm buăl păng inh lăm năr âu mơ̆n. Jơ năr đơ̆ng teh đak âu oei pơtrŭt buăl, mă-lei jơ năr đơ̆ng pơlei ‘lơ̆ng yak năm hăm tơdrong ‘mêm păng tơdrong ‘lơ̆ng tơpăt. ‘Nĕ pă hli kơ dôm sơnăm chang gô, yua kơ Kră Yang gô yua dôm sơnăm ‘noh vă ‘bơ̆ hơmet păng tơplih lu bơ̆n. Hơpơi kơ buăl păng inh gô yak hlôi đơ̆ng tơdrong pơlong lăng âu hăm jơhngơ̆m ‘bĕnh kơ chang hơmĕng, krăng hơmet wă yak năm lăm tơdrong proh hơmet ‘lơ̆ng rŏ mă Sư đei pơkă ăn kơ lu bơ̆n.

Ơ lu bơngai mơ̆ng mă ‘mêm kơ eng, athei hlôh băt khan ‘Bok Kei-Dei trŏ jơ̆ Tơ’ngla ăn kơ lu bơ̆n jơ năr, gơh hơgei păng kŭm bơwei lu bơ̆n hlôi kơ dôm tơdrong pơlong lăng. Năr ‘nâu, athei tơchĕng lăng ih đei tơ’bôh jơhngơ̆m thoi yơ kơplah ‘nao gơh đei minh tơdrong kĕ jei, ih pơyơ̆r ư-ang kơ Kră Yang dah drơ̆ng tơdrong kĕ đei gah kơdih? Athei krao apinh Kră Yang tơ’bôh dôm anih mă ih oei dan kơdih pơm tơm tơplih kơ Sư. Păng tuch luch, apinh Sư tơgŭm ih hlôh băt tơdrong iĕ ioch păng đei hơgăt đơ̆ng kơdih, wă kơ ih băt chu iŏk đon ala, lui gơnang păng yak năm hăm Kră Yang lăm tôm tơdrong.