Tơdrong juăt kơpơm nhen đao ‘bar pah măt: sư pơm kơjăp đon lui, mă-lei đơ̆ng noh kư̆m pơm tơ hiong lê̆ tơdrong pơyom mơnat. Lu bơ̆n lăng lu bơngai noh jơ̆ tơdrong juăt hmă đĕch. Dôm kơ pơma dơnuh ưh pă đei lơ thoi sơ̆ boih. Dôm nơ̆r jet rai tŏsĕt. Kư̆m đei, tơdrong lu bơ̆n pơgơ̆p hăm Kră Yang kư̆m đei truh lăm tơdrong thoi noh mơ̆n. Lu bơ̆n ưh kơnhăm kơ Sư, năm chă Sư kơplah đei tơdrong kăl đĕch, tơplih kơ chang hơmĕng wă đei oei hơdai hăm Tơ’ngla ‘mêm kơ bơ̆n. Mă-lei, Sư oei chang gô lu bơ̆n wih tơ anih hrĕp, pă minh ‘măng dơ̆ng tơ’bơ̆p tơdrong arih krao khan rơkah rơkai, ưh kơ đei layơ hrĕng kro.

Năr ‘nâu, ‘năr 01/08/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Marissa Nordlum kơ̆l ‘bai ANIH HRĔP

“Dah iĕm wă krao khan, iĕm athei tang ‘măng kơdrô̆ tơ anih hrĕp. Iĕm krao khan thoi noh na iĕm tơchĕng truh tơ ‘Bă bơ̆n Yang mă bơ̆n ưh kơ gơh ‘bôh. Mă iĕm krao khan tơ anih hrĕp Sư kư̆m ‘bôh mơ̆n, Sư ăn tơdrong iĕm apinh noh tơpă.” (Mathiơ 6:5-6)

Kơplah oei pơhrăm tơ hnam pơhrăm tih, gah inh juăt kơ yak reh brŏ păng hơri tơ lu hnam et kaphê jơ̆p kơ pơlei wă chă thim jên. Inh juăt kơ yak năm dăr tơ kơchơ tơ pơlei tih, jet lăng lu sư kăl kơ đe reh brŏ hơri ưh, na chĕp ba gi-tar păng tơmam kơdih năm reh hơri. Juăt hmă, inh gô đei hơmet adrol đơ̆ng ‘bar pêng giĕng adrol kơ măng hơri. Mă-lei, kư̆m đei inh reh hơri “pơsuh hăt hot”, truh kơ năr reh hơri măng ‘noh inh gô hơri ‘bai kiơ. Kơplah ưh kơ đei jơ năr pơhrăm reh hơri, inh khŏm iŏk ‘bai đêl juăt kơ hơri– dôm ‘bai hơri inh răk lăm đon truh tơ tep măt kư̆m gơh reh păng hơri tơproh ‘lơ̆ng.

‘Nao brei mơsơ̆ đĕch, Kră Yang tơ’bôh kơ inh đêl lu tơdrong ‘noh wă tơ’blŏk kơ inh băt inh juăt “pơm pơsuh hăt hot” lăm kơplah jơ năr krao khan. Hlĭch tơpă kơplah Sư pơchrang tơ lăm anih hlơp gô tơplih lăm tơdrong arih lu bơ̆n. Tơdrong pơchrang ‘noh ưh kơ pơm kơ lu bơ̆n đei mơn sek tơdrong yoch dah mơlâu, thoi lăm Rôma 8:1 đei chih: “Thoi noh na dang ei, lu bơngai mă oei lăm Kră Yang Yêsu Krist gô ưh pă pơm yoch dơ̆ng ôh.” ‘Noh jing đei tơ’blŏk lăm jơhngơ̆m, ‘bĕnh kơ tơdrong ‘mêm đơ̆ng Yang Bơhngol ‘Lơ̆ng, wă kơ tơbral tơdrong yoch păng wơ̆ ‘lŏ hloh lăm Kră Yang.

Rŏlăng buăl kư̆m hlôi đei tơdrong noh thoi inh. Băt kơ kiơ, kơplah oei mơ̆ng ‘bai krao khan hơdai âu, buăl mơn băt ‘bôh tơdrong arih krao khan đơ̆ng kơdih rai pă gan đei. Inh apinh yơ̆r ti adrol hloh drơ̆ng iŏk tơdrong ‘noh. Kư̆m đei inh juăt kơ yua “ ‘bai đêl ” pơm hơlơ̆k hơle kơplah pơgơ̆p hăm Kră Yang. Yua kơ lui kơ Kră Yang đunh sơnăm ‘net ‘net rai rơdu. Truh kơ inh krao khan kơplah tơ’bơ̆p tơdrong kăl đĕch: kơplah đei bơngai jĭ jăn, kơplah gre răm, dah đei bơngai athei krao khan akŭm jơ kơsơ̆ năr tơpơh. Na kơplah lăm tơdrong arih lăm rim năr, jơ krao khan đơ̆ng inh rai hơlah hloh.

Rŏlăng đei lơ bơngai kiơ̆ Kră Yang kư̆m oei lăm tơdrong thoi noh mơ̆n. Mă-lei ‘noh sĭt tơpă ưh kơ tơdrong arih rơkah rơkai mă Sư wă ôh. Sư wă lu bơ̆n đei tơdrong arih rơkah rơkai, ‘bĕnh blai đơ̆ng lăm đak sơlŭng jrŭ, ưh kơ lăp adrin hăm đak klĭnh đê̆ hrĕng kro. Wă kơ đei thoi noh, lu bơ̆n kăl kơ jơ năr yak mơ̆t tơ anih hlơp oei hơdai hăm Kră Yang.

Lăm Sơ̆p hla bơar Mathiơ 6:5-6, Yang Yêsu đei bơtho thoi âu: “Dah iĕm wă krao khan, iĕm athei tang ‘măng kơdrô̆ tơ anih hrĕp. Iĕm krao khan thoi noh na iĕm tơchĕng truh tơ ‘Bă bơ̆n Yang mă bơ̆n ưh kơ gơh ‘bôh. Mă iĕm krao khan tơ anih hrĕp Sư kư̆m ‘bôh mơ̆n, Sư ăn tơdrong iĕm apinh noh tơpă.”

Lu bơ̆n juăt khan kơ anih krao khan noh jơ̆ krao khan hơdrô̆ păng pơgơ̆p hăm Kră Yang tơ “anih hlơp”. ‘Nâu sĭt jing anih mă Kră Yang Yêsu lu bơ̆n ling lang năm tơ noh (Luka 5:15-16). Kơplah đŏk sơ̆p hla bơar ‘Bok Kei-Dei, lu bơ̆n kư̆m ‘bôh rup lu bơngai drŏ kăn, bơngai drŏ nglo gơh hơgei đơ̆ng ‘Bok Kei-Dei, thoi kơ Abraham, Đawit, Đaniel, Êli, dah ‘bok Pôl: lu sư juăt kơ chă Kră Yang lăm anih hlơp ‘noh. Athei jet kơdih lăm jơhngơ̆m khan: Inh krao khan wă kơ lu bơngai nai ‘bôh păng ư-ang, dah inh wă tơpă đơ̆ng lăm jơhngơ̆m wă pơgơ̆p hăm Kră Yang? Sơ̆p hla bơar ‘Bok Kei-Dei bơtho rơđah tơpă, dah đon tơchĕng ưh kơ trŏ, na nơ̆r ư-ang đơ̆ng kon bơngai noh đĕch mă ưh kơ đei bơnê đơ̆ng ‘Bok Kei-Dei (Mathiơ 6:5). Mă-lei Kră Yang Yêsu oei krao lu bơ̆n yak mơ̆t lăm tơdrong pơgơ̆p jrŭ să hloh kơ noh dơ̆ng. Kư̆m nhen klo akăn ưh kơ đei layơ pơma dơnuh tơdrong hnam dơnŏ tơ anih lơ bơngai, Kră Yang kư̆m wă kơ lu bơ̆n yak mơ̆t lăm tơdrong pơgơ̆p hăm Sư thoi noh mơ̆n. Sư wă kơ lu bơ̆n pơih jơhngơ̆m đon hăm Sư păng hiôk chơt hăm tơdrong pơgơ̆p hăm minh ‘nu Sư đĕch.

Sĭt đơ̆ng tơdrong tơ’bơ̆p jrŭ să gô wei rong tơdrong pơgơ̆p hăm Kră Yang. Kơplah lu bơ̆n tang lê̆ tơnang ‘măng, lê̆ tơ gah minh pah lu tơdrong arih hrơ̆ng hreng wă oei minh drô̆ lăm Sư đĕch, lu bơ̆n gô hlôi đei tơdrong oei hơdai đơ̆ng Yang Bơhngol ‘Lơ̆ng jrŭ să hloh. Sĭt tơ anih hlơp ‘noh, Kră Yang pơklaih dôm lu jơhngơ̆m ơh sơ’ngon, pơm kơ jơhngơ̆m jing ‘nao, pơthim ăn pran hloh wă kơ lu bơ̆n yak năm lăm tơdrong Sư krao iŏk, păng pơgơ̆p ming ŭnh ‘mêm mơnat lăm jơhngơ̆m oei gleh lap păng rơdu.

Lu bơ̆n athei pơma tơpăt kơdih bơ̆n. Rŏlăng krao khan kơplah gô đei lu bơngai nai jum dăr? Hăm trŏ kơ hơdrol kơ sŏng sa, lăm jơ akŭm, dah lăm akŭm hnam dơnŏ? Dah trŏ thoi noh, rŏlăng Kră Yang oei chông ba buăl yak mơ̆t lăm tơdrong arih lăm tơdrong krao khan jrŭ să hloh. Sư oei krao buăl yak mơ̆t lăm tơdrong pơma dơnuh jrŭ hloh, minh tơdrong pơgơ̆p jrŭ să jê̆ Sư hloh lăm rim năr.

Apĭnh đĭ đăng krao khan hơdai: Kơkuh kơ ‘Bă mă ‘mêm mơnat, kon bơnê kơ Ih yua kơ kon đei lơ ‘măng huay pă rơdu lăm tơdrong pơgơ̆p hăm Ih, Ih ling-lang chang gô kon wih brŏk dơ̆ng. Apinh Ih pơgơ̆p ming ŭnh ‘mêm mơnat lăm jơhngơ̆m đon kon, wă kơ kon rơhing oei lăm Ih, păng đei pơma dơnuh hăm Ih ling-lang. Apinh Ih bơtho kon băt kơ ming lê̆ dôm lu tơdrong oei tơgar iŏk đon tơchĕng kon, wă yak mơ̆t tơ anih hlơp, mơ̆ng nơ̆r pơma rơngơp đơ̆ng Ih. Hơpơi kơ kon rơhing rim năr kon gô năm jê̆ Ih hloh păng hiôk chơt đơ̆ng lăm ‘Bă. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơeng, buăl ưh kơ băt wă gô pơtơm đơ̆ng blŭng a thoi yơ? Athei pơtơm đơ̆ng ‘bơ̆t dâu. Athei pơtơm đơ̆ng kơplah jơ ‘nâu. Lăp kăl kơ ‘măn jơ pơđăm phŭt, yak mơ̆t lăm anih hrĕp, tang tơnang ‘măng, păng tơ’bơ̆p Kră Yang kơ đĭ đăng kon bơngai. Sư oei chơ̆n jơhngơ̆m chang gô buăl. Păng inh lui ngeh khan, lăm kơplah buăl hlôi mơn băt tơdrong ‘lơ̆ng rŏ đơ̆ng glung đak ro ‘noh, buăl gô ưh pă pơdơh kơ wih wơ̆t tơ anih ‘noh. Yua kơ tơ ‘noh đei tu đak arih tam mă đei layơ hrĕng kro ôh.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.