Đei dôm tơdrong lu bơ̆n pơm lăng gah ‘nguaih ‘lơ̆ng rŏ tơpă, mă-lei đon tơchĕng lăm jơhngơ̆m ưh kơ rơgoh ‘lơ̆ng ôh. Nhen thoi, lu bơ̆n tơgŭm minh ‘nu bơngai, mă-lei lăm jơhngơ̆m oei wă kơ đe pơ-ư; lu bơ̆n jang tơgŭm đĭ jơhngơ̆m, mă-lei mơn kơ blĕk kơplah ưh kơ đei bu pơ-ư dah bơnê. Dôm tơdrong mơn thoi ‘noh tơbăt ăn kơ lu bơ̆n kăl kơ hơmet ming jơhngơ̆m đon lu bơ̆n. ‘Bok Kei-Dei jơ̆ Tơ’ngla lăng ‘bôh dôm lu tơdrong bơ̆n pơm păng Sư kư̆m lăng đon tơchĕng jrŭ hlơp lăm jơhngơ̆m đon lu bơ̆n.

Năr ‘nâu, ‘năr 04/08/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Gary E. Roberts kơ̆l ‘bai KƠPLAH KRĂ YANG LĂNG ‘BÔH LĂM JƠHNGƠ̆M.

“Mă-lei năr ‘noh kơnh Inh gô khan kơ lu sư thoi âu: ‘Inh ưh kơ băt kơ lu iĕm âu ôh. Weh tơ nai năm, iĕm bơngai kơnê̆ ngăl.” (Mathiơ 7:23)

Minh lăm dôm lu tơdrong lăng ‘lơ̆ng hloh pơma gah tơdrong pơjing ‘nao kơplah Yang Yêsu wih jur dơ̆ng đei chih roi lăm Êsai 65:25: ”Kŏ so păng triu kon gô sa hơdai, dăm brang gô sa hơnong thoi rơmo.” Tơdrong tơ’bôh âu pơdah ăn minh năr ayơ ‘noh, kơplah ‘Bok Krist wih jur dơ̆ng, dôm lu tơdrong yoch kơnê̆ tơ ala teh đak gô tŭk lê̆. Tơdrong ayăt dih băl păng tơdrong ơh sơ’ngon gô ưh pă đei bơih; đĭ-đăng tôm tơmam Kră Yang pơjing gô đei arih lăm tơdrong hiôk hian mă ‘Bok Kei-Dei đei pơkă bơih đơ̆ng blŭng a. Kơplah tơchĕng pơwao kơ nơ̆r lăm sơ̆p hla bơar ‘Bok Kei-Dei âu, inh tơchĕng truh kơ minh tơdrong jang nai mă ‘Bok Kei-Dei kư̆m oei bơ̆jang lăm hrei ‘nâu. Mă khan tơdrong huai iŏk ưh tam mă đei truh, mă-lei Kră Yang pơtơm tơm đơ̆ng blŭng a lăm tơdrong jang ‘noh lăm tơdrong arih lu bơngai lui kơ Sư.

Kơplah lui kơ Kră Yang, lu bơ̆n ưh tam mă đei jing ‘lơ̆ng tôm hloi ôh. ‘Bok Kei-Dei pơtrơp bơ̆jang dơ̆ng lăm tơdrong arih lu bơ̆n wă khan trong yak năm tơ tơdrong ‘lơ̆ng rơgoh. Sư tơplih jing ‘nao đon tơchĕng lu bơ̆n (Êphêsô 4:20-24), bơtho lu bơ̆n tŭk lê̆ kon bơngai so (Rôm 8:13) păng ‘bơ̆ hơmet ‘net ‘net wă kơ lu bơ̆n rai nhen thoi ‘Bok Krist hloh (Philíp 2:12-13). ‘Noh jơ̆ trong yak năm ding truh tơ ning mônh.

Lăm trong yak năm ‘noh, ‘Bok Kei-Dei tơplih jing ‘nao tơdrong pơm gah ‘nguaih, păng gah lăm jơhngơ̆m đon lu bơ̆n. Dôm tơdrong yoch kơnê̆ nhen thoi kơ pơ-ang, blĕk, klai gar, kơnam, dah ‘maih wă kiơ̆ kơ sĕch akar gô ưh pă đei chĕp bơwei lăm tơdrong arih đơ̆ng lu bơngai lui tơpă kơ Kră Yang bơih. Mă khan trong yak năm ‘nâu gô ơh sơ’ngon tơpă, mă-lei ‘noh jơ̆ minh tơdrong gô đei lăm tơdrong tơblah gah bơhngol. Tơdrong tơblah gah sĕch akar gô pơkeh lê̆ kơplah lu bơ̆n pơdơh lăm Kră Yang păng đei tơplih jing ‘nao nhen thoi rup Sư.

Inh kư̆m hlôi đei tơblah gah bơhngol lăm tơdrong arih kơdih, mă hloh loi tơdrong pơ-ang gah bơhngol. ‘Bok Paisios khan tơdrong pơ-ang jrŭ hlơp hloh ngăl đei đơ̆ng lu bơngai đei tơdrong arih gah bơhngol pran kơtang. Lăng gah ‘nguaih, ‘bôh sư tơjur jơhngơ̆m tơpă, mă-lei lăm jrŭ hlơp lăm jơhngơ̆m đon wă kơ đe pơ-ư. ‘Noh jơ̆ tơdrong “tơ’bôh”, anih mă tơdrong pơ-ang gô hrŭk ao tơdrong tơjur jơhngơ̆m ưh kơ tơpă.

Đei minh wơ̆t, inh mơn kơdih inh kư̆m đei tơdrong thoi noh. Kơplah krao khan păng apinh Yang Bơhngol ‘Lơ̆ng tơ’bôh đon tơchĕng jrŭ hlơp lăm jơhngơ̆m, inh ‘bôh hlĭch tơpă kơplah mơn băt kơ tơdrong jang inh pơm ưh kơ yua kơ ‘mêm kơ Kră Yang ôh, mă ‘noh lĕch đơ̆ng tơdrong wă kơ đe ‘mêm, wă kơ đe pơ-ư. Kơplah ưh pă đei đe pơ-ư thoi noh, inh ‘bônh kơ bơ̆l hăl, truh tơ blĕk.

Lăm kơplah noh, Kră Yang bơtho inh minh tơdrong. I Kôrintô 13 đei tơgŭm inh mơn băt: minh tơdrong jang mă lăng kiơ̆ kơ măt ‘lơ̆ng thoi yơ, mă dah ưh kơ lĕch đơ̆ng tơdrong ‘mêm ‘Bok Kei-Dei kư̆m ưh kơ đei yua kiơ ôh.

Kră Yang kư̆m đei pơma khan: “Năr tôch ning-mônh đei lơ bơngai pơma lung Inh thoi âu: ‘Ơ Kră Yang, nhôn yua anăn Ih pơtruh nơ̆r ‘Bok Kei-Dei, nhôn yua anăn Ih pơpuh yang kơnê̆ lĕch đơ̆ng akâu bơngai păng nhôn pơm lơ tơdrong mơsêh mơyang nai yua anăn Ih.’ Mă-lei năr ‘noh kơnh Inh gô khan kơ lu sư thoi âu: ‘Inh ưh kơ băt kơ lu iĕm âu ôh. Weh tơ nai năm, iĕm bơngai kơnê̆ ngăl.” (Mathiơ 7:22-23)

Minh tơdrong kăl ‘noh jơ̆, lu bơngai ‘nâu ưh kơ sĭ ưh kơ băt kơ Kră Yang ôh, mă-lei tơplơ̆ dơ̆ng lu sư jơ̆ bơngai đei tơdrong arih kơ nhăm dêh “tơdrong lui”. Lu sư gơh pơma khan lê̆ adrol, pơpuh yang kơnê̆, pơm lơ tơdrong hlĭch, păng “yua anăn Kră Yang” na pơm lơ tơdrong mơsêh. Mă-lei, Kră Yang khan “dôm lu bơngai pơm tơdrong kơnê̆” păng khan “Inh ưh kơ băt kơ lu iĕm âu ôh”.

Nơ̆r tơ’blŏk ăn kơ lu bơ̆n đơ̆ng Kră Yang Yêsu tơ’blŏk ăn kơ lu bơ̆n athei ling-lang tơchĕng lăng lăm jơhngơ̆m bơ̆n kơdih. Dôm tơdrong jang gah bơhngol, mă khan ‘bôh hơ iă thoi yơ, kư̆m ưh kơ gơh tơplih jơhngơ̆m ‘mêm păng chu yom Kră Yang ôh. Lu bơ̆n athei ling-lang apinh Yang Bơhngol ‘Lơ̆ng lăng ming đon tơchĕng jrŭ hlơp păng jơhngơ̆m lu bơ̆n kơplah jang kơ Sư. Kơplah Kră Yang tơ’bôh tơdrong pơ-ang dah tơdrong pơm ưh kơ ‘lơ̆ng trŏ ayơ, lu bơ̆n kăl kơ tơbral tơdrong yoch hăm Sư, apinh Sư pơklaih lu bơ̆n lĕch đơ̆ng tơdrong pơ-ang gah bơhngol păng ling-lang kơchăng kơ dôm lu tơdrong pơ-ang lăm jơhngơ̆m. Kơplah lu bơ̆n pơtrơp tơjur jơhngơ̆m chu yom kơ Kră Yang, tơdrong ‘mêm mơnat Sư gô đei tơ’bôh tôm lăm tơdrong rơdu lu bơ̆n (II Kôrintô 12:9). Sư gô ‘bơ̆ hơmet ‘net ‘net đon tơchĕng jrŭ hlơp đơ̆ng lu bơ̆n, wă kơ tôm tơdrong lu bơ̆n pơm lĕch đơ̆ng tơdrong ‘mêm kơ Sư.

Apĭnh đĭ đăng krao khan hơdai: Ơ Kră Yang, Ih băt kơ kon gô ‘bônh kơ pơ-ang păng lăp đon kiơ̆ kơdih lăm tơdrong arih gah đon lui. Yua kơ thoi noh, apinh Kră Yang tơgŭm kon ling-lang băt lăng ming jơhngơ̆m păng đon tơchĕng jrŭ hlơp đơ̆ng kơdih kon lăm rim tơdrong jang. Kon hơpơi kơ tôm tơdrong kon pơm đei đơ̆ng tơdrong ‘mêm kơ Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơeng, năr ‘nâu, athei ‘măn jơ năm tơ Kră Yang, apinh Sư lăng ming jơhngơ̆m đon buăl păng tơ’bôh đon tơchĕng jrŭ hlơp mă buăl ưh tam mă đei mơn băt. ‘Nĕ kơ lăp đon kiơ̆ kơ kơdih yua kơ dôm tơdrong jang buăl hlôi pơm ăn kơ Kră Yang, na athei tơchĕng pơwao lăng dôm lu tơdrong jang đơ̆ng buăl Kră Yang hăm lăp đon ưh? Kơplah Yang Bơhngol ‘Lơ̆ng tơ’bôh tơdrong yoch kơnê̆ ayơ, athei tơjur jơhngơ̆m tơbral tơdrong yoch kơ Sư. Athei ling-lang krao khan nhen thoi pơtao Đawit lăm Hơriso: 139:23-24 khan: “Ơ Kră Yang ‘Bok Kei-Dei, apinh Ih lăng lăng inh păng băt kơ jơhngơ̆m inh. Pơlong lăng inh bĕ păng băt kơ tơdrong tơchĕng inh; Apinh Ih lăng lăng inh hăm đei yoch kơnê̆ kiơ ưh? Apinh Ih chông anhăk inh lăm trong arih ling-lang. Anih jrŭ wă khan lăm tơpu kon.”

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.