Dah đei kơmăi phĭn rup mă gơh phĭn iŏk đon tơchĕng, nơ̆r pơma păng tơdrong arih dang ei đơ̆ng buăl lăm jơ âu, buăl đei hăm pơ̆n pơih lăng dôm rup ‘noh ưh? Lu bơ̆n juăt kơ bơwei hơmet tơdrong gah ‘nguaih, hơmet pơse lu rup wă kơ ‘lơ̆ng na tah tơ mang. Mă-lei, oei đei minh tơlĕi phim ling-lang thĕng hreh rôp iŏk tôm tơdrong tơpă hloh lăm bơhngol buăl. Kơplah pơih lăng sơ̆p hla bơar ‘Bok Kei-Dei, lu bơ̆n athei hơdai chă Kră Yang lăng ‘bôh tơdrong kiơ lăm tơdrong arih dang ei đơ̆ng rim ‘nu lu bơ̆n.

Năr ‘nâu, ‘năr 02/08/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Dan Betzer hăm kơ̆l ‘bai KƠMĂI PHĬN RUP ƯH KƠ ĐEI LAYƠ PƠMA HƠLĔNH

“Thoi noh boih na rim ‘nu bơ̆n athei tơchĕng lăng lăm akâu bơ̆n kơdih ‘mơ̆i wă kơ băt bơ̆n gơh huch sa đak păng ‘bĕng ‘noh dah ưh.” (I Kôrintô 11:28)

Giĕng adrol ki, Khŭl Akŭm lu nhôn đei pơgơ̆r minh tơdrong pơchơt vă pơjing pơpôi jên ăn kơ tơdrong răroi nơ̆r ‘Bok Kei-Dei. Tơ dêh âu, bơyan ‘nâu oei tŏ hlăng prăng ‘lơ̆ng thoi noh na pơjing tơdrong pơchơt tơ ‘nguaih hiôk tơpă. Mă tơpă, jơnăr nhôn pơdơh kơ pơjing tơdrong pơchơt noh yua kơ kial hơbŭt truh, huơ̆r tôm tơmam tơ anih cham.

Năr noh, đei minh ‘nu bơngai chă phĭn rup yak năm đơ̆ng khŭl âu truh tơ khŭl nai vă phĭn rôp iŏk dôm tơdrong ‘noh. Pơge ‘nâu, sư ăn kơ inh đei ‘bar pêng pŏk rup ‘nao ôp. Na pơma tơpă, inh lăng rup noh hiĕk kơtih nhơ̆m kơtih.

Lăng lu rup ‘noh, inh jet kơdih lăm jơhngơ̆m: “Ô, bu ‘nâu kih? Dơ̆ng kơnê̆ dêh?” Mă-lei hlich, kơplah lăng hơlen pơnhen dơ̆ng, inh ưh pă gơh hơngah dơ̆ng bơih: bơngai ưh kơ băt pơchơt hăm tơdrong chro ti kư̆ kă lăng ưh kơ ‘lơ̆ng ‘noh jơ̆… inh. kơiĕng nhen ‘bĕng mi, dơ̆ng rơwê rơwa, tơ’bôh tôm tơdrong lăng ưh kơ ‘lơ̆ng. Hăl dêh tơpă!

Lăm đon tơchĕng, inh ling-lang tơchĕng khan dơ̆ng kơdih kơplah pơchơt lăng rŏ dêh. Mă-lei đơ̆ng bơngai chă phĭn rup âu, ‘bôh tơpă tă kơ phara dêh: lăng kơdih inh ưh kơ phara kiơ bơngai sem brem rơwê rơwa tơ anih cham noh. Hăm ‘bôh ưh, lu bơ̆n ưh kơ gơh hơlĕnh kơmăi phĭn rup ôh.

Rŏlăng ‘noh kư̆m jơ̆ yua kơ kiơ lơ bơngai hli kơ pơih sơ̆p hla bơar ‘Bok Kei-Dei wă đŏk. Yua kơ sơ̆p hla bơar ‘Bok Kei-Dei jơ̆ kơmăi phĭn rup đơ̆ng ‘Bok Kei-Dei, pơdah pơchrang păng tơ’bôh rơđah tơpă tơdrong arih gah bơhngol lu bơ̆n ‘bơ̆t anăp Sư.

Kon bơngai ling-lang wă pơjing kơdih “anih hiôk kơjăp” lăm jơhngơ̆m đon tơchĕng. Tơ noh, lu bơ̆n pơjing kơdih rup gah bơhngol ‘lơ̆ng trŏ, rơgoh păng ‘lơ̆ng tôm. Lu bơ̆n ‘maih wă lăng kơdih dôm lu tơdrong ‘lơ̆ng hloh kơ tơdrong bơ̆n pơm tơpă. Mă-lei kơplah tơ’bơ̆p Nơ̆r Kră Yang, kơmăi phĭn gah bơhngol ‘noh tơ’bôh rơđah tơpă tôm tơdrong lu bơ̆n hơpơi wă đơ̆ng lăm jơhngơ̆m.

Mă khan đei dôm kơ anih ”lăng kơnê̆”, mă-lei kư̆m đei dôm anih phĭn lăng ‘lơ̆ng rŏ tơpă. Na pơma tuch luch, lu bơ̆n jơ̆ tơmam đơ̆ng tơpang ti Kră Yang pơjing. Mă-lei, tơdrong băt hlôh jrŭ să gah ‘Bok Kei-Dei gah tơdrong yoch kơnê̆ đơ̆ng kon bơngai jơ̆ minh tơdrong ưh kơ gơh weh wer ôh. Trŏ thoi bơngai khan lê̆ adrol Êsai đei chih: ”Đĭ-đăng lu bơ̆n thoi triu jrok trong” (Êsai 53:6) dah kơ nhen sứ đồ Phaolô hlôi pơma rơđah: ”Yua kơ đĭ-đăng kon bơngai weh ataih đơ̆ng ‘Bok Kei-Dei kiơ̆ tơdrong yoch ngăl” (Rôm 3:23).

Tơdrong pơm ưh kơ trŏ lăp dơ̆ng ‘bơ̆t gah ‘nguaih đĕch, ‘noh jơ̆ tơdrong arih lăm đon lui: lu bơ̆n ‘bônh weh ataih đơ̆ng Kră Yang đei hơmet bơih, nhen thoi inh chro ti kư̆ kă thoi noh.

Mă khan ưh kơ đei dan kơdih lăm tơdrong sek tơlang lu bơngai nai, lu bơ̆n kăl tơpă tơpăt lăng kơdih akâu lăm tơdrong pơchrang pơdah đơ̆ng Nơ̆r ‘Bok Kei-Dei.

Lăm tơdrong huch sa ‘blŏk hơdơ̆r kơ Kră Yang, sơ̆p hla bơar ‘Bok Kei-Dei đei nơ̆r tơbăt rơđah khan: “Thoi noh boih na rim ‘nu bơ̆n athei tơchĕng lăng lăm akâu bơ̆n kơdih ‘mơ̆i” (I Kôrintô 11:28). Tơdrong tơchĕng lăng lăm jơhngơ̆m bơ̆n kơdih âu ưh kơ sĭ wă ba lu bơ̆n mơn kơ tơdrong sek tơlang dah mơlâu yua kơ tơdrong yoch kơnê̆, mă ‘noh jing minh tơdrong bơwei gah bơhngol, pơrăm jơhngơ̆m pơ-ang, păng lăng tơ tơdrong mơnat huai iŏk đơ̆ng Kră Yang Yêsu.

Rup phĭn tơdrong arih ling-lang đơ̆ng buăl păng inh đei phĭn rôp iŏk lăm năr âu. Buăl hăm wă pơih jơhngơ̆m đon lăng tơ rup tơpă ‘noh, wă kơ tơdrong arih buăl đei tơplih jing ‘nao yua kơ đơ̆ng tơdrong mơnat Sư ưh?

Apĭnh đĭ đăng krao khan hơdai: Kơkuh kơ Kră Yang mă ‘mêm kơ kon, kon băt hlôh tôm kơ anih hlơp, tôm tơdrong rơdu păng dôm lu tơdrong ưh kơ trŏ ‘bơ̆t anăp Ih. Apinh Ih huay kơ jô̆ yo kơ kon yua kơ lơ ‘măng kon oei hrŭk ao ‘lơ̆ng rŏ wă pơklơ̆p lê̆ dôm tơdrong pơ-ang lăm jơhngơ̆m kon. Apinh Nơ̆r Ih rim năr thoi kơmăi phĭn gah bơhngol, pơchrang pơdah păng tơ’bôh rơđah tơpă tôm tơdrong kon tơchĕng kơnê̆ đơ̆ng kon, wă kơ kon băt tơjur jơhngơ̆m tơ ala jơ̆ng Ih. Apinh Ih dui ba kon lĕch đơ̆ng tơdrong mơlâu yua kơ tơdrong yoch kơnê̆, wă kơ kon đei ôp rơgoh hăm pham huai iŏk đơ̆ng Kră Yang. Apinh Ih ‘bơ̆ hơmet tơdrong arih kon, đơ̆ng đon tơchĕng, nơ̆r pơma truh tơdrong kon pơm, wă kơ rim năr hloh hlôi, rup phĭn tơdrong arih kon gô pơdah ‘lơ̆ng rŏ đơ̆ng Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơeng, wă kơ đei rup phĭn ‘lơ̆ng, kư̆m đei đe yua iŏk kơmăng wă pơm rơđah kơ anih hơdah noh. Tơdrong arih gah bơhngol đơ̆ng lu bơ̆n kư̆m thoi noh mơ̆n. Kơplah sơ̆p hla bơar ‘Bok Kei-Dei tơ’bôh rơđah tơpă dôm lu anih yoch kơnê̆ đơ̆ng kon bơngai, ‘noh jơ̆ kơplah rup phĭn ‘mêm mơnat đơ̆ng Kră Yang Yêsu pơdah ‘lơ̆ng rŏ hloh. ‘Nĕ kơ hli kơplah lăng ‘bôh rup kơdih “rơwê rơwa” lăm kơmăi phĭn gah bơhngol đơ̆ng Kră Yang, athei ling-lang tơchĕng lăng lăm akâu bơ̆n kơdih Nơ̆r Sư – ưh kơ sĭ lăm kơplah huch sa ‘blŏk hơdơ̆r kơ Kră Yang đĕch ôh, mă lăm rim năr, rim jơ. Yua kơ rup tơpă đơ̆ng lu bơ̆n ưh kơ rơđah thoi yơ, na đơ̆ng pham Sư, lu bơ̆n gô jing tơmam gĭt mă Kră Yang adrin hơmet keh ‘lơ̆ng rim năr.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.